1 Krọnikuls 26 - Ạḍinya Iigbia

Abukoriom Otu Ịiḅereghi phọ

¹ Ịphen kụ ịdi odiighi iiḍighi ọngo bụo aLivai dị ọrol ghan bụo okori Otu Ịiḅereghi phọ. Sịphe ọto phọ aKora, oye ạrol dị oghol mọ aMeselemaya ọony aKore ọlo eghunotu phọ Asaf.

² Ọdi ạmoogh oḍual ạnmuny, ọgo ọdaph ikumoor: Zẹkaraya, Jẹdiayel, Zẹbadaya, Jạtniel,

³ Ilam, Jehohanan, rꞌEliehoenai.

⁴ Obed Idom ạrol kẹn ni dị Ẹnaan ẹseph kụ ẹngo ọphaanya alephiri, ọgo ọdaph ikumoor: Semaya, Jẹhozabad, Joa, Sạkar, Nẹtanel,

⁵ Ạmiel, Ịsaka, rꞌaPueletai.

^6-7 ASemaya, ọkpana ọony Obed Idom, ạmoogh odiiny alephiri: Otni, Rẹfel, Obed, Ẹlzabad, Elihu rꞌaSemakaya. Bịdi awe dị oganana ọto ạbidi loor esi ọkar ẹmaar ạbidi; ịyal ạbuphe ọman phọ ụkar kụ olegheri ịyaar.

⁸ Eghunotu Obed Idom uselemi ḍita dị ọman odiinydi rꞌịyal awe dị ọmaar ịlo oḍighi phọ ọphon.

⁹ Eghunotu aMeselemaya uselemi ḍioph rꞌọphaanya awe dị ọkar ọmaar.

¹⁰ Sịphe ọto phọ aMerari, aHosa ạrol li dị ạmoogh inya alephiri: Simri (ọde ọdi aḍighi nyọdi oḍiemiom, ghạlamo ịdipho ọdi úḍighi bọ okumoor),

¹¹ Hịlkaya, Tebalaya, rꞌạZekaraya. Ookpomoghi oḍighi bọ ḍioph rꞌịraar awe eghunotu aHosa dị oḍighi bụo okori Otu Ịiḅereghi phọ.

¹² Bụo okori Otu Ịiḅereghi phọ, udi ọdaphan rughunotu, kụ ọngooghi bịdi iiḍighi sịphe Otu Ịiḅereghi phọ ọdaphan ịdipho ạbuo aLivai phọ.

¹³ Tọrobo eghunotu, úpogh mọ ekom, udi ghan ẹdo olegheri ọnhu-aḍibuo lọ kopogh.

¹⁴ ASelemaya aphin ọnhu-aḍibuo ạga emitenom erumuḍio phọ, kụ ạZekaraya ọony ọdi, oye dị rạngo ghan ogey oroma, aphin nyọpo ephunom mọ.

¹⁵ Ụngo Obed Idom ọnhu-aḍibuo esoorom mọ, kụ ọngo nmụny ọdi okori ghan iisoph dị odoghoḍi rạraar.

¹⁶ Ụngo Supim rꞌaHosa ọnhu-aḍibuo ạga emeelom erumuḍio phọ rꞌỌnhu Aḍibuo aSaleket ẹpe eten dị ẹkel ạnyu. Oḍighi okori ghan, udi oseere kụ buniin ọghi ghan mem mem.

¹⁷ Emitenom erumuḍio phọ, odiiny awe kụ ụrol ghan oḍighi ḍio; ephunom mọ, inya, ḅịle esoorom mọ, inya. Inya awe okori kụ ẹdi ọmeremi iisoph dị odoghoḍi ạraraar ḍio ḍio, ịyal awe osoph.

¹⁸ Etuman ogbogo emeelom erumuḍio phọ, inya awe okori kụ ụrol ghan ọgbal eten kụ ịyal ọgbal ogbogo phọ rꞌaloor.

¹⁹ Ịduon kụ ẹdi oseenaan iiḍighi okori ọngooghi ọto phọ aKora rꞌopolo phọ aMerari.

Ịnon iiḍighi sịphe Otu Ịiḅereghi phọ

²⁰ Bụeri phọ ạbuo aLivai phọ useenaan ọpham esi eekoom Otu Ịiḅereghi phọ rꞌiisoph dị ọlogh ruunmo dị mọḅogh ọngo Ẹnaan.

²¹ ẠLadan, oniin sịphe ạnmuny phọ aGerson, kụ aḍighi ọde ọde ịbadi asita arughunotu, ọloghom eghunotu ạJehiel ọony phọ ọdi.

²² AZetam rꞌaJoel, bụnon ịyal ạnmuny ạLadan, kụ ạbudi oseenaan bọ eekoom Otu Ịiḅereghi phọ rꞌiisoph dị odoghoḍi rạraar.

²³ Udiighi kẹn ni iiḍighi oseenaan nmụny nmụny Ạmram, Izhar, Hẹbron, rꞌỤziel.

²⁴ ẠSebuel, ọlo ọto aGersom ọony phọ aMozis, ọdi kụ ogbogh dị aphogh ghan eekoom Otu Ịiḅereghi phọ.

²⁵ Ọdaphan Eliezer umor phọ aGersom, ọdi asian rꞌaSelomit. Eliezer kụ ọde aRehabaya, ọpo aḍighi bọ ọde phọ aJesaya, ọde phọ ạJoram, ọde phọ aZikri, ọde phọ aSelomit.

²⁶ ASelomit rꞌawe eghunotu ọdi kụ uphogh ghan oomo aruunmo lọ aDevid ọdaam mọ, aruwo ẹmhu arughunotu, abuḍiemiom asita aropolo ḅịle rꞌabugbogh ạbuo ẹgham ọngooghi Ẹnaan.

²⁷ Iniin ạraraar dị bịdi ọsighiogh ẹpe ẹgham mọ usereghi ologhi Otu Ịiḅereghi phọ ọngo Ẹnaan.

²⁸ ASelomit rꞌeghunotu ọdi kụ uphogh ghan tọrobo ịyaar lọ moseere Otu Ịiḅereghi phọ rꞌaruunmo lọ ạSamuel oyil phọ, ạSol ọdaam mọ, Ạbner ọony phọ ạNer, ḅịle rꞌaJoab ọony phọ aZeruya ọpham orumom.

Iiḍighi ạbunon ạbuo aLivai

²⁹ Sịphe ạnmuny ạnmuny phọ Izhar, useenaan iiḍighi oseeriom ghan ạraraar ọngooghi Kẹnanaya rꞌạnmuny ọdi: ọmaar oseere ịgeeghi ịlo oye rꞌoye, oogboonaan ịiruen we phọ Ịzirel.

³⁰ Sịphe ạnmuny ạnmuny phọ ạHebron, useenaan iiḍighi oseeriom ghan oomo ạraraar lọ egbolomaam omeeraam esi Ẹnaan rꞌịtooghi ọdaam mọ, sịphe Ịzirel, ạga emeelom erumuḍio phọ Ọphiiny ạJodan ọngooghi Hasabaya rꞌiḍioph rꞌoḍual okuron asiya ọdi, oomo ạbidi awe dị olegheri.

³¹ AJeraya kụ aḍighi oḍiemiom ạnmuny ạnmuny ạHebron. ADevid rọda bọ Ịzirel rẹman inyadi ạsia, ọwaaghi olegheri ạrol li ịlo oḍigh asiya ạnmuny ạnmuny phọ ạHebron, kụ ọmiin mọ ikpolom awe ẹgham ạbuo asiya phọ ọdi ụrol ghan ẹpe Jazer sịphe ade ạGiliad.

³² ADevid ọdaam mọ ạson ịyaldi rꞌoḍual okuron ikpolom aruwo ẹmhu arughunotu sịphe asiya phọ aJeraya kụ aseenaan bịdi oomo iiḍighi lọ egbolomaam omeeraam esi Ẹnaan rꞌịtooghi ọdaam mọ, sịphe Ịzirel, ạga emitenom erumuḍio phọ Ọphiiny ạJodan — sịphe arere aRuben, ạGad, rꞌạManase ạga emitenom erumuḍio phọ.