1 Sạmuel 22 - Ạḍinya Iigbia

Mọzeeghi riil ạrikia phọ

¹ ADevid ạḍua ẹmha phọ ạGat asuma ạghi aḍigh epogh aḍighiigh dị etuman ẹmha dị oghol mọ Ạdulam. Mem dị abumor phọ ọdi rꞌạbueri phọ awe eghun phọ ọnaghan bọ mọ ọdi odi ẹpe bịdi ụḍua ni ọghi ọrolan nyọdi.

² Awe lọ rọgbiphoghom rꞌạbulo oleeghi ịimugh rꞌạbulo eḍighinom ạraraar ẹmha phọ ekia ụghi kẹn ni ọteeny nyọdi. Awe phọ ụghiom ni inya okuron kụ ọdi aḍighi oḍiemiom ạbidi.

³ Kụ aDevid ạḍua sịphe phọ ạghi asi Mizpa ẹpe Mọab, kụ ạḅeni ọdaam mọ ạMoab mọ, “Seseeny, meera ọde rꞌonhiin ạmi oru ọrolan ghan nyịna, tụtu mị ạwa alegheri ịpe Ẹnaan kiḍighinaan bọ ịmi.”

⁴ Kụ aDevid ạwile ọde rꞌonhiin phọ ọdi sịphe kꞌọdaam mọ ạMoab, kụ bịdi ọrol ghan sịphe phọ oomo asuḍughul-otu phọ ịpe aDevid ạaghian bọ ologhi epogh aḍighiigh phọ.

⁵ Kụ oyil Ẹnaan dị oghol mọ ạGad ạghi ạteeny Devid kụ ạḅeni mọ, “Kạ́tol mun ẹphen, nyeene agheel ẹpe ade phọ aJuda.” Kụ aDevid ạḍua ạghi ẹpe ẹekpua phọ ạHeret.

⁶ Eniin aḍio ạSol ạrol ẹpe Gibia, ạrol ude zin oniin oreeny dị asi ạnyu ẹeḅaraph, kụ ọdi ạpham ni ọsoph phọ ọdi ḍịghaagh, kụ oomo ạbuo ịtooghi phọ ọdi ọmeregha okoom nyọdi, kụ ọḅeni nyọdi mọ mọmiin Devid rꞌawe phọ ọdi.

⁷ Kụ ạSol ạḅeni bụo ịtooghi phọ ọdi mọ, “Ịnaghan, nyina awe kꞌạBenjamin. Nyina regbiom ghan mọ aDevid kạsighe iizo ariiḍien rꞌavain kụ ạngooghi oomo phọ anyina ḍụghum kụ ạsighe oomo anyina aḍighi bụo ịtooghi awe ẹgham mọ ọdi ḍụghum?

⁸ Ẹpe kụ ịyaar phọ nyina meḅian bọ oghiigh ạmi? Rꞌoniin ọnyo anyina ịmi ụ́ḅeni mọ ọkaraghi ọony phọ ạmi mạghi ạmoogh mụḅoph rꞌaDevid. Rꞌoniin oye ịmi ụ́utughian mun, ịmi kẹn ụ́ḅeni mọ aDevid oniin oye ạmi mạnya nyịidipho rạwa ghan ọgel oghiigh ạmi, kụ ọkaraghi ọony phọ ạmi rạḅeni ghan nyọdi mọ kpạrami ḍịghaagh.”

⁹ ADoeg ạmeera ni sịphe phọ rꞌạbuo ịtooghi phọ ạSol, kụ ọdi ạḅem mọ, “Mị ụmiin ni Devid mem dị ọdi ạghi ạteeny Ạhimelek ọony phọ Ahitub ẹpe Nọb.

¹⁰ Kụ Ạhimelek apuru Ọmoogh-we phọ ịlo kẹnighe esi aDevid oḍighi, kụ ạngo nyọdi rạraar olhe, kụ ạsighe elhool ẹgham mọ ạGolayat ọlo aFilistia phọ ạngo nyọdi.”

¹¹ Kụ iḍighi kụ ọdaam mọ arom ọghi ọmagh Ạhimelek oyil ạrikia phọ rꞌoomo abumor phọ ọdi dị oḍighi aani riil ạrikia phọ ẹpe Nọb; kụ bịdi oru ọteeny nyọdi.

¹² Kụ ạSol ạḅeni mọ, “Nạghan, Ạhimelek.” Kụ ọdi ạphagharanaan mọ, “Mị odi ni rakumu nyịna, oye phọ.”

¹³ Kụ ạSol apuru nyọdi mọ, “Eeghe kụ iḍighi kụ nạ rꞌaDevid moḅian bọ oghiigh ạmi? Eeghe kụ iḍighi kụ nạ ạngo bọ nyọdi ạbred rꞌelhool ẹgham mọ, kụ ạḅile ạghi idike esi Ẹnaan loor ẹmhu ọdi? Nyịidipho phọ ọdi mạnya rạwa ghan eepoogh oghiigh ạmi?”

¹⁴ Kụ Ạhimelek ạphagharanaan mọ, “ADevid kụ ạkar aseere ologhi oḍighi esi oomo ạbuo ịtooghi phọ ạna. Ọdi ọyogo ạna. Sịphe aḍita awe phọ rokori ghan bọ nyịna, ọdi kụ uwo ẹmhu kụ oomo awe phọ odi bọ sịen otu phọ ạna ọlogh ni nyọdi eegu.

¹⁵ Ii, mị ụghi ni ḍipuru esi Ẹnaan loor ẹmhu phọ ọdi kụ ẹphen kụ kẹ́ḅel amem. Esi ẹlo ọḅem mọ mị abian rꞌọdi oghiigh ạna, ọdaam mọ ịmi rꞌeghunotu phọ ạmi kụ́loghom aani rꞌamem. Mị úlegheri aani rꞌẹnum ịphen phọ.”

¹⁶ Kụ ọdaam mọ ạḅem mọ, “Ạhimelek, nạ rꞌoomo asiya phọ ạna komuughu ni.”

¹⁷ Kụ ọdi ạḅeni we ẹgham mọ ọmeera bọ otuman nyọdi mọ, “Ịze riil ạrikia Ọmoogh-we phọ. Bịdi moḅian rꞌaDevid bịn ịmi ụ́ḅeni mọ ọdi masuma ghạlamo ịduon bịdi molhegheri bọ ni.” Kụ ọlo awe ẹgham mọ úmeera. Bịdi ụ́sighe rạghaagh ạbidi ụḅoghom bụpinyon rịkia Ọmoogh-we phọ.

¹⁸ Kụ ọdaam mọ ạḅeni Doeg mọ, “Nạ zẹ bịdi.” Kụ aDoeg ạze oomo phọ ạbidi. Ḍio phọ ạḍiphe ọdi ạze bọ ọphaanyadi rꞌoogh ariil ạrikia dị mọmanam ọpham oopa phọ Ẹnaan.

¹⁹ ẠSol ạto kẹn ni ạḅem mọ ọze oomo ạbunon awe dị orugh ẹpe Nọb, ẹmha ariil ạrikia phọ, lephiri rꞌạnmariir, ịbam ạnmuny rꞌạnmuny asipugh, sịnam rꞌịnam adool rꞌiyool-ịga. Bịdi ụze ni ọmadan.

²⁰ Kụ Ạbayata, oniin ọony Ạhimelek, asuma ni ạghi aḍighan Devid.

²¹ Ọdi ạghaaph ạḅeni Devid ịpe ạSol mạze bọ riil ạrikia kꞌỌmoogh-we phọ.

²² Kụ aDevid ạḅeni nyọdi mọ, “Mem mọ mị ạmiin bọ Doeg sịphe ḍio phọ ạḍiphe phọ, mị ulegheri ni mọ ọdi kạgba ni ạḅeni Sọl. Pọ ịduon phọ mị kụ uḍighi ịyaar phọ mọze bọ oomo asiya phọ ạna.

²³ Tọl sịen rꞌạmi. Kákiilaan. ẠSol rạwa ni oghiigh ạna rꞌạmi, kụ ọlo nạ ạrol rꞌạmi, ịyaar nyịna kéḍighi.”