1 Krọnikuls 28 - Ạḍinya Iigbia

ADevid atomoghiom ịlo oḍighi ghan oḍighi Otu Ịiḅereghi phọ

¹ ADevid ọdaam mọ ạto ni ạngo oomo ạbuo iiḍighi Ịzirel mọ ookpomoghan ẹpe Jeruselem. Kụ oomo awe iiḍighi arughunughun, ạbuo iiḍighi phọ ophogh ghan bọ oḍighi ọmar phọ, abuḍiemiom aropolo phọ, ạbuo ophogh aruphua rꞌịnam mọ ọdaam mọ rꞌạnmuny ọdi ọmoogh bọ — ọkar oomo awe iiḍighi otu ọdaam mọ, abugbogh awe ẹgham rꞌikpolom awe — ookpomoghan ẹpe Jeruselem.

² ADevid ạmeera ghisigh ạbidi kụ ạḅaanaan bịdi mọ, “We eelhe ạmi, iler rụru. Mị ụwa ọlogh ogey otu dị koseere Igbe Ịyo phọ, ịkasi ọkpasaghiom aruwol Ọmoogh-we Ẹnaan phọ ayira. Mị maakolobian ọlogh otu ịiḅereghi oghueniom ọdi,

³ kụ ọdi mạḅem mọ mị kụ́logh loor esi dị mị oye ẹgham ḅịle mị mazuughi ịḅaal dị ẹbugh ẹpughan.

⁴ Ọmoogh-we Ẹnaan phọ Ịzirel ụsaḅar ịmi rꞌạnmuny ạnmuny ạmi ọda Ịzirel kꞌagee-pọ. Ọdi ạsaḅar eghun phọ aJuda omitiom oḍiemiom, kụ sịphe Juda kụ ẹdi ọdi ạsaḅar ọto ọde ạmi. Sịphe ọto phọ ọpo phọ, iḍighi ni ḍịḅeeraan ọdi ọsighe ạmi oḍighi ọdaam oomo Ịzirel.

⁵ Ọdi ụngo ni ịmi ịbadi alephiri ạnmuny kụ esi oomo ạbidi ọdi ạsaḅar Sọlomon kụ ọda Ịzirel, ọmar Ọmoogh-we phọ.

⁶ “Ọmoogh-we phọ ụḅeni ịmi mọ, ‘ẠSolomon ọony phọ ạna kụ kạlogh Otu Ịiḅereghi ạmi. Mị mạsaḅar nyọdi oḍighi ọony ạmi, kụ mị kaḍighi ọde ọdi.

⁷ Mị kaḍighi ịdi ọmar phọ ọdi kạtol kꞌagee-pọ, eḍighi ịyaar dị ọdi ạmaar ri ạnaghanan iilogh rꞌịtooghi phọ ạmi ịduon ọdi raḍighi bọ nyịidipho.’

⁸ “Nyịidipho, we ạmi, ghisigh Ẹnaan phọ ayira ḅịle rꞌookpomoghan oomo Ịzirel awe phọ Ẹnaan, mị rịḅeni inyina mọ iiko ẹḅile ẹnaghanan oomo ịlo Ọmoogh-we Ẹnaan phọ ayira mạto ụḅeni iyira, ọbo nyina ẹghelom ịma ade phọ ạḍien, ḅịle ọbo nyina ẹḅogh ẹngo oghiil atum oghiil kꞌagee-pọ.”

⁹ Kụ Sọlomon ọdi ạḅeni, “Mọony ạmi, mị rạḅeni nyịna mọ legheri Ẹnaan ọde phọ ạna kụ ạrolan nyọdi rꞌophooph ologhi dị rạ́bal ịyal yạl. Ọmoogh-we phọ alegheri ni oomo ịitughian ayira rꞌạruuphua. Eḍighi mạar dị nạ ạghi esi ọdi, ọdi kạsighe ni nyịna, kụ ọlo nạ ạgumom ọman nyọdi, pọ ọdi kaghel li nyịna bịn akanam.

¹⁰ Legheri mọ Ọmoogh-we phọ mạsaḅar nyịna kụ ọlogh Otu Ịiḅereghi phọ ọdi. Nyịidipho ḍighi amitiom — kụ aḍighi ạlogh ẹmhu.”

¹¹ ADevid ạngo ni Sọlomon ḍịnya dị ọge ịpe aruutu Otu Ịiḅereghi phọ kọtol bọ, iisoph ooko ghan aruphua rꞌoomo ịpheri phọ iisoph phọ, Ẹphan phọ, esi phọ rọsar ghan bọ ịkaraph kọwilenaan.

¹² Ọdi ạḅile ạngo nyọdi rịnya dị eḍeenaan iisoph lọ kekoom rurugh, rꞌariisi ooko ghan ạraraar iiḍighi Otu Ịiḅereghi phọ rꞌaruunmo lọ moseenaan Ọmoogh-we phọ.

¹³ ADevid ạngoom nyọdi rịnya dị eḍeenaan ịlo ariil ạrikia phọ rꞌạbuo aLivai koḍighi ghan oḍighi sịphe Otu Ịiḅereghi phọ rꞌọmaar osereghi ạraraar arukumuan Otu Ịiḅereghi phọ.

¹⁴ Ọdi aromoghiom ọnhu asilva rꞌagol dị kọlemom rạraar phọ,

¹⁵ ịlo ạtorobo ọtozi rꞌọmeremiom ọtozi,

¹⁶ ịlo ịdaabili asilva, rꞌịlo ịdaabili agol ạnyu esi phọ ọḅam bọ iiḅoghoḍi ạbred lọ ọngo Ẹnaan.

¹⁷ Ọdi ạḅile aromoghiom ọnhu ọkar agol dị kọlemom ịkangi ạralaay, rụkpa rꞌizoki, ọnhu asilva rꞌagol ọlemom ạsigbagba eḍien,

¹⁸ ọnhu ịma agol dị koḍighinom enmeny ạrikia ạnyu esi phọ kọsu ghan bọ ịnsens, rꞌọlemom ạruukpaany aghuḍuul phọ ẹetarion bọ raphaaph phọ ạbidi eekpereghiom Igbe Ịyo Ọmoogh-we phọ.

¹⁹ ADevid ọdaam mọ ạḅem mọ, “Oomo ịphen phọ edi sịphe ạḍinya phọ ọge bọ ọdaphan oromoghiom mọ Ọmoogh-we phọ rꞌaloor kụ ụngo bọ ịmi.”

²⁰ ADevid ọdaam mọ ạḅeni Sọlomon ọony phọ ọdi mọ, “Mọogh ọokpara oḅio ạḅile ạnya. Miigh oḍighi phọ kụ kámeera ịyaar esophoghom nyịna. Ọmoogh-we Ẹnaan phọ, ọpo mị rakumu bọ, kạtolan ni rꞌạna. Ọdi nyịna kághel, kụ kạtolan ni rꞌạna tụtu nạ ạmadan oomo arukumuan Otu Ịiḅereghi phọ ọdi.

²¹ Mọngo ni riil ạrikia phọ rꞌạbuo aLivai phọ iiḍighi sịphe Otu Ịiḅereghi phọ. Awe iiḍighi ạkirokiro ẹmaar ookolobian ni ọloghonaan ạna ḍịghaagh, ḅịle oomo awe phọ rꞌabuḍiemiom mọ ạbidi odi eeḍian ạna.”