1 Sạmuel 16 - Ạḍinya Iigbia

Ọsagharan mụnum-ịko Devid oḍighi ọdaam eelhe

¹ Ọmoogh-we phọ ạḅeni Sạmuel mọ, “Kẹ́kasian ọwile ọkunuma ịlo ạSol? Mị maghel nyọdi oḍighi ọdaam Ịzirel. Kụ nyịidipho sịghe mụnum-ọliv ạghi ẹpe Bẹtilihem ọto kꞌoye dị oghol mọ ạJesi, loor esi dị mị mạsaḅar oniin ọony ọdi mọ aḍighi ọolha eelhe phọ.”

² Kụ ạSamuel apuru mọ, “Keḍighi ika kụ mịna aḍighi ịdipho phọ? Eḍighi ịyaar dị ạSol ạnaghan, kughiigh ni ịmi!” Kụ Ọmoogh-we ạphagharanaan mọ, “Sịghe ḍịbam ạḍiya ạnam kụ ạpham ạghimom, kụ ạḅem mọ nạ ụghi ọphighiron ẹkia ọngo Ọmoogh-we phọ.

³ Ạmagh Jẹsi mọ aru aani ọphighiron ẹkia phọ; kụ mị ạḅeni nyịna ịpe nạ kaḍighi bọ. Nạ kạsagharan mụnum-ịko ọdaam eelhe phọ oye phọ ọpo mị kạḅeni bọ nyịna.”

⁴ ẠSamuel aḍighi ni ịpe Ọmoogh-we phọ ạḅeni bọ nyọdi oḍighi phọ, kụ ọdi ạghi asi Bẹtilihem, bịn ikumoor awe ẹmha phọ ropiigha yogh kụ oru ọteeny nyọdi kụ opuru mọ, “Oyil-uḍien, eru phọ ạna ẹlo ẹepho ni?”

⁵ Kụ ọdi ạphagharanaan mọ, “Ii, mị uru ọphighiron ẹkia ọngo Ọmoogh-we phọ. Iselemian yogh siloor anyina ịdaph ịmi eru.” Kụ ọdi ạḅeniom ni Jẹsi rꞌạnmuny phọ ọdi mọ ọghi aani ọphighiron ẹkia phọ.

⁶ Mem dị bịdi ọghi bọ osi, ạSamuel ạmiin ọony ạJesi dị oghol mọ Eliab, kụ ọdi ạḅemom ologhi ọdi mọ, “Oye phọ ọphon ạmeera bọ sịen risigh Ọmoogh-we phọ kụ ọkaraghi ọpo ọdi kạsaḅar bọ.”

⁷ Kụ ọlo Ọmoogh-we phọ ạḅeni Sạmuel mọ, “Kápogh ḍimite rꞌẹnighe phọ. Mị akel li nyọdi, loor esi dị mị rápogh ghan ịdipho awe ropogh ghan bọ. Awe ropogh ghan ẹphen ạnyu phọ, kụ mị rapogh ghan ologhi phọ ọdi.”

⁸ Kụ ạJesi ạmagh ọony ọdi dị oghol mọ Ạbinadab kụ ạsighe ạghiom Sạmuel. Kụ ạSamuel ạḅem mọ, “Eeye, Ọmoogh-we phọ nyọon phọ kẹn ọ́saḅar.”

⁹ Kụ ạJesi ạsighe aru Sama, kụ ạSamuel mọ, “Eeye, Ọmoogh-we phọ nyọon phọ kẹn ọ́saḅar.”

¹⁰ ẠJesi ạsighe oḍual phọ ạnmuny phọ ọdi aruom Sạmuel, kụ ạSamuel ạḅeni nyọdi mọ, “Ọmoogh-we phọ ọ́saḅar rꞌoniin ọnyo ạbuen phọ.”

¹¹ Kụ ọdi apuru oye phọ mọ, “Ạnmuny phọ ạna úsugha mun?” Kụ ạJesi ạphagharanaan mọ, “Ọkaraghi ọbam mọ odi ni, kụ ạsighe iyool-ịga phọ rạki ịḅal.” Kụ ạSamuel ạḅem mọ, “Ịḅeni ọdi aru sịen. Yoor kọ́pighiron ẹkia phọ tụtu ọdi aru.”

¹² Kụ ạJesi arom ạghiomonaan ọony phọ. Ọdi aḍighi ni ịma, ọnyoghonyogho oye rꞌariḍien dị rẹtaphan. Kụ Ọmoogh-we phọ ạḅeni Sạmuel mọ, “Ọphon kụ oye phọ. Sạgharan nyọdi mụnum mọ.”

¹³ Kụ ạSamuel ạsighe mụnum-ọliv ạsagharan ẹmhu aDevid sịphe risigh abumor phọ ọdi. Egina amem bịn Uwaloor Ọmoogh-we phọ aḍigh loor Devid bịn ạrolan nyọdi emiigh ḍio phọ ạḍiphe phọ ẹghiom risigh. Kụ ạSamuel agheel ẹpe Rama.

ADevid odi ogiga ạSol

¹⁴ Uwaloor Ọmoogh-we phọ ạwile Sọl, kụ ọkaraph uwaloor dị Ọmoogh-we phọ arom ạghi ghan ạaḅaghami nyọdi.

¹⁵ Kụ abutelhedom mọ ọdi ọḅeni nyọdi mọ, “Yoor olegheri ni mọ ọkaraph uwaloor dị Ẹnaan erom atu ni rạaḅaghami nyịna.

¹⁶ Kụ urom iyoor, oye phọ, yoor kọki ọwa oye lọ ạmaar oti ọne. Tọro amem lọ ọkaraph uwaloor phọ aru esi ạna, oye phọ kati ghan ọne phọ bịn aloor phọ ạna kepoorom ghan ni.”

¹⁷ Kụ ạSol ạto ạḅeni bịdi mọ, “Ịki ịwaanaan ịmi oye lọ ạmaar oti ọne phọ.”

¹⁸ Kụ oniin oye dị rạdaph ghan nyọdi ạḅem mọ, “ẠJesi oye ọlo ạBetilihem ạmoogh ni mọony dị ạmaar iitia. Ọdi aḍighi ni ịma oye dị ọ́moogh eepuph, ogey oye ẹgham, ạḅile kẹn ạmaar ọghaaph. Ọmoogh-we phọ kẹn odi ni rꞌọdi.”

¹⁹ Kụ ạSol arom butelhedom mọ ọghi ọteeny Jẹsi ọḅeni mọ, “Ḅẹni mọony phọ ạna Devid, ọpo rapogh ghan bọ iyool-ịga phọ, mọ ọdi aru.”

²⁰ Kụ ạJesi arom Devid mọ ạghi ạteeny Sọl, kụ ạngoom ni ọony ạtu-ọga, rꞌẹnam adool dị ọsaany ạbred, rꞌokuru ozu ẹnam dị omuzeḍi miim.

²¹ Kụ aDevid ạghi ạteeny Sọl, bịn ạSol ạlhogh nyọdi dom sịphe kꞌọdi. ADevid ạḅeeraan ni Sọl iboom, kụ ạsaḅar nyọdi mọ ọdi kụ ạpham ghan reenema ẹgham ọno.

²² Kụ ạSol arom ạghiomonaan Jẹsi mọ, “ADevid ụḅeeraan ni ịmi. Bịle ọdi ạrol sịen rꞌạmi aḍighi ghan oḍighi.”

²³ Emiigh sịen phọ kụ ẹghiom risigh, tọrotoro amem lọ ọkaraph uwaloor phọ Ẹnaan erom bọ aru esi ạSol, aDevid kạsighe ọne phọ ọdi kụ ati; bịn ọkaraph uwaloor phọ mạḍua bịn ạSol amoon.