1 Krọnikuls 9 - Ạḍinya Iigbia

Awe dị origheel ẹpe ạdol iiruen phọ

¹ Oomo awe phọ Ịzirel ụgeeghi ọdaphan rughunotu kụ ịphen phọ ụlogh sịphe Ạḍinya Ạbudaam mọ Ịzirel. Ụsighiogh ni ọḍuanam we phọ aJuda ogheelom Bạbilon esi ọliom esi ạsipioghom mọ ạbidi.

² Ạbuḅel dị origheel ọteeny ruphua ạbidi sịphe igbogh ạramha phọ ụḅaraghiom oopho awe ạbuo Ịzirel, ariil ạrikia, ạbuo aLivai, rꞌạbuo iiḍighi sịphe Otu Ịiḅereghi phọ.

³ Awe arughunughun phọ aJuda, ạBenjamin, Ifraim rꞌạManase ụghi ọrol ẹpe Jeruselem.

^4-6 Ọrol bọ 690 arughunotu ạbuo eghun phọ aJuda dị ọrol ghan ẹpe Jeruselem. Ạnmuny ạnmuny ạPerez, ọony phọ aJuda, ụsighe mọ oḍiemiom ạbidi Utai, ọony phọ Amihud rꞌọony ọony Ọmri. Ạbunon ạburude ạburude ọdi uḍighi Imri rꞌaBani. Ạnmuny ạnmuny aSela, ọony phọ aJuda, ụsighe mọ oḍiemiom ạbidi Asaya dị aḍighi uwo ẹmhu eghunotu phọ. Ạnmuny ạnmuny aZera, ọony phọ aJuda, ụsighe mọ oḍiemiom ạbidi Jẹwel.

^7-8 Bụen kụ ạbuo eghun phọ ạBenjamin dị ọrol ẹpe Jeruselem: ASalu ọony aMesulam, ọpo aḍighi bọ ọony aHodavaya, ọony phọ aHasenua Ibneya ọony aJeroham Ela ọony Uzi ḅịle ọony ọony aMikri AMesulam ọony aSefataya, ọpo aḍighi bọ ọony aRewel, ọony phọ Ibnaija.

⁹ Ọrol bọ 956 arughunotu eghun phọ ẹphen dị ọrol ghan sịphe. Oomo phọ ạbuphe ọgo bọ sịen uḍighi ruwo ẹmhu arughunotu.

Ariil ạrikia dị ọrol ghan ẹpe Jeruselem

^10-12 Ariil ạrikia phọ ạbuen ụrol ghan ẹpe Jeruselem: AJedaya, aJehoyarib, rꞌaJakin, Azaria ọony ạHilkaya (ogbogh ọnyo iiḍighi sịphe Otu Ịiḅereghi phọ) ọpo ạburude ạburude ọdi oḍighi bọ Mesulam, Zẹdok, Merayot, rꞌAhitub Adaya ọony aJeroham, ọpo ạburude ạburude ọdi oḍighi bọ Pashur rꞌaMalkaija AMaasai ọony Ạdiel, ọpo ạburude ạburude ọdi oḍighi bọ Jazera, Mesulam, Mesilemit, rꞌImer.

¹³ Ariil ạrikia phọ dị oḍighi rụmhu arughunotu ụman 1,760. Bịdi uḍighi weye ẹmaar esi oomo iiḍighi dị oḍighi yogh sịphe Otu Ịiḅereghi phọ.

Ạbuo aLivai dị ọrol ghan ẹpe Jeruselem

^14-16 Ạbuo aLivai phọ ạbuen ụrol ghan ẹpe Jeruselem: ASemaya ọony aHasiub, ọpo ạburude ạburude ọdi oḍighi bọ Azrikam rꞌaHasabaya, ọpo phọ ọlo ọto aMerari ABakbakar, aHeresi, rꞌaGalal AMatanaya ọony aMika, ọpo ạburude ạburude ọdi oḍighi bọ Zikri rꞌAsaf Obadaya ọony aSemaya, ọpo ạburude ạburude ọdi oḍighi bọ Galal rꞌaJedutun ABerekaya ọony Ạsa ḅịle ọony ọony Elkana, ọpo ạrol bọ eelhe phọ eḍighi bọ ẹlo ẹmha phọ aNetofa.

Abukoriom Otu Ịiḅereghi dị ọrol ghan ẹpe Jeruselem

¹⁷ Abukoriom Otu Ịiḅereghi phọ ạbuen ụrol ghan ẹpe Jeruselem: aSalum, Akub, aTalmon, rꞌAhiman. ASalum kụ aḍighi oḍiemiom ạbidi.

¹⁸ Tụtu ẹteeny mem mọ ạmuphe bụo aropolo phọ ạbidi ụkar kụ ọrol ghan eḍighom ạga phọ emitenom erumuḍio phọ Ọnhu-aḍibuo Amarugh Ọdaam mọ. Ẹḅel amem mọ bịdi ụmeregha ghan ọnhu-aḍibuo arugbogo ạbuo aLivai phọ.

¹⁹ ASalum ọony phọ aKore ḅịle ọony ọony phọ Ebiasaf, ọdi rꞌabumor ọdi weye ọto aKora kụ ukori ghan eḍighom Ogbogo Ạdol Ọmoogh-we phọ, ịdipho ạburude ạburude phọ ạbidi oḍighi ghan bọ mem mọ bịdi kụ okori ghan bọ.

²⁰ ẠFinehas ọony Ẹliazar — Ọmoogh-we phọ ạrolan nyọdi! — ọdi maphogh ghan bịdi mem dị meten.

²¹ ẠZekaraya ọony aMeselemaya aḍighi aani okoriom eḍighom Ogbogo Ạdol Ọmoogh-we phọ.

²² Ookpomoghi, 212 awe kụ ẹdi ọsaḅar bụo okori ghan riḍighom rꞌạrunhu-aḍibuo. Udoghoḍi siḍien ạbidi ọdaphan rạmha phọ bịdi ọrol ghan bọ. ADevid ọdaam mọ rꞌạSamuel oyil phọ kụ usereghi bọ bụrude ạburude ạbidi riisi phọ ịphen ẹmoogh bọ ịyaar oḍighinom mọ.

²³ Bịdi rꞌạnmuny ạnmuny ạbidi ukori ghan rụnhu-aḍibuo Otu Ịiḅereghi phọ.

²⁴ Ọnhu-aḍibuo ạrol tọrobo ịigaany, ephunom, esoorom, emitenom erumuḍio, rꞌemeelom erumuḍio, kụ tọro ekpisi ẹmoogh ogbogh okoriom.

²⁵ Bukoriom mọ ạbuen, abumor ạbidi kụ ụlhoghonaan ghan ḍịghaagh, kụ ọrol ghan ẹpe ạramha phọ, kụ onme ghan iiḍighi okori ghan oḍual ariiḍio mem.

²⁶ Inya abugbogh abukoriom mọ, ạbuo aLivai, kụ bịdi kụ ukureriom ghan iiḍighi. Bịdi kẹn kụ ulegheri ịlo iisoph Otu Ịiḅereghi phọ rꞌạraraar olhe lọ oseere sịphe phọ.

²⁷ Bịdi urugh otuman Otu Ịiḅereghi phọ, loor esi dị iḍighi oḍighi ạbidi ophogh ghan, ḅịle rꞌoghughuron ghan ạrunhu-aḍibuo phọ ḍịroor ạḍiroor.

Ạbunon ạbuo aLivai

²⁸ Bụnon ạbuo aLivai kụ ulegheri ịlo ạrukpa dị ọphamam ghan ịiḅereghi. Bịdi ụsighe ghan omitiom ọḅile ọsighe oḅulemi tọrobo amem lọ ọmoogh ịyaar oḍighinom.

²⁹ Buniin uphogh ghan ịnon ạraraar iigbia, ḅịle rꞌịgbieneen ịbiakpa, miim, mụnum-ọliv, ịnsens rꞌạraraar ịma eḍu.

³⁰ Kụ okirion ghan ạraraar ịma eḍu phọ, oḍighi riil ạrikia phọ.

³¹ Oniin ọnyo aLivai dị oghol mọ aMatitaya, ọkpana ọony aSalum, ọlo ọto aKora, kụ ạpham ghan oḍighi ọgbaghaḍi ghan ạkikia lọ kọpighironom ẹkia.

³² Awe ọto aKohat kụ ạbudi ọngo oḍighi ghan ạbred ịsiphe Otu Ịiḅereghi phọ tọrobo aḍio ophooghian.

³³ Iniin arughunotu ạbuo aLivai kụ ạbudi ọmoor ghan ạsuor ephegh Otu Ịiḅereghi phọ. Abuḍiemiom arughunotu phọ ịphen urugh sịphe iniin aruutu ogiga Otu Ịiḅereghi phọ kụ okpetenaan ịnon iiḍighi loor esi dị bịdi ụnaghanan ghan ḍịmagh ootaany rꞌaḍughul.

³⁴ Awe phọ ọgo bọ sịen kụ uḍighi ruwo ẹmhu arughunotu ạbuo aLivai, ọdaphan oḍigh ạburude ạbidi. Bịdi kụ abuḍiemiom dị ọrol ghan ẹpe Jeruselem.

Ạburude ạburude rꞌẹemara ẹemara ạSol ọdaam mọ

³⁵ ẠJeyel amitiom egbogh ẹmha phọ ạGibion kụ arugh sịphe. Ạnir ọdi ughol mọ aMaaka.

³⁶ Ọkpana ọony ọdi Abdon, kụ ạbunon ạnmuny ọdi ạbuen: aZur, aKis, aBaal, ạNer, ạNadab,

³⁷ aGedor, Ahio, ạZekaraya, rꞌaMiklot,

³⁸ ọde phọ ạSimia. Ạnmuny ạnmuny ạbidi ụrol ghan ẹpe Jeruselem otuman ịnon arughunotu ọto phọ ạbidi.

³⁹ ẠNer kụ ọde aKis, kụ aKis kụ aḍighi ọde ạSol. ẠSol ạmar inya alephiri: Jọnatan, Malkisua, Ạbinadab, rꞌEsbaal.

⁴⁰ ẠJonatan kụ ọde aMerib Baal ọpo aḍighi bọ ọde aMaika.

⁴¹ AMaika ạmar inya alephiri: Piton, Mẹlek, Taria, rꞌEhaz.

⁴² Ehaz kụ aḍighi ọde aJara, ọpo aḍighi bọ ọde ịraar alephiri: Alemet, Azmavet, rꞌaZimri. AZimri kụ aḍighi ọde ạMoza.

⁴³ Ạmoza kụ ọde aBinia. ABinia kụ ọde aRefaya. ARefaya kụ ọde Eliasa, kụ Eliasar kụ ọde Azel.

⁴⁴ Azel ạmar odiiny alephiri: Azrikam, Bokeru, Ịsmael, Siaraya, Obadaya, rꞌaHanan.