1 Krọnikuls 23 - Ạḍinya Iigbia

¹ Mem dị aDevid ọdaam mọ mạkpo, ọdi aḍighi ni Sọlomon ọony phọ ọdi ọdaam Ịzirel.

Oḍighi ạbuo aLivai phọ

² ADevid ọdaam mọ aakpomoghi ni oomo abuḍiemiom mọ Ịzirel rꞌoomo ariil ạrikia phọ rꞌạbuo aLivai phọ.

³ Ọdi agbi ni oomo alephiri ạbuo aLivai dị ọman ịraardi ạsia kụ ẹghiom ạnyu. Oomo phọ ạbidi ụman ni ịraardi rꞌọphaanya ọonir.

⁴ Ọdaam mọ ạson ịyaldi rꞌinya ọonir awe ophogh ghan oḍighi ologhi Otu Ịiḅereghi phọ, odiiny ọonir awe osereghi ghan rịnya oye rꞌoye ọḅile oogbo ịiruen,

⁵ Inya ọonir awe okori ghan, ḅịle rꞌinya ọonir awe oboom ghan Ọmoogh-we phọ ọḅaram iitia dị ọdaam mọ kụ ạngo ịlo ịphen phọ bịn.

⁶ ADevid adi ni we phọ aLivai ịraar asita, ọdaphan ropolo ạbidi: Gerson, Kohat rꞌaMerari.

⁷ AGerson ạmoogh ịyal alephiri: Lạdan rꞌaSimei.

⁸ ẠLadan ạmoogh ịraar alephiri: Jẹhiel, Zetam rꞌaJoel,

⁹ bụphe oḍighi bọ ruwo ẹmhu aropolo ạnmuny ạnmuny ạLadan. (Simei ạmoogh ịraar ạnmuny: Selomot, Hạziel, rꞌạHaran.)

^10-11 ASimei ạmoogh inya alephiri: Jahat, Zina, Jeus, rꞌaBeria, dị ọdaphan ikumoor. AJeus rꞌaBeria ụ́moogh ịbadi ạnmuny ạnmuny; loor ịduon phọ ugbi bịdi mọ oniin ọto.

¹² AKohat ạmoogh inya alephiri: Ạmram, Izhar, Hẹbron, rꞌỤziel.

¹³ Ạmram, ọkpana ọony ọdi, kụ ọde Eeron rꞌaMozis. (Eeron rꞌạnmuny ạnmuny ọdi useere kịro, ophogh ghan ạraraar iigbia phọ kꞌagee-pọ, ọsu ghan ịnsens mem ịiḅereghi Ọmoogh-we phọ, oḍighinaan ọdi oḍighi, ḅịle rꞌọseph awe phọ esi aḍien phọ ọdi.

¹⁴ Kụ ọlo ạnmuny aMozis, oye phọ Ẹnaan, kụ ẹdi ọloghom esi ạbuo aLivai phọ.)

¹⁵ AMozis ạmoogh ịyal ạnmuny, Gersom rꞌaEliezer.

¹⁶ Oḍiemiom esi ạnmuny phọ aGersom kụ ạSebuel.

¹⁷ Eliezer ạmoogh oniin olephiri bịn, Rehabaya, kụ ọlo aRehabaya ạmoogh iboom ạnmuny ạnmuny.

¹⁸ Izhar, ọony phọ aKohat amuneniom bọ ịyal phọ, ạmoogh oniin ọony Selomit uwo ẹmhu ọto phọ.

¹⁹ ẠHebron, ọony phọ aKohat amuneniom bọ ịraar phọ, ạmoogh inya ạnmuny: Jeraya, Amaraya, Jạhaziel, rꞌaJekamiam.

²⁰ Ụziel, ọony phọ aKohat amuneniom bọ inya phọ, ạmoogh ịyal alephiri Maika rꞌIshaya.

²¹ AMerari ạmoogh ịyal alephiri, Mahli rꞌaMusi. AMahli kẹn ạmoogh ịyal alephiri, Ẹliazar rꞌaKis,

²² kụ Ẹliazar amugh dị mọony ụ́moogh, ạmoogh nmạnyaan bịn. Ạnmanyaan phọ ọdi ạalagh siya ạbidi, nmụny phọ aKis.

²³ AMusi, ọony phọ aMerari amuneniom bọ ịyal phọ, ạmoogh ịraar ạnmuny: Mahli, Eder, rꞌaJeremot.

²⁴ Bụen kụ ạnmuny ạnmuny aLivai, ọdaph ropolo rꞌarughunotu, odoghoḍi siḍien ọony ọony loor ạḍinya. Tọrobo ọnyo ạbidi lọ ạman ịyaldi ạsia kụ opuom sịphe, ạmoogh ni oḍighi sịphe Otu Ịiḅereghi Ọmoogh-we phọ.

²⁵ ADevid ạḅem ịduon: “Ọmoogh-we Ẹnaan phọ Ịzirel mạngo ẹepho we ọdi, kụ ọdi rꞌaloor kạtol ghan ẹpe Jeruselem kꞌagee-pọ.

²⁶ Ịduon phọ pọ ị́kpianaan mun dị ạbuo aLivai phọ kọpam ghan Ogbogo Ạdol Ọmoogh-we phọ rꞌoomo ạraraar phọ rọpamam ghan bọ ịiḅereghi.”

²⁷ Ọdaphan oromoghiom mọ aDevid asughanam bọ ọman phọ, udoghoḍi ghan siḍien oomo ạbuo aLivai dị ọman ịyaldi ạsia loor ạḍinya,

²⁸ kụ ọngo bịdi iiḍighi phọ ịphen: ọloghonaan ghan ạḍighaagh ariil ạrikia phọ ọḍua bọ kꞌEeron sịphe oḍighi Otu Ịiḅereghi phọ, ọmaar ophogh arigiga rꞌiisoph phọ, ḅịle rꞌoḍighi ịdi kọ́pue ịyaar lọ eḍighi ẹlo iigbia;

²⁹ oselemi ghan ạbred lọ kọngo Ẹnaan, aflaur lọ ạphighironom ẹkia, akek lọ yist ụ́logh, ịgbaghaḍineen ạrikia ḅịle rꞌaflaur lọ okirionom mụnum-ọliv; ọto ghan kụ olegheri ẹemor ạrikia lọ ọphinyon;

³⁰ ọseph ghan ọḅile oboom Ọmoogh-we phọ ḍịroor tọrotoro ạḍiroor rꞌạtorotoro adulhe,

³¹ ḅịle rꞌạtoro amem lọ ọphinyon rịkia oguom ạnian ọngo Ọmoogh-we phọ ḍio ophooghian, ẹyaal omoom ụnwanyu rꞌịnon ạrayaal. Udoghoḍi iilogh dị ẹmha ọkar ọnhu ạbuo aLivai dị koḍighi ghan oḍighi phọ ọphon tọrobo amem. Useenaan oḍighi ooseeny ghan Ọmoogh-we phọ ọngo bụo aLivai kꞌagee-pọ.

³² Ụngo bịdi ọmaar ophogh ghan Ogbogo Ạdol Ọmoogh-we phọ rꞌOtu Ịiḅereghi phọ, rꞌọloghonaan ạḍighaagh siya ạbidi ariil ạrikia phọ kꞌEeron sịphe oḍighi Otu Ịiḅereghi phọ.