1 Pita 3 - Ạḍinya Iigbia

Aburulhom rꞌạnmariir

¹ Nmạriir ilom, isooromi ghan kẹn loor ẹngo burulhom mọ anyina, pịdi ạroozo phọ anyina eḍur buniin ạbuphe kọ̋naghanan bọ ọghaaph phọ Ẹnaan ẹloghom aani. Rꞌekpo ọnhu bịn nyina kẹ́kaaph ghan,

² ịdi eḍighi bọ kọmiin ghan ni mọ ạroozo phọ anyina ẹserere ni, ḅịle mọ nyina ẹlogh ni eegu Ẹnaan.

³ Ẹnighe phọ anyina kíḍighi ịlo ạraraar dị rọmiin ekpeḍien, ịdipho oselemian ạsilaal, rꞌọloghoḍian asigol, rꞌoonmeeghi iinmenan!

⁴ Ẹnighe phọ anyina ghụn eḍighi nyẹpe rọ́miin ghan bọ ekpeḍien phọ, ịdipho osooromi aloor rꞌọbolobolo ologhi! Ịphen phọ réḍighi ghan igbaany, kụ ẹman kẹn ịyaar iboom ghisigh Ẹnaan.

⁵ Gediidi, abugey ạnmariir phọ oḍuom bọ ologhi Ẹnaan ụnighe ẹnighe osooromi ghan aloor ọngo aburulhom ạbidi.

⁶ ASera ạmoogh ni ẹzo phọ ẹphen phọ. Ọdi ạnaghanan ni Ebraham kụ ạmagh ghan nyọdi mọ “Oye phọ.” Nyina eḍighi ghan igey ḅịle ịyaar íkiilaan, pọ nyịidipho nyina ạnmanyaan aSera.

⁷ Nyina aburulhom mọ kẹn, ịdipho nyina erughom bọ nmạriir phọ anyina, ilegheri ni mọ bịdi ịnyaam ụ́moogh, kụ ịtuan ịduon phọ eghueni ghan bịdi, ịdi eḍighi bọ bịdi rꞌanyina kụ kẹḅophoghan ni epin aani bin aghuḍum kꞌagee-pọ phọ Ẹnaan rẹngo ghan bọ. Ịtuugh ịduon phọ kụ ẹrol, ọbo ịyaar kẹeḅaghami ghan bọ ịiḅereghi phọ anyina.

Ikol oḍighi ghan ịpe ẹnighe bọ ẹmiinom

⁸ Ịlo oseeriom ọghaaph phọ: oomo phọ anyina ịḅoph iloghi, ẹmoogh ghan igbiririph. Ịpomoghian ịdipho ạnmuny-onhiin. Oniin ạnma ghan nyoniin ighirigiir, esooromi ghan loor anyina.

⁹ Kẹ́sighe ghan ịkaraph ẹkpiom ịkaraph. Kẹ́sighe ghan kẹn igurughian ẹkpiom igurughian. Ịngo ghan ghụn bịdi ḍịseph, ịdi eḍighi bọ mem mọ Ẹnaan ịmagh bọ inyina ọdi aguanaan ọngo anyina ḍịseph.

¹⁰ Ịdipho ạḍinya iigbia phọ rẹḅem ghan bọ mọ, “Oye lọ rạwa ọghelom aghuḍum mọ ọdi rꞌọrol ọteeny aani igey, asoph ọkaraph ọghaaph rꞌọgbaaghi ghan ọkpe akureri!

¹¹ Ọdi ạwile yogh oḍighi ghan ịkaraph aḍighi ghan igey! Ọdi ạwa ghan ẹepho kụ aphorogh ạkpaariom,

¹² ịdi eḍighi bọ Ọmoogh-we phọ agbi ni riḍien ọdi esi awe aruukuan phọ, ạḅile rạnaghanan ghan ịiḅereghi phọ ạbidi, kụ rạḅitonaan ghan ni bụo ạsipioghom mọ.”

¹³ Ạnhian nụun kụ kiḍighi inyina ịyaar, eḍighi ịyaar dị ekpom anyina ẹghologhol ghan ni oḍighi ịpe ẹnighe bọ.

¹⁴ Kụ ghạlamo nyina ighol li oḍighi ghan ịpe ẹnighe bọ kụ rẹmiinom, pọ iboh kꞌẸnaan kịrolonaan ni inyina. Kékiilaan ghan we. Kémeera mọ bịdi ịngo inyina okaphian oomiigh.

¹⁵ Ịlogh eegu Kraist sịphe iloghi phọ anyina, eḍighi nyọdi Ọmoogh-we phọ anyina. Iikolobian ghan oomo amem ọphagharanaan dị nyina kẹngo ghan tọrobo oye lọ ịḅeni inyina mọ ịkaaph ẹmhu oḍuom ologhi phọ nyina ẹmoogh bọ ẹḅeni nyịno.

¹⁶ Kụ ịkaaphom ghan osooromi aloor rꞌeghuan. Iloghi anyina inyina kị́gurogh rꞌamem, pịdi mem lọ ironyon inyina osiphe ghan umugholoor bụphe olegheri bọ mọ nyina ạbuo aKraist kụ rọkaaph ghan bọ ọphuenom iiḅi ạroozo phọ anyina.

¹⁷ Ịyaar phọ eḍighi bọ, lọ Ẹnaan emeera ni, pọ ịminimiin dị oghol oḍighi igey kụ rọmiinom kụ ịnighe epu ịlo oḍighi ịkaraph.

¹⁸ AKraist aghol ẹmhu anyina kụ amugh bọ. Ọdi ạsighe loor phọ ọdi, aḍighi ọmur rꞌiphorobo dị owophom ịkaraph mem bịn ḅeer ọmadan. Ogey oye kụ ạar ḍuugh ạbukaraph awe amugh, pịdi ịsighe inyina osiemi kꞌẸnaan. Ughiigh ni ḍizu phọ ọdi, kụ ọngo ghuḍum uwaloor phọ ọdi.

¹⁹ Kụ ọdi ạrol dọl uwaloor kụ ạḍua bọ ạghi agbeel ạḅeni ruwaloor phọ ịpe ọkasaghiom bọ.

²⁰ Ịphen phọ aruwaloor awe phọ ạbuphe Ẹnaan ụ́naghanan bọ mem mọ dị ạmoogh bọ ni ọkparam akori riiḍio phọ ịpe aNoa rạka bọ oboom oghuugh phọ. Ọphaanya awe ni bịn kụ ụrol bọ ologhi oghuugh phọ. Bụen phọ kụ ẹdi ọphel bọ otene sịphe ạmuum mọ.

²¹ Ạmuum mọ ạmuen phọ ạkighom mụphe robur ghan bọ ọphelom anyina. Owur ạmuum mọ kọ́ogbirinaan ẹenir aloor bịn, ọgba ghan omitiom rꞌophooph ologhi mọ omeeraam ni Ẹnaan. Owur ạmuum mọ rạtuan ghan ịdipho ạJizos Kraist aḅetenu bọ sịphe aḍuugh phọ kụ kịphel inyina.

²² ẠJizos Kraist phọ magheel kꞌạke odi ḍịghaagh elhiom Ẹnaan, rapogh ghan oomo ạruukpaany phọ Ẹnaan, rꞌịtooghi phọ rꞌịikpo phọ edi bọ kꞌạke.