1 Krọnikuls 5 - Ạḍinya Iigbia

Ẹemara ẹemara aRuben

¹ Bụen kụ ạnmuny ạnmuny aRuben, ọkpana ọony phọ ạJekob. (Loor esi dị ọdi ạrolan bọ esi rꞌoniin ọyuga ọde phọ ọdi, ọdi aroph ni riliom mọ rọngo ghan bọ ọkpana ọony kụ riliom mọ ịpe phọ ụngo Jọsef.

² Kụ ọlo eghun aJuda kụ ịkaraghi ẹmoogh ịikpo kụ emitiom oye dị ạda oomo arughunughun phọ.)

³ ARuben, ọkpana ọony ạJekob, ạmoogh inya ilephiri: Hanok, Palu, Hẹzron rꞌaKami.

^4-6 Bụen kụ ạnmuny ạnmuny aJoel ẹḍua oghiil esi oghiil: aSemaya, aGog, aSimei, aMaika, aRiaya, aBaal rꞌaBeera. ẠTiglat Pileser, ogbogh ọdaam eelhe phọ Asiria, asiph ẹgham Beera, oḍiemiom eghun phọ, bịn ạghimom ẹnon ekpisi.

⁷ Ịdi olegheri sịphe arughunotu phọ eḍeenaan mọ bụen abuḍiemiom aropolo sịphe eghun phọ aRuben: ạJeyel, ạZekaraya,

⁸ rꞌaBela, ọony phọ Azaz ḅịle ọony ọony aSema, ọlo ọto aJoel. Opolo phọ ọphon ụrol ghan sịphe Aroer ḍịghaagh dị ẹḍua ephunom kụ esi Nebo rꞌaBaal Mion.

⁹ Bịdi ụmoogh igbogh asita ạsinam sịphe ade phọ ạGiliad, kụ bịdi ọmooghom de phọ kꞌẹpe erumuḍio phọ remite ghan bọ ọosaar phọ ẹdalala bọ rẹki ẹpe Ọphiiny aYufratis.

¹⁰ Oghiil ạSol ọdaam mọ eghun phọ aRuben uzuom ni weye aHagrait, ọze bịdi ẹgham, kụ ọmooghom de phọ ạbidi ạga phọ ạGiliad ẹpe erumuḍio phọ remite ghan bọ.

Ẹemara ẹemara ạGad

¹¹ Eghun phọ ạGad ụrol ọghiom ephunom aRuben sịphe ade phọ ạBasan kụ ọkel iboom ạga phọ erumuḍio phọ remite ghan bọ osi Saleka.

¹² AJoel kụ amitiom okumoor ọto, kụ aSafam amitiom ọdi atum pạ. AJanai rꞌaSafat kụ umitiom ịnon aropolo sịphe Bạsan.

¹³ Bụeri phọ awe eghun phọ bụo oḍual aropolo phọ ịphen: Mạikel, Mesulam, Siba, Jorai, Jakan, Zia rꞌEber.

¹⁴ Bịdi ạnmuny ạnmuny Abihel ọony aHuri, bụen ọdaph bọ bụrude ạburude oḅula ọman ịduon: Abihel, Huri, Jaroa, Gịliad, Mạikel, Jesisai, Jado, Buz.

¹⁵ Ahi, ọony phọ Ạbdiel ḅịle ọony ọony aGuni, kụ uwo ẹmhu aropolo phọ ịphen.

¹⁶ Bịdi ụrol ghan de phọ ạBasan rꞌạGiliad, sịphe ạramha phọ edi bọ ẹpe rꞌoomo arere ạroogho phọ aSaron.

¹⁷ (Uukpomoghi ịphen ọge ḍịnya mem aJotam ọdaam mọ aJuda rꞌaJeroboam II ọdaam mọ Ịzirel.)

Awe ẹgham arughunughun phọ orughogh bọ ẹpe erumuḍio phọ remite ghan bọ.

¹⁸ Sịphe arughunughun phọ aRuben, Gạd rꞌạManase ạga phọ erumuḍio phọ remite ghan bọ, ụrol 44,760 awe ẹgham dị ọkar ọtughemi ọmaar ọpham ạrusuaram, arolhool ẹgham rꞌạsikumugh.

¹⁹ Bịdi ụghi ẹgham eenan awe aHagrait phọ aJetur, Nafis rꞌạNodab.

²⁰ Bịdi ụkpasi oḍuom ologhi ạbidi esi Ẹnaan kụ ọoḅereghi mọ ạloghonaan bụno ḍịghaagh kụ Ẹnaan ẹnaghanan ịiḅereghi phọ kụ ẹngo bịdi ọkpar opu esi awe phọ aHagrait rꞌạbuphe ooḍikuan bọ rꞌạbidi.

²¹ Bịdi usiphi rạghaagh ạmulogh aḍien phọ 50,000 ạsikamel, 250,000 iyool-ịga ra 2,000 ịnam adool kụ ọḍuanam 100,000 awe ẹgham ạḍieri phọ ạḍighaagh.

²² Bịdi ụze ni ịbadibadi ạbumulogh-ḍien phọ, loor esi dị ẹgham mọ iḍighi ogbi Ẹnaan. Kụ bịdi ụrol ghan ẹpe tụtu ẹteeny ọsighiogh bọ bịdi ọghimom iiruen ạramha.

Awe phọ ạManase ạga phọ erumuḍio phọ remite ghan bọ

²³ Awe phọ ạManase ạga phọ erumuḍio phọ remite ghan bọ urugh sịphe ade phọ ạBasan dị esi kꞌephunom aBaal Hẹrmon, Senir rꞌEegum ạHermon, kụ aḍita ạbidi ọbugh iboom.

²⁴ Bụen kụ aruwo ẹmhu aropolo phọ ạbidi: Efer, Isi, Eliel, Ạzriel, Jerimaya, Hodavaya rꞌạJadiel. Oomo ạbidi uḍighi ikpolom awe ẹgham, abuḍiemiom aropolo ạbidi dị ọkar olegheri.

Usiphi rughunughun ạga phọ emitenom erumuḍio phọ ọḍuanam

²⁵ Kụ ọlo awe phọ ụ́kpasi oḍuom ologhi ạbidi esi Ẹnaan ạburude ạburude ạbidi kụ ọwile nyọdi, ooseeny ạrumugh phọ Ẹnaan mephorogh bọ ẹsighe sịphe ade phọ.

²⁶ Kụ Ẹnaan eḍighi ịdi aPul ọdaam eelhe phọ Asiria (ọḅile olegheri nyọdi mọ ạTiglat Pileser) azuom ẹmha phọ ạbidi ẹgham. Ọdi ạsighiogh bụo aropolo aRuben, Gạd rꞌạManase ạga phọ emitenom erumuḍio phọ kụ arughemi bịdi ẹpe Hala, Habor rꞌaHara rꞌọgbal Ọphiiny aGozan.