1 Ạbudaam 5 - Ạḍinya Iigbia

ẠSolomon aakolobian ọlogh Otu Ịiḅereghi phọ

¹ Mem dị aHiram ọdaam mọ aTaya ạnaghan mọ mọsagharan elho eeko Sọlomon oḍighi nyọdi ọdaam, ạsighe esi ọde phọ ọdi, ọdi arom rụukpaany ọghi ọteeny Sọlomon loor esi dị ọdi ạphomoghian ni Devid.

² Kụ ạSolomon arom ạghiom Hiram kụ ạḅeni mọ,

³ “Nạ alegheri ni mọ aDevid ọde phọ ạmi ọ́lhoghonaan Otu Ịiḅereghi phọ Ẹnaan phọ ọdi loor ạraagham mọ ekoom bọ nyọdi ekitonom, tụtu Ọmoogh-we phọ aḍighi ịdi ọdi ạazeghiom bọ rạda aruwol ọdi.

⁴ Kụ nyịidipho Ọmoogh-we Ẹnaan phọ ạmi mụngo ịmi ẹepho oomo arikpisi phọ; oye iyoor sighiton rạ́wa mun, ịkaraph arigbiom ílho mun.

⁵ Mịin, nyịidipho mị rạatughian ghan ịlo ọlhoghonaan otu ḍien Ọmoogh-we Ẹnaan phọ ạmi; ịdipho Ọmoogh-we phọ ạghaaph bọ ạḅeni Devid ọde phọ ạmi mọ, ‘Ọony ạna ọpo mị kạtolomi bọ sịphe ạgada ọdaam ẹmha phọ ạsighe esi phọ ạna, ọdi kụ kạloghonaan ḍien phọ ạmi otu.’

⁶ Kụ nyịidipho tom weye ạna, bịdi ulereghinaan ịmi ịsaga phọ edi bọ ẹpe Lẹbanon. Abutelhedom ạmi kotu ọḅaram bụphe ạna, kụ mị kạkpe ni butelhedom mọ ikpoki lọ nạ ạḅem. Sịphe ogbo phọ ayoor awe dị ọmaar olhereghi ireeny ịdipho ạbuo aSaidon úlho.”

⁷ Mem dị aHiram ạnaghan bọ dom mọ ạSolomon, kụ ọdi ạmoogh ọḅaal ologhi, kụ rꞌibo kụ ạḅem mọ, “Ạḍiseph ẹrolonaan Ọmoogh-we phọ rodon phọ ạḍien dị ạngo bọ Devid mọony dị ạsu ologhi dị ạda eboom eelhe dị oleeny ịduon.”

⁸ Kụ aHiram arom ạghiom Sọlomon ạḅeni mọ, “Mị mạnaghan ni dom mọ nạ arom bọ uruom ịmi. Mị kaḍighi ni oomo ịpe nạ ạḅem bọ ịlo ireeny ịsaga phọ rꞌạsipo arobool phọ.

⁹ Abutelhedom ạmi kotool li ẹpe Lẹbanon ọsighe otu osiemi sịphe ọphiiny phọ, kụ mị ạgba ạzoghiom ạsighe atu asiemi esi phọ ẹpe nạ kạma bọ, kụ mị ạsighe apunughi ạnyu esi phọ kụ nạ ạsighe. Kụ nạ aḍighi ịpe mị rạatughian bọ, ịlo nạ kạngo ghan eḍien ọto kꞌạmi.”

¹⁰ Kụ aHiram ạsighe ireeny ịsaga phọ rꞌạsipo arobool phọ ạsighe ạghiomonaan Sọlomon ịdipho dị ạwa bọ.

¹¹ ẠSolomon ạngo ghan Hiram 2,000,000 ịtoom igbogh ẹemor ịbiakpa eḍien ọto kꞌọdi ra 400,000 aruuku ạmunum. ẠSolomon ạngo ghan ịphen phọ tọrobo ạlha.

¹² Ọmoogh-we phọ ạngo olegheri-ịyaar Sọlomon ịdipho ọdi aguanaan bọ nyọdi; kụ aHiram rꞌạSolomon ọmoogh ẹepho rꞌạmuḅoph, oghiran ịyo.

¹³ Kụ ạSolomon ọdaam mọ agu osogh dị oomo awe Ịzirel kụ kosogh ghan; kụ awe phọ osogh bọ ụman bọ ịraardi ọonir awe.

¹⁴ Ọdi ạsighe ghan ḍioph ọonir awe ụnwanyu ạghi Lẹbanon, kụ onmeeghi ghan ni kụ otigheel ologhi otu ạbidi ọtol ịyal ụnwanyu. Ọdi ạsighe Adoniram aḍighi uwo ẹmhu ạbuo osogh phọ.

¹⁵ ẠSolomon ạmoogh bọ we dị kotool ghan sidool oḍualdi ọonir awe; bụdi roogbo ghan rạna ẹpe ạramha ruugum mọ ọman bọ ọphaanyadi awe.

¹⁶ Ḅịle kẹn, bụphe rọtooghi ghan bọ kọngo bụphe roḍighi bọ iiḍighi phọ ọman bọ ịraar ọonir rꞌịraar okuron awe.

¹⁷ Ụdaph ghan ịpe ọdaam mọ ạḅeni bọ bịdi oḍighi, kụ bịdi orool iboom iiḅoghoḍi ạrana omiteghom, rạna dị ẹman iboom ikpoki rꞌasighiigh dị oogbo ịlo ọloghom Otu Ịiḅereghi phọ.

¹⁸ Kụ ạbuloghom aruutu phọ, bụphe ạSolomon rꞌạbuphe aHiram, rꞌawe phọ ạBiblos omiigh ạayagh asighiigh phọ rꞌoghulogh ạsipo phọ ịpe kọloghom bọ Otu Ịiḅereghi phọ.