1 Pita 1 - Ạḍinya Iigbia

¹ Mị aPita otelhedom mọ ạJizos Kraist kụ ụge ḍịnya phọ ạḍien riruomaan inyina phọ Ẹnaan ẹsaḅar bọ kụ erughogh bọ ẹwalala reelhe phọ ạPontos rꞌaGaletia rꞌaKapadosia rꞌEsia rꞌaBaitinia.

² Ẹnaan Ọde phọ melhegheri ni etene igbaany kụ ịsaḅar bọ inyina, kụ Uwaloor Iigbia phọ iḍighi inyina we aruukuan, pịdi nyina ẹnaghanan Jịzos Kraist, ọsighe ịḅaal phọ ọdi iwophom inyina. Ạḍiseph rꞌẹepho ẹbalabala ni ịrolonaan inyina!

Ạdol oḍuom ologhi

³ Ạḍiseph ẹrolonaan Ẹnaan rꞌỌde phọ ạJizos Kraist Ọmoogh-we phọ ayira. Loor oboom ọnma ighirigiir phọ ọdi, ịdipho ọdi aḅeton bọ Jịzos Kraist sịphe aḍuugh phọ, mọḅile ụmar iyira ọlogh ghuḍum oḍuom ologhi,

⁴ mọ yira kopin aani bin ạraraar phọ Ẹnaan eseenaan bọ ẹpe kꞌạke we phọ ọdi. Ạraraar phọ edi ni esi dị kópiemi, ḅịle kẹ́ḅor ẹpuughi.

⁵ Ịphen phọ iseenaan ni inyina ạbuphe mọtuan bọ omeeraam mọ oḍigh ḍibuo ịikpo phọ Ẹnaan, kụ rokori ghan bọ pẹleeny phọ ọpo mookolobian bọ oseere ịlo ogananami ruukuna phọ.

⁶ Ịtuan ni ịphen phọ ẹmoogh ọḅaal ologhi, ghạlamo ịdipho ẹkpe bọ ni okururu mọony amem mọ ạmuen loor ịminimiin kịrokiro phọ nyina rẹmiinom bọ.

⁷ Ịphen phọ ịlo olegheriom mọ omeeraam mọ anyina ogey ni. Gol dị kạpu ghan ni bịn ọsighe ghan ni nịan kụ ropoghom mọ ogey ni. Ịduon phọ kẹn kụ ẹdi kopogh aani ni omeeraam mọ anyina ạman bọ ni ịyaar iboom apu gol, pịdi olegheriom mọ katue ni ạkparam ạteeny ḍio phọ kogananami bọ Jịzos Kraist ọbo nyina ẹmoogh ḍịseph rꞌeegu ḅịle rꞌeghuan.

⁸ Nyina nyọdi kẹ̋miin ghan ni kụ nyina ẹpomoghian ni nyọdi. Nyina nyọdi nyịidipho rẹ́miin ni, kụ nyina emeeraam bọ ni nyọdi. Kụ nyina rebo ni iboom iboh dị anem kétue ẹkaaph,

⁹ ịdi eḍighi bọ aruwaloor phọ anyina rẹmoogh pẹleeny phọ ọpo aḍighi bọ ibugha omeeraam mọ anyina.

¹⁰ Ariil phọ Ẹnaan uḅiligha ni ọwaaghi ghan ịlo olegheri ẹmhu ạpeleeny phọ ọphon phọ, kụ bịdi ụmiin ni ịmiin dị ẹkpulughiom inmo phọ ịphen phọ Ẹnaan kịngo bọ inyina.

¹¹ Bịdi ụwaaghi ghan ni olegheri amem mọ Uwaloor phọ aKraist ạrol bọ loor phọ ạbidi ạghaaph ghan bọ aghol, rꞌọdo phọ erumom mọ. Uwaloor phọ aKraist ạḅeni ghan ni bịdi ịminimiin dị aKraist kạmiinom, ḅịle rꞌigbogh dị kẹdapham sịphe.

¹² Ẹnaan ịghaaph ni emitiom eḍeenaan riil phọ ạbuen phọ mọ oḍighi phọ bịdi roḍighi bọ kọ́lo ạsuo ạbidi, ọlo ạsuo anyina ghụn ni. Kụ nyịidipho bụphe Uwaloor Iigbia phọ kꞌạke ạngo bọ ịikpo ọghaaphom ooḅi ọghaaph phọ, momitiom ịphen phọ ogananami ịḅeni inyina. Ịphen phọ ạraraar dị rꞌạruukpaany phọ Ẹnaan bịn roḍulha ni loor ọwa olegheri aani.

Ịtol dọl aruukuan

¹³ Loor ịphen phọ, ịpam ni iloghi anyina ẹkparami kụ ekoriom mem oḍighi omitiom mọ. Igona loor, ẹkpasi oomo oḍuom ologhi phọ anyina esi ooḅi ọghor phọ nyina kẹmoogh bọ mem mọ kogananami bọ Jịzos Kraist.

¹⁴ Ịdipho nyina meḍighi bọ nmụny eeḅi ẹzo phọ, ịnaghanan ghan Ẹnaan. Kémeera mun mọ ịkaraph ạruuphua phọ nyina ẹmoogh bọ mem mọ ọpo nyina Ẹnaan ke̋lhegheri bọ kụ ẹḅile ekpophonom ghuḍum mọ anyina.

¹⁵ Ịtol ghụn dọl aruukuan esi ạtorobo ịyaar lọ nyina reḍighi, ịdipho Ẹnaan phọ ịmagh bọ inyina eḍighi bọ oye aruukuan phọ.

¹⁶ Ịdipho ạḍinya iigbia phọ rẹḅem ghan bọ mọ, “Iikuan ghan, ịdi eḍighi bọ mị oye aruukuan.”

¹⁷ Ịdipho mem lọ nyina rẹeḅereghi Ẹnaan phọ repogh ghan bọ oḍighi ạtorobo oye kẹtuugh ịiruen esophonaan kụ nyina rẹmagh ghan bọ mọ “Ọde”, ịsighe nụun oomo phọ aghuḍum mọ anyina asugha bọ sịen ade phọ eghueniom nyọdi.

¹⁸ Tọ nyina elegheri ni ịdi ophiemi kụ ịtagharanam bọ inyina sịphe ạdol isa phọ ạburude ạburude phọ anyina ịrolomi bọ inyina. Úḍighinom ịyaar dị kẹḅuura ịdipho asilva rꞌagol.

¹⁹ Ụsighe ghụn ịḅaal phọ aKraist ẹman bọ ni iboom kụ ịtagharanam bọ inyina. AKraist phọ ạghigh mọony oyool-ọga dị rꞌịyaar ị́biph, ḅịle kẹn ẹgha úḍigh.

²⁰ Ẹnaan ịsaḅar ri nyọdi ẹsighe kụ ogbi bọ ọlem aḅirini phọ, kụ ẹtuan rụmhu anyina egananami nyọdi sịen ariiḍio ekureriom mọ.

²¹ Nyina mẹtuan nyọdi emeeraam Ẹnaan phọ eḅeton bọ nyọdi sịphe aḍuugh phọ ẹngoom eghuan, kụ loor ịduon phọ nyina ẹkpasi omeeraam mọ rꞌoḍuom ologhi phọ anyina esi Ẹnaan.

²² Nyịidipho phọ nyina mẹnaghanan bọ igey phọ eselemian loor phọ anyina, dị tụtu ẹkuami ẹphomoghian bụo asiya phọ anyina, oniin ạphomoghian nyoniin rꞌoomo ologhi ọdi ạmadan!

²³ Ẹnaan mẹsighe ekpo ọnhu aghuḍum mọ ọdi edi ghan bọ kꞌagee-pọ phọ ịmaram inyina; nyina meḍighi nmụny Ọde dị rámugh ghan, odi ghan kꞌagee-pọ.

²⁴ Ịdipho ạḍinya iigbia phọ rẹḅem ghan bọ mọ, “Oomo awe phọ ọkighogh rọogho, kụ oomo eghuan phọ ạbidi ẹkighogh ipoola ạroogho phọ. Ạroogho renyororo ghan ni, ḅịle kẹn ipoola rẹkar ghan ni,

²⁵ kụ ọlo ikpo ọnhu Ọmoogh-we phọ edi ghan ni kꞌagee-pọ.” Ikpo ọnhu phọ ịphen phọ kụ ooḅi ọghaaph ọghaaph bọ ịḅeni inyina.