1 Krọnikuls 4 - Ạḍinya Iigbia

Ẹemara ẹemara aJuda

¹ Bụen abuniin ạnmuny ạnmuny phọ aJuda: ạPerez, ạHezron, aKami, aHur rꞌaSobal.

² ASobal kụ ọde aRiaya, ọpo aḍighi bọ ọde aJahat, ọde Ahumai rꞌaLahad, ạburude ạburude awe phọ ọrol bọ ẹpe Zora.

^3-4 AHur kụ ọkpana ọony Ẹfrat, ạnir phọ ạKeleb ọde ọdi, kụ ạnmuny ạnmuny phọ ọdi kụ umitiom bọ egbogh ẹmha phọ ạBetilihem. AHur ạmoogh ịraar alephiri: Ẹtam, Pẹnuel rꞌEzer. Ẹtam ạmoogh ịraar alephiri: Jẹzreel, Ịsma rꞌIdbas rꞌoniin ọnyani Hazelelponi. ẠPenuel kụ amitiom egbogh ẹmha phọ aGedor kụ Ezer amitiom Husa.

⁵ Asihur ọpo amitiom bọ ẹmha phọ aTekoa aphin ịyal ạnmariir Hela rꞌaNaara.

⁶ Ọdi rꞌaNaara ọmar inya alephiri: Ahuzam, Hefer, Temeni rꞌaHaahastari.

⁷ Ashur rꞌaHela ọmar ịraar alephiri: Zeret, Izhar rꞌEtnan.

⁸ AKoz kụ aḍighi ọde Anub rꞌaZobeba, kụ ọde ọde aropolo phọ ụḍua kꞌẠharhel ọony aHarum.

⁹ Oye ạrol li dị oghol mọ aJabez, oye dị ọkar ọlogh eghuan sịphe eghun kꞌạbidi. Onhiin ọdi kụ aghol nyọdi mọ aJabez loor esi dị ẹmaria ọdi iphin iboom.

¹⁰ Kụ aJabez ạaḅereghi aphoghomiom Ẹnaan phọ Ịzirel mọ, “Ụseph ịmi, Ẹnaan, kụ ụngo ịmi de lọ ẹmanam. Tọlan rꞌạmi kụ ụgbole ịmi esi ịkaraph dị ketue ịngo ịmi eephina.” Kụ Ẹnaan eḍighinaan nyọdi ịlom mọ ọdi.

Asiḍien ạbunon ạbuo eghun dị ooghologh

¹¹ ẠKeleb, umor phọ aSuhu, ạmoogh mọony dị oghol mọ aMehir. Mehir kụ ọde Eston,

¹² dị ạmoogh ịraar alephiri: Bẹt Rạfa, Pasea rꞌaTehina. ATehina kụ amitiom bọ egbogh ẹmha phọ aNahas. Ạnmuny ạnmuny awe phọ ạbuen ụrol ghan ẹpe Reka.

¹³ AKenaz ạmoogh ịyal alephiri, Ọtniel rꞌaSeraya. Ọtniel ạmoogh kẹn ịyal alephiri, Hatat rꞌaMionotai.

¹⁴ Mionotai kụ ọde Ofra. ASeraya kụ ọde aJoab, ọpo amitiom bọ Eḍiiny Aweye Ạmaka phọ, sịphe phọ oomo awe phọ uḍighi weye ẹmaar-iiḍighi.

¹⁵ ẠKeleb ọony phọ aJefune ạmoogh ịraar alephiri: Iru, Ela rꞌaNaam. Kụ Ela kụ ọde aKenaz.

¹⁶ ẠJehalelel ạmoogh inya alephiri: Zịf, Zifa, Tiria rꞌẠsarel.

^17-18 Ezra ạmoogh inya alephiri: Jẹter, Mered, Efer rꞌaJalon. AMered aphin Bitiya, ọnyani ọdaam mọ Ijipt, kụ bịdi ọmar ọnyani Mịriam rꞌịyal alephiri Samai rꞌIsba. Isba kụ ạwa bọ amitiom ẹmha phọ Estemoa. AMered aphin kẹn ni ạnir ọlo eghun aJuda, kụ bịdi ọmoogh ịraar alephiri: Jạred ọpo amitiom bọ ẹmha phọ aGedor; Heber ọpo amitiom bọ ẹmha phọ ạSoko; rꞌạJekutiel, ọpo amitiom bọ ẹmha phọ aZanoa.

¹⁹ Hodaya aphin umarani aNaham. Ạnmuny ạnmuny ạbidi kụ umitiom bọ ọto aGam dị orugh ẹpe ẹmha phọ aKeila rꞌopolo aMaakat dị orugh ẹpe ẹmha phọ Estemoa.

²⁰ ASimon ạmoogh inya alephiri: Amnon, Rina, Bẹn Hanan rꞌaTilon. Isi ạmoogh ịyal alephiri: Zohet rꞌạBen Zohet.

Ẹemara ẹemara aSela

²¹ ASela oniin ọony aJuda. Ạnmuny ạnmuny ọdi uḍighi Er, ọpo amitiom bọ ẹmha phọ aLeka; Laada, ọpo amitiom bọ ẹmha phọ aMaresa; ọto ạbuphe olooghi ghan bọ ịyegheyeghe arukpe phọ, bụphe orugh bọ ẹmha phọ ạBet Asbia;

²² Jokim rꞌawe phọ orugh bọ ẹmha phọ aKozeba; rꞌaJoas rꞌaSaraf, bụphe ophin bọ nmạriir ạMoabait kụ ogbi orugh ẹpe Bẹtilihem. (Eḍighinom ạraraar phọ ịphen meḍighi egbaany.)

²³ Bịdi ụlhem ghan roko kꞌọdaam mọ kụ orughogh rạmha aNetaim rꞌaGedera.

Ẹemara ẹemara ạSimion

²⁴ ẠSimion ạmar oogh alephiri: Nẹmuel, Jamin, Jarib, Zera rꞌaSaul.

²⁵ Ọony aSaul ughol mọ aSalum, ọony ọony ọdi mọ aMibsam, kụ ọony ọony ọony ọdi mọ aMisma.

²⁶ Kụ ẹḍua Misma ạḍikool awe phọ uḍighi Hạmuel, Zakur rꞌaSimei.

²⁷ ASimei ạmar ḍioph rꞌodiiny alephiri rꞌodiiny ạnmanyaan, kụ ọlo abumor ọdi ụ́mar ịbadi ạnmuny kụ eghun phọ ạSimion ị́kar ị́bugh ịdipho eghun phọ aJuda.

²⁸ Tụtu ẹteeny mem dị aDevid aḍighi ọdaam, ạnmuny ạnmuny phọ ạSimion ụrologhu rạmha phọ ịphen: Beersheba, Molada, Hazar Sual,

²⁹ Bilha, Ezem, Tolad,

³⁰ Bẹtuel, Homa, Zịklag,

³¹ Bẹt Markabot, Hazar Susim, Bẹt Biri, rꞌaSaaraim.

³² Bịdi ụḅile ni orughogh oogh ịnon ạramha: Ẹtam, Ain, Rimon, Token rꞌAsan,

³³ rꞌạramha dị ekoom kụ ẹghi esi ogbo esoorom rꞌemeelom erumuḍio phọ ẹpe ẹmha Baalat. Ịphen kụ ịdi bịdi oseere ịlo arughunotu ạbidi rꞌariisi dị bịdi ọrol ghan.

^34-38 Awe phọ ạbuen kụ ạbuo ạrumhu aropolo phọ ạbidi: Mesobab, Jạmlek, Josa ọony Amazaya, Joel, Jehu (ọony aJosibiya), ọony aSeraya, ọony Ạsiel, Elioenai, Jaakoba, Jesohaya, Asaya, Ạdiel, Jẹsimiel, Benaya, Zịza (ọony aSifi, ọony Alon, ọnyo ẹemara aJedaya, Simri, rꞌaSemaya). Loor esi dị arughunotu phọ ạbidi iphoph ghan,

³⁹ bịdi ụwalala ọghi ẹpe erumuḍio phọ emeel ghan bọ kụ ọwa osi Gerar kụ ọngo ghan iyool-ịga ịḅal ḍịghaagh emitenom erumuḍio phọ etuman bọ eḍiiny phọ ẹpe egbogh ẹmha phọ edi bọ.

⁴⁰ Bịdi ụmiin ịma ạroogho rꞌade ẹnuum dị edi ekpisi dị ẹyaghagha kụ ẹpho. Awe phọ ọrol bọ ẹpe phọ mem dị meten uḍighi we ạHamait.

⁴¹ Mem mọ ạHezekaya ạda bọ Juda, awe phọ ooghologh bọ ụghi Gerar kụ olhereghi rugbogo phọ rꞌịbam aruutu awe phọ ọrol ghan bọ ẹpe phọ. Bịdi ophorogh we phọ omiteghom bịn ọrol ghan bịn ụ́ḍua mun loor esi dị ạroogho ịḅal iyool-ịga emuza.

⁴² 500 ạbunon awe ạbuo eghun ạSimion ọghi emitenom erumuḍio phọ kụ osi ẹpe Idom. APelataya, aNiaraya, aRefaya rꞌỤziel, ạnmuny phọ Isi, kụ uḍiemiom bịdi.

⁴³ Ẹpe phọ bịdi ụze ni we Ạmalekait dị osugha bịn kụ odi ghan ẹpe kꞌaḍio phọ.