1 Bụo ạKorint 2 - Ạḍinya Iigbia

Ọghaaph ịlo aḍuugh egbo phọ aKraist amugh bọ

¹ Bụo asiya, mem mọ mị aru bọ ọghaaph ạraraar ịbooghian phọ Ẹnaan ọḅeni anyina, mị ụ́kaaph mụdi mị ophelegbe olegheri ịyaar rꞌịidugha ikpo ọnhu.

² Mem mọ yira ọrolan bọ, mị ụphur ri ọkpuku awula ịnon ạraraar, omuton ọghaaph ghan ịlo ạJizos Kraist rꞌaḍuugh phọ ọdi loor oreeny phọ bịn.

³ Mị ụpham ni eepuph rꞌophiigha aloor rꞌokaphian oomiigh kụ arumom bọ ịteeny inyina.

⁴ Mị ụ́sighe ḍịidugha anem rꞌolegheri ịyaar ịsien aḅirini phọ kụ ạghaaphom ghan bọ ạtughemi. Ịikpo Uwaloor Iigbia phọ ịkparami ghan ni ikpo ọnhu phọ ạmi, eḍeenaan mọ ịḍua ni esi Ẹnaan phọ kụ eru.

⁵ Esi ịduon phọ, nyina ị́tuan olegheri ịyaar awe aḅirini phọ, nyina ịtuan ghụn ni ịikpo phọ Ẹnaan kụ emeeraam bọ.

Olegheri ịyaar dị ạḍua kꞌẸnaan kụ aru

⁶ Kụ ọlo yoor rọkaaph ghan ni ịlo olegheri ịyaar kọloghoḍi rụru ạbuphe uwaloor phọ maphoph bọ ạmanam, kụ kị́lo olegheri ịyaar ịsien aḅirini phọ ḅịle rꞌịlo ạbuphe ọdaaghi bọ riisi sịen aḅirini phọ. Ịikpo ạbuen phọ reminenom.

⁷ Yoor rọkaaph ghan ịlo olegheri ịyaar phọ ọpo Ẹnaan ạaghinaan bọ we. Kꞌamem dị kọ̋lhem aḅirini phọ, Ẹnaan mẹsaḅar ri olegheri ịyaar phọ ọphon ọbo yira ọmoogh aani bin igbogh phọ ọdi.

⁸ Ọnyo ạbuphe ọdaaghi bọ riisi sịen aḅirini phọ dị alegheri olegheri ịyaar phọ ọphon ọ́rol. Mọ bịdi ulegheri ni, ọbo mụ́kan Ọmoogh-we Eghuan phọ loor oreeny phọ ukiigh.

^9-10 Kụ Ẹnaan mẹsighe Uwaloor phọ ọdi egananamiom iḍeenaan iyira rạraar ịbooghian phọ ọdi. Ịdipho ạḍinya iigbia phọ ẹḅem bọ, “Rạraar dị oye kꞌekulha ụ́miin, kꞌekulha ụ́naghan; ịdi kꞌekulha ụ́utughian mọ kemite, ịphen kụ ạraraar phọ Ẹnaan eekolobian bọ eseenaan bụphe ọphomoghian bọ nyọdi.” Uwaloor Iigbia phọ alegheri ni oomo ạraraar ạman, ghạlamo rꞌeekuna ịitughian ịbooghian phọ Ẹnaan ni.

¹¹ Ọmar awe, uwaloor phọ odi bọ loor oye phọ bịn kụ ralegheri ghan oomo ịlo oye phọ. Ịduon phọ kẹn kụ ẹdi Uwaloor Iigbia phọ bịn kụ ralegheri ghan oomo ịlo Ẹnaan.

¹² Uwaloor phọ yira ọmoogh bọ ọlo Ẹnaan, kọ́lo ịsien aḅirini phọ. Ẹnaan kụ ịngo mọ yira olegheriom oomo aruunmo phọ ọno.

¹³ Uwaloor Iigbia phọ kụ ụtughemi bọ iyoor. Awe olegheri ịyaar ịsien aḅirini phọ kụ iyoor ụ́tughemi bọ ikpo ọnhu phọ yoor rọgbaam ghan bọ ẹmhu ạraraar uwaloor phọ kọḅeni bụphe olegheri bọ Uwaloor Iigbia phọ.

¹⁴ Kụ oye lọ úlegheri rạraar uwaloor phọ kạ́moogh aani ruunmo kꞌUwaloor Iigbia phọ. Ịphen phọ kétue ẹbol eḍigh rụru ọdi. Ọdi kạ́maghami ịyaar ịdi eḍighi bọ ropoghom uwaloor bịn kụ olegheriom mọ ẹman ni ịyaar.

¹⁵ Oye lọ alegheri rạraar uwaloor phọ ratue ghan ni kalegheri ịdi oomo ạraraar ẹman, kụ ọnon oye kátue ạmiin ịdi ọdi ạman aani.

¹⁶ Ịdipho ạḍinya iigbia phọ ẹḅem bọ, “Ạnhian kụ alegheri ịitughian Ọmoogh-we phọ? Ạnhian kụ katue atomoghiom nyọdi?” Kụ yira ghụn ọḅoph ịitughian rꞌaKraist.