1 Jọn 4 - Ạḍinya Iigbia

Ịyal ọdo aruwaloor

¹ Iiḅi asiya, kémeeraam mun oomo ạbulo rọḅem ghan mọ bụno ọmoogh Uwaloor Iigbia phọ. Ịmaar ghan ẹeḅeghion ruwaloor phọ ephogh mọ ịḍua ni esi Ẹnaan kụ eru, ịdi eḍighi bọ ịbadi ariil ọkpe momite sịen aḅirini phọ.

² Ịduon kụ ịdi nyina kẹloghom elegh Uwaloor phọ kꞌẸnaan: tọrobo oye lọ rạkaaph ghan kamitiom mọ ạJizos Kraist aateneghian ni amite eye kụ aru bọ, pọ ạmoogh ni Uwaloor phọ kꞌẸnaan.

³ Kụ tọrobo oye lọ rạparanaan ghan Jịzos, pọ ọ́moogh Uwaloor phọ kꞌẸnaan. Ọphon phọ uwaloor kꞌẠmulogh-ḍien phọ aKraist. Nyina ịnaghan ni mọ uwaloor phọ ọphon ratu ni, kụ nyịidipho maru asi sịen aḅirini phọ.

⁴ Ịbam ạnmuny, nyina ạbuo kꞌẸnaan, kụ nyina mẹkpar epu riil ọkpe phọ loor esi dị Uwaloor phọ idianaan bọ inyina ạmoogh ni ịikpo apu uwaloor phọ odianaan bọ bụphe aḅirini phọ.

⁵ Bịdi rọkaaph ghan ịlo ạraraar aḅirini phọ kụ aḅirini phọ rọnaghanan ghan ni bịdi, ịdi eḍighi bọ bịdi ạbuo aḅirini phọ.

⁶ Yira phọ ạbuo kꞌẸnaan. Tọrobo oye lọ alegheri Ẹnaan rụnaghanan ghan ni iyira, kụ oye lọ útu ọlo kꞌẸnaan iyira rụ́naghanan ghan. Ịduon kụ ịdi yira kolegheriom Uwaloor igey rꞌuwaloor ọkpe.

Ẹnaan phọ pọ ẹphomoghian

⁷ Iiḅi asiya, oniin ạphomoghian ghan nyoniin, ịdi eḍighi bọ Ẹnaan phọ azin ẹphomoghian! Kụ oye lọ ạmoogh ẹphomoghian, pọ mọmar ọḅile ọmar, alegheri Ẹnaan.

⁸ Oye lọ ẹphomoghian ụ́moogh ólhegheri Ẹnaan, ịdi eḍighi bọ Ẹnaan phọ ẹphomoghian.

⁹ Ịdipho Ẹnaan erom bọ ogina Ọony phọ ọdi mọ aru sịen aḅirini phọ pịdi yira ọtuan nyọdi ọmoogh ghuḍum kụ ịdi ọdi uḍeenaan bọ iyira ẹphomoghian phọ ọdi.

¹⁰ Ẹmhu ẹphomoghian phọ ịduon: kị́di yira ọphomoghian Ẹnaan, ịdi ghụn ọdi ụphomoghian iyira kụ ạsighe bọ Mọony phọ ọdi aḍighi ọmur rꞌiphorobo dị owophom ịkaraph phọ ayira ọsighe.

¹¹ Iiḅi asiya, ọtuugh ịduon Ẹnaan ịphomoghian bọ iyira kụ oniin ạphomoghian ghan nyoniin.

¹² Oye dị mạmiin ghan Ẹnaan ekpeḍien ólho. Kụ oniin ạphomoghian ghan nyoniin, pọ Ẹnaan idianaan iyira, ḅịle kẹn ẹphomoghian phọ ọdi memunughan loor ayira.

¹³ Ịdipho Ẹnaan mịngo bọ iyira Uwaloor Iigbia phọ ọdi kụ ịdi yira kọmoogh oḍuom ologhi olegheriom mọ yira odianaan ni Ẹnaan, ọdi ạḅile udianaan iyira.

¹⁴ Kụ yoor mọmiin rọḅeni ghan bụnon mọ Ọde phọ arom Mọony phọ ọdi oḍighi Ọpelia aḅirini phọ.

¹⁵ Kụ oye lọ ạghaaph amitiom mọ ạJizos kụ Ọony phọ Ẹnaan ni, pọ odianaan Ẹnaan, Ẹnaan edianaan nyọdi.

¹⁶ Yira olegheri ni ọḅile omeeraam ẹphomoghian phọ Ẹnaan ịphomoghian bọ iyira. Ẹnaan phọ ẹphomoghian, kụ oye lọ odimom ẹphomoghian odianaan Ẹnaan, ḅịle kẹn Ẹnaan edianaan nyọdi.

¹⁷ Ịduon kụ ẹmhu omuneni ẹphomoghian phọ loor ayira, mọ yira ọmoogh oḍuom ologhi ḍio ịiruen phọ, ịdi eḍighi bọ ạroozo phọ ayira sịen aḅirini phọ eeleenyan ni rꞌịpe aKraist.

¹⁸ Ẹphomoghian ị́moogh okaphian oomiigh, kụ ẹphomoghian dị emunughan reporogh ghan ni okaphian oomiigh keroph. Ẹphomoghian dị ẹḅaram okaphian oomiigh ke̋munughan, ịdi eḍighi bọ okaphian oomiigh rạdaphan ghan ghẹlhe.

¹⁹ Yira rọpomoghian ghan ịdi eḍighi bọ Ẹnaan kụ ịphur ịphomoghian iyira.

²⁰ Oye lọ ạlogh ḍien ọnyo asiya ọdi kụ rạḅem ghan mọ ọno ạpomoghian ni Ẹnaan, pọ ọgbaam ọkpe. Mọ ọdi ọ́phomoghian ọnyo asiya phọ ọdi mạmiin ghan bọ, ika kụ ẹdi ọdi kạpomoghian bọ Ẹnaan phọ ọdi kọ̋miin ghan bọ?

²¹ Ọphon kụ ologh phọ aKraist ạlogh bọ ụngo iyira, mọ oye lọ ạphomoghian Ẹnaan ạphomoghian aani ghan ọnyo asiya ọdi.