1 Sạmuel 11 - Ạḍinya Iigbia

ẠSol aagulemi bụo Amonait phọ

¹ Rẹkiom ni oniin ụnwanyu bịn aten, bịn aNahas ọdaam mọ Amon aḍiemiom weye ẹgham ọdi bịn azuom ẹgham ẹmha phọ aJabes ẹpe eelhe phọ ạGiliad bịn akpobiom ẹmha phọ. Aweye ẹmha phọ aJabes ọḅeni Nahas mọ, “Kiran ịyo ẹepho rꞌayoor, bịn yoor kọsighe ni nyịna aḍighi ọolha-ẹmha ayoor.”

² Kụ aNahas ạphagharanaan mọ, “Nyina emeera ịphen mị kạḅem bọ kụ mị agbi nụun oghiran ịyo rꞌanyina. Mị kạpoghoron ekpeḍien ạḍighaagh elhiom ạtorotoro ọnyo anyina pịdi mị asiphe umugholoor oomo Ịzirel.”

³ Kụ ikpolom awe phọ aJabes ọḅem mọ, “Ụngo iyoor oḍual aḍughul-otu, yoor orom ọghiom oomo ạramha phọ Ịzirel. Eḍighi ịyaar dị oye ọphel ayoor úlho, kụ yoor omeera ịphen nạ ạḅem bọ.”

⁴ Awe phọ orom bọ dom mọ ọghi osi Gibia, ẹpe ạSol arugh bọ, kụ mem dị bịdi ọḅeni bọ dom mọ, awe phọ omiigh emoghi mọ mebeeph.

⁵ ẠSol ạḍua ozo ratigheel rꞌạsinam ọdi, kụ ọdi apuru mọ, “Eeghe kụ imite? Uḍighi ika kụ awe phọ romoghi yogh bọ ịduon phọ?” Kụ bịdi ọḅeni nyọdi ịpe adom mọ aJabes ẹḅem bọ.

⁶ Mem dị ạSol ạnaghan bọ dom mọ, uwaloor Ẹnaan phọ aḍigh ni loor ọdi, kụ ẹghagh ologhi ọdi iboom.

⁷ Kụ ọdi ạsighe ịyal ạsinam ạze ạkanyan ạkiriph ịpherepe; kụ arom we mọ ọsighe ịpherepe ịnam mọ oleenye oomo areelhe phọ Ịzirel, kụ ạphurom rụru mọ, “Tọrotoro oye dị ụ́daph Sọl rꞌạSamuel ụ́ki ẹgham mọ, pọ ịduon phọ kụ ịdi kọkiriph sịnam ọdi.” Esi eegu Ọmoogh-we phọ, oomo phọ ạbidi, oye ósugha, uru ni ookpomoghan.

⁸ ẠSol aakpomoghi ni bịdi ẹpe Bezek: ịraar okuron ọonir aweye Ịzirel rꞌịraardi okuron awe aJuda.

⁹ Kụ bịdi ọḅeni butelhedom mọ aJabes mọ, “Ịki ẹḅeni we phọ anyina mọ tụtu rẹteeny ootaany iḍue bịdi kọmoogh ni pẹleeny.” Mem dị awe phọ aJabes ọnaghan bọ dom mọ, iloghi ạbidi ịḅaal li iboom

¹⁰ kụ ọḅeni Nahas mọ, “Iḍue phọ ọpo kẹḅaal bọ, yoor kọḅogh loor phọ ayoor ọngo nyịna, aḍighi ịlo ẹḅeeraan nyịna.”

¹¹ Ḍughul phọ ạḍiphe phọ ạSol adi ni we phọ ọdi ịraar ạriikpigh, kụ eḅon ạḍiroor bịdi ọghi rugbogo ẹpomoghian phọ ạbidi ozuom ẹgham weye phọ Amon. Tụtu rẹteeny ootaany, bịdi mọze ḍita awe. Awe dị osugha osumughu, uwo ẹlo ọdi anyeene ghan ẹlo ọdi.

¹² Ẹpe kẹ esi dị awe phọ Ịzirel ọḅeni Sạmuel mọ, “Odi ẹghen awe phọ ạbuphe ọḅem bọ mọ ạSol kúḍighi ọdaam mọ ayira? Ḅọgh bịdi ụngo iyoor, yoor kọze bịdi.”

¹³ Kụ ọlo ạSol ạḅem ni mọ, “Arodon phọ káḍio oghiigh oye, ịdi eḍighi bọ Ọmoogh-we phọ mạphel Ịzirel rodon atene.”

¹⁴ Kụ ạSamuel ạḅeni we phọ Ịzirel mọ, “Ụgua, oomo ayira ọghi ẹpe Gịlgal ọḅile ogbeel mọ ạSol kụ ọdaam mọ ayira.”

¹⁵ Ẹpe kụ esi dị oomo ạbidi ọghi osi Gịlgal; kụ ọghi sịphe esi iigbia phọ kụ ogbeel mọ ạSol kụ ọdaam ẹmha phọ. Kụ bịdi ọphinyon rịkia ẹboroph, kụ ạSol rꞌoomo awe phọ Ịzirel olhe ẹyaal ọotughianam aḍio phọ.