1 Pita 2 - Ạḍinya Iigbia

Ẹko aghuḍum mọ ḅịle rꞌaweye eelhe aruukuan phọ

¹ Loor ịphen phọ, ịbile yogh ịghughian, rꞌiigbegheḍiom, rꞌiituma, rꞌologhi ẹḍim, rꞌọphue aḍien.

² Ịkigh imoom ạnmuny, ẹwa ghan mụserereeny ạmamaam aruwaloor phọ kụ ẹmaam ọbo nyina ephoph ẹmoogh pẹleeny,

³ ịdi eḍighi bọ nyina mẹenema ọnma ighirigiir Ọmoogh-we phọ.

⁴ Itu ẹteeny Ọmoogh-we phọ aḍighi bọ ẹko aghuḍum mọ aweye oghel bọ, kụ Ẹnaan ẹsaḅar bọ ni ẹmaghami ịyaar.

⁵ Itu ịsighe inyina ịdipho ạroko aghuḍum ọloghom otu ịiḅereghi aruwaloor. Iḍighi bụpinyon rịkia aruukuan, ẹphinyon ghan rịkia aruwaloor dị Ẹnaan kekol Jịzos Kraist kụ ele ghan,

⁶ ịdi eḍighi bọ ạḍinya iigbia phọ ẹḅem ni mọ, “Ịnaghan, mị ạsaḅar ri ẹko ogbo dị ẹman ịyaar ragim ẹpe Zạyon, kụ oye lọ ameeraam nyọdi kạ́moogh mabi.”

⁷ Ẹko phọ ẹphen phọ ẹman ni ịyaar iboom esi anyina phọ memeeraam bọ, kụ esi ạbuphe úmeeraam bọ, “Ẹko phọ ạbuloghom ruutu phọ oghel bọ kụ mẹḅile eḍighi ẹko ogbo,”

⁸ ḅịle kẹn “Ẹko dị reḍighi ịdi awe kokpetaan ghan rꞌaḍighiigh dị keḍighi ịdi bịdi komeleghu.” Bịdi rookpeteghaan ghan, ịdi eḍighi bọ bịdi ụ́naghanan ọghaaph phọ Ẹnaan, ịdipho ọgianaan bọ bịdi.

⁹ Kụ nyina awe dị Ẹnaan mẹsaḅar, ariil ạrikia kꞌọdaam, ạbuo eelhe aruukuan, awe dị Ẹnaan kụ ẹmoogh, mọ ịkaaph emitiom iiḍighi ịiḍaany ọpo ịmagh bọ inyina ẹku ufiri phọ, kụ ịsighe bọ inyina ạlogh ẹku ạḍiikia ạḍiḅaal phọ ọdi.

¹⁰ Nyina ítu weye Ẹnaan mem dị eten, kụ nyịidipho nyina aweye ọdi; inyina ighirigiir ị́nma mem dị eten, kụ nyịidipho mịnma inyina ighirigiir.

Ịtol dọl awe dị roḍighi oḍighi kọngo Ẹnaan

¹¹ Iiḅi asiya, ịdipho nyina eḍighi bọ buteneneen dị eru iiruen sịen aḅirini phọ, mị rịiḅereghian ni inyina mọ ịkporion rạghaagh ịkaraph ạruuphua iphulupul phọ ịpe retuphiom ghan bọ ẹgham ruwaloor phọ anyina.

¹² Ẹzo phọ anyina ogbo aruuruen phọ ẹmaar eeleeny, ọbo ghạlamo bịdi ụghaaph ni mọ nyina reḍighi ghan ịkaraph, bịdi ọmiin ghan iiḅi iiḍighi phọ anyina kụ oboom Ẹnaan, ḍio phọ dị katu bọ!

¹³ Ịtuan ẹmhu Ọmoogh-we phọ ẹnaghanan ghan oomo ịtooghi awe ịikpo, mꞌuwo ẹmha phọ aRom aḍighi bọ ni zin ịtooghi phọ,

¹⁴ mꞌạraalha phọ dị ratom ghan bọ ni mọ ọghi ọliom bụlo oḍighi ịkaraph, kụ ọseph bụlo oḍighi igey phọ.

¹⁵ Ịphen phọ kụ ịḅeeraan Ẹnaan: mọ iiḅi iiḍighi phọ anyina eḍighi ghan dị ạbuo elegheri ịyaar phọ rọkaaph ghan bọ ọghaaph elologhi phọ koḅoroghian.

¹⁶ Ịtol ghan dọl awe dị mokpetenaan, kụ ọlo kẹ́sighe okpetenaan phọ anyina ezua eekpereghiom ịkaraph. Ịtol dọl awe dị roḍighi ghan oḍighi kọngo Ẹnaan.

¹⁷ Ịlogh eghuan oomo awe. Ịpomoghian bụo asiya phọ. Ịlogh eegu Ẹnaan. Ịlogh eghuan uwo ẹmha phọ aRom.

Ịdaph ịgbaranuom aruwol phọ aKraist

¹⁸ Nmụny-otu, ịsighe eghuan kụ esooromiom loor anyina ẹmadan ẹngo bụrude-otu phọ anyina. Kẹ́tolom ịduon phọ bụphe ọmoogh bọ igbiririph rꞌọnma ighirigiir phọ bịn, ịḅaram aani ni bụphe ẹzo phọ ẹkpar bọ.

¹⁹ Ịdipho nyina mạar ị́piom bọ kụ nyina erue ni ẹkparam ịmiinian phọ ịphen phọ, Ẹnaan kịngo ni inyina ḍịseph, ịdi eḍighi bọ nyina eseere ni ologhi ịpe ọdi rạwa bọ.

²⁰ Ạḍiseph dị nyina kẹmoogh ílho, eḍighi ịyaar dị nyina rẹkparam ịmiinian dị ọtuan ọpioman anyina kụ rịmiine inyina. Ẹnaan kịngo ghụn ni inyina ḍịseph, eḍighi ịyaar dị nyina ị́pioman kụ rẹkparam ni ịmiinian phọ.

²¹ Ịphen kụ ịdi Ẹnaan ẹtuan bọ kụ ịmagh bọ inyina: mọ aKraist aghol ẹmhu anyina kụ ạmiinom bọ mọ ịsighe nyịno ẹmaam ghan, pịdi nyina ẹdaph ghan ịgbaranuom aruwol phọ ọdi.

²² Ọdi ịkaraph óḍighi. Ọghaaph iigbegheḍiom ọ́ḍua ọnhu ọdi omite.

²³ Oronyon bọ nyọdi, ọdi óronyon aani oḅulemian. Ọmiine bọ nyọdi, ọdi ọ́paaghian ịpa. Ọdi ạsighe ghụn oḍuom ologhi phọ ọdi ạkpasi esi ọpo raagbo ghan bọ eelenyan ịiruen phọ.

²⁴ AKraist rꞌaloor ọdi ạsighe ịkaraph phọ ayira ạḅama ẹmhu ọdi sịphe oreeny phọ, bịn ịkaraph kụ iyira ị́moogh mun, aruukuan kụ mẹḅile ịmoogh iyira. Asigbir phọ ẹrol bọ loor phọ ọdi miikonom inyina.

²⁵ Ọbo nyina ịghigh iyool-ịga dị repe eten, kụ nyịidipho nyina meḅula ẹteeny Okoriom Iyool-Ịga phọ rꞌOpoghom aruwaloor phọ anyina.