1 Jọn 1 - Ạḍinya Iigbia

Ekpo Ọnhu aghuḍum mọ

¹ Yoor ọge ḍịnya phọ ạḍien riruomaan inyina ịlo Ekpo Ọnhu aghuḍum mọ ẹpe edi ghan bọ ni kꞌẹḅel emiighom mọ: yoor mọnaghan ni, ọḅile opogh ọmiinom riḍien ayoor, ọḅile ọsighe rạghaagh ọḅoghom.

² Mem mọ aghuḍum mọ ạkuen aganana bọ, yoor ụmiin ni. Kụ yoor rọkaaph ghan bọ kịḅeni inyina ịlo aghuḍum kꞌagee-pọ phọ ạrolan ghan bọ Ọde phọ kụ mogananami bọ yoor olegheri.

³ Yoor rịḅeni ghan inyina ịpe yoor mọmiin bọ, ọḅile ọnaghan, pịdi nyina rꞌayoor ọḅaran mụḅoph phọ yoor ọmoogh bọ rꞌỌde phọ ḅịle rꞌạJizos Kraist Ọony phọ ọdi.

⁴ Yoor rọge ịphen phọ, ọbo iboh phọ ayira emunughan.

Ẹnaan phọ pọ ạḍiḅaal

⁵ Ḍịen kụ adom mọ yoor ọnaghan bọ esi Ọony phọ ọdi, kụ ogbeel bọ rịḅeni ghan inyina, mọ Ẹnaan phọ ạḍiḅaal bịn, rꞌẹnum ufiri ólho ghan esi ọdi.

⁶ Oye lọ odi ni ẹku ufiri kụ rạḅem ghan mọ ọno ạmoogh mụḅoph rꞌẸnaan, pọ rạgba ni ọkpe sịphe ikpo ọnhu phọ ọdi ḅịle eḍighinom ịyaar phọ ọdi ísooran.

⁷ Kụ yira ọrol ghụn dọl ẹphalaḅaal, ịdipho ọdi odi bọ dọl ẹphalaḅaal phọ, pọ oniin mạmoogh mụḅoph rꞌoniin, ḅịle kẹn ịḅaal phọ ạJizos Ọony phọ Ẹnaan kụ regbuurogh ghan ịkaraph iloghi phọ ayira kẹḅaalami.

⁸ Yira ọḅem mọ yira ịkaraph ụ́moogh, pọ yira robia ni loor. Igey phọ iyira ílhoonaan.

⁹ Kụ yira ọgba ghụn ịkaraph phọ ayira omitiom, Ẹnaan kẹsar ri ịkaraph phọ ayira ịwilenaan iyira ẹḅile igbuurogh iyira ẹḅaalami esi ẹkaraph eḍighinom ịyaar phọ ayira, ịdi eḍighi bọ ọdi rábi ghan ruguan phọ ọdi, ḅịle ịiruen ọdi reeleeny ghan ni.

¹⁰ Kụ yira ọḅem mọ yira ịkaraph kőḍighi ghan, pọ yira rọlogh ghan Ẹnaan ọkpe. Ọghaaph phọ Ẹnaan kőḍigh iloghi phọ ayira.