1 Krọnikuls 21 - Ạḍinya Iigbia

ADevid agbiighi we phọ

¹ ASetan eru phọ ạwa ni ọsighe ịiḅaghami oruomaan awe Ịzirel, kụ ọdi aḍighi ịdi aDevid ạatughian ogbi awe.

² ADevid ạto ni ạḅeni Joab rꞌạbueri phọ awe iiḍighi phọ mọ, “Ịki oomo ade phọ Ịzirel, emiigh eniin eekuna kụ esi nyẹeri phọ, egbi we phọ. Mị rạwa olegheri ịlo ọman.”

³ AJoab ạphagharanaan mọ, “Ọmoogh-we phọ ạbughe weye phọ Ịzirel oniin okuron amem apuemi ịphen edi bọ nyịidipho! Oomo ạbidi abutelhedom ạna. Kụ ọlo eeghe kụ iḍighi kụ nạ ogbogh ọdaam mọ rạwa bọ oḍighi ịduon phọ ọngo eelhe phọ apum?”

⁴ Kụ ọdaam mọ ạkpaariom ni mọ aJoab ạnaghanan ịto phọ ọno. AJoab amite, ạghi arelhe oomo eelhe phọ Ịzirel kụ agbi origheel Jeruselem.

⁵ Ọdi ạḅeni Devid ọdaam mọ ḍita alephiri dị mọmanam ọghi ẹgham: 1,100,000 ẹpe Ịzirel, 470,000 ẹpe Juda.

⁶ Loor esi dị ịto ọdaam mọ ị́ḅeeraan Joab, ọdi ógbi we arughunughun phọ aLivai rꞌạBenjamin.

⁷ Ịpe oḍighi bọ ị́ḅeeraan Ẹnaan, kụ ọdi ạliom Ịzirel.

⁸ ADevid ạḅeni Ẹnaan mọ, “Mị masoor oboom ologh oḍighi ịphen phọ. Nyịidipho mị rạaḅereghi ni nyịna mọ seseeny, gbuurogh ịkaraph otelhedom mọ ạna ạsighe. Mị uḍighinom elologhi.”

⁹ Pọ kụ amem dị Ọmoogh-we phọ ạḅeni Gạd oyil Ẹnaan phọ aDevid mọ,

¹⁰ “Kịa ạḅeni Devid mọ mị radianaan nyọdi ịraar asibin. Mị kaḍighi ni tọro ẹlo ọdi ạsighe.”

¹¹ ẠGad ạghi ni ạteeny Devid kụ ạḅeni ịpe Ọmoogh-we phọ ạḅem bọ, kụ apuru mọ, “Eeghe kụ ẹdi nạ kapin?

¹² Ịraar ạsia ịgbakuro, mọ ịraar ạsia oghiil okpetenaan awe ẹgham ạmulogh-ḍien, mọ ịraar aḍio dị Ọmoogh-we phọ kazuom nyịna rꞌelhool ẹgham ọdi, aseere ẹkaraph ẹzegh sịphe ade phọ, ạḅile atom ọokpaany ọdi oleenye aḍuugh oomo phọ Ịzirel? Mạar ạatughian, kụ ụḅeni ịmi ọdo ọphagharanaan lọ mị kaḅulemi ạḅeni Ọmoogh-we phọ.”

¹³ Kụ aDevid ạḅeni Gạd mọ, “Mị odi ẹkaraph esi dị okpetenaan úlho. Kụ ọlo mị ụ́wa mọ awe kụ ụliom ịmi. Ọmoogh-we phọ rꞌaloor ọdi kụ ụliom ịmi loor esi dị ọnma ighirigiir phọ ọdi ạbugh ni.”

¹⁴ Kụ Ọmoogh-we phọ aseenaan ẹkaraph ẹzegh Ịzirel, kụ awe dị omugh ọman oḍualdi ọonir awe.

¹⁵ Kụ ọdi arom ọokpaany kꞌạke phọ mọ aphiemi Jeruselem, kụ ọdi anme ologhi ọdi kụ ạḅeni ọokpaany phọ ọpo phọ rạze bọ we phọ, mọ, “Bịle. Ịpe mẹkasian. Kụl ḍịghaagh ạna.” Mem mọ ạmuen phọ ọokpaany kꞌỌmoogh-we phọ ạtol atuman ẹgbiom ịbiakpa Arauna ọnyo aJebusait.

¹⁶ ADevid ạmiin ni ọokpaany phọ dị ạmeera okuaḍio kụ ạpham elhool ẹgham ọdi ḍịghaagh raakolobian ophiemi aJeruselem. Kụ aDevid rꞌabuḍiemiom awe phọ — oomo ạbidi ọkpologhian rụsuoma ọto — ozumeri rụmhu kụ asighisigh ẹḅogh ude.

¹⁷ Kụ aDevid ạaḅereghi mọ, “Ẹnaan, mị kụ ọpo aḍighi bọ ịkaraph ạpioghom; mị kụ ụḅem bọ ogbi awe phọ. Eeghe kụ ịdi ọdo awe phọ ạbuen phọ moḍighi? Ọmoogh-we Ẹnaan phọ ạmi, ụliom ịmi rꞌọto ạmi, ạwile we phọ ạna.”

¹⁸ Ọokpaany kꞌỌmoogh-we phọ ạḅeni Gạd mọ ạto ạngo Devid mọ ạghi ạkananaan enmeny ạrikia Ọmoogh-we phọ sịphe ẹgbiom ịbiakpa phọ Arauna ọnyo aJebusait phọ.

¹⁹ Kụ aDevid aḅetenu ạghi ịdipho ạGad mạḅeni bọ nyọdi, ịdipho Ọmoogh-we phọ ạto bọ ạngo nyọdi.

²⁰ Sịphe ẹgbiom ịbiakpa phọ, Arauna rꞌinya ạnmuny ọdi rọgbe ghan ịbiakpa, kụ mem dị ạnmuny phọ ọmiin ọokpaany phọ kꞌỌmoogh-we phọ, bịdi oghilighu ạaghian.

²¹ Mem mem mọ Arauna aphogh kụ ạmiin Devid ọdaam mọ dị ratu, kụ ọdi ạwile esi phọ rọtol ghan bọ kọponyon ịbiakpa phọ kụ ạghi azuan ọdaam mọ azumeri ẹmhu kụ aghisigh ọdi ẹḅogh ude.

²² Kụ aDevid ạḅeni nyọdi mọ, “Mị uru ogho esi phọ rọtol ghan bọ kọponyon ịbiakpa phọ ạna, ịlo ọkananaan enmeny ạrikia Ọmoogh-we phọ sịphe phọ, ọbo ẹzegh phọ ẹbile we phọ. Mị kạngo nyịna ọkar ịdi ẹman.”

²³ Arauna ạḅeni Devid mọ, “Tiin, ọde-otu ạmi ọdaam mọ, aḍighi tọro ịlo nạ ạatughian. Pọrono sịen sịnam ịlo oḍighinom ịyaar aghuḍum oguom ạnian phọ. Mịin aani oomo ikpooghi phọ ịphen rọponyonom ghan bọ ịbiakpa phọ, ịlo ọkpooniom ạnian phọ, ḅịle rꞌeḍien ẹlo ọphighironom ẹkia phọ. Mị ạngo nyịna oomo phọ ịne oopho.”

²⁴ Kụ ọdaam mọ ạphagharanaan mọ, “Eeye, mị kạkpe ni nyịna amuneni. Mị kạ́sighe ịyaar ạna, ịyaar dị ị́man mạar, kụ ạphighironom ẹkia ạngo Ọmoogh-we phọ.”

²⁵ Kụ ọdi agho esi phọ rọtol ghan bọ kọponyon ịbiakpa phọ odiiny okuron ipoḍi agol.

²⁶ Ọdi ạkan sịphe phọ enmeny ịyaar aghuḍum Ọmoogh-we phọ kụ ạphighironaan sịphe phọ ẹkia oguom ạnian rꞌịyaar aghuḍum ẹboroph. Ọdi ạaḅereghi kụ Ọmoogh-we phọ ạphagharanaan rꞌạnian dị ẹḍua kꞌạke kụ esoor ọsuughi ạrikia sịphe enmeny phọ.

²⁷ Ọmoogh-we phọ ạḅeni ọokpaany kꞌạke phọ mọ ạgbole elhool ẹgham mọ ọdi, kụ ọokpaany phọ ạnaghanan.

²⁸ Esi ịphen phọ aDevid ạmiin mọ Ọmoogh-we phọ mạphagharanaan ịiḅereghi phọ ọno, kụ ọdi aḍighi rạraar aghuḍum sịphe enmeny esi ẹgbiom ịbiakpa phọ Arauna.

²⁹ Ogbogo Ạdol Ọmoogh-we phọ, ọpo aMozis aselemi bọ ẹpe ẹdala phọ, rꞌenmeny phọ ọsuughi ghan bọ rạraar aghuḍum mọ ịrol li nịiniin esi ịiḅereghi phọ ẹpe Gịbion mem mọ ạmuen.

³⁰ Kụ ọlo, aDevid órue ọ́ghi ẹpe ọoḅereghi Ẹnaan loor esi dị ọdi aghiilaan elhool ẹgham ọokpaany kꞌỌmoogh-we phọ.