1 Bụo ạKorint 11 - Ạḍinya Iigbia

¹ Ịtuughaany ịmi, ịdipho mị rạtuughaany bọ Kraist.

Ọkagha ẹmhu mem ịiḅereghi

² Mị rịseph ni inyina ịdi eḍighi bọ nyina rịitughian ghan ni ịmi oomo amem, ẹḅile kẹn rẹdaph ghan ịtughemi phọ mị ạḅogh bọ ịngo inyina.

³ Mị rạwa mọ ilegheri mọ aKraist kụ rapogh ẹmhu ạtorobo olephiri ọony, olhom mọ kụ rapogh ẹmhu ạnir phọ, Ẹnaan kụ repogh ẹmhu aKraist.

⁴ Esi ịduon phọ, olephiri ọony dị azua eghoony kụ aḍighom otu ạsiosi rạaḅereghi, ạḅile rạkaaph ghan ịpe Ẹnaan egananami bọ, pọ mamuton eephoogh Kraist phọ aru bọ ẹmhu phọ ọdi.

⁵ Ḅịle kẹn ạnir-ephoph dị ẹmhu ọdi ọkaghaam ụ́kagha kụ aḍighom otu ạsiosi rạaḅereghi, ạḅile rạkaaph ghan ịpe Ẹnaan egananami bọ, pọ mamuton eephoogh olhom mọ aru bọ ẹmhu phọ ọdi bịn ọgbaranaan ólho mun esi ọdi rꞌoopheeny ạnir dị aghula ẹmhu.

⁶ Ạnir lọ ẹmhu ọdi rạ́wa ghan ọkagha pọ ạsama ghan ạmadan! Kụ sịen dị ọsama phọ rꞌoghula phọ eḍighi bọ umugholoor, pọ ọdi ạkagha ghan ọkaghaam!

⁷ Olephiri ọony ọ́moogh ịyaar oghol kụ ozua ghan eghoony, ịdi eḍighi bọ aḍimite phọ ọdi ẹkigh ḍimite phọ rꞌeegu phọ Ẹnaan. Kụ aḍimite ạnir-ephoph ẹkigh eegu olephiri ọony,

⁸ ịdi eḍighi bọ ụ́sighe ọkala ạnir-ephoph kụ ọlhemom bọ olephiri ọony, ụsighe ọkala olephiri ọony kụ ọlhemom bọ ạnir-ephoph.

⁹ Ḅịle kẹn ụ́tuan ạnir-ephoph kụ ọlhem bọ olephiri ọony, ụtuan olephiri ọony kụ ọlhem bọ ạnir-ephoph.

¹⁰ Ịduon kụ iḍighi kụ ạnir ạkagha ghan ẹmhu ọdi oḍeenaan mọ ọno odianaan ịtooghi olhom mọ, ọtuan ịdipho ạruukpaany phọ edianaan bọ ịtooghi phọ Ẹnaan!

¹¹ Kụ ọlo sịen aghuḍum mọ ayira esi Ọmoogh-we phọ, ạnir-ephoph odimom ghan iighurom olephiri ọony, ḅịle kẹn olephiri ọony odimom ghan iighurom ạnir-ephoph.

¹² Ịdipho ọsighe bọ ọkala olephiri ọony kụ ọlemom ạnir-ephoph kụ ịdi kẹn ạnir-ephoph kụ rạmar ghan bọ olephiri ọony; kụ oomo phọ ịdi ịḍua esi Ẹnaan kụ eru bọ.

¹³ Ipoghom iloghi anyina: ẹkpe ḍịen ni dị ạnir-ephoph dị ẹmhu ụ́kagha kạaḅereghi ghan Ẹnaan?

¹⁴ Yira rꞌaloor ayira bịn ologhoma ni mọ ịidoony ạsilaal resiphe ghan ni olephiri ọony umugholoor,

¹⁵ kụ ạri ghụn eḍighi ni ịyaar obomaam esi ạnir-ephoph. Ịidoony ạsilaal phọ kụ ẹdi ọngo mọ ạnir-ephoph aakpereghiom ghan ẹmhu ọdi.

¹⁶ Kụ eḍighi ịyaar dị oye rạwa ọogbaghanaan ịlo ịphen phọ, pọ ịdi mị ạmoogh ọḅem ịduon mọ ẹnon eḍighinom ịyaar ílho mem lọ yoor ḅịle rꞌạbunon awe ạsiosi phọ Ẹnaan ookpomoghan esi ịiḅereghi.

Eḍien adulhe Ọmoogh-we phọ

¹⁷ Ịphen mị ạto bọ rịḅeni inyina, eniin esughanam ni dị mị kákol ịseph inyina: ookpomoghan ạsiosi phọ anyina rạloghori ghan ghụn ni bịn kpạripe rꞌoḍighi ạsuo ọngo aḍita phọ.

¹⁸ Ẹḅel ekpo phọ ịduon: mọghaaph ni ụḅeni ịmi mọ ạnmuny-ẹkpar momite sịphe ogbo phọ anyina, kụ mị rạwa ni omeeraam mọ ịphen phọ ịne ni.

¹⁹ (Iikia ílho, amadian kạtol li sịphe ogbo phọ anyina ọbo bụphe roḍighi bọ igey phọ oganana.)

²⁰ Mem lọ nyina eekpomoghan, nyina rétu ghan olhe eḍien adulhe Ọmoogh-we phọ.

²¹ Nyina ẹrologhu ude olhe amalhe, buniin rosughugha ghan ni mụo ạbidi bịn koḍighi ịyaar dị buniin romugh ọkoony, amiim rakiigh buniin.

²² Nyina ị́moogh ḍịen iloghi aruutu ọrol ghan olhe rꞌọphughol? Ḅịle nyina rẹwa ghan omuton eephoogh bụo ookpomoghan ạsiosi phọ Ẹnaan, rꞌoofolomi ạbuphe ụ́moogh bọ ịyaar olhe phọ ḍụghum? Mịna ụkaaph eeghe ịlo ịphen phọ? Ịseph inyina ḍụghum? Ịlo ạmi ríḍigh ọseph anyina.

²³ Ịtughemi phọ mị ạar bọ Ọmoogh-we phọ kụ ạḅogh bọ ịngo inyina ịduon: mọ ḍughul phọ ạḍiphe kobool bọ Jịzos Ọmoogh-we phọ, ọdi ạsighe ni ạbred,

²⁴ rọngo ḍịseph Ẹnaan, kụ ạparion, kụ ạḅem mọ, “Ọphon kụ aḍizu phọ ạmi rọngo bọ ọphelom anyina. Iḍighi ghan ịphen phọ ịitughianam ịmi.”

²⁵ Igina phọ kẹn, bịdi molhe eḍien adulhe phọ kụ ọdi ạsighe ọphaal amiim mọ kụ ạḅem mọ, “Ọphaal amiim mọ ạmuen kụ ịḅaal phọ ạmi ọsighe bọ oghirom imoom ịyo phọ Ẹnaan. Tọrobo amem lọ nyina ẹphughol, ịitughianam ghan ịmi.”

²⁶ Ẹmhu phọ ịduon mọ tụtu Ọmoogh-we phọ aru nyina kegbeelom ghan ḍuugh phọ ọdi, tọrobo amem lọ nyina ele ạbred phọ ọphon ẹḅile ẹphugholom ọphaal phọ ọphon.

²⁷ Esi ịduon phọ, oye lọ alhe ạbred phọ, ạḅile ạphugholom ọphaal amiim mọ reten omuton eephoogh Ọmoogh-we phọ, pọ mạapu ḍizu rꞌịḅaal Ọmoogh-we phọ.

²⁸ Esi ịphen phọ, oye ye ạphur ghan ạaḅeghion loor phọ ọdi aphogh kụ agbi olhe ạbred phọ rꞌọphugholom ọphaal phọ!

²⁹ Eḍighi ịyaar dị ọdi rale ghan ạbred phọ, ạḅile rạpugholom ghan ọphaal phọ kụ ụ́kiom ologhi ẹmhu aḍizu Ọmoogh-we phọ, pọ mạrol sịphe amalhe phọ asopha ọoruen ạḅama ẹmhu.

³⁰ Ịduon kụ iḍighi kụ asiloor ịbadi anyina eḅoroghian bọ rꞌịirurughian ḅịle buniin momuughu bọ.

³¹ Eḍighi ịyaar dị yira rọpur ghan ni komitenom ologhi ayira ezue, pọ ịiruen Ọmoogh-we phọ iyira kíphum.

³² Kụ Ọmoogh-we phọ masoph ọoruen rụliomom iyira ọbo kụḅaram ghan bọ iyira bụphe aḅirini phọ opiemi.

³³ Bụo asiya ạmi, esi ịduon phọ, mem lọ nyina eru eekpomoghan olhe eḍien adulhe Ọmoogh-we phọ, iikorian ghan kụ ele.

³⁴ Ọlo ọkoony rasiph alhe ghan eḍien ologhi otu kụ aru, ọbo nyina ekpetenaan ịiruen phọ Ẹnaan! Mem lọ mị aru kụ mị ạaḅeghion ịpe esugha bọ apogh.