1 Sạmuel 15 - Ạḍinya Iigbia

Ozuom ẹgham weye Ạmalek

¹ ẠSamuel ạḅeni ni Sọl mọ, “Mị kụ oye phọ Ọmoogh-we phọ arom bọ mọ aru azu nyịna eghoony aḍighi ọdaam ẹmha awe phọ ọdi Ịzirel. Kụ nạghan ịdi Ọmoogh-we Oomo Ịikpo phọ ạḅem.

² Ọdi mạnya ọlhiom awe phọ Ạmalek loor esi dị ạburude ạburude ạbidi uruphiom ni ẹgham weye phọ Ịzirel mem mọ bịdi ọḍua bọ Ijipt rotigheel.

³ Kịa azuom ẹgham we phọ Ạmalek ạphueghi oomo ạraraar lọ bịdi ọmoogh ạmadan. Kásugheeny rꞌeniin ịyaar. Zẹ ni oomo alephiri ạnmuny rꞌạnmariir rꞌịbam ạnmuny rꞌạbulo pụruku ọmar, rꞌạsinam rꞌiyool-ịga, sịkamel rꞌịnam adool phọ ạbidi ạmadan.”

⁴ ẠSol aakpomoghi we ẹgham mọ ọdi aphogh ẹpe Telem. Awe ẹgham bụo Ịzirel ụman ịyal okuron ọonir, rꞌạbuo aJuda dị ọman ḍioph ọonir.

⁵ Kụ ọdi rꞌawe phọ ọdi ọghi ẹmha phọ Ạmalek osoor esi eḍiiny ạaghian yogh kụ okori ghan.

⁶ Ọdi arom dom ọghi ọphur rụru weye phọ aKenait, (bụen phọ uḍighi we dị ạburude ạburude ạbidi ụlhoghonaan ni ḍịghaagh we Ịzirel mem mọ bịdi ọḍua bọ Ijipt rotigheel) kụ ọḅeni mọ, “Ịbile ẹmha Ạmalek ẹḍuaghu, ọbo mị kạḅaram ghan bọ weye phọ anyina rꞌạbidi ạze.” Kụ aKenait phọ ọḍuaghu.

⁷ ẠSol ạkpar ri apu we Ạmalekait phọ, eenan bịdi emiigh ẹpe Havila kụ ẹghi esi ẹpe Sur ẹpe erumuḍio phọ remite ghan bọ Ijipt.

⁸ Ọdi asiph imoom Ạgag ọdaam mọ Ạmalek kụ ạze oomo ạbueri phọ awe phọ.

⁹ Kụ ọlo ạSol rꞌawe phọ ọdi ụwile ni Ạgag úkiigh, ḅịle kẹn bịdi ụ́ze igbogh iyool-ịga phọ rꞌạsinam mọ rꞌạnmuny iyool-ịga phọ rꞌạtorotoro ịyaar dị ẹnighe. Bịdi ọphueghi rạraar phọ ịpe ị́moogh bọ ịyaar oḍighinom mọ bịn.

Moghel Sọl ọdaam mọ

¹⁰ Ọmoogh-we phọ ạḅeni Sạmuel mọ,

¹¹ “Ologhi ạmi ọ́ḅaal mun ịduon mị ạsighe bọ Sọl aḍighi ọdaam ẹmha phọ; ọdi mụḅitonaan ịmi, ḅịle kẹn ọ́naghanan mun ịlo mị ạto.” Iphin ni ologhi ạSamuel iboom kụ ọdi ạaḅereghian ghan Ọmoogh-we phọ oomo aḍughul phọ.

¹² Eḅon ạḍiroor ạḍieri phọ aḍio phọ kụ ọdi ạghi ọwa ạSol. Kụ ạSamuel ạnaghan mọ ạSol maten rạki ẹpe ẹmha phọ ạKarmel ẹpe phọ ọdi mạka bọ ịyaar dị kọsighe ọotughianam ghan nyọdi aseere, kụ mạḍua kẹn sịphe phọ rạki Gịlgal.

¹³ ẠSamuel ạghi ạteeny Sọl, kụ ạSol ạmagh nyọdi kụ ạḅem mọ, “Ọmoogh-we phọ ạseph nyịna, Sạmuel. Mị maḍighi ịpe Ọmoogh-we phọ ạto bọ.”

¹⁴ Kụ ạSamuel apuru mọ, “Iḍighi ika kụ mị rạnaghan bọ ẹḍogh iyool-ịga rꞌạsinam dị reḅeela yogh?”

¹⁵ ẠSol ạphagharanaan mọ, “Awe phọ ạmi ụsighe ịnam mọ ịphen phọ ẹpe Ạmalek. Bịdi useere igbogh iyool-ịga phọ rꞌạsinam mọ ọsighe ọphighironom ẹkia ọngo Ọmoogh-we Ẹnaan phọ ạna, kụ ịpheri phọ yoor moogulemi ọman.”

¹⁶ Kụ ạSamuel amooghaam nyọdi mọ, “Bịle kụ. Mị kạḅeni ni nyịna ịdi Ọmoogh-we ụḅeni ịmi ḍughul phọ.” Kụ ạSol ạḅeni nyọdi mọ, “Kạaph ụḅeni ịmi.”

¹⁷ ẠSamuel ạphagharanaan mọ, “Ghạlamo ịduon nạ ạsighenom bọ loor phọ ạna mọ nạ ọ́man ịyaar phọ, nạ kụ oḍiemiom oomo arughunughun phọ Ịzirel; Ọmoogh-we phọ kụ azu nyịna eghoony mọ ḍighi ọdaam mọ Ịzirel,

¹⁸ kụ ọdi ạto ạngo nyịna mọ kịa aphiemi bụkaraph awe phọ Ạmalek. Ọdi ạḅem mọ ibe tụtu nyina ẹze oomo phọ ạbidi ẹmadan.

¹⁹ Eeghe kụ iḍighi kụ nạ ọ́naghanan bọ nyọdi? Eeghe kụ iḍighi kụ nạ aagborion bọ awum rạraar phọ bịn ạphuenom ologhi Ọmoogh-we phọ?”

²⁰ ẠSol ạphagharanaan mọ, “Mị ụnaghanan ni Ọmoogh-we phọ. Mị ụghi ni ịdipho ọdi ụḅeni bọ ịmi, mị ạpam Ạgag ọdaam mọ atighelom, kụ mị ạze ni oomo aweye phọ Ạmalek.

²¹ Kụ awe phọ ạmi ụ́ze igbogh iyool-ịga rꞌạsinam mọ bịdi ozirion bọ. Kpạripe rꞌọze, bịdi ọsighe otu ẹphen Gịlgal ọphighironom ẹkia ọngo Ọmoogh-we phọ Ẹnaan phọ ạna.”

²² Kụ ạSamuel apuru Sọl mọ, “Eeghe kụ ịḅeeraan Ọmoogh-we phọ epu: ọnaghanan ọdi ḍụghum kụ ọphinyon ạrikia? Ọnaghanan ọdi kụ ạnighe apu ọsighe ogbogh odughuna ọphighiron ẹkia ọngo ọdi.

²³ Oruphiom ọdi ẹgham abeeph ni ịdipho ọgbe-ạghama, kụ ophoophe aloor aḍighi ni ịkaraph ịdipho ọka ịyaar ọoḅereghi. Loor esi dị nạ maghel bọ ịto Ọmoogh-we phọ, ọdi kẹn maghel nyịna oḍighi ọdaam.”

²⁴ Kụ ạSol ạḅeni Sạmuel mọ, “Agey ni, mị maḍighi ịkaraph. Mị ụ́naghanan ịto Ọmoogh-we phọ rꞌịpe nạ ụḅeni bọ ịmi oḍighi phọ. Mị ughiilaan we phọ kụ aḍighi ịpe bịdi ọwa bọ.

²⁵ Kụ nyịidipho phọ sạr ụwilenaan ịmi ịkaraph phọ ạmi ụdaph ịmi aḅula pịdi mị ạaḅereghi Ọmoogh-we phọ.”

²⁶ Kụ ạSamuel ạphagharanaan mọ, “Mị kạ́daph nyina aḅula. Nạ maghel ịto Ọmoogh-we phọ, kụ ọdi maghel aani nyịna oḍighi ọdaam Ịzirel.”

²⁷ Kụ ạSamuel aaghiraan ogheel bịn ạSol asiph ạsuoma oye phọ bịn ạsuoma ạphaaru.

²⁸ Kụ ạSamuel ạḅeni nyọdi mọ, “Ọmoogh-we phọ mạphaar ọmar phọ Ịzirel ạsighe ḍịghaagh ạna rodon kụ mạsighe ạngo oye dị ạnighe apu nyịna.

²⁹ Egbogh Ẹnaan phọ Ịzirel rạ́gba ghan ọkpe, ḅịle kẹn ránme ghan ologhi ọdi. Ọdi kóye — ọdi ránme ghan ologhi ọdi.”

³⁰ Kụ ạSol ạḅem mọ, “Mị maḍighi ni ịkaraph kụ ọlo ụlogh ịmi eegu. Ịmi kúmuton eephoogh sịen arisigh abuḍiemiom awe phọ ạmi rꞌoomo Ịzirel. Ụdaph ịmi oḅula, pịdi mị ạaḅereghi Ọmoogh-we Ẹnaan phọ ạna.”

³¹ Kụ ạSamuel ạdaph Sọl aḅula, kụ ạSol ạaḅereghi Ọmoogh-we phọ.

³² Kụ ạSamuel ạḅem mọ, “Ịsighe Ạgag ọdaam mọ Ạmalek iruom ịmi.” Kụ Ạgag ạghi ạteeny nyọdi, rapiigha kụ ọdi ạatughian ghan mọ, “Kpạripe ghụn oye phọ amugh.”

³³ Kụ ạSamuel ạḅeni mọ, “Ịdipho elhool ẹgham mọ ạna meḍighi bọ ịdi ịbadi aburunhiin ụ́moogh mun nmụny, ịduon kẹn kụ ẹdi onhiin ạna kạ́moogh mun mọony.” Kụ ạSamuel abenogh Ạgag aghiigh ạkiriph sịphe risigh enmeny phọ ẹpe Gịlgal.

³⁴ Kụ ạSamuel aten ạghi ẹpe Rama; kụ ạSol ọdaam mọ aten agheel ẹpe kꞌọdi ẹpe Gibia.

³⁵ Emiigh sịen phọ ạSamuel rꞌọdaam mọ ụ́miinan mun bịn tụtu ạSol amugh; kụ ọlo ạSamuel ạkunuma ni iboom ịlo ạSol. Kụ ologhi Ọmoogh-we phọ ọ́ḅaal mun ịduon ọdi aḍighi bọ Sọl ọdaam mọ Ịzirel.