1 Bụo ạKorint 15 - Ạḍinya Iigbia

Oḅeton Kraist esi aḍuugh

¹ Bụo asiya, nyịidipho mị rạwa ọghiom anyina ologhi ịlo ooḅi ọghaaph phọ ọpo mị ạghaaph bọ ịḅeni inyina, kụ nyina ẹnaghanan bọ ni, ephighiom omeeraam mọ anyina.

² Ooḅi ọghaaph phọ ọphon kụ rịphel ghan bọ inyina dị omeeraam mọ anyina ạmeera bọ zim, emuton lọ nyina epu ni bịn emeeraam.

³ Ịpe mị ạar bọ kụ ịdi mị ạḅogh bọ ịngo inyina kụ eḍighi ni ephigh iboom: mọ aKraist aghol ịkaraph phọ ayira kụ amugh bọ, ịdipho ọge bọ sịphe Ạḍinya Iigbia phọ;

⁴ ḅịle mọ uḍi ni nyọdi, kụ oḅeton nyọdi sịphe aḍuugh phọ ḍughul otu dị emuneniom ịraar, ịdipho ọge bọ sịphe Ạḍinya Iigbia phọ;

⁵ ḅịle mọ ọdi aḍeenaan ni loor ọdi Pita kụ agbi omitenaan aḍioph rꞌịyal abutelhedom mọ.

⁶ Kụ amitenaan ḍita ạbuo asiya dị opel oogh okuron mem. Ịbadi ạbuen phọ odiighi ni kꞌarodon, kụ ọlo buniin momuughu ni.

⁷ Kụ ọdi amitenaan Jems kụ agbi omitenaan oomo phọ abutelhedom mọ.

⁸ Osughanam ọman phọ, ọdi umitenaan aani ni ịmi, ghạlamo ịdipho mị ạghigh bọ ni mọony dị ímunughan kụ ọmar,

⁹ ịdi eḍighi bọ mị kụ uḍigh ạagia ạḅaram ọḅiph sịphe abutelhedom mọ. Mị phọ kẹn bịn ụ́man oghola mọ otelhedom, ịdi eḍighi bọ mị ụgbiphoghom ni bụo ạsiosi phọ Ẹnaan.

¹⁰ Kụ esi ọnma ighirigiir phọ Ẹnaan kụ mị odi bọ dọl phọ ạḍien mị odi bọ, ḅịle kẹn ighirigiir phọ dị ụnma bọ ịmi ípe oopho. Okiririom ghụn ophogh, mị kụ mạkpar ḍịghaagh apu oomo ạbueri phọ abutelhedom mọ, kụ ọlo mị ạsighe ọnma ighirigiir phọ Ẹnaan kụ raḍighinom bọ, kị́nyaam ạmi.

¹¹ Mọ ịḍua esi ạmi kụ eru, ḅịle mọ ịḍua esi ạbidi, ọgbaranaan ólho — ịtughemi phọ igina ni, kụ ịphen kụ ịdi nyina emeeraam bọ ni.

Kuḅeton aani ni iyira esi aḍuugh phọ

¹² Ịdipho yoor rọkaaph bọ ni kọkononoom mọ moḅeton Kraist sịphe aḍuugh phọ, uḍighi ika kụ buniin anyina rẹḅem ghan bọ mọ ịyaar dị oghol mọ oḅerion esi aḍuugh ílho ghan phọ?

¹³ Ịphen phọ eru ni igey, pọ emeeraam mọ Kraist úḅeton.

¹⁴ Kụ eḍighi ịyaar dị Kraist úḅeton sịphe aḍuugh phọ, ọghaaph phọ ayoor oopho ni bịn, ḅịle kẹn omeeraam mọ anyina oopho ni bịn.

¹⁵ Ịdi epu sịen, emeeraam kẹn mọ yoor rọgbaanaan Ẹnaan ọkpe, ịdipho yoor ọghaaph bọ mọ ọdi aḅeton Kraist sịphe aḍuugh phọ. Kụ eḍighi ni igey mọ ịyaar dị oghol mọ oḅerion esi aḍuugh ílho ghan, tọ pọ ọdi Kraist óḅeton.

¹⁶ Mọ ịyaar dị oghol mọ oḅerion esi aḍuugh ílho ghan, pọ Kraist úḅeton.

¹⁷ Kụ eḍighi ịyaar dị Kraist úḅeton, omeeraam mọ anyina rạmaghamagha ni, ḅịle kẹn nyina edimom ni ịkaraph phọ anyina.

¹⁸ Ẹḅile kẹn emeeraam mọ bụphe omeeraam bọ Kraist kụ rọnaani bọ rạlha aḍuugh phọ ope ni oopho bịn.

¹⁹ Oḍuom ologhi phọ ayira esi aKraist kụ aḍighi ọlo aghuḍum mọ ạkuen bịn, pọ ighirigiir dị idianaan iyira epu ịlo ạbunon.

²⁰ Ọkaraghi igey phọ ịduon mọ moḅeton Kraist sịphe aḍuugh phọ oḍighi nyọdi ịḅel iimuma ạbuphe koḅerion bọ sịphe ạralha aḍuugh phọ.

²¹ Ịdipho aḍuugh ẹtuan bọ oye kụ eru kụ ịdi oḅerenu esi aḍuugh phọ ạtuan kẹn ni oye kụ aru.

²² Ịdipho oomo awe phọ ọḅophoghan bọ Ạdam kụ ọtuan bọ omuughu kụ ịdi kọtuan Kraist oḅerion oomo awe phọ ọḅophoghan bọ nyọdi.

²³ Kụ amem mụo oye rꞌoye: aKraist kụ ịḅel iimuma phọ kụ egbi ọteeny ạbuphe oru bọ bụo ọdi mem mọ dị katu bọ.

²⁴ Eekuna phọ rẹteeny, kụ aKraist apiemi oomo ạbulo ọmoogh ịikpo ọdaaghiom aruwaloor rꞌawe, kụ ạḅogh ọmar phọ ạlogh ḍịghaagh Ẹnaan Ọde phọ.

²⁵ AKraist phọ kụ kạtooghi ni rạraar tụtu ọdi mạkpar apu oomo ạbumulogh-ḍien phọ ọdi aḍighi bịdi ịkasi ọkpasaghiom aruwol.

²⁶ Aḍuugh kụ ọnyo ạmulogh-ḍien dị kopiemi osughanam ọman,

²⁷ ịdi eḍighi bọ ạḍinya iigbia phọ ẹḅem mọ, “Ẹnaan mẹsighe oomo ạraraar eḍighi ịkasi ọkpasaghiom aruwol phọ ọdi.” Iikia ílho mọ Ẹnaan phọ ẹsighe bọ oomo ạraraar phọ eseere eeḍian aKraist rꞌaloor ọdi íḍighom aani sịphe “oomo ạraraar” phọ.

²⁸ Kụ mem dị mọsighe oomo ạraraar phọ oseere eeḍian aKraist, Ọony phọ rꞌaloor ọdi kaseere aani loor eeḍian Ẹnaan phọ ẹpe ẹḅogh bọ oomo phọ ịdi ẹngo nyọdi. Ẹnaan bịn kụ kepogh oomo phọ ịdi ẹmadan.

²⁹ Ḅịle kẹn, buniin odi ni dị rokol ghan ẹmhu ạbuphe momuughu bọ kụ komeera mọ owurogh bụno mụum. Eḍighi ịyaar dị oḅerion esi aḍuugh ílho ghan, ẹmhu eḍighinom ịyaar phọ ẹphen phọ eeghe? Bịdi ughol bọ eeghe nụun kụ romeeraam ghan bọ mọ owurogh bụno ọdo phọ ạmuum mọ ạmuen phọ.

³⁰ Mọ oḅerion esi aḍuugh ílho ghan, kụ yoor ughol eeghe kụ odi ghan bọ dọl okaphian oomiigh oomo amem mọ?

³¹ Iiḅi asiya, mị rasoman ghan ḍuugh ḍio etum ḍio. Iikunya ạmi ịdipho nyina kụ eḍighi bọ ẹegu-ọman phọ ạmi esi ạJizos Kraist Ọmoogh-we phọ ayira.

³² Ọsighenom mọ mị ụtuan ịitughian aḅirini phọ bịn kụ eenan bọ ilhom ịnam mọ ẹphen Ẹfesos, eeghe kụ ạsuo dị mị ạsighe? Kụ mọ oḅerion esi aḍuugh ílho ghan, yira ọrolom ọḅem mọ ọphon mọ, “Ole ghan bịn ọphughol, iini iḍueneen yira komuughu!”

³³ Kéekeleghian mun loor anyina. “Orelhian ịkaraph ạrighiri rẹpue ghan ni ẹzo.”

³⁴ Isereghian ẹwile ịkaraph areten phọ anyina. Ịphen phọ mị rạkaaph osiphiom anyina umugholoor. Ịbadi anyina Ẹnaan ílegheri.

Aloor phọ koḅetenuom bọ sịphe aḍuugh phọ

³⁵ Ooni oye kapuru ni mọ, “Koḅerion bọ ika bụphe momuughu bọ? Ḍighen ọdo aloor kụ ẹdi bịdi kotigheelom bọ?”

³⁶ Opokorodom, legheri mọ eemuma lọ nạ ạzuph tụtu imugh rési ghan.

³⁷ Ẹpe nạ ạzuph bọ sịphe ade phọ, oopho ekpo ni bịn, iini ekpo ọbiakpa, iini ekpo ẹnon ịyaar ri, kụ ọmiigh phọ amite, ạgbatanaan ni ekpo phọ.

³⁸ Ẹnaan kụ rẹngo ghan ḍizu lọ ẹḅeeraan nyọdi mọ ekpo eemuma phọ ẹmoogh, ḍizu ḍịo ekpo eemuma rꞌekpo eemuma.

³⁹ Ḅịle kẹn iphulupul ạraraar phọ ịpe ẹmoogh bọ ḍiphooghu phọ kíniin. Iphulupul ịlo awe kịro ni; ịlo ịnam kịro ni; ịlo ịnun kịro ni; ịlo ina kịro ni.

⁴⁰ Ḅịle kẹn iniin ạraraar edi ni kꞌạke; iniin edi ni kꞌade. Ẹnighe ẹlo ịpe kꞌạke phọ edi ni; ḅịle ẹlo ịpe kꞌade phọ edi ni.

⁴¹ Ẹnighe ẹlo erumuḍio phọ kịro ni; ẹlo ụnwanyu phọ kịro ni; ẹlo ạraanaan phọ kịro ni. Kụ sịphe ạraanaan phọ kẹn ni bịn ẹnighe ẹlo ẹenaan rꞌẹenaan.

⁴² Ịduon kụ ịdi kẹtol mem mọ koḅerion bọ bụphe momuughu bọ. Aḍizu phọ ạḍien yira odimom bọ kemugh ni epe, kụ mem oḅerion phọ, aḍuugh ílhoonaan mun.

⁴³ Ḍizu phọ ạḍien odughe ni osooromi, kụ mem oḅerion phọ kọngo ni ịnyaam opophe.

⁴⁴ Ḍịen phọ aḍizu awe, ḍịphe phọ ạḍio aruwaloor. Ịdipho aḍizu awe edi bọ ni emeeraam mọ aḍizu aruwaloor edi aani ni.

⁴⁵ Ịduon kụ ẹmhu ịpe ạḍinya iigbia phọ ẹḅem bọ mọ, “Ụngo ni ḍiphooghu aghuḍum ḍizu Ạdam, ọḅel oye phọ”; kụ Ạdam mọ asughanam bọ ọman phọ maḍighi uwaloor dị rạngo ghan ghuḍum.

⁴⁶ Ilegheri mọ ịlo aruwaloor phọ kụ rẹ́pur ghan keru. Ịlo rọmiin kụ reḍia ghan, kụ egbi ọteeny ịpe aruwaloor phọ.

⁴⁷ Ụsighe ọposo kụ ọlhem bọ Ạdam, ọḅel oye phọ; Ạdam mọ amuneniom bọ ịyal phọ ạḍua kꞌạke kụ aru.

⁴⁸ Ọlemogh oomo awe ọposo phọ ọkighemi nyọpo ọsighe bọ ọposo phọ kụ ọlem, kụ oomo ạbuphe kꞌạke phọ ọkighemi nyọpo ạḍua bọ kꞌạke phọ kụ aru.

⁴⁹ Ịdipho ọghighemi bọ ḍizu phọ ayira nyọpo ọsighe bọ ọposo phọ kụ ọlhem kụ ịdi kụghighemi ni iyira nyọpo ạḍua bọ kꞌạke phọ kụ aru.

⁵⁰ Bụo asiya, ẹmhu phọ ịduon mọ: ịlo edimom iphulupul rꞌịḅaal kétue epin aani bin ọmar phọ kꞌẸnaan, ḅịle ịlo remugh ghan képin aani bin ịlo aḍuugh ílhoonaan ghan.

⁵¹ Ịnaghanan. Mị kạkaaph rạraar ịbooghian phọ Ẹnaan egananami bọ ịḅeni inyina mọ oomo phọ ayira kụ kọ́naani rạlha aḍuugh. Nmananam bịn onyam-ọḅatan, ekureriom ẹḅaam ọkuodu phọ,

⁵² kụ oomo phọ ayira onmeeghian yogh. Mem dị ọkuodu phọ kạḅa bọ, koḅerion ni bụphe momuughu bọ dị ḍuugh kọ́miin mun, kụ yira onmeeghian yogh.

⁵³ Ịlo remugh ghan kẹsighe ịlo aḍuugh ílhoonaan kụ eenmenan. Ịlo kẹmiin ḍuugh kẹsighe ịlo ḍuugh kẹ́miin kụ eenmenan.

⁵⁴ Kụ mem dị mọsighe ịpe aḍuugh ílhoonaan bọ oonmenemi ịpe remugh ghan bọ, kụ ịpe kẹmiin bọ ḍuugh phọ mẹsighe ịpe ḍuugh kẹ́miin bọ eenmenan, bịn momuneni ịpe ọge bọ sịphe ạḍinya iigbia phọ mọ, “Mophiemi ḍuugh. Ọkpar opu phọ mamunughan.”

⁵⁵ “Ḍuugh, ọkpar opu phọ ạna odi ẹghen? Ḍuugh, opi phọ ạna odi ḍighen esi?”

⁵⁶ Ịkaraph kụ rẹngo ghan bọ ḍuugh opi phọ. Ologh kụ rạngo ghan bọ ịkaraph ịikpo phọ.

⁵⁷ Kụ ọseph ni Ẹnaan phọ ẹtuan bọ Jịzos Kraist Ọmoogh-we phọ ayira reḅeton ghan ḍịghaagh phọ ayira!

⁵⁸ Iiḅi asiya ạmi, loor ịduon phọ, ikim ni bịn ípighironu ghan. Ịsighe oomo ịnyaam mọ anyina eḍighinom ẹngo Ọmoogh-we phọ, ịdipho nyina elegheri bọ ni mọ arukumuan dị nyina eghol Ọmoogh-we phọ kụ ekumuan képe oopho.