1 Bụo ạKorint 4 - Ạḍinya Iigbia

Abutelhedom aKraist

¹ Ịsighenom mọ yoor awe oḍighi aKraist dị Ẹnaan mẹḅogh ịpe ịbooghian phọ ọdi ẹlogh ḍịghaagh.

² Kụ egbogh ịyaar dị rọwa ghan ḍịghaagh oye dị aḍiemiom oḍighi, oseere ghan ologhi esi oḍighi phọ.

³ Ị́kigh ịyaar esi ạmi mọ nyina mụghumo abuugboom ịiruen ịsien aḅirini phọ kụ usophonaan ịmi ọoruen. Mị rásopha ghan ọoruen kạḅamian ẹmhu.

⁴ Ịduon mị úloghoma bọ apum mọ íḍeenaan mọ mị mạar ụ́piom. Ọmoogh-we phọ kụ alegheri akeel rꞌapum.

⁵ Ịduon kụ iḍighi kụ kéḅonom ghan osophonaan oye ọoruen kụ egbi ọteeny amem mọ. Ọmoogh-we phọ aru, kạsighe ni rạraar ịbooghian ufiri phọ amitiom ẹphalaḅaal, kụ agananami ịitughian phọ ịpe ạaghian bọ sịphe iloghi phọ ạbidi. Kụ ẹtuan sịphe kụ tọrobo oye ạboor Ẹnaan ḍịseph phọ ạḍiphe ẹgbaanyan bọ nyọdi.

⁶ Bụo asiya, loor ẹmhu anyina, ịphen phọ mị ạkaaph ạmaam loor ạmi rꞌẠpolos. Mị ụmaaniom iyoor pịdi nyina elegheri ẹmhu ọḅem mọ ọphon mọ, “Kétenom ghan ọku.” Kébomaam ghan nyoniin kụ ephogh nyọori phọ esoore.

⁷ Ạnhian kụ aphophe bọ nyoniin ọnyo anyina apuemi bụeri phọ? Ẹnaan kụ inyina ị́ngo bọ oomo ạraraar phọ nyina ẹmoogh bọ ḍụghum? Kụ eru ni ruunmo, nyina ighol eeghe nụun kụ rebaga ghan bọ?

⁸ Nyina ịḅem ḍịen mọ nyina ẹmoogh ni emuzeḍi. Nyina ịḅem mọ nyina eḍum ni ewarara. Nyina ịḅem ḍịen mọ nyina mẹrologhu sịgada ọdaam ẹmha, rꞌẹmhu anyina ni. Ḅẹm loon mọ nyina ẹkaraghi ni ẹtologhu sịgada ọdaam ẹmha phọ, ọbo yoor moḍighi bụḅarama anyina.

⁹ Ẹkigh esi ạmi mụdi yoor abutelhedom mọ, eekuna ạrebene dị Ẹnaan ekpor ẹkol bịn ẹngo ịdipho awe dị erugh aḍuugh ephum, kụ kọze esi ogbo dị ạruukpaany phọ Ẹnaan rꞌaweye rꞌoomo aḅirini phọ rọmiin.

¹⁰ Yoor moghol ẹmhu phọ aKraist ọkigh bụo arolologhi, kụ nyina rẹḅem ghan ghụn ni mọ nyina kụ ịsu ologhi esi aKraist. Mọ nyina kụ ịkpar, kụ yoor odugh. Mọ nyina kụ ịmoogh eghuan, kụ eghuan iyoor ílho.

¹¹ Kꞌạnyiidipho yoor odi ni ọkoony eḍien rꞌạmuum, oonmenemineen iyoor úlho, rụphamam ghan iyoor igbagbaar, yoor marugh ụ́moogh,

¹² yoor rokumuanam ghan rạghaagh ayoor ọbo ọmoogh ịyaar ọrolom. Bụlo uronyon iyoor, yoor rọngo ghan ḍịseph. Bụlo ụgbiphoghom iyoor, yoor rọkparam ghan ni.

¹³ Bụlo ụgilaam iyoor yoor rọbonyian ghan ịyoghoyogho ikpo ọnhu. Kꞌạnyiidipho yoor kụ atopha ḅịle rꞌịiya aḅirini phọ.

¹⁴ Mị rạ́ge ịphen phọ osiphiom anyina umugholoor. Mị ụtuan ghụn oromoghiom anyina ịdipho ạnmuny phọ mị ạphomoghian bọ.

¹⁵ Ghạlamo ịdipho kótue bọ ni ọbal omuneni riibia dị rịtughemi inyina ịlo aKraist, ạburude anyina úḍiza. Mị ughol ooḅi ọghaaph phọ kụ aḍighi bọ ọde anyina esi ạJizos Kraist.

¹⁶ Esi ịduon phọ, mị rịkpaariom ni inyina mọ ịtuughaany ghan ịmi.

¹⁷ Mị ụtuan ịduon kụ atom bọ Timoti, ooḅi ọony phọ ạmi ạkpar bọ ni sịphe oḍighi Ọmoogh-we phọ, mọ aru ịghiom inyina ologhi ọdo eḍighinom ịyaar phọ mị rạḍua ghan bọ sịosi kạgba sịosi ạtughemi ghan we mọ oḍighi oḍighi ọngo Jịzos Kraist.

¹⁸ Ịbadi anyina rebaga ghan mụdi mị mighiilaan inyina bịn ạbile oru phọ.

¹⁹ Kụ mị ạnuun ni ratu ọteeny anyina, lọ Ọmoogh-we phọ ameera, kụ mị ạmiin aani ịikpo ạbuen phọ rọpaaghian ghan bọ.

²⁰ Rọmiin ghan ọmar phọ kꞌẸnaan sịphe ịikpo oḍighi phọ kópu ghan bịn ọghaaph.

²¹ Nyina epin nyẹghen? Mị ụpam ịkpara ọguroghom anyina, kụ ọpham ologhi ẹphomoghian rꞌọnma ighirigiir kụ orumom ḍụghum?