1 Pita 5 - Ạḍinya Iigbia

Aḍita iyool-ịga phọ Ẹnaan

¹ Mị okumoor oye phọ ạmiin bọ kụ rạkaaphaan bọ ịminimiin phọ aKraist, ḅịle kapin aani bọ ni bin igbogh phọ ịpe kogananami bọ, rịlhom ni inyina ikumoor awe phọ edi bọ sịphe ogbo ạbuo ạsiosi phọ

² mọ iḍighi bupoghom iyool-ịga phọ ịpe Ẹnaan ịngo bọ inyina. Kéḍighi mụdi rịkpaariom ni inyina, ipoghom bịdi ophooph ologhi, ịdipho ẹḅeeraan bọ Ẹnaan. Kẹ́tuan sụo kụ eḍighi ghan oḍighi phọ anyina, ịsighe ḍịḅeeraan okumu Ẹnaan kụ eḍighinom ghan.

³ Kẹ́pamam ḍịikpara ạḍighaagh bụphe ọḅogh bọ ọlogh ḍịghaagh phọ anyina. Iḍighi we dị bịdi kọtuughaany ghan,

⁴ pịdi mem mọ kogananami bọ Uw-ẹmhu Opoghom Iyool-Ịga phọ, nyina ẹzola ḍughuuph iphelegbe dị kẹ́ḅuura.

⁵ Nyina ugheel phọ, ịtuugh igina phọ ịduon phọ kẹn kụ esooromi loor anyina ẹngo ikumoor awe phọ. Kụ aḍita phọ anyina ẹkpologhian ạsuoma osooromi aloor dị oniin kakumu ghan ạngo nyoniin, ịdi eḍighi bọ ạḍinya iigbia phọ rẹḅem ghan mọ, “Ẹnaan rẹḅitonaan ghan ni bụphe robaga bọ kẹngo ooḅi ọghor bụphe osooromi bọ loor.”

⁶ Isooromi ni loor anyina sịphe ḍịghaagh iphelegbe phọ Ẹnaan, pịdi ạḍighaagh anyina kụ eḅetenu mem mọ Ẹnaan egu bọ.

⁷ Ịnyaariom nyọdi oomo phọ ịiḅaghami phọ anyina, ịdi eḍighi bọ ọdi kụ riiko inyina.

⁸ Iimhanham, egona loor. Eru ịlogh ni inyina ḍien kụ reeghirogh ghan ịdipho ạnam-dịka dị regbophoghu ọwa oye lọ ọdi kạba.

⁹ Imiighe omeeraam mọ anyina ẹmerenyan Eru, elegheri mọ iniin phọ ọdo ịminimiin phọ kụ edianaan ni bụo oomo areelhe aḅirini phọ momeeraam bọ.

¹⁰ Kụ nyina ẹmiinom mọony amem bịn Ẹnaan ọnma ighirigiir phọ ịmagh bọ inyina ọḅophoghan rꞌaKraist ophin aani abin igbogh kꞌagee-pọ phọ ọdi, kimuneni ni inyina, imiighe inyina, ịngo inyina ịnyaam, iphighi inyina ẹkparami.

¹¹ Ịikpo phọ ịlo ọdi ni kꞌagee-pọ kꞌagee-pọ. Ẹrol li ịdipho!

Iipuruan

¹² ẠSailas, ọnyo asiya phọ mị aḍuom bọ ni ologhi, kụ ụlhoghonaan ịmi ḍịghaagh ọge ọony ạḍinya phọ ạḍien oruom anyina. Mị rạwa ni ọkparami iloghi anyina, ḅịle rꞌọghaaph omitiom ọḅeni anyina mọ ẹphen kụ ẹmhu ọghor phọ kꞌẸnaan. Kẹ́kporokporo.

¹³ Ạbuo ạsiosi phọ ạBabilon Ẹnaan ẹsaḅar aani bọ, rꞌạMak ọony phọ ạmi mipuru inyina.

¹⁴ Oniin aghurughiom nyoniin ẹphomoghian! Ẹepho ẹrolonaan oomo phọ anyina aKraist kụ ạmoogh bọ!