1 Ạbudaam 9 - Ạḍinya Iigbia

Ẹnaan ẹḅile eḍeenaan loor Sọlomon

¹ Mem dị ạSolomon ạmadan bọ ọlogh Otu Ịiḅereghi phọ rꞌotu ọdaam mọ, rꞌoomo ịpe ọdi ạatughian bọ ẹḅeeraan nyọdi ịlo oḍighi,

² kụ Ọmoogh-we phọ amite egaan esi ạSolomon amuneni ịyal amem ịdipho ọdi amite bọ egaan phọ ẹpe Gịbion.

³ Kụ Ọmoogh-we phọ ạḅeni nyọdi mọ, “Mị mạnaghan ni ịiḅereghi phọ ạna rꞌịlhom mọ ạna ịpe nạ ụlhom bọ ịmi. Mị mạasa Otu phọ ọphon nạ ạlogh bọ aseere dọl iigbia mọ aḍien phọ ạmi ẹrol sịphe phọ kꞌagee-pọ, kụ ariḍien ạmi rꞌologhi phọ ạmi kẹtol ghan sịphe phọ oomo amem.

⁴ Kụ ịlo ạna eru mạar dị nạ katelhe ghan ni egbodo phọ ạmi ịdipho aDevid ọde phọ ạna arelhe ghan bọ egbodo ạmi rꞌogey ologhi rꞌaruukuan, kụ kạdaph ghan aḍighi ghan oomo ịpe mị ạtooghi bọ ạngo nyịna, kụ aako ghan ịtooghi phọ ạmi rꞌịiruen phọ ạmi,

⁵ pọ mị kagananami ni ạgada ọdaam eelhe phọ ạna aaleenyemi Ịzirel kꞌagee-pọ ịdipho mị agananami bọ Devid ọde phọ ạna kụ ạḅeni bọ mọ kẹtol ịdipho oopho bịn, oye kamite ghan sịphe oghiil atum oghiil phọ ạna kụ ạtolom ạgada ọdaam eelhe phọ Ịzirel.

⁶ Kụ eru mạar dị nạ ạgbatanaan ụwile ịmi, mꞌạna mꞌạnmuny ạna, kụ ọwile ooko iilogh phọ ạmi, kụ ẹghi rekumu ịnon ạrumugh rẹeḅereghi bịdi,

⁷ pọ mị kamutonaan Ịzirel sịphe ade phọ ạḍiphe mị ạngo bọ bịdi rꞌOtu phọ ọphon mị mạsaḅar bọ aseere dọl iigbia ạngo ḍien phọ ạmi; mị kạḅitonaan ni bịdi kụ Ịzirel aḍighi ḍidogh rꞌịgilaam esi oomo awe.

⁸ Kụ Otu phọ ọphon aleeny bọ ịduon, tọrobo oye lọ raten sịen keḍigh ghan ni iikia kụ ạnyaghaan ghan ịpaaph, kụ bịdi ọḅem ghan mọ, ‘Ọmoogh-we phọ ạtu ika kụ aḍighi bọ ịduon de phọ ạḍien rꞌotu phọ ọphon phọ?’

⁹ Kụ bịdi ọḅem ghan mọ, ‘Ịdi eḍighi bọ bịdi moghel Ọmoogh-we Ẹnaan phọ ạbidi ẹpe ẹsighe bọ bịdi ẹpe ade phọ Ijipt ẹḍuanam kụ ọḅile ọki oḍighom ịnon ạrumugh rọoḅereghi ghan kooseeny bịdi. Ịduon kụ iḍighi kụ Ọmoogh-we phọ ạtu bọ ạsighe ịkaraph phọ ịphen azuom bịdi.’”

Oguan ạSolomon rꞌaHiram

¹⁰ Ẹman bọ ịyaldi ạsia kụ ẹdi ạSolomon ạsighe bọ ạloghom ịyal phọ aruutu phọ ịphen, Otu Ịiḅereghi phọ rꞌọpo ogiga ọdaam mọ.

¹¹ AHiram ọdaam mọ aTaya kụ ạngooghi ghan bọ Sọlomon sịpo ọsaga rꞌạsipo obool rꞌoomo agol phọ ịpe ọdi rạwa bọ. Kụ ạSolomon ạngo Hiram ịyaldi ạramha ẹpe ade phọ aGalili.

¹² Kụ aHiram ạḍua ẹpe Taya ạghi ạmiin rạmha phọ ạSolomon ạngo bọ nyọdi, kụ nyọdi ị́ḅeeraan.

¹³ Kụ ọdi ạḅem mọ, “Ạramha phọ ịphen nạ ụngo bọ ịmi eeghe ọdo ạramha, umor ạmi?” Kụ ọdi aghol pạkiri phọ mọ ade aKabul kꞌarodon ni.

¹⁴ Agol phọ aHiram ạsighe bọ ạghiomonaan ọdaam mọ apel li inya ọonir igbogh ịtoom ẹemor.

Ịnon iiḅi iiḍighi dị ạSolomon aḍighi yogh

¹⁵ Osogh awe eepua oḍighi phọ ạSolomon ọdaam mọ agu bọ ịduon: awe ọlogh Otu Ịiḅereghi phọ rꞌọpo ogiga phọ ọdi rꞌaMilo rꞌiikpe oghoony phọ aHazor rꞌaMegido rꞌaGezer.

¹⁶ (Ọdaam eelhe phọ Ijipt azuom ni ẹgham Gezer aguom nịan, ạze we phọ orugh bọ sịphe ẹmha phọ, kụ ạsighe ạkuom ọnyani phọ ọdi nyọpo ạSolomon aphin bọ.)

¹⁷ ẠSolomon ạḅile ạlogh ẹmha aGezer ẹpe esoorom ạBet Horon,

¹⁸ rꞌaBaalat, rꞌạTamar ẹpe ẹdala ade phọ aJuda,

¹⁹ rꞌoomo ạramha ịlo ookoom ghan aruphua ịpe ạSolomon ạmoogh bọ, rꞌạramha arughuugh ẹgham ọdi, rꞌạramha ịlo awe dị rokiilom ghan rụsu ọdi rꞌịpe ạSolomon ạatughian bọ ịlo odoghoḍi ẹpe Jeruselem rꞌẹpe Lẹbanon rꞌoomo ade phọ ọdi ạda bọ.

²⁰ Kụ awe Ạmorait rꞌạHitait rꞌạPerezait rꞌaHivait rꞌaJebusait bụphe osugha bọ sịphe ade phọ, bụen phọ kạ́nmuny Ịzirel.

²¹ Bụen phọ ạnmuny ạbidi dị osugha sịphe ade phọ, bụdi ạnmuny Ịzirel útue ụ́ze ụ́madan, ạSolomon ạsighe bịdi aseere dọl ạrebene, kụ bịdi odi ghan dọl phọ ạḍiphe phọ kꞌarodon.

²² Kụ nmụny phọ Ịzirel, ạSolomon óḍighi bịdi rẹbene. Bịdi oḍighi we ẹgham ọdi rꞌabutelhedom ọdi rꞌạbuo ạrumhu awe ẹgham mọ ọdi; buniin ropogh ghan rughuugh-ude phọ ọdi, buniin ropogh ghan rụsu phọ ọdi.

²³ Bụo ạrumhu awe iiḍighi osogh phọ ạSolomon ọman bọ oogh okuron rꞌooghdi awe.

²⁴ Ọnyani ọdaam eelhe phọ ạḍua ẹpe ẹmha phọ aDevid agheel ẹpe otu ogiga phọ ọdi nyọpo ạSolomon ạloghonaan bọ nyọdi kụ ọdi agbi ọlogh aMilo.

²⁵ Ịraar amem lhạ ạSolomon ạphinyon bọ rịkia oguom ạnian rꞌẹboroph ạngo Ọmoogh-we phọ, ạsuughi ghan ịnsens egbodo Ọmoogh-we phọ sịphe enmeny ạrikia phọ ọdi ạloghonaan bọ Ọmoogh-we phọ. Ịduon kụ ịdi ọdi ạmadan bọ Otu Ịiḅereghi phọ.

²⁶ ẠSolomon ọdaam mọ ạḅile ạmoogh rụnwunyaru ẹpe Ezion Geber etuman bọ Elat ẹpe oolhe Ọphiiny Akaba phọ ẹpe ade phọ Idom.

²⁷ Kụ aHiram ạsighe we dị olegheri ịlo ọphiiny arom bịdi ọḅophan rꞌabutelhedom mọ ạSolomon,

²⁸ kụ bịdi ọghi Ofir kụ ọsighe ẹpe phọ gol dị ẹemor epel ḍioph rꞌinya ọonir igbogh ịtoom ẹemor ọsighe ọghiom Sọlomon ọdaam mọ.