1 Krọnikuls 20 - Ạḍinya Iigbia

ADevid aḍigh ạsighe Raba

¹ Emiighom ạrunwanyu ạlha phọ, mem dị ạbudaam rọki ghan ẹgham, aJoab aḍiemiom we phọ ọdi ạghimom de phọ Amon. ADevid ọdaam mọ ọ́ghi, ạrol ghụn ẹpe Jeruselem. Bịdi ughoonyom ni ẹmha phọ aRaba, ozuoghom kụ ọphueghi ẹmha phọ.

² Ẹkaaneen ẹmugh ẹlo Amonait dị oghol mọ ạMolek ịmoogh ni eghoony igbogh dị oḍighinom gol kụ ẹemor phọ ịman esi 34 igbogh ịtoom ẹemor. Sịphe ologhi phọ ịbekulari kụ ịrol dị aDevid ạsighe kụ ạlogh eghoony igbogh ọdi. Ọdi ạḅile awum ịminighan aruphua sịphe ẹmha phọ.

³ Ọdi asiphi we ẹmha phọ kụ ạngo bịdi ịikpara iiḍighi dị ọsighe ghan ịfokofoko, rụsua arukuron rꞌasikubu kụ oḍighinom. Ạtuugh ịphen phọ aḍighi ghan oomo ạramha phọ Amonait phọ. Kụ ọdi rꞌawe ọdi oḅula ẹpe Jeruselem.

Ạraagham dị eenaan rephelegbe aFilistia

⁴ Iru ni ẹteeny mem dị ẹgham ẹḅile emite rꞌawe phọ aFilistia ẹpe Gezer. Phọn kụ amem dị aSibekai ọlo aHusa aghiigh ọgbagara ophelegbe dị oghol mọ aSipai, kụ ọkpar opu we aFilistia.

⁵ Ẹnon ẹgham ịḅile ni emite rꞌawe aFilistia, kụ Elhanan ọony aJair aghiigh Lami, umor phọ ạGolayat ọlo ạGat, ọpo ọsoph phọ ọdi ạmoogh bọ esi ọpham dị ạgbagara mụdi ogbororiom oloom arukpe.

⁶ Ẹnon ẹgham ịḅile ni emite ẹpe Gạt, ekpisi dị ọgbagara ophelegbe ạrol dị ạmoogh odiiny ạsunugh tọrobo ạḍighaagh rꞌodiiny ịlo aruwol tọrobo owol. Ọdi ọnyo ẹemara ịgbagara arephelegbe ageedi.

⁷ Ọdi ạwa ạaram awe Ịzirel, kụ ẠJonatan, ọony aSama umor phọ aDevid, aghiigh nyọdi.

⁸ Ịraar phọ ạbuen, bụphe aDevid rꞌawe phọ ọdi ọze bọ, ạnmuny ạnmuny ịgbagara arephelegbe phọ ẹpe Gạt.