1 Sạmuel 2 - Ạḍinya Iigbia

Ịiḅereghi phọ aHana

¹ AHana ạaḅereghi kụ ạḅem: “Ọmoogh-we phọ mạsighe iboh amuzeḍi ologhi ạmi; pọ eeghe ịdi ologhi ạmi ạḅaal loor esi ịphen ọdi uḍighi bọ ịmi! Mị ạmilogh ni ẹpomoghian phọ ạmi; pọ eeghia ọdo iboh dị mị ạmoogh loor esi dị Ẹnaan mịlhoghonaan ịmi ḍịghaagh!

² “Oye ólho dị kọtomaam Ọmoogh-we phọ esi ạdol iigbia; oye dị kọtomaam nyọdi ólho, oye dị raako ghan weye ịdipho Ẹnaan phọ ayira ólho.

³ Ịbile ọghaaph ophoophe aloor phọ anyina; ịbile ọghaaph iituma phọ anyina loor esi dị Ọmoogh-we phọ kụ Ẹnaan dị elegheri oomo awe, kụ ẹdi kụ raagbo ịiruen kạngo oomo ịlo iiḍighi awe mụghumo ẹnighe ni mꞌị́nighe.

⁴ Ạsikumugh arephelegbe ẹgham mọ mewunughian, kụ awe dị ịikpo ílho kụ moten rụukpara.

⁵ Awe dị olhe ghan ẹpher mem dị meten, nyịidipho ạbunon awe kụ ropir ghan bịdi kọghimom rukumuan kụ ogbi ọngaani eḍien, kụ ọlo ạbuphe ọrol ghan bọ ọkoony phọ úlho mun ọkoony. Ẹ́mar ạnir phọ mạmar oḍual ạnmuny, kụ onhiin ịbadi ạnmuny phọ rꞌoniin ọ́moogh mun.

⁶ Ọmoogh-we phọ kụ rakiigh ghan kạḅile ạngo ghuḍum; ọdi kụ rạsighe ghan we kạghi ọmar iḍim kụ ạḅile ạsighe bịdi aḅulemi ọmar awe.

⁷ Ọdi kụ aḍighi kụ abuniin awe oḍighi rukulom, buniin ạbudaam; ọdi asooromi buniin kụ aphophe buniin.

⁸ Ọdi kụ rapoophe ghan bọ uwekulom sịphe ophugh phọ kụ ạḅile apoophe nyọdi esi ạdol ịkunu phọ. Ọdi kaḍighi bịdi we dị kotelhian ghan rꞌạnmuny ạbudaam kụ ạḅile asereghi bịdi riisi arughuenian. Oomo phọ ade phọ Ọmoogh-we phọ kụ ạmoogh; ạnyu ade phọ kụ ẹdi ọdi aphighi bọ aḅirini phọ.

⁹ “Ọdi kụ raako ghan sighuḍum awe phọ omeeraam bọ nyọdi kụ ọlo ạbukaraph awe phọ kope ni esi ufiri; oye rạ́moogh ghan ọkpar opu rꞌịikpo ọdi bịn.

¹⁰ Oomo ẹpomoghian Ọmoogh-we phọ koogulaan ni; ọdi kạsighe ọomaany ẹpe kꞌạke kụ asoorom bịdi. Ọmoogh-we phọ kụ kasoph ọoruen ạngo oomo aḅirini phọ; ọdi kụ kạngo ịikpo ọdaam mọ, ọdi kụ kaḍighi ịdi ọdaam mọ ọpo ọdi mạsaḅar bọ kazin ḍịghaagh iphelegbe.”

¹¹ Ẹpe kụ esi dị Elkana aten agheel ẹpe kꞌọdi ẹpe Rama, kụ ọlo ạSamuel ạrol ẹpe Sailo kụ akumu ghan Ọmoogh-we phọ eeḍian Ilai oyil ạrikia phọ.

Alephiri ạnmuny phọ Ilai

¹² Ạnmuny phọ Ilai uḍighi bụkaraph awe; Bịdi úpogh Ọmoogh-we phọ ọ́maghami ịyaar,

¹³ ḅịle kẹn bịdi ụ́daph iilogh phọ esi ạraraar phọ ịpe ariil ạrikia phọ rọboor ghan bọ we phọ. Kpạripe ghụn, mem lọ oye ạghi ọphighironom ẹkia, otelhedom oyil ạrikia phọ kạpam ọsisi dị ạmoogh ịraar ịkpangi kụ atumom kụ sịphe phọ ịnam mọ edi bọ ni repul,

¹⁴ ọdi kagim ọsisi phọ asumeeny ologhi aguugh phọ rapul bọ kụ oomo ịnam lọ ọsisi phọ ạsugh aphune, pọ ịpe phọ ịlo oyil ạrikia phọ. Oomo awe Ịzirel dị ọghi ghan Sailo ọphinyonaan ạrikia bịdi uḍighi ghan ịduon phọ.

¹⁵ Ịdi etum sịphe, tụtu kọsighe ẹnuum mọ ọkpooniom bọ nịan phọ, otelhedom oyil ạrikia phọ katu ni ạḅeni oye phọ ọpo rạpighironaan bọ ẹkia phọ mọ, “Ụngo ịmi ẹnam lọ oyil ạrikia phọ kạpoghi; ọdi kạ́sighe ẹlo mọsa emuton emoom.”

¹⁶ Eru mạar dị oye phọ ạphagharanaan mọ, “Bịle ọtuugh ịlo ẹkpe oḍighi kụ oḍighi: ọphur ọsighe ẹnuum mọ ọlogh nịan kụ agbi ọsighe ịlo ẹḅeeraan nyịna,” otelhedom oyil ạrikia phọ kạḅem mọ, “Eeye. Ụngo ịmi nyịidipho. Eḍighi ịyaar dị nạ úmeera, pọ mị kạsighe ḍịikpara ạḍighaagh kụ ạsighenom.”

¹⁷ Ịkaraph phọ ịphen ạnmuny phọ Ilai oḍighi ghan bọ, eeph ni iboom ghisigh Ọmoogh-we phọ, loor esi dị bịdi ụ́manami ịyaar rịkia dị rọngo Ọmoogh-we phọ.

ẠSamuel odi Sailo

¹⁸ Esi oomo phọ ịphen phọ, ạSamuel ạrol ghan ni akumu ghan Ọmoogh-we phọ, ạkpologhian ghan ạsuoma iigbia kꞌẸnaan phọ.

¹⁹ Tọrotoro ạlha onhiin phọ ọdi ạkol ghan ni ạsuoma iigbia phọ ạghiomonaan nyọdi mem lọ ọdi ạdaph olhom mọ ọdi ạghi ọphighiron ẹkia ẹlo ạlha phọ.

²⁰ Kụ Ilai ạseph Elkana rꞌạnir phọ ọdi kụ ọdi ạḅeni Elkana mọ, “Ọmoogh-we phọ aḍighi ni ịdi ạnir phọ ọphon kạmaraghinaan nyịna bụnon ạnmuny dị kọsighe esi ọphon nạ mạngo bọ nyọdi.” Ịphen phọ reten kụ bịdi ogbi nụun ogheel ẹpe kꞌạbidi.

²¹ Ọmoogh-we phọ ạkaraghi ni ạseph Hana kụ ọdi ạḅile ạmar bụnon ịraar alephiri ạnmuny rꞌịyal ạnmanyaan; kụ ạSamuel aphoph ni esi arukumuan Ọmoogh-we phọ.

Ilai rꞌalephiri ạnmuny ọdi

²² Ilai mạkpo iboom, kụ ọdi ạnaghan ghan ni oomo phọ ịpe ạnmuny phọ ọdi roḍighi bọ we phọ Ịzirel, ḅịle kẹn mọ bịdi rọki ghan kọrolan esi rꞌạnmariir phọ ạbuphe roḍighi ghan bọ oḍighi phọ sịphe ọnhu-aḍibuo ogbogo aruupuruan phọ Ẹnaan.

²³ Kụ Ilai ạḅeni bịdi mọ, “Eeghe kụ nyina reḍighi yogh bọ rạraar phọ ịphen? Tọrotoro oye rạkaaph ghan ni kụḅeni ịmi ịlo ịkaraph phọ nyina reḍighi yogh bọ.

²⁴ Ịbileghi ịphen phọ, nmụny ạmi. Ịphen phọ awe Ọmoogh-we phọ rọkaaph ghan bọ ịlo anyina eḍighi ni ugbini ugbini.

²⁵ Eru mạar dị oye ạpioman esi ọnon oye, pọ Ẹnaan ketue ni ẹpel nyọdi; kụ ọlo ạnhian kụ katue ạpel oye dị mạpiom ghisigh Ọmoogh-we phọ?” Kụ ọlo bịdi ụ́naghanan ẹḍogh ọde phọ ạbidi, loor esi dị Ọmoogh-we phọ magbiighi amuneni ọze ạbidi.

²⁶ ẠSamuel aphoph ni rạkiom, ọdi kẹn ạḅeeraan ni Ọmoogh-we phọ ḅịle kẹn rꞌawe.

Ịmiin phọ ọmiinanaan bọ ọto phọ Ilai

²⁷ Oniin oye kꞌẸnaan ạghi ni ạteeny Ilai kụ ạḅeni mọ, “Ọmoogh-we phọ ạḅem ịduon mọ, ‘Mem mọ ọpo Eeron ogbogh ọde phọ ạna rꞌeghunotu phọ ọdi ọrol bọ dọl ạrebene ẹpe Ijipt, mị ugananami ni loor ạmi aḍeenaan Eeron.

²⁸ “‘Sịphe oomo arughunughun phọ Ịzirel mị ụsaḅar eghunotu phọ ọdi mọ oḍighi bụpinyon rịkia phọ ạmi, ọmeera ghan sịphe enmeny phọ, ọsuughi ghan ịnsens, ọḅile ọkpologhian ghan ạsuoma iigbia phọ kụ orumom ghan esi ạmi ḍipuru. Ḅịle kẹn mị ụto ni ạḅeni bịdi mọ tọrotoro ẹkia lọ ụphighoronaan ịmi sịphe enmeny phọ, bịdi ọsighe aani ghan bịn.

²⁹ Uḍighi bọ ika kụ nyina ẹmoogh ekpooko ọsighiogh oomo ạrikia phọ mị ạḅeni bọ we phọ ạmi mọ uruom ghan ịmi? Ilai, eeghe kụ iḍighi kụ nạ ạlogh bọ eegu nmụny phọ ạna upu ịmi kụ nạ ameera bọ mọ bịdi ọnuum ghan oomo igey ariisi ịnam mọ awe phọ ạmi ọphinyonom bọ rịkia mọ ụngo ịmi phọ?

³⁰ Mị Ọmoogh-we Ẹnaan phọ Ịzirel uguanaan ni mem dị meten mọ eghunotu phọ ạna rꞌẹkpigh otu phọ ạna kụ koḍighi ghan bụpinyon rịkia kꞌagee-pọ, kụ ọlo nyịidipho mị káḍighi mun ịdipho! Kpạripe ghụn, mị kakueni weye lọ ughueni ịmi kụ mị kạgilaam weye lọ ụgilaam ịmi.

³¹ Nạghan, amem retu ni dị mị kạze oomo ugheel ạnmuny sịen eghunotu phọ rꞌopolo phọ ạna tụtu esi esi dị olephiri ọony kạ́tol sịen kꞌanyina ạkpo.

³² Kẹeḅaghami ghan ni nyịna ẹḅile ẹngo nyịna ẹḍim ologhi ọmiin oomo ạḍiseph dị mị kạseph bụeri phọ awe phọ Ịzirel, kụ ọlo sịen kꞌanyina oye kạ́tol mun dị kạtol mun ạkpo.

³³ Kụ ghạlamo ịduon phọ ni, mị kaseere ni oniin oye sịphe oḍigh awe phọ ạna, dị kámugh aani, kụ ọdi kaḍighi oyil ạrikia dị kukumu ghan ịmi. Kụ ọlo oye phọ ọphon phọ kaḍighi oye ikpom ariḍien dị kạ́moogh oḍuom ologhi, kụ oomo ạbueri phọ awe phọ ạna komugh ghan ḍuugh egbo.

³⁴ Mem dị ịyal phọ ạnmuny phọ ạna, Hofini rꞌạFinehas komugh bọ ḍiniin aḍio phọ, kụ nạ agbi olegheri mọ oomo phọ ịphen mị mạghaaph bọ kemite ni.

³⁵ Mị kạsaḅar ri oyil ạrikia dị ịmi kúbi, kaḍighi ghan oomo ịlo mị rạwa. Mị kạngo ni nyọdi nmụny dị kọtol ghan okumu egbodo ọdaam lọ mị ạsaḅar.

³⁶ Kụ tọrobo oye kꞌạna dị akpetenaan ḍuugh phọ, ọdi kạki ghan ḍịghaagh oyil ạrikia phọ ọphon phọ kụ ạlom aani ikpoki rꞌeḍien, kụ ọdi ạaḅereghian ghan mọ omeera mọ ọno ạloghonaan ḍịghaagh bụpinyon rịkia phọ, ọbo ọngaani nyọdi ịyaar ole.’”