1 Bụo ạKorint 12 - Ạḍinya Iigbia

Ịlo aruunmo aruwaloor

¹ Ọoḅeghion nụun ophogh ḍipuru phọ anyina ịlo aruunmo aruwaloor phọ! Iiḅi asiya, rꞌeniin ịlo ịphen phọ dị mị rạwa ạaghinaan anyina ílho.

² Nyina elegheri ni mọ mem mọ nyina ẹrol bọ ẹku aruru phọ, ạnmuny aghuḍuul dị rẹ́ḅa ghan kụ ịmooghom inyina eekeleghi ghan.

³ Iloghoma nụun mọ oye dị Uwaloor phọ Ẹnaan kụ aḍiemiom rạ́ḅem ghan mọ, “Moruule Jịzos,” kụ oye dị Uwaloor Iigbia phọ kụ úḍiemiom kátue ạkaaph amitiom mọ, “ẠJizos kụ Ọmoogh-we phọ ni.”

⁴ Aruunmo aruwaloor phọ kịrokiro ni, kụ oniin Uwaloor phọ ni kụ rạngo ghan bọ.

⁵ Oḍighi ọlo oye rꞌoye ni, kụ oḍighi ghan ni rọngo nyoniin phọ Ọmoogh-we phọ.

⁶ Ịnyaam oḍighinom oḍighi phọ kịrokiro ni, kụ eniin phọ Ẹnaan phọ ni kụ rẹngo ghan bọ ịnyaam oḍighi ọlo oye rꞌoye.

⁷ Rọmiin ghan eḍighinom ịyaar Uwaloor Iigbia phọ loor ạtorobo oye reten kịrokiro, ịlo ạsuo aḍita phọ.

⁸ Uwaloor Iigbia phọ ạngo ooni oye olegheri ịyaar, ạngo ooni oye ọmaar ghan ọtughemi, kụ ịyal phọ ạbidi rọkaaph ni ḍiniin adom mọ.

⁹ Ogina phọ Uwaloor phọ ni ạngo ooni oye omeeraam, ạngo ooni oye ịikpo ookonom ghan ạreezegh,

¹⁰ ạngo ooni oye ịikpo oḍighi yogh ghan ịiḍaany, ạngo ooni oye ọghaaph ghan ịpe Ẹnaan egananami bọ, ạngo ooni oye ịikpo mọ ạaḅeghion ghan ruunmo alegheri ịlo igey mꞌịkaraph aruwaloor kụ ẹsighe eru, ạngo ooni oye mọ ephum ghan kụ ạḅa ọnon ọnhu dị ụ́naghan, ạngo kẹn ooni oye mọ ạgba ghan ẹmhu phọ ạḅeni we.

¹¹ Oniin rꞌogina Uwaloor phọ ni kụ raḍighi ghan bọ oomo phọ ịphen phọ kạngo ruunmo ịlo oye rꞌoye, ịdipho ẹḅeeraan bọ nyọdi.

Aloor phọ ẹmoogh ni riisi kịrokiro

¹² Oye ạmoogh bọ ḍiniin aloor, kụ ariisi aloor phọ ịbadi ni, kụ oomo phọ ariisi phọ etulughan bọ sịphe aḍiniin phọ aloor phọ. AKraist ạkighom aani ịduon phọ.

¹³ Ughol li ogina phọ Uwaloor phọ kụ owurogh bọ oomo phọ ayira mụum mọ. Ạbuo aJu rꞌaruuruen, rꞌạrebene rꞌạbuo ade mọḅoph ḍiniin aloor phọ rọpughol ghan muniin ạmuum Uwaloor phọ.

¹⁴ Sịen dị esi kịrokiro kụ etulughan bọ eḍighi loor phọ,

¹⁵ eḍighi ịyaar dị ẹda owol phọ ẹḅem mọ, “Mị útu bọ ḍịghaagh, pọ mị úlho aani sịphe aloor phọ,” ịduon phọ bịn ímirighan nyọdi ọrol aani ịsiphe aloor phọ.

¹⁶ Ḅịle kẹn aḅeri phọ kụ ạḅem mọ, “Mị útu bọ ekpeḍien, pọ mị úlho aani sịphe aloor phọ,” ịduon phọ bịn ímirighan nyọdi ọrol aani ịsiphe aloor phọ.

¹⁷ Oomo phọ aloor phọ kụ eḍighi ekpeḍien bịn, mịnaghan ghan ika ḍụghum? Ḅịle kẹn, oomo phọ aloor phọ kụ eḍighi aḅeri bịn, mịnaghan ghan ika eḍu?

¹⁸ Kụ Ẹnaan melhegheri ni kụ ẹde bọ oomo ariisi aloor phọ ịdipho ẹḅeeraan bọ nyọdi.

¹⁹ Eḍighi ịyaar dị oomo ariisi aloor phọ kụ eḍighi nyeniin bịn, aloor phọ mịtol bọ ḍighen?

²⁰ Ịdi edi bọ, ariisi aloor phọ ịbadi ni kụ aloor phọ aḍiniin ni.

²¹ Ịduon kụ iḍighi kụ ekpeḍien phọ kémighirom ẹḅeni ḍịghaagh mọ, “Mị ụ́moogh ịyaar oḍighinom ạna.” Ḅịle kẹn, ẹmhu phọ kémighirom ẹḅeni rạda aruwol mọ, “Mị ụ́moogh ịyaar oḍighinom anyina.”

²² Okiririom ghụn ophogh, ariisi aloor phọ ịpe ẹghigh bọ dị ẹyoghoyogho ni phọ eḍighi ni ephigh iboom,

²³ kụ ariisi aloor phọ ịpe ghụn yira rogbiom ghan bọ mọ ị́man ịyaar phọ kụ ịdi yira roonmenemi ghan koghueniom. Ḅịle kẹn ariisi aloor phọ ịpe ị́nighe ghan bọ ọmiin phọ ghụn kụ ịdi yira roonmenemi ghan ọnighemiom ẹnighe

²⁴ phọ ẹpe iiḅi ariisi aloor phọ ayira rẹ́wa ghan bọ. Kụ Ẹnaan rꞌaloor ọdi ni kụ ạdeeghi bọ riisi aloor phọ ẹdiom ọngo eghuan riisi phọ ịpe eghuan íḍigh bọ.

²⁵ Esi ịduon phọ amadian ólho loor phọ, eniin edimom nyeniin dọl igbiririph.

²⁶ Kụ eniin esi aloor phọ rẹmiinom, pọ oomo ịpheri phọ rẹmiinom aani ni, kụ ọngo ḍịseph nyeniin esi, pọ oomo ịpheri phọ repin aani ni bin ọḅaal ologhi phọ.

²⁷ Oomo phọ anyina kụ aloor phọ aKraist, kụ tọrobo ọnyo anyina pọ eniin esi aloor phọ ọdi ni.

²⁸ Kụ Ẹnaan melhegheri ni kụ ẹde bọ we phọ eseere uwo oḍighi rꞌoḍighi sịphe ạsiosi phọ: ạbuḅel phọ abutelhedom, bụdi otum pạ ạbuo ọghaaph ghan ịpe Ẹnaan egananami bọ, bụdi omuneniom ịraar ạbutughemia kụ ogbi ọteeny ạbuo oḍighi yogh ghan ịiḍaany, kụ ọteeny ạbudi ọngo ịikpo ookonom ghan awe rꞌạbuo ọloghonaan ghan ạḍighaagh bụnon, rꞌạbuo ịtooghi, rꞌạbudi kepum ghan kụ ọḅa ọnon ọnhu dị ụ́naghan.

²⁹ Aḍita phọ kụ abutelhedom ḍụghum? Aḍita phọ kụ ạbuo ọghaaph ghan ịpe Ẹnaan egananami bọ ḍụghum? Aḍita phọ kụ ạbutughemia ḍụghum? Aḍita phọ kụ roḍighi yogh ghan ịiḍaany ḍụghum?

³⁰ Aḍita phọ kụ ụmoogh ịikpo ookonom ghan awe ḍụghum? Aḍita phọ kụ rọḅa ghan ọnon ọnhu dị ụ́naghan ḍụghum? Aḍita phọ kụ rọgba ghan ọnhu phọ ọphori phọ ạḅa bọ kọḅeni bụeri phọ ḍụghum?

³¹ Iseere ologhi ẹwa ghan ruunmo phọ ịpe eḍighi bọ ni ephigh iboom. Kụ nyịidipho mị kiḍeenaan inyina ịdi ẹnighe epu oomo phọ ịne.