1 Krọnikuls 13 - Ạḍinya Iigbia

Ọsighe Igbe Ịyo phọ ẹpe Kịriat Jiarim

¹ ADevid ọdaam mọ ạmoogh ni ruupuruan rꞌoomo awe ẹgham dị ropogh ghan oniin ọonir awe rꞌạbudi ropogh ghan oniin okuron awe.

² Kụ ọdi ạghaaph amitiom ạḅeni oomo awe phọ Ịzirel, “Eḍighi ịdi nyina emeeraam kụ ẹḅile eḍighi ogbi Ọmoogh-we phọ, pọ orom butelhedom ọghiom bụeri phọ awe phọ ayira, ariil ạrikia rꞌạbuo aLivai ẹpe ạramha phọ ạbidi, kụ ọḅeni bịdi mọ ookpomoghan sịen rꞌayira.

³ Reru reten, yira kọki ọsighe Igbe Ịyo phọ kꞌẸnaan, ịpe ọḅitonaan bọ mem mọ ạSol kụ aḍighi bọ ọdaam mọ, otumom ẹphen.”

⁴ Ẹḍogh phọ ịḅeeraan ni we phọ kụ bịdi omeeraam.

⁵ Kụ aDevid aakpomoghi we phọ Ịzirel oomo eelhe phọ, emiigh ọku Ijipt ẹpe ạga ẹsiinyom mọ kụ esi Eḍighom ạHamat ẹpe ạga ephunom mọ, ịlo ọsighe Igbe Ịyo phọ ẹpe Kịriat Jiarim orumom aJeruselem.

⁶ ADevid rꞌawe phọ ụghi ẹpe egbogh ẹmha phọ aBaala, ịduon phọ pọ ẹpe Kịriat Jiarim ẹpe eelhe phọ aJuda, pịdi ọsighe ẹpe phọ Igbe Ịyo kꞌẸnaan ịpe emeera bọ ḍien Ọmoogh-we phọ ọpo ọrolomi bọ ạnyu ạruukpaany aghuḍuul phọ ẹmoogh bọ raphaaph phọ.

⁷ Otu phọ Ạbinadab kụ ẹdi bịdi omitiom Igbe Ịyo phọ kụ ọsighe ọsaany omoom oghuugh-ude. Uza rꞌAhio kụ ụuḅaki ghan oghuugh phọ,

⁸ aDevid rꞌoomo awe phọ rọker rꞌoomo ịnyaam ạbidi oghueniom ghan Ọmoogh-we phọ. Bịdi uti ghan ni rẹne, rạkama rꞌịkpaalaam rꞌạrukuodu.

⁹ Ịduon bịdi ọghi bọ osi esi dị aKidon rạponyon ghan ịbiakpa, bịn ạsinam mọ ekpetaan, kụ Uza ạgbuton ḍịghaagh bịn akoph Igbe Ịyo phọ.

¹⁰ Egina amem bịn Ọmoogh-we phọ ạghagham ologhi Uza bịn aghiigh nyọdi mọ ạtuan eeghe kụ ạḅoghom Igbe Ịyo phọ ḍịghaagh. Ọdi amugh ni sịphe ghisigh Ẹnaan.

¹¹ Kụ esi phọ ịsiphe okol mọ Pẹrez Uza kꞌaḍio phọ. Iphin ni iboom ologhi phọ aDevid loor esi dị Ọmoogh-we phọ mạlhiom Uza esi ọghagh ologhi.

¹² Pọ kụ amem dị aDevid aghiilaan Ẹnaan kụ ạḅem mọ, “Mịna kaḍighi bọ ika Igbe Ịyo phọ?”

¹³ Kụ iḍighi kụ aDevid ọ́pham ọ́ghimom ẹpe Jeruselem. Kpạripe ghụn ọdi ạwile kꞌoye dị oghol mọ Obed Idom, oye ọlo ẹmha phọ ạGat.

¹⁴ Ịrol sịphe ịraar ụnwanyu, kụ Ọmoogh-we phọ ạseph ọto kꞌObed Idom rꞌoomo ạraraar lọ eḍighi ịlo ọdi.