1 Bụo ạKorint 10 - Ạḍinya Iigbia

Kẹ́eḅereghi ịkaaghineen ạrumugh

¹ Bụo asiya, ịkiom ologhi ịpe emitenaan bọ bụrude ạburude phọ ayoor ọdaph bọ Mozis. Bịdi uḍigh ḍibuo ọotu dị Ẹnaan emitiom, kụ oomo phọ ạbidi ụḅeeny ni Ọphiiny Igbilha phọ rꞌẹwoor.

² Ọotu phọ rꞌọphiiny phọ kụ ạmuum dị owurogh mọ bịdi ọḅophoghan ọdaph Mozis.

³ Oomo phọ ạbidi ule ni eniin phọ eḍien aruwaloor phọ.

⁴ Ḅịle kẹn oomo phọ ạbidi ụphughol li muniin ạmuum aruwaloor phọ. Bịdi ụphughol ghan mụum aḍighiigh aruwaloor phọ ẹdaph ghan bọ bịdi. Aḍighiigh phọ pọ aKraist rꞌaloor ọdi.

⁵ Rꞌịduon phọ ni bịn bịdi uphin ni ologhi Ẹnaan dị ạrumhu ogbogh opol awe epheeghu ni ẹpe ẹdala phọ.

⁶ Oomo phọ ạraraar phọ ịphen phọ ịlo ọsuemi ayira ologhi, ọphurom ạruru ayira mọ ịkaraph iyira kị́phu ghan ịdipho ẹphu ghan bọ bịdi,

⁷ mọ kụ́uḅereghi ghan ịkaaghineen ạrumugh, ịdipho buniin ạbidi ọoḅereghi ghan bọ. Ịdipho ạḍinya iigbia phọ ẹḅem bọ mọ, “Awe phọ ụrol ude olhe ghan ọphughol, kụ oḅerenu ọgher ịḅa.”

⁸ Yira ipesi kúpesi ghan, ịdipho buniin ạbidi opesi yogh ghan bọ kụ awe dị oḅeleghu oniin ootaany bịn omuughu ụghiom ni ịyaldi rꞌịraar ọonir.

⁹ Yira kúḍighi ghan ịlo ọdegh Ọmoogh-we phọ ịdipho buniin ạbidi oḍighi bọ kụ iḍigh-eḍum mọ ẹḍaanyogh ghan bọ bịdi ẹze.

¹⁰ Kẹ́nun ghan ịnun, ịdipho buniin ạbidi ọnun ghan bọ kụ ọokpaany aḍuugh phọ aphiemi bọ.

¹¹ Oomo phọ ạraraar phọ ịphen phọ imiteghunaan bịdi ịlo ọsuemi ạbunon ologhi, kụ ọge bọ oseere ọphurom ạruru ayira, ịdi eḍighi bọ yira odi mem dị aruukuna phọ rẹteeny.

¹² Oye lọ ragbi mọ ọno ạmeera ni amiigha ni loor, ọbo ọdi kameel ghan bọ!

¹³ Tọrobo ọdegh ophogh dị ịteeny inyina, pọ rạteeny ghan ni weye. Kụ Ẹnaan reḍighi ghan ni ịlo dị aguanaan, kụ ọdi kámeera mọ ọdegh ophogh dị ipel inyina ịteeny inyina. Mem lọ ọdegh ophogh ịteeny inyina, ọdi kịngo ni inyina ịnyaam ọkparam ḅịle rꞌịlo oḍighi kụ okpetenaan.

¹⁴ Iiḅi asiya ạmi, esi ịduon phọ, ịkporion rạghaagh ọoḅereghi ghan ịkaaghineen ạrumugh.

¹⁵ Mị ạsighenom mọ nyina awe ologhi ni. Imitenom ezue iloghi phọ anyina kụ ẹeḅeghion ịphen mị rạkaaph bọ ephogh.

¹⁶ Ọḅophoghan ọphugholom oniin ọphaal amiim mọ yoor oghol ghan bọ rọngo ḍịseph Ẹnaan — ịduon phọ pọ yira kụ rópin bin ạsuo ịḅaal phọ aKraist ḍụghum? Ọḅophoghan olhe eniin eeḅoghoḍi ạbred phọ yoor ọparion bọ — ịduon phọ pọ yira kụ rópin bin ạsuo aloor phọ ọdi ḍụghum?

¹⁷ Ịdipho ạbred phọ yira rọḅophoghan ghan bọ kole aḍighi bọ ni eniin eeḅoghoḍi, oomo phọ ayira, aḍita phọ emuza-muza, pọ aḍiniin aloor phọ ni.

¹⁸ Ịitughian eḍighinom ịyaar awe phọ Ịzirel: bụphe role ghan bọ rạraar lọ ọphinyonom rịkia roḍeenaan ghan mọ bụno rooseeny ghan Ẹnaan phọ ọkananaan bọ enmeny ịyaar aghuḍum mọ.

¹⁹ Ẹmhu ịphen phọ eeghe? Ọony aghuḍuul ạmoogh ni ḍiphooghu ḍụghum? Eḍien lọ ọngo mọony aghuḍuul phọ reenmia ghan ni ḍụghum?

²⁰ Kị́duon. Mị rạḅem ghan mọ ạrikia lọ ọphighiron ọḅam enmeny ịyaar aghuḍum aruru, pọ ọngo ruru ụ́ngo Ẹnaan. Mị ụ́wa mọ ịmoogh mụḅoph rꞌaruru.

²¹ Nyina kẹ́ḅar ọphaal Ọmoogh-we phọ rꞌọphaal aruru kụ ẹpugholom, ḅịle kẹn nyina kẹ́ḅar malhe Ọmoogh-we phọ rꞌamalhe aruru kụ ele.

²² Yira rọwa ghan mọ Ọmoogh-we phọ ạghagh ologhi ḍụghum? Ẹkigh mụdi ịnyaam ayira kụ ipu ịlo ọdi ḍụghum?

²³ Rọḅem ghan mọ, “Ịlo umirighan iyira oḍighi ílho.” Ọbo ịduon phọ ni, kụ oomo ạraraar kụ ị́nighenaan oye oḍighi ghan. “Ịlo umirighan iyira oḍighi ílho,” oomo phọ ịdi kụ kẹ́loghonaan ḍịghaagh ophophe omeeraam mọ.

²⁴ Oniin ạwa ghan ịlo kẹngo sụo nyọori phọ, kị́lo ọdi bịn!

²⁵ Itoph ologhi anyina iipuruan kị́tol bịn ạa ghan tọrobo ẹnam lọ ọpham orumom ḍighi aal,

²⁶ ịdi eḍighi bọ ạḍinya iigbia phọ ẹḅem mọ, “Ọmoogh-we phọ kụ ạmoogh de phọ rꞌoomo ạraraar phọ.”

²⁷ Eḍighi ịyaar dị ọnyo aruru ịmagh inyina olhe eḍien kụ nyina emeeraam ni ẹghi, pọ itoph ni ologhi anyina iipuruan kị́tol bịn ele ịyaar lọ ịḅamanaan inyina.

²⁸ Kụ eḍighi ịyaar dị oye arophaan ọnhu mọ, “Ẹphen eḍien dị ọphighironom ẹkia ọngo ruru,” pọ ịtuan nyọdi ẹsighe ologhi ẹwilenom eḍien phọ.

²⁹ Nyina ekol nyọdi kụ rẹbile bọ eḍien phọ, kị́itughian ologhi anyina. Ooni oye kapuru mọ, “Ẹmhu eeghe nụun kụ mịna kạtuan bọ ịitughian ologhi ọnon oye bịn asoph oḍigh eḍighinom ịyaar phọ ạmi akpere?

³⁰ Eḍighi ịyaar dị mị rakol ghan eḍien ạmi kạngo ḍịseph Ẹnaan, oye kạtuan bọ eeghe kụ ụḍagha ịmi ịlo eḍien phọ mị maghol bọ ni ạngo ḍịseph phọ?”

³¹ Kụ mị ạpagharanaan ạḅeni we mọ, “Tọrobo ịlo nyina eḍighi, mꞌamale ḅịle mꞌịpughol, iḍighi ghan oomo phọ ịne eghueniom Ẹnaan.

³² Ạdol phọ anyina kíḍighi ịiḅaghami ịngo bụo aJu rꞌaruuruen rꞌạbuo ạsiosi phọ Ẹnaan.

³³ Ịtuugh dọl phọ ạmi kụ ẹrol aani. Oomo phọ oḍighi phọ mị aḍighi ghan bọ, mị ụwa ghan ni ọḅaalami ologhi awe, ạḅile ạatughian ghan ịlo ạsuo aḍita phọ, kọ́lo ạmi bịn, ọbo bịdi ọmoogh aani pẹleeny.”