1 Sạmuel 10 - Ạḍinya Iigbia

¹ ẠSamuel ạsighe izoki ạmunum-ọliv kụ ạsagharan ẹmhu ạSol, kụ ạkpun nyọdi kụ ạḅem mọ, “Ọmoogh-we phọ mạsagharan nyịna mụnum mọ ḍighi ọdaam awe phọ ọdi Ịzirel. Nạ kụ kạda we phọ ọdi ạḅile abianaan ịlo ẹpomoghian phọ ạbidi káḍighi bịdi ịyaar. Kụ ẹphen kụ eḍeenaan phọ nạ kalegheriom bọ mọ Ọmoogh-we phọ mạsaḅar nyịna mọ ḍighi ọdaam awe phọ ọno:

² Mem dị nạ ụwile ịmi rakeel rodon phọ, nạ kazuan ni ịyal awe pạ amatuman oḍi phọ aRechel ẹpe Zelza ẹpe eelhe phọ ạBenjamin. Bịdi kọḅeni nyịna mọ mọmiin ni ịnam adool phọ nyina ẹwa ghan bọ, kụ ọde phọ ạna mạwile ịnam adool phọ rạto ghan nyịna kụ rapuru ghan mọ, ‘Mịna kaḍighi bọ ika mọony phọ ạmi?’

³ Kiton sịphe phọ tụtu nạ ạghi asi sịphe oreeny iigbia phọ ẹpe Tabor, sịphe phọ nạ kazuan ịraar awe dị rọki Bẹtel ọphighiron ẹkia. Oniin ọnyo ạbidi kaḍiemiom ịraar ạnmuny ạrutu-ịga, ọphori phọ katool ịraar iiḅoghoḍi ạbred, kụ ọpo amuneniom bọ ịraar phọ kạpam okuru amiim.

⁴ Kụ bịdi kọmagh ni nyịna mọ mẹḅaal, kụ ọsighe ịyal iiḅoghoḍi ạbred ọngo aani nyịna, kụ sịghe ni.

⁵ Kụ nạ ạki asi sịphe ẹeḅaraph phọ Ẹnaan ẹpe Gibia, esi dị ogbogo awe ẹgham mọ aFilistia odi. Ẹpe eḍighom ẹmha phọ, nạ kạmiin ḍita ariil Ẹnaan dị ọḍua sịphe enmeny phọ edi bọ ẹpe ạnyu ẹeḅaraph phọ kụ rosoor, kụ rotiighi ghan rẹne, rꞌạrakama, rꞌaruuḍue.

⁶ Egina amem bịn Uwaloor phọ Ọmoogh-we phọ kaḍigh ni loor ạna, kụ nạ ạki aḍighan ḍịkool ịḅa phọ rꞌịlooghi phọ bịn kụ nạ aten kịro ọdo oye.

⁷ Kụ mem dị ạraraar phọ ịphen memiteghu, ḍighi tọrotoro ịyaar lọ Ẹnaan ẹḅeni nyịna oḍighi.

⁸ Kụ nạ aḍiemi ghan ẹpe Gịlgal, mị katu ni ẹpe phọ ạteeny nyịna ạpinyon rịkia ịlo oguom ạnian phọ rꞌịlo ọḅophoghan. Ukori ịmi ẹpe phọ oḍual aḍughul-otu, tụtu mị aru ạḅeni nyịna ịlo nạ kaḍighi.”

⁹ Mem dị ạSol ạwile bọ Sạmuel rạḍua, Ẹnaan anme ni ologhi ạSol. Kụ oomo phọ ạraraar phọ ịpe ạSamuel ạḅeni bọ nyọdi imite ni ḍio phọ ạḍiphe.

¹⁰ Mem dị ạSol rꞌotelhedom mọ ọdi ọghi bọ osi Gibia aḍita ariil Ẹnaan uzuan ni nyọdi. Egina amem bịn uwaloor phọ Ẹnaan aḍigh nyọdi bịn ọdi ạghi aḍighan ḍịkool ịḅa phọ rꞌịlooghi phọ ạbidi.

¹¹ Aweye dị molhegheri ghan nyọdi igbaany ụmiin ni dị ọdi raḍighi ịphen phọ kụ oniin apuru ghan nyoniin mọ, “Eeghe kụ imitenaan mọony phọ aKis? ẠSol maḍighi aani oyil Ẹnaan ḍụghum?”

¹² Oye dị arugh sịphe phọ apuru mọ, “Ạbueri phọ ariil phọ Ẹnaan ọtol ika? Ạburude ạbidi oḍighi eeghe ọdo awe?” Ịduon phọ kụ ẹdi ọḅem bọ mọ ọphon amite bọ mọ, “ẠSol maḍighi aani oyil Ẹnaan ḍụghum?”

¹³ Mem dị ạSol mạmadan ịḅa phọ rꞌịlooghi phọ ọdi, ọdi aten ạghi sịphe enmeny phọ ẹpe ạnyu ẹeḅaraph phọ.

¹⁴ Umor ọde ạSol ạmiin ni Sọl rꞌotelhedom mọ ọdi, kụ apuru bịdi mọ, “Nyina ịrol ẹghen?” Kụ bịdi ọphagharanaan mọ, “Yoor ụwa ghan ịnam adool phọ, kụ mem dị yoor útue ụ́miin bịdi kụ yoor ọghi ọteeny Sạmuel.”

¹⁵ Kụ oye phọ apuru Sọl mọ, “ẠSamuel ịḅeni inyina eeghe?”

¹⁶ Kụ ạSol ạphagharanaan mọ, “ẠSamuel ụḅeni iyoor mọ mọmiin ịnam adool phọ.” Kụ ọlo ọdi ọ́ḅeniom ọnyo asiya phọ ọdi ịpe ạSamuel ạḅem bọ mọ ạSol kaḍighi ọdaam ẹmha phọ.

Okononomi Sọl mọ ọdaam ẹmha phọ

¹⁷ ẠSamuel ạmagh weye phọ aakpomoghi mọ ọpham ịiḅereghi ẹpe Mizpa.

¹⁸ Kụ ọdi ạḅeni we phọ mọ, “Ọmoogh-we Ẹnaan phọ Ịzirel ạḅem mọ, ‘Mị ụsighe inyina ẹpe Ijipt ạḍuanam, ạḅile ịtagharan inyina ḍịghaagh awe phọ Ijipt rꞌạbueri phọ awe phọ ạbuphe ịkpiloghom ghan bọ inyina.

¹⁹ Mị kụ Ẹnaan phọ anyina, ọpo rịtagharan ghan bọ inyina esi ịiḅaghami rꞌạḍikparamineen ạdol phọ anyina, kụ rodon nyina mịḅitonaan ịmi kụ ịḅeni ịmi mọ mị ụngo inyina ọdaam ẹmha. Pọ ẹnighe ni-aa, itu emiteghu eghun etum eghun rꞌopolo atum ọto, ẹmeregha ghisigh ạmi Ọmoogh-we phọ.’”

²⁰ Kụ ạSamuel ạḅeni ghan rughunughun phọ mọ oḍuraan ọobeeph kụ Ọmoogh-we phọ ạsaḅar eghun ạBenjamin.

²¹ Kụ ạSamuel ạḅeni rughunotu phọ kꞌạBenjamin mọ oḍuraan ọobeeph, kụ ọsaḅar eghunotu phọ aMatri. Kụ alephiri ạnmuny eghunotu phọ aMatri oḍuraan ọobeeph, kụ ọsaḅar Sọl ọony phọ aKis. Kụ bịdi ọwa nyọdi, kụ ọlo mem dị bịdi ụ́miin bọ nyọdi,

²² bịdi opuru mọ, “Ọnon oye odi ni ḍụghum?” Ọmoogh-we phọ ạphagharanaan mọ, “ẠSol odi ni ẹpe, ạbooghian sịphe okpol bọ riiḍien phọ.”

²³ Kụ bịdi oghiil ọsighe Sọl omitiom ọngo we phọ, kụ bịdi ụmiin ni mọ ạSol aphoph apu oomo phọ awe phọ emiigh kꞌạrupha ọdi kụ ẹghiom ạnyu.

²⁴ Kụ ạSamuel ạḅeni oomo awe phọ mọ, “Ịporono oye phọ Ọmoogh-we phọ mạsaḅar bọ. Ọnon oye ólho sịen ogbo phọ ayira dị kọtomaam nyọdi.” Kụ oomo phọ awe phọ ọlo kụ ọḅem mọ, “Ọdaam tọl kꞌagee-pọ.”

²⁵ ẠSamuel ạghaaph ni ạḅeni we phọ iiḍighi ọdaam mọ rꞌariiliom mọ ọdi, kụ ọdi ạge ịphen phọ ạlogh ḍịnya, kụ ạsighe ḍịnya phọ ạlogh esi iigbia. Kụ ọdi ạḅeni we phọ mọ ogheleghu.

²⁶ ẠSol agheel aani kẹn ni ẹpe kꞌạbidi ẹpe Gibia. Buniin ikpolom awe, dị Ẹnaan mẹḅogh iloghi phọ, ụdaph ni Sọl.

²⁷ Kụ ọlo buniin awe dị ụ́moogh ịyaar oḍighinom ụḅem ni mọ, “Oghiil oye phọ ọphon katue ni uḍighi iyira igey ḍụghum?” Bịdi ụḅitonaan ni Sọl kụ ruunmo ụ́kuom.