1 Krọnikuls 18 - Ạḍinya Iigbia

We ạbunon areelhe dị aDevid aagulemi

¹ Ịphen phọ reru reten kụ aDevid ọdaam mọ ạḅile azuom ẹgham bụo aFilistia phọ, ạkpar apu bịdi. Ọdi ạaram bịdi ẹmha phọ ạGat rꞌạramha phọ ekoom bọ.

² Ọdi ạkpar apu kẹn we ạMoab dị ọḅile oḍighi we dị ọrol ghan eeḍian ọdi kụ osogh ghan iisogh ọngo nyọdi.

³ ADevid ạḅile azuom Hadadezer ọdaam mọ aZoba sịphe eelhe phọ ạSiria etuman bọ ạga ạHamat, loor esi dị aHadadezer makiton ẹpe eelhe ọphiiny phọ aYufratis rạki ọḅile ọkparami ịtooghi phọ ọdi ẹpe phọ.

⁴ ADevid azirion oniin ọonir arughuugh-ude phọ ọdi, oḍual ọonir awe dị rokiilom ghan rụsu ḅịle rꞌịyaldi ọonir awe dị rotelhe ghan owol ade. Ọdi aseerian ni rụsu dị ọkasian oghiilom oniin okuron arughuugh-ude kụ aḅonyon ruwol ịpheri phọ ạrusu phọ.

⁵ Mem dị awe ạSiria dị ọrol Dạmaskos orom we ẹgham mọ ọghi ọloghonaan ḍịghaagh aHadadezer ọdaam mọ, aDevid azuom kụ ạze ịyaldi rꞌịyal ọonir awe.

⁶ Kụ agbi osereghi awe ẹgham simarugh ẹpe eelhe phọ ạbidi, kụ bịdi oḍighi we eeḍian ọdi kụ osogh ghan iisogh ọngo nyọdi. Ọmoogh-we phọ ạngo ghan ni Devid ọkpar opu tọrotoro esi.

⁷ ADevid azirion ạanyi rụsuaram ikpo phọ oḍighinom bọ gol phọ ịpe awe ịtooghi phọ aHadadezer orool bọ, ạpham agheelom Jeruselem.

⁸ Ọdi ạḅile kẹn ni ạsighiogh agheelom ẹminighan enaba sịphe Tibat rꞌaKun, rạmha dị aHadadezer kụ ạda ghan. (Íbia bịn ạSolomon ạsighe enaba phọ ọphon ạkaaghiom oghuugh, ịidoony ạroko rꞌạraraar arukumuan ịsiphe Otu Ịiḅereghi phọ.)

⁹ AToi ọdaam mọ ạHamat ạnaghan ni mọ aDevid mạkpar apu oomo awe ẹgham mọ aHadadezer.

¹⁰ Kụ iḍighi kụ ọdi arom Jọram ọony ọdi mọ ạghi ạteeny Devid ạmagh nyọdi ạseph mọ maḍighi ịduon ọdi mạkpar bọ apu Hadadezer, ịdi eḍighi bọ aToi rꞌạbidi meeghi ghan ni rạagham. ẠJoram ạpham ni ruunmo asilva rꞌagol rꞌenaba kụ ạghiomonaan Devid.

¹¹ ADevid ọdaam mọ ạḅogh ni rạraar phọ ịphen ạngo mọ ọsighe ghan ọphamam ịiḅereghi, kụ ọdi ạḅaram kẹn silva rꞌagol phọ ọdi ạsighiogh bọ ḍịghaagh areelhe phọ ịpe ọdi mạkpar bọ apu — Idom, Mọab, Amon, Filistia rꞌẠmalek.

¹² Abisai, ọpo onhiin phọ ọdi oghol bọ mọ aZeruya, ạkpar apu bụo Idom sịphe Eḍiiny Aboph phọ kụ ạze we ạbidi dị ọman ḍioph rꞌọphaanya ọonir.

¹³ Kụ agbi osereghi awe ẹgham simarugh oomo eelhe phọ Idom, kụ awe phọ ọrol ghan eeḍian ọdi. Ọmoogh-we phọ ạngo ghan ni Devid ọkpar opu tọrotoro esi.

¹⁴ ADevid ạda ni oomo Ịzirel kụ aagboonaan ịiruen ạtooghi ghan ạngo oomo awe phọ ọdi.

¹⁵ AJoab, umor phọ Abisai kụ uwo ẹmhu awe ẹgham; ạJehosafat ọony phọ Ahilud kụ aphogh ghan ịgeeghi ẹmha phọ.

¹⁶ ẠZedok, ọony phọ Ahitub, rꞌẠhimelek ọony phọ Ạbayata kụ uḍighi riil ạrikia phọ; aSeraya kụ ọgeeghia;

¹⁷ aBenaya ọony phọ ạJehoyada kụ uwo ẹmhu ạbuphe okori ghan bọ Devid; kụ ạnmuny phọ aDevid kụ ọrologhu ghan igbogh ạsidol sịphe otu ọdaam mọ.