1 Krọnikuls 12 - Ạḍinya Iigbia

Ạbuḅel ạbuo eghun phọ ạBenjamin dị ọdaph Devid

¹ ADevid ạrol ghan ẹpe Zịklag, ekpisi dị ọdi ạghi okpetenaan ạSol ọdaam mọ. Ẹpe kụ ẹdi ịbadi abugey awe dị mobia esi ạraagham ọteeny nyọdi,

² awe ạbuo eghun phọ ạBenjamin ẹpe ạSol aḍighi bọ ọnyo oḍighom. Bịdi mọtuugha ọraph ịkpina, ḅịle rꞌọphiph oḍigh rꞌekpo ḍịghaagh elhiom rꞌạḍighaagh ekeeny.

^3-7 Bịdi ụrolonaan ghan ịtooghi Ahiezer rꞌaJoas, nmụny aSemaa, ọlo aGibia. Bụen kụ awe ẹgham mọ: Jẹziel rꞌạPelet, ạnmuny Azmavet Beraka rꞌaJehu bụo Anatot Ismaya ọlo ạGibion, ogbogh ọnyo ẹgham rꞌoniin oḍiemiom sịphe “Ịraardi phọ” Jerimaya, Jạhaziel, Johanan rꞌạJozabad, bụo aGedera Eluzai, Jerimot, Bialiya, Semaraya rꞌaSefataya, bụo aHarif Elkana, Ishaya, Ạzarel, Jọezer, rꞌaJasobiam, bụo ọto aKora Joela rꞌạZebadaya, ạnmuny aJeroham, bụo aGedor

Ạbuo eghun phọ ạGad dị ọdaph ghan Devid

⁸ Ịphen asiḍien ọkar awe ẹgham dị mobia esi ạraagham sịphe eghun phọ ạGad dị ọdaphan ḍita aDevid mem dị ọdi ạrol ẹekpara esi ẹpe ẹdala phọ. Ẹmaar ạbidi uḍeenaan ghan ookpereghian asiloor rꞌịsuaram ḅịle rꞌoroph ịsoph. Bịdi uḍigh ḍiigu ophogh mụdi ạnam-dịka kụ oogborion rꞌikem mụdi ọnuen ạraaḅaraph.

^9-13 Oniin atum nyoniin ịduon: Ezer, Obadaya, Eliab, aMismana, Jerimaya, Atai, Eliel, aJohanan, Ẹlzabad, aJerimaya, rꞌaMakbanai.

¹⁴ Buniin awe phọ ạbuen dị oḍighi bụo eghun phọ ạGad uḍighi bugbogh awe ẹgham dị ophogh ghan oniin ọonir awe eeḍian ạbidi, kụ bụnon oḍighi bụbam dị oniin okuron awe kụ ọrol ghan eeḍian ạbidi.

¹⁵ Ọḅel ụnwanyu aḍiniin ạlha, mem dị ạmuum Ọphiiny ạJodan awooph iigbom mọ, bịdi ụḅeeny ọphiiny phọ, ọowalami we phọ orughogh bọ sịphe ariḍiiny phọ ẹpe ạga emitenom rꞌạga emeelom erumuḍio ọphiiny phọ.

Ạbuo arughunughun phọ ạBenjamin rꞌaJuda dị ọdaph ghan Devid

¹⁶ Eniin amem aḍita awe ạbuo arughunughun ạBenjamin rꞌaJuda umite ọghi ẹpe ẹekpara esi phọ aDevid ạrol bọ.

¹⁷ ADevid ạghi ạteeny bịdi kụ ạḅem mọ, “Eḍighi ịyaar dị nyina retu ịdipho ạrighiri ọloghonaan ạmi ḍịghaagh, pọ itu sịen ẹḅophan rꞌayoor. Kụ ọlo eḍighi ịdi nyina rẹwa ọḅogh ạmi ọngo ạbumulogh-ḍien ạmi, ghạlamo ịduon mị inyina ịlo ị́nighe ki̋ḍighi bọ, pọ Ẹnaan ạburude ạburude phọ ayira kelegheri ni kụ ịliom inyina.”

¹⁸ Uwaloor Ẹnaan aḍigh loor oniin ọnyo ạbidi Amasai, ọdi kụ ạḅile aḍighi oḍiemiom ẹgham sịphe “Ịraardi phọ” kụ ọdi ạmagh Devid amitiom mọ, “Devid ọony ạJesi, yoor ạbuo ạna! Ọkpar opu aḍighi ọlo ạna rꞌạbuphe ọphel bọ nyịna! Ẹnaan edi ni ọogaany ạna.” ADevid ạseph bịdi kụ aḍighi bịdi bugbogh sịphe aḍita ẹgham mọ ọdi.

Ạbuo eghun phọ ạManase dị ọdaph ghan Devid

¹⁹ Buniin awe ẹgham ạbuo eghun ạManase ụḅeeny oten ạga aDevid mem dị ọdi arelhiom ramite rꞌawe aFilistia ozuom elephiri ạSol ọdaam mọ. Ọkar agey ọdi ọ́lhoghonaan ḍịghaagh we aFilistia phọ, loor esi dị ạbudaam mọ ạbidi ughiilaan ni mọ iini ọdi kạḅogh bịdi ạngo Sọl ọḅel ọde-otu phọ ạbidi, kụ bịdi orom nyọdi oḅulemi ẹpe Zịklag.

²⁰ Bụen kụ awe ẹgham mọ ạbuo eghun ạManase dị ọḅeeny oten ạga aDevid mem mọ ọdi ratigheel bọ: Adna, ạJozabad, ạJediayel, ạMaikel, ạJozabad, Elihu, rꞌaZiletai. Sịphe aḍita awe ẹgham ạManase, oniin ọonir awe ụrol ghan eeḍian ạtorobo ọnyo ạbidi.

²¹ Bịdi uḍighi bugbogh dị ophogh ghan we ẹgham mọ aDevid, loor esi dị oomo phọ ạbidi uḍighi we ẹgham dị ịḍagha ị́tol. Ẹsighe rẹki, bịdi uḍighi ghan bugbogh sịphe aḍita awe ẹgham mọ Ịzirel.

²² Kọḅem mọ ḍio ḍio ḍio abumoom awe uḍighan ghan rꞌaDevid. Ịduon phọ ẹnum amem bịn aḍita awe ẹgham mọ ọdi ọbugh iboom.

Aḍita awe ẹgham mọ aDevid

^23-37 Mem dị aDevid ạrol ẹpe Hẹbron, ịbadibadi awe dị mọtuugha ẹgham uḍighan ḍita ẹgham mọ ọdi ọloghonaan ạḍighaagh nyọdi oḍighi ọdaam esi phọ ạSol, ịdipho Ọmoogh-we phọ maguanaan bọ. Ogbiighi bọ bịdi uḍighi ịduon: Juda: 6,800 awe dị ọkar ọngo ịinya kụ ọpham ịsuaram rꞌịsoph; Sịmion: 7,100 awe dị mọmaar ọtuugha ịlo ẹgham Livai: 4,600 awe Bụmatuan ạJehoyada, ọnyo ẹemara Eeron: 3,700 awe Asiya ạZedok, ọgbagara oye ẹgham: 22 abuḍiemiom awe Bẹnjamin (eghun phọ ạSol): 3,000 awe (ogbogh opol awe eghun ạBenjamin ụkar ri ụrolan rꞌạSol) Ifraim: 20,800 awe dị ooleghaan sịphe aropolo phọ ạbidi Mạnase ạga emeelom erumuḍio phọ: 18,000 dị ọson mọ ọghi ọrolomi Devid ạgada ọdaam mọ Ịsaka: 200 abuḍiemiom rꞌawe dị ọrol eeḍian ạbidi (abuḍiemiom mọ ạbuen ulegheri ni ịdi ẹkpe dị Ịzirel koḍighi, rꞌamem dị ẹnighe oḍighi) Zẹbiulon: 50,000 dị osooromi loor kụ ologhi aḍigh ee elephiri kụ mọtuugha eenom ịdo kịrokiro ạreenema; Nạftalai: 1,000 abuḍiemiom, kụ ọḅaram 37,000 awe dị ọnyaam ịsuaram rꞌịsoph; Dạn: 28,600 awe dị mọtuugha ịlo ẹgham; Ạser: 40,000 awe dị ọnya elephiri; Rughunughun ạga emitenom erumuḍio phọ ạJodan — Ruben, Gạd rꞌạManase ạga emitenom erumuḍio phọ: 120,000 dị mọtuugha eenom ịdo kịrokiro ạreenema.

³⁸ Oomo awe ẹgham mọ ạbuen ọnya bọ elephiri ụghi Hẹbron, ọnya ọrolomi aDevid ạgada ọdaam mọ dị kapogh oomo phọ Ịzirel. Oomo ạbueri phọ awe phọ Ịzirel ụḅoph ọnhu ịlo eniin phọ ịyaar phọ.

³⁹ Bịdi ụrol ịraar aḍughul-otu ẹpe rꞌaDevid, olhe ghan eḍien, ọphughol miim dị awe ạbidi moseenaan bịdi.

⁴⁰ Awe ụḍua rere arughunughun Ịsaka, Zẹbiulon rꞌạNaftalai, rikpisi dị ẹkel ẹpe ephunom mọ, kụ orumom rꞌịnam adool, ạsikamel rꞌạsinam dị oroolom flaur rꞌiimuma ạfig rꞌịgharaghar iimuma avain rꞌamiim rꞌạmunum-ọliv. Bịdi ụpham kẹn ni sịnam rꞌiyool-ịga ịlo ọze kụ ạa. Oomo phọ ịphen iḍighi eḍeenaan ọḅaal ologhi dị ạrol oomo eelhe phọ.