1 Sạmuel 1 - Ạḍinya Iigbia

Elkana rꞌọto ọdi ẹpe Sailo

¹ Oniin oye ạrol li dị oghol mọ Elkana. Ọdi ọlo eghun phọ Ifraim ọdi arugh ẹpe ẹmha phọ aRama ḍịghaagh ạḍiphe aroogbolom mọ Ifraim. Ọdi ọony aJeroham ḅịle kẹn ọnyanyani Elihu, ọdi ọlo eghunotu aTohu ọlo ọto phọ aZuf.

² Elkana ạmoogh ịyal ạnmariir aHana rꞌaPenina. APenina ạmoogh ni ịbam ạnmuny, kụ ọlo aHana ọ́moogh rꞌoniin ọony.

³ Tọrotoro ạlha Elkana ạḍua ghan ni ẹpe Rama ạghi ọoḅereghi rꞌọphinyon ạrikia ọngo Ọmoogh-we Oomo Ịikpo phọ ẹpe Sailo, ẹpe Hofini rꞌạFinehas, ịyal phọ ạnmuny phọ Ilai, kụ oḍighi bọ bụpinyon rịkia phọ Ẹnaan.

⁴ Tọrobo amem lọ Elkana ạphighironaan ẹkia phọ, ọdi kạsighe muniin abin ịnam ạngo Penina ạnir phọ ọdi. Oomo ạnmuny phọ ọdi, lephiri phọ rꞌạnmanyaan phọ uphin ghan bin bin.

⁵ Kụ ọlo ghạlamo ịdipho oye phọ ạphomoghian bọ ni Hana iboom, ọdi ạsighe muniin abin bịn ạngo nyọdi, ịdi eḍighi bọ ọdi ẹ́mar ạnir.

⁶ APenina oyobopha phọ ọdi ạgilaam ghan ạḅile ạaḅaghami nyọdi loor esi dị ọdi ẹ́mar ạnir.

⁷ Ịphen phọ imite ghan lhạ etum lhạ. Tọrobo amem lọ bịdi ọghi otu Ọmoogh-we phọ, aPenina kaḍighi ni ịdi ologhi aHana kabeeph iboom tụtu amoghi yogh ạḅile akin eḍien.

⁸ Olhom mọ ọdi kapuru ni nyọdi mọ, “Hana, nạ ramoghi ghan eeghe? Eeghe kụ iḍighi kụ nạ akin bọ eḍien phọ? Uḍighi ika kụ ologhi phọ ạna rạ́ḅaal ghan bọ? Mịna úpel ḍioph ạnmuny esi ạna ḍụghum?”

AHana rꞌIlai

^9-10 Eniin aḍio, mem dị bịdi molhe eḍien ọḅile ọphughol mụum sịphe otu Ọmoogh-we phọ ẹpe Sailo, kụ aHana aḅetenu. Ologhi phọ ọdi eeph ni iboom, kụ ọdi amoghi iboom sịphe ọdi rạaḅereghi bọ Ọmoogh-we phọ. Mem mọ ạmuphe phọ Ilai oyil ạrikia phọ ạtol sịphe ạdol phọ ọdi atuman eghuugh phọ.

¹¹ AHana aguanaan rꞌoomo ologhi ọdi kụ ạḅem: “Egbogh Ẹnaan Ọmoogh-we, uphogh ịmi ọnyani-otu phọ ạna. Mịin ịminimiin phọ ạmi ụutughian ịmi. Ịmi kúwula! Eḍighi ịyaar dị nạ ụngo ịmi oniin olephiri ọony, mị aguanaan ọḅogh ọdi ọngo ạna oomo aghuḍum mọ ọdi kụ ẹmhu phọ ọdi amem kẹ́tol dị kọsam.”

¹² AHana akananaam ni ịiḅereghi phọ ạḅeni Ọmoogh-we phọ tụtu ẹsighe mem kụ Ilai aphogh ghan ịidoronhu phọ ọdi.

¹³ Ạnir phọ ạaḅereghiom ghan ologhi; ịidoronhu ọdi bịn kụ iphiigha ghan kụ ọlo ẹḍogh phọ ọdi ímite. Ẹpe kụ esi dị Ilai agbiom ghan mọ ạnir phọ mạphughol miim.

¹⁴ Kụ ọdi ạḅeni ạnir phọ mọ, “Bịle iboh ạbupughol miim ạna. Kạ́pughol mun miim. Sereghian.”

¹⁵ “Eeye, mị ụ́pughol miim, oye phọ,” ạnir phọ ạphagharanaan. “Mị rạ́pughol ghan miim! Ịyaar kụ rịiḅaghami ịmi iboom kụ mị rạaḅereghi ghan, mị ạḅogh ịiḅaghami phọ ạmi rạngo ghan Ọmoogh-we phọ.

¹⁶ Kágbiom mọ mị oyeelayeela ạnir. Mị ụuḅereghi ghan ịduon phọ loor esi dị mị úlegheri mun ịlo oḍighi.”

¹⁷ Kụ Ilai ạḅeni mọ, “Keel rꞌẹepho. Ẹnaan phọ Ịzirel ẹngo nyịna ịyaar phọ ẹpe nạ mạlhom bọ nyọdi.”

¹⁸ “Ụutughianam ghan ịmi igey,” ạnir phọ ạphagharanaan. Kụ ạnir phọ aten agheel bịn ologhi phọ ọdi ạḅaal.

Ẹmaram mọ ạSamuel, rꞌọḅogh ọdi ọngo Ẹnaan phọ

¹⁹ Rẹḅile rẹḅaal kụ Elkana rꞌeghunotu phọ ọdi oḅon oḅerenu, kụ bịdi rọoḅereghi Ọmoogh-we phọ, kụ oten ogheel ẹpe ọto kꞌạbidi ẹpe Rama. Elkana ạrolan esi rꞌạnir phọ ọdi aHana, kụ Ọmoogh-we phọ ạphagharanaan ịiḅereghi phọ ạnir phọ.

²⁰ Kụ iḍighi kụ aHana aamor kụ ạmar olephiri. Kụ ạnir phọ aghol mọony phọ mọ ạSamuel, kụ ọdi ạghaaph amitiom mọ, “Mị ụlhom Ọmoogh-we phọ mọony phọ ọphon.”

²¹ Amem mọ ẹḅile bọ ẹteeny dị Elkana rꞌeghunotu phọ ọdi kọki ẹpe Sailo ọpighiron ẹkia ẹlo ạlha phọ rꞌọngo ẹkia phọ ẹpe ọdi aguanaan bọ.

²² Kụ ọlo egi phọ ẹphen phọ aHana ọ́ghi aani. Ạnir phọ ạḅeni olhom mọ ọdi mọ, “Roghine mạmaam ọbumoony phọ ọphon, kụ mị ạsighe nyọdi ạki otu Ọmoogh-we phọ, kụ ọdi ạtol sịphe oomo aghuḍum mọ ọdi.”

²³ Elkana ạphagharanaan mọ, “Ẹnighe ni, tụugh aḍighi ịlo nạ agbiighi mọ ẹnighe; tọl ologhi otu tụtu nạ aghine mạmaam ọbumoony phọ. Kụ Ọmoogh-we phọ aḍighi ni ịdi oguanan phọ ạna kameera!” Kụ aHana ạrol ghan otu aakonom ghan mọony phọ ọdi.

²⁴ Ạnir phọ roghine mạmaam mọony phọ, kụ ọdi ạsighe mọony phọ ạghi Sailo, ạphamam ḍilephiri ạnam dị ẹman ịraar ạsia, rꞌaḍioph igbogh ịtoom ẹemor ịbiakpa dị ọgbe, rꞌokuru dị omuzeḍi miim. Kụ ạnir phọ ạsighe Sạmuel, ịduon phọ aghom bọ ni, ạsighe ạghi otu Ọmoogh-we phọ ẹpe Sailo.

²⁵ Mem dị moghiigh nạm mọ, kụ bịdi ọsighe mọony phọ ọghiomonaan Ilai.

²⁶ Kụ aHana ạḅeni nyọdi mọ, “Oye phọ, nạ ụutughian ni ịmi ḍụghum? Mị kụ ạnir phọ ọpo nạ ạmiin bọ ạmeera bọ sịen kụ ạaḅereghi ghan bọ Ọmoogh-we phọ.

²⁷ Mị ụlhom nyọdi mọony kụ ọdi mụngo ịmi ịpe mị ạlhom bọ.

²⁸ Kụ mị mạḅogh nyọdi rạngo Ọmoogh-we phọ. Tọrotoro ọnhu ạsia lọ ọdi ạrol sịen aḅirini phọ, pọ ọdi ọlo Ọmoogh-we phọ.” Kụ bịdi ọoḅereghi Ọmoogh-we phọ sịphe phọ.