1 Bụo ạKorint 13 - Ạḍinya Iigbia

Ẹphomoghian

¹ Eḍighi ịyaar dị uunmo ịmi ruunmo ọḅa ghan ọnhu kịrokiro phọ awe rꞌạruukpaany phọ Ẹnaan rọḅa ghan bọ kụ mị ẹphomoghian ụ́moogh, pọ ọghaaph phọ ạmi ópel ḍịaḅa ogele rꞌẹdeneneen dị rookaragh.

² Mọ mị ạmoogh ruunmo dị kịsiiny ghan ịmi ọghaaph ghan ịpe Ẹnaan egananami bọ, ḅịle rꞌịlo ọnaghanan oomo ạraraar ịbooghian, rꞌolegheri ghan oomo ạraraar ḅịle rꞌịlo ọmoogh omeeraam dị ạkasian oruphom aruugum kụ mị ẹphomoghian ụ́moogh, pọ mị oopho ịyaar ri bịn.

³ Mị atue ni ạsighe oomo ạraraar lọ mị ạmoogh aḍighinom iiḅi ạman, ạḅile kẹn ạngo loor ạmi mọ oguom nịan, kụ mị ẹphomoghian ụ́moogh, pọ ạsuo ịmi úlhoonaan.

⁴ Ẹphomoghian eḍighi ọkparam rꞌoḍighi ghan iiḅi; ẹphomoghian íḍighi ephogh-aḍien rꞌiituma rꞌobaga.

⁵ Ẹphomoghian réḍighi ghan ịlo umugholoor, rẹ́wa ghan ịlo aloor bịn, rékpom ghan ekpom, rẹ́logh ghan ịyaar ologhi.

⁶ Ẹphomoghian rébo ghan mem lọ oye ạpioman, rẹḅaal ghan ologhi mem lọ ạḍighaagh igey eḅetenu.

⁷ Ẹphomoghian réḍim ghan; ọku ólhoonaan ghan omeeraam mọ rꞌoḍuom ologhi phọ rꞌọkparam mọ ọdi.

⁸ Ẹphomoghian rémineen ghan. Aruunmo ịlo ọghaaph ịpe Ẹnaan egananami bọ kẹtol li mọony amem bịn. Aruunmo ọḅa ghan ọnon ọnhu dị ụ́naghan kesi ni eekuna. Aruunmo olegheri ịyaar keten ni,

⁹ ịdi eḍighi bọ olegheri ịyaar phọ ayira rꞌọghaaph ghan ịpe Ẹnaan egananami bọ eḍighi ni egbem bịn.

¹⁰ Kụ mem dị ịpe emunughan bọ ketu bọ, egbem mọ kọ́miin mun.

¹¹ Ẹghoroghor phọ ạmi, ẹghaaphom-ịyaar phọ ạmi rꞌịitughian phọ ạmi rꞌarigbiom mọ ạmi iḍighi ni ịlo ịbam ạnmuny. Nyịidipho mị mạmanam bọ aḍighi oye, mị masereghi eḍighinom ịyaar ịbam ạnmuny.

¹² Ịphen yira rọmiin bọ nyịidipho ẹkigh mụdi yira opogh atamaḍiki kụ rọmiin ghan oogho dị ạrol bịn tụm. Mem mọ retu bọ, oniin kạmiin ni egbodo oniin. Ịphen mị nyịidipho úlegheri bọ ụman, mị kalegheri ni ạman mem mọ ọpo phọ, ịdipho Ẹnaan milhegheri bọ ịmi ẹmadan.

¹³ Nyịidipho ịraar ạraraar phọ ịphen kụ ịmeera: omeeraam rꞌoḍuom ologhi rꞌẹphomoghian, kụ ẹphomoghian kụ ipu oomo phọ ịne.