1 Sạmuel 17 - Ạḍinya Iigbia

ẠGolayat ạpa weye Ịzirel

¹ Awe aFilistia phọ uukpomoghan ni ọnya ẹgham sịphe Soko, eniin ẹmha aJuda; bịdi ọghi odoghoḍi rugbogo ẹgham esi dị oghol mọ Efes Damim, sịphe igbo aSoko rꞌAzeka.

² ẠSol rꞌawe Ịzirel uukpomoghan ni kụ odoghoḍi rugbogo ịlo ạbidi ẹpe eḍiiny phọ Ela. Ịpa kụ esi dị bịdi ookolobian eeghian rꞌawe phọ aFilistia.

³ Aweye aFilistia ọkoolan ạnyu eniin eegbolom kụ Ịzirel ọkoolan ẹnon eegbolom, kụ eḍiiny phọ ẹrol igbo ạbidi.

⁴ Oniin oye dị oghol mọ ạGolayat ọlo ẹmha dị oghol mọ ạGat ạḍua ni ẹpe arugbogo ạbuo aFilistia phọ amite kụ ạpa weye phọ Ịzirel. Aḍiphoph ọdi ẹkiom ni ịraar akuḅu,

⁵ kụ ạkpologhian ibura ẹgham dị oḍighinom enaba kụ ẹemor phọ ẹkiom ni ooghdi rꞌoḍual igbogh ịtoom, ạḅile azua eghoony dị oḍighinom enaba.

⁶ Enaba phọ kẹn kụ ẹdi ọdi ạlhogha ruwol phọ ọdi, kụ ọdi ạgban ọsoph dị oḍighinom kẹn enaba.

⁷ Kụ ọsoph phọ ọdi ạman ni ḍigbe otu kụ ẹmhu ọsoph phọ oḍighinom okuron dị ẹemor phọ ẹman oḍual igbogh ịtoom ẹemor. Oye ẹgham dị raḍiemiom ghan kụ ạpham ghan ọsuaram ọdi.

⁸ ẠGolayat ạmeera kụ ạlho ạmagh weye phọ Ịzirel mọ, “Nyina reḍighi ghan eeghe ẹpe phọ? Iḅerenu ẹgham mọ mẹteeny. Mị kụ ophelegbe esi awe phọ aFilistia, kụ ọlo nyina ạrebene ạSol! Ịsaḅar oniin oye sịphe ogbo phọ anyina emitiom ọdi rꞌạmi kobeeghi.

⁹ Ọdi ạkpar ughiigh ịmi, pọ yoor koḍighi rẹbene anyina, kụ ọlo eḍighi ịyaar dị mị kụ ạkpar aghiigh nyọdi, pọ nyina keḍighi rẹbene ayoor.

¹⁰ Mị mạpa ịnugh weye ẹgham Ịzirel rodon. Oye lọ ạman amite ẹphen eeghian rꞌạmi!”

¹¹ Mem dị ạSol rꞌawe phọ ọdi ọnaghan bọ ịphen phọ, aruugu asiph ni bịdi.

ADevid odi ogbogo ẹgham mọ ạSol

¹² ADevid ọony oye ọlo Ẹfrat phọ ẹpe Bẹtilihem eelhe phọ aJuda. Ḍien ọdi ughol mọ ạJesi. Oye phọ ọphon ạmoogh bọ ọphaanya ạnmuny, kụ mem mọ ọpo ạSol aḍighi bọ ọdaam eelhe phọ, ạJesi maḍighi ni okumoor oye.

¹³ Ịraar abukumoor ạnmuny phọ ạJesi mọdaph Sọl ọki aani ẹgham mọ. Ọkar okumoor phọ ughol mọ Eliab, ọpo atum bọ oghol mọ Ạbinadab, kụ omuneniom ịraar phọ oghol mọ aSama.

¹⁴ ADevid kụ ọdi osophom ḍịmar, kụ ịraar phọ abukumoor phọ odi ẹpe rꞌạSol.

¹⁵ ADevid ạto ghan mem ạghi ẹpe Bẹtilihem ophogh iyool-ịga ọde phọ ạbidi.

¹⁶ ẠGolayat ạpa ghan ni weye phọ Ịzirel tọrotoro ạḍiroor rꞌadulhe tụtu ẹman inyadi aḍughul-otu.

¹⁷ Eniin aḍio kụ ạJesi ạḅeni Devid mọ, “Sịghe ḍioph igbogh ịtoom ẹemor ịgbaghaḍineen ịbiakpa phọ ịphen, rꞌiḍioph iiḅoghoḍi ạbred phọ ịphen, aagborion ạghiom bumor phọ ạna ẹpe arugbogo ẹgham mọ.

¹⁸ Ạsighe ḍioph iiḅoghoḍi onhiir ạmamaam ạnam ạpham ạghiom uwo ẹmhu phọ ạbidi. Mạar ạwa alegheri ịlo abumor phọ ạna odi; kụ nạ ratigheel, pạm ịyaar dị keḍeenaan mọ nạ ụkaraghi ni ạmiin bịdi ḅịle kẹn mọ bịdi omoon ni.

¹⁹ ẠSol ọdaam mọ rꞌabumor phọ ạna rꞌoomo awe phọ Ịzirel odi ẹpe eḍiiny phọ Ela robe ghan ẹgham rꞌawe aFilistia.”

²⁰ ADevid aḅon aḅetenu ḍịeri phọ ạḍiroor phọ, ạwilenaan iyool-ịga phọ ọnon oye, kụ ạsighe eḍien phọ ạghi ịdipho ạJesi mạḅeni bọ nyọdi. Ọdi ạghi asi ẹpe arugbogo phọ mem dị awe phọ Ịzirel moḅetenu rọki ẹpe erugh ẹgham mọ kụ rọmoor ghan sụor ẹgham.

²¹ Aweye ẹgham aFilistia rꞌaweye ẹgham Ịzirel ọmeregha riisi ạbidi oosomonaan ịlo eeghi ẹgham mọ.

²² ADevid ạsighe eḍien phọ ọdi ạpham bọ aseenaan opoghom ariiḍien phọ; kụ aghiil ạghi aani ẹpe erugh ẹgham mọ, ạghi ạteeny bumor phọ ọdi kụ apuru ịlo ạraraar phọ edi.

²³ Ọdi odi rạkaaphan bịdi bịn ạGolayat ophelegbe awe ẹgham aFilistia phọ aru kẹn ạpa weye phọ Ịzirel ịdipho ọdi raḍighi ghan bọ. Kụ aDevid ạnaghan ni ịpa phọ ọdi.

²⁴ Mem dị aweye phọ Ịzirel ọmiin bọ Gọlayat bịdi usumughu rꞌoghiilaan.

²⁵ Kụ oniin ạḅeni ghan nyoniin mọ, “Ipogh nyọdi! Ịnaghan ịpa phọ ọdi! ẠSol ọdaam mọ maguanaan ọngo iboom aruunmo tọrotoro oye lọ aghiigh oye phọ ọphon; ọdaam mọ aguanaan kẹn ọngo ọnyani phọ ọdi pinien, kụ ọto kꞌạbidi kósogh ghan mun isogh ẹmha.”

²⁶ ADevid apuru ni we phọ ạbuphe otuman bọ nyọdi mọ, “Kọngo eeghia oye lọ aghiigh oye ọlo aFilistia phọ ọphon phọ kụ aḍighi ịdi Ịzirel okpetenaan ituunyan phọ ịphen? Ạnhian ọnyo ịdeni ọlo aFilistia phọ ọphon phọ kụ atu bọ raafolomi weye ẹgham kꞌẸnaan phọ rémugh ghan bọ?”

²⁷ Kụ bịdi ọḅeni nyọdi ịpe koḍighi bọ oye lọ aghiigh Gọlayat.

²⁸ Eliab okumoor umor aDevid ạnaghan ni ịdi aDevid rạḅaanaan ghan bọ weye phọ. Ọdi ạghagham ni ologhi Devid kụ ọdi ạḅem mọ, “Nạ raḍighi ghan eeghe ẹphen phọ? Ạnhian kụ rapogh bọ iyool-ịga phọ ạna ẹpe ẹdala phọ? Nạ ọbumoony oḅom ẹmhu. Nạ uru ọmiin aani ẹgham mọ.”

²⁹ Kụ aDevid apuru nyọdi mọ, “Mịna uḍighi eeghe nyịna eeghe? Mịna kápuru aani mun oye ịyaar?”

³⁰ Kụ ọdi aaghiraan kụ apuru ọnon oye ḍiniin aḍipuru phọ, kụ tọro amem lọ ọdi apuru, ụngo ghan nyọdi oniin phọ ọphagharanaan phọ.

³¹ Buniin awe ụnaghan ni ịpe aDevid ạḅem bọ, kụ bịdi ọghi ọghaaph ọḅeni Sọl. Kụ ạSol arom mọ ọmagh nyọdi.

³² Kụ aDevid ạḅeni Sọl mọ, “Nạ ogbogh ọdaam, oye kúkiilaan ọlo aFilistia phọ ọphon phọ! Mị kạki ni abianan nyọdi.”

³³ Kụ ạSol ạḅeni Devid mọ, “Eeye. Nạ katue ni ạmerenyan nyọdi ẹgham? Ẹphurukpu phọ ạna. Nạ kẹn kọ̋tuugha ịlo ẹgham.”

³⁴ Kụ aDevid ạḅeni Sọl mọ, “Nạ ogbogh ọdaam. Mị uphogh ghan ni iyool-ịga ọde ạmi. Tọro amem lọ ẹbeeny mꞌạnam-dịka eru ẹsighe ọony oyool-ọga,

³⁵ mị uphorogh ghan ni asiph ẹnam mọ ạar ọony oyool-ọga phọ. Kụ eḍighi ịyaar dị ẹnam mọ ekiton eru ozuom ạmi, mị ụpham ghan ni ọleem mọ ọdi ạgurogh nyọdi aghiigh.

³⁶ Mị mạze ni ạnam-dịka rꞌạrebeny, kụ mị kạtuugh ni ịduon phọ aḍighi ọnyo aruru ọlo aFilistia phọ ọphon phọ maafolomi bọ we ẹgham Ẹnaan phọ ẹpe rémugh ghan bọ.

³⁷ Ọmoogh-we phọ mụphel ghan ịmi ạsighe ḍịghaagh ạnam-dịka rꞌạrebeny phọ. Ọdi kạḅile ni ụphel ịmi ạsighe ḍịghaagh ọlo aFilistia phọ.” Kụ ạSol ạḅeni Devid mọ, “Ẹnighe ni-a, kịa, Ọmoogh-we phọ ạrol rꞌạna.”

³⁸ Kụ ọdi ạsighe ịinya ẹgham ọdi, ạkpologhi Devid; eghoony dị oḍighinom enaba kụ ẹdi ọdi azu ẹmhu aDevid, kụ ạkpologhi nyọdi ạsuoma ẹgham mọ.

³⁹ Kụ aDevid ạsighe elhool ẹgham mọ ạSol ạzola kụ ạghi orelhiom ọḍua ọdi órue loor esi dị ọdi kọ̋kpologhian ghan ịpe phọ kꞌekulha. Kụ ọdi ạḅeni Sọl mọ, “Mị kátue ạkpologhian ịphen phọ abiom ẹgham mọ. Mị kọ̋kpologhian ghan.” Kụ ọdi ạkporonaan.

⁴⁰ ADevid ạsighe oreeny abupoghom iyool-ịga phọ rꞌoogh ịbam ịpeḅere ạrana sịphe okol ạmuum mọ kụ ạlogh ologhi okuru ọdi. Kụ ọdi ạsighe kạtapot phọ ọdi; kụ anyeene ọghi ọteeny ạGolayat.

ADevid ạkpar apu Gọlayat

⁴¹ Oye ọlo aFilistia phọ arelhe rạki ọteeny aDevid; ọpamam ọsuaram aḍiemiom nyọdi. Ọdi atelhe rạkpul,

⁴² kụ ọdi rọkar rọmiin Devid kụ ọdi amiigh rịgilaam loor esi dị ọdi aphogh bọ, ọony phọ ịma ọser-sẹr ọony.

⁴³ Kụ ọdi ạḅeni Devid mọ, “Ẹḅam mọ ẹpe nạ ạpham bọ ẹlo oḍighinom eeghe? Nạ ragbiom ghan mọ mịna aghoogh ḍụghum?” Kụ ọdi amiigh ọsighe aḍien eru ẹmha phọ ạbidi ogurughiom aDevid.

⁴⁴ Kụ ọdi ạmagh Devid mọ, “Tue ẹphen, mị kạphanyi nyịna kụ mị ạsighe ạngo ịnun rꞌịnam kụ ẹba.”

⁴⁵ Kụ aDevid ạphagharanaan mọ, “Nạ ạpam elhool ẹgham rꞌọsoph rꞌạjavelin kụ ratumom bọ eeghian rꞌạmi, kụ ọlo mị ratu eenan rꞌạna esi aḍien Ẹnaan Oomo Ịikpo rꞌẸnaan awe ẹgham mọ Ịzirel, ẹpe nạ mạgilaam bọ.

⁴⁶ Rodon phọ ạḍien Ọmoogh-we phọ kạḅogh ni nyịna ụngo ịmi; mị kạkpar ri apu nyịna kụ mị asoph ẹmhu phọ ạna. Kụ mị kạsighe ruzu awe ẹgham ạbuo aFilistia phọ ạngo ịnun rꞌịnam mọ ạany. Kụ oomo aḅirini phọ ogbi olegheri mọ Ịzirel ọmoogh ni Ẹnaan.

⁴⁷ Kụ tọrotoro oye sịen phọ kạmiin ni mọ Ọmoogh-we phọ rạ́sighe ghan rolhool ẹgham rꞌịsoph kụ kạphelom weye phọ ọdi. Ọkpar-opu phọ ọlo Ọmoogh-we phọ kụ ọdi kạsighe ni oomo phọ anyina ạḅogh ạlogh ḍịghaagh ayoor.”

⁴⁸ Kụ ạGolayat ạḅile arelhe rạkpul Devid, kụ aDevid aghiil ạghi ạteeny sịphe awe ẹgham mọ aFilistia ọgoor bọ ḍiigbu phọ kọtol bọ kụ obe ẹgham mọ.

⁴⁹ Kụ aDevid ạroph okuru phọ ọdi kụ amitiom eniin ekpo, kụ ạraph Gọlayat. Ekpo phọ ẹghi ẹteeny nyọdi sịphe elhor phọ bịn kụ eḅom ọkeeghi ẹmhu phọ bịn ạGolayat ameel ezuemi.

⁵⁰ Kụ aDevid ọ́pham elhool, ạpham kạtapot rꞌeniin ekpo bịn kụ maghiigh Gọlayat.

⁵¹ Kụ ọdi aghiil ạghi ạteeny nyọdi, kụ ạsighe elhool ẹgham mọ ạGolayat amitiom sịphe aḍiphul phọ, kụ asophom ẹmhu ọdi. Mem dị awe aFilistia phọ ọmiin bọ mọ ophelegbe phọ ạbuno mamugh, bịdi osumughu.

⁵² Kụ awe phọ Ịzirel rꞌaJuda ọyughuron, kụ omiigh ophorogh ạbidi tụtu ọghi osi Gạt, ḅịle kẹn rꞌeḍighom Ẹkron. Kụ awe aFilistia dị moḍighi yogh rạraar umeleghu ni oomo eten phọ rẹki bọ Saaraim tụtu ẹghi esi Gạt rꞌẸkron.

⁵³ Mem dị awe phọ Ịzirel oḅula bọ eghiil ophorogh phọ awe aFilistia, bịdi ụghi ni owum rạraar phọ ẹrol bọ sịphe arugbogo phọ.

⁵⁴ Kụ aDevid ạsighe ẹmhu phọ ạGolayat agheelom Jeruselem; kụ ọlo ọdi aseere reenema ẹgham mọ ạGolayat sịphe ogbogo phọ ọdi.

Ọsighe Devid ọki oḍeenaan Sọl

⁵⁵ Mem dị ạSol ạmiin bọ Devid dị rạki eeghian rꞌạGolayat, ọdi apuru ni Ạbner oḍiemiom ẹgham mọ ọdi mọ, “Ạbner, ọony phọ ọphon phọ ọlo kꞌạnhian?” Kụ Ạbner ạphagharanaan mọ, “Mị úlegheri.”

⁵⁶ Kụ ạSol ạto ạḅem mọ, “Kịa ạwa alegheri.”

⁵⁷ Kụ iḍighi kụ mem mọ aDevid maghiigh bọ Gọlayat kụ arigheel ẹpe arugbogo phọ ạbidi, Ạbner ạsighe nyọdi ạghiomonaan Sọl. ADevid ạpam ghan ni ẹmhu phọ ạGolayat.

⁵⁸ Kụ ạSol apuru nyọdi mọ, “Mọony phọ, nạ ọony ạnhian?” Kụ aDevid ạphagharanaan mọ, “Mị ọony otelhedom mọ ạna Jẹsi, ọlo ẹmha phọ ạBetilihem.”