1 Krọnikuls 11 - Ạḍinya Iigbia

ADevid ạda Ịzirel rꞌaJuda

¹ Oomo awe phọ Ịzirel ụghi ni ọteeny Devid ẹpe Hẹbron, kụ ọḅeni nyọdi mọ, “Yoor oḍighi ni ịḅaal rꞌiphulupul phọ ạna.

² Mem dị meten, ghạlamo amem mọ ọpo ạSol aḍighi bọ ni ọdaam mọ ayira, nạ kụ uḍiemiom ghan ni weye phọ Ịzirel ọghi ẹgham, kụ Ọmoogh-we Ẹnaan phọ ạna aguanaan ni nyịna mọ nạ kụ kaḍiemiom ghan weye phọ ọno ạḅile ạda bịdi.”

³ Kụ iḍighi kụ oomo ikumoor awe phọ Ịzirel uru ni ọteeny Devid ẹpe Hẹbron. Kụ ọdi aghiran ịyo rꞌạbidi, bịdi ogbul nyọdi elho, kụ ọdi aḍighi ọdaam eelhe phọ Ịzirel, ịdipho Ọmoogh-we phọ maguanaan bọ esi ạraghaaph phọ ạSamuel.

⁴ ADevid ọdaam mọ rꞌoomo awe phọ Ịzirel ụghi oghoonyom egbogh ẹmha phọ aJeruselem. Mem mọ ọpo ughol ghan mọ aJebus, kụ awe aJebusait phọ, ạbuḅel awe dị orugh sịphe ade phọ, ụrol li sịphe phọ.

⁵ Awe aJebusait phọ ọḅeni Devid mọ ọdi kátue aḍigh ẹmha phọ, kụ ọlo aDevid ạsighe Zạyon esi phọ ẹpe ọkuami bọ ọlogh. Loor ịduon phọ kụ ẹdi rokol ghan bọ mọ “Ẹmha phọ aDevid.”

⁶ Kụ aDevid ạḅem mọ, “Ọḅel oye dị kakiigh oniin ọnyo aJebusait kụ kaḍighi oḍiemiom ẹgham mọ!” AJoab, ọpo oghol bọ onhiin phọ mọ aZeruya, kụ aḍiemiom elephiri phọ kụ aḍighi oḍiemiom ẹgham.

⁷ Loor esi dị aDevid ạghi kụ arugh sịphe, ughol mọ “Ẹmha phọ aDevid.”

⁸ Ọdi ạḅile aselemi ẹmha phọ, amiighom esi dị ọḅile kụ ọlogh ọogha ạga eegbolom mọ emitenom erumuḍio phọ, kụ aJoab ạḅile aaḅulemi ịpheri phọ ariisi ẹmha phọ.

⁹ ADevid aphogh ghan ọbugh ọbugh bịn loor esi dị Ọmoogh-we Oomo Ịikpo phọ ạrolan ni nyọdi.

Arephelegbe awe ẹgham mọ aDevid

¹⁰ Ịphen kụ asiḍien arephelegbe awe ẹgham mọ aDevid ạmoogh bọ. Bụnon awe phọ Ịzirel kụ ụḅoph ọnhu kụ ọlogh aani ḍịghaagh kụ ọdi aḍighi ọdaam ịdipho Ọmoogh-we phọ maguanaan bọ, kụ bịdi ọpham eelhe phọ ọdi ọkparami.

¹¹ Ọḅel phọ aJasobiam ọpo ọto phọ aHakmon. Ọdi kụ uwo ẹmhu “Ịraar phọ” ạbuphe ropogh bọ we ẹgham mọ. Ọdi aruph elhool ẹgham ạsighe ạziom ịraar okuron awe egina amem.

¹² Ọdi atum pạ Ẹliazar ọony phọ aDodo ọlo ọto Aho.

¹³ Ọdi ạrolan rꞌaDevid kụ eenaan we aFilistia ẹpe Pas Damim. Ọdi ạrol ozo ịbiakpa abali mem mọ awe Ịzirel omiigh bọ oghiil ọḍua,

¹⁴ kụ ọdi rꞌawe phọ ọdi ọmeera sịphe ogbo ozo phọ kụ ee rꞌawe aFilistia phọ. Ọmoogh-we phọ ạngo nyọdi oboom ọkpar opu.

¹⁵ Eniin aḍio ịraar esi Ịraardi arephelegbe ẹgham mọ ụghi ni ọteeny Devid ẹpe aḍighiigh phọ aDevid ạrol ghan bọ atuman epogh Ạdulam, mem dị bụo aFilistia phọ modoghoḍi rugbogo ẹpe Eḍiiny aRefaim.

¹⁶ Mem mọ ọpo aDevid ạrol sịphe eegbolom dị ọkuami ọlogh; kụ aḍita awe ạbuo ẹgham awe aFilistia phọ mọmooghom Bẹtilihem.

¹⁷ Inyaam esiph Devid kụ ạḅem mọ, “Mị rạwa dị oye kuruomaan ịmi mụum dị oḍu sịphe aghuḍia phọ ọpo odi bọ ịigaany eḍighom ẹmha phọ ạBetilihem!”

¹⁸ Kụ ịraar phọ arephelegbe phọ oḅom ẹmhu ạayi oten igbo arugbogo awe ẹgham mọ aFilistia, oḍigh ọghi oḍu mụum ẹpe aghuḍia phọ ẹpe Bẹtilihem, ọsighe oruomonaan Devid. Kụ ọlo ọdi ómeera ọphughol; kpạripe ghụn ọdi ạsighe kụ azu ạphighironom ẹkia ạngo Ọmoogh-we phọ.

¹⁹ Kụ ạḅem mọ, “Ịlo ạmi ríḍigh, Ọmoogh-we. Ugbi ni oḍighi ịphen phọ. Kẹkigh mụdi mị rạpughol ịḅaal awe phọ ạbuen phọ ọsighe bọ ghuḍum mọ ạbidi ọwa ọlogh esi ịiḅaghami.” Bịn ọdi ómeera ọphughol. Ịphen ẹgbagara eḍighinom ịyaar ịraar arephelegbe awe ẹgham mọ.

²⁰ Abisai umor phọ aJoab kụ uwo ẹmhu sịphe “Ịraardi phọ”. Ọdi ạsighe ọsoph phọ ọdi kụ eenan ẹgham rꞌịraar okuron awe kụ ạze bịdi, kụ amitiom ḍien ọdi sịphe “Ịraardi phọ” ạbidi.

²¹ Aḍien ọdi kụ ịkar eeleghaan sịphe “Ịraardi phọ”, kụ aḍighi uwo ẹmhu ạbidi. Kụ ọlo ómitiom ḍien dị eeleeny “Ịraar phọ”.

²² ABenaya ọony phọ ạJehoyada ọlo ẹpe Kạbzeel aḍighi ni ọnon oye ẹgham dị aḍien eeleghaan. Ọdi aḍighi ni ịbadi iiḍighi arephelegbe ạraraar, kụ ẹḅaran dị ọdi ạze ịyal igbogh awe ạMoab dị ee ghan ẹgham. Eniin aḍio dị ibikpo ẹghar ọdi ạghi ni bịn asoor ooni bịn aghiigh ạnam-dịka.

²³ Ọdi kẹn aghiigh ni oniin oye ọlo Ijipt, oye dị ạbugh kụ aphoph ạman ịyal akuḅu kụ ạpham ghan oboom ọsoph. ABenaya ạpham ẹḅam bịn kụ azuom oye ọlo Ijipt phọ elephiri, aziton ọsoph phọ ḍịghaagh ọdi kụ aghiighom nyọdi.

²⁴ Ịpe phọ kụ ẹgbagara eḍighinom ạraraar phọ aBenaya ọpo aḍighi bọ oniin sịphe “Ịraardi phọ”.

²⁵ Ọdi amitiom ḍien apu bụeri phọ “Ịraardi phọ”, kụ óoleeny “Ịraar phọ”. ADevid ạsighe nyọdi aḍighi uwo ẹmhu ạbuphe okori ghan bọ nyọdi.

^26-47 Bụen ạbunon awe ẹgham dị omitiom ḍien: Ạsahel, umor phọ aJoab Elhanan ọony phọ aDodo ọlo ạBetilihem mọ ASamot ọlo aHarod AHelez ọlo ạPelet Ira ọony phọ Ikes ọlo aTekoa phọ Abiezer ọlo Anatot ASibekai ọlo aHusa Ilai ọlo Aho AMaharai ọlo aNetofa AHeled ọony phọ aBaana ọlo aNetofa phọ Itay ọony phọ aRibai ọlo aGibia ẹpe ạBenjamin phọ ABenaya ọlo aPiraton AHurai ọlo eḍiiny dị etuman aGaas Ạbiel ọlo Arba Azmavet ọlo aBahurum Eliaba ọlo aSaalbon Hasem ọlo aGizon ẠJonatan ọony phọ aSagee ọlo aHarar phọ Ahiam ọony phọ ạSakar ọlo aHarar phọ Elifal ọony phọ Ur AHefer ọlo aMekera Ahaija ọlo aPelon AHezro ọlo ạKarmel ANaarai ọony phọ Ezbai AJoel umor phọ aNetan AMibhar ọony phọ aHagri AZelek ọlo Amon APaarai ọlo Arab ANaharai otoolom ịinya ẹgham aJoab ọony phọ aZeruya ọlo aBeerot phọ Ira rꞌạGareb ọlo aJatir AYuraya ọlo ạHitait phọ AZabad ọony phọ Ahlai Adina ọony phọ ạSiza (ogbogh ọnyo eghun phọ aRuben, rꞌaḍita ọdi dị ọman ịraardi awe ẹgham) AHanan ọony phọ aMaaka ẠJosafat ọlo aMitan Uzia ọlo Astera ẠSama rꞌạJeyel ạnmuny phọ aHotam, ọlo Aroer ẠJediayel rꞌaJoha ạnmuny phọ aSimri, ọlo aTiz Eliel ọlo aMahava AJeribai rꞌaJosavaya, ạnmuny phọ Elnaam Itma ọlo ạMoab Eliel, Obed, rꞌạJaasiel ạbuo aZoba.