1 Ạbudaam 3 - Ạḍinya Iigbia

ẠSolomon ạaḅereghi ạlhom Ẹnaan olhegheri ịyaar

¹ ẠSolomon rꞌọdaam eelhe phọ Ijipt ọḅoph ọnhu: ạSolomon ạsighe ọnyani ọdaam eelhe phọ aphin, ạpham agheelom ẹpe ẹmha phọ aDevid, tụtu ọdi ạloghoḍi otu ọlo ọdi rꞌOtu Ịiḅereghi phọ ạmadan, ạḅiir iikpe aghoonyom Jeruselem.

² Awe phọ Ịzirel ụphinyonaan ghan rịkia ẹpe aroogbolom mọ, ịdi eḍighi bọ mem mọ ọpo phọ Ọmoogh-we phọ otu kọ̋lhoghonaan.

³ ẠSolomon ạphomoghian Ọmoogh-we phọ, ạdaph oomo oroma phọ ịpe aDevid ọde phọ ọdi arelhe ghan bọ, omuton ọphinyonaan ạrikia phọ rꞌọsuughi ịmuwa phọ ạnyu arenmeny ạrikia phọ.

⁴ Enmeny ạrikia ẹlo Gịbion kụ elhom. Eniin amem ạSolomon ạghi ẹpe ọphinyon ọonir ạrikia oguom ạnian.

⁵ Ẹpe Gịbion kụ ẹdi Ọmoogh-we phọ amite egaan ḍughul esi ạmalha aḍeenaan loor ọdi, kụ ạḅeni Sọlomon mọ, “Ụlhom ịmi ịyaar lọ mị kạngo aani nyịna.”

⁶ Kụ ạSolomon ạphagharanaan mọ, “Nạ uḍeenaan ni otelhedom mọ ạna aDevid ọde phọ ạmi eboom ẹphomoghian, ịdipho ọdi ạrol bọ risigh ạna rꞌọgba igey rꞌaruukuan rꞌologhi dị aseleman esi ạna, kụ nạ ạrolom nyọdi rꞌoboom ọnma ighirigiir, kụ nạ ạngo nyọdi mọony mọ ạrolom ạgada ọdaam eelhe phọ ịduon edi bọ rodon.

⁷ Kụ nyịidipho, Ọmoogh-we Ẹnaan phọ ạmi, nạ maḍighi otelhedom mọ ạna ọdaam ạsighe esi ọde phọ ọdi: kụ mị ọony aani ni, mị úlegheri aani ịlo orelhe omite rꞌorelhe oḍigh.

⁸ Kụ otelhedom mọ ạna odi ogbo awe phọ ạna, bụphe nạ ạsaḅar bọ, ḍita awe dị kótue ogbi kẹn kótue ọbal omuneni.

⁹ Ngọ otelhedom mọ ạna olhegheri ịyaar dị ọdi kạsighe apoghom ghan we phọ ạna aagbo ịiruen dị eeleeny. Mị úlegheri ọgbaranaan dị odi esi igey rꞌịkaraph. Ạnhian kụ katue bọ aagboonaan ḍita awe phọ ạna ạbuen ịiruen?”

¹⁰ Ịlom mọ ạSolomon ạlhom bọ ẹḅeeraan Ọmoogh-we phọ.

¹¹ Kụ Ẹnaan ẹḅeni nyọdi mọ, “Loor esi ịlom mọ ịphen nạ ạlhom bọ, kụ nạ ụ́lhom bọ kụudoony aghuḍum, kẹn nạ ụ́lhom bọ ẹelha rꞌaghuḍum ạbuphe ọlogh bọ nyịna ḍien, kụ nạ ạlom olhegheri ịyaar olegheri ghan ịlo ẹnighe rꞌịlo ị́nighe.

¹² Mịin. Nyịidipho mị mạtuugh ịpe nạ ạlhom bọ aḍighi. Mịin. Mị mạngo nyịna ologhi olhegheri ịyaar rꞌọnaghan ạḍughum, olegheri ghan ịlo ẹnighe rꞌịlo ị́nighe. Kụ ọnon ọlo kạghigh nyịna ólho, ḅịle kẹn ọnon oye dị kạsighe esi phọ ạna kụ kạtol ịduon nạ ạrol bọ ólho.

¹³ Kụ mị ạḅile ạngoom nyịna ịdi nạ ụ́lhom, ẹelha rꞌarughuenian. Kụ iḍighi ọnon ọdaam dị kọsighe ọmaam nyịna ólho, oomo asiḍughul-otu phọ ạna.

¹⁴ Eru mạar dị nạ kạdaph ni reten phọ ạmi kụ atelhe ghan aako ghan ịtooghi phọ ạmi rꞌiilogh phọ ạmi ịdipho aDevid ọde phọ ạna ạdaph ghan reten phọ ạmi kụ arelhe ghan, pọ mị kạdoonyemi siḍughul-otu phọ ạna.”

¹⁵ Kụ ạSolomon ạsuma, kụ aloghoma mọ mụen phọ ạmalha. Kụ ọdi ạghi Jeruselem, kụ ọdi ạmeera egbodo Igbe Ịyo phọ Ọmoogh-we phọ kụ ạphighironaan rịkia oguom ạnian rꞌạrikia ẹboroph, kụ alianaan butelhedom mọ ọdi ẹyaal.

ẠSolomon asoph ḍịgbagara

¹⁶ Kụ ịyal abulhiom ẹmha ạnmariir oru sịphe phọ ọteeny ọdaam mọ, kụ ọmeera egbodo ọdi.

¹⁷ Kụ oniin ạnir phọ ạḅem mọ, “Sey, ọde-otu ạmi, ạnir phọ ọphon phọ rꞌạmi kụ urugh oniin phọ otu phọ, kụ mị ạmar mọony mem dị ạnir phọ ọphon phọ odi ni sịphe otu phọ.

¹⁸ Kụ mị ạmar bọ ịraar aḍughul-otu reten bịn ạnir phọ ọphon ạmar aani. Ịyal ayoor bịn kụ urugh sịphe otu phọ, ọnon oye ólho.

¹⁹ Kụ ọony ạnir phọ ọphon amugh ḍughul dị ọdi ạminanam mọony phọ ọdi aghiigh.

²⁰ Kụ ọdi ạsuma ogbo aḍughul bịn aru ạsighe mọony phọ ạmi sịphe ịigaany phọ ạmi, mem dị ọnyani-otu phọ ạna rạnaani, ạsighe ạmuneen rụgbo ọdi, ạsighe oḍim ọony phọ ọdi ạmuneen rụgbo ạmi.

²¹ Kụ mị ạsuma ḍịroor ọngo ọony phọ ạmi mạmaam, kụ mị ạmiin mọ mamugh. Kụ mị akiririom aphogh dị mẹḅaal, kọ́ony phọ ọpo ạmi mị ạmar bọ.”

²² Kụ ọphori phọ ạnir phọ ạḅem mọ, “Eeye. Ọphon odi bọ kụ ọony phọ ọpo ạmi. Ọpo mamugh bọ kụ ọony phọ ạna.” Kụ ọḅel ạnir phọ ạḅem mọ, “Eeye. Ọpo odi bọ kụ ọdi ạmi; ọpo amugh bọ kụ ọdi ạna.” Ịphen phọ bịdi ụugbaghanaan ghan risigh ọdaam mọ.

²³ Kụ ọdaam mọ ạḅem mọ, “Ạnir phọ ọphon rạḅem ghan mọ ọony phọ ọphon odi bọ kụ ọlo ọno, mọ ọpo amugh bọ kụ ọlo ọdi; kụ ọphori phọ ạnir phọ rạḅem ghan mọ ọony phọ ọpo mamugh bọ kụ ọony phọ ọpo ọdi, mọ ọphon ọdi bọ kụ ọony phọ ọpo ọno.”

²⁴ Kụ ọdaam mọ ạḅem mọ, “Ịsighe elhool ẹgham iruom ịmi. Kụ ọsighe elhool ẹgham mọ oru oseere risigh ọdi.”

²⁵ Kụ ọdaam mọ ạḅem mọ, “Ịsighe mọony phọ ọpo odi bọ edi ịyal abin, ẹsighe bin ẹngo ạnir phọ nyọon, ẹsighe bin ẹngo nyọori phọ ạnir phọ.”

²⁶ Kụ ạnir phọ ọpo ọony phọ ọdi odi bọ ạḅeni ọdaam mọ mọ, “Igbiririph ọony phọ ạmi ẹpughan. Sey, ọde-otu ạmi, ngọ nyọdi omoon ọony phọ, kákiigh.” Kụ ọphori phọ ạnir phọ ạḅeni ọdaam mọ mọ, “Mụghumo ọlo ọdi mọ ọlo ạmi, pọ odi ni.”

²⁷ Kụ ọdaam mọ ạphagharanaan kụ ạḅem mọ, “Ịyaar dị kọtu kụ okiigh mọony phọ ílho. Ịsighe omoon ọony phọ odi bọ ẹngo ọḅel ạnir phọ. Ọdi kụ ọkaraghi onhiin ọony phọ.”

²⁸ Kụ oomo awe Ịzirel ọnaghan ọoruen aḍighiton phọ ọdaam mọ asoph bọ, kụ bịdi oghiilaan ọdaam mọ, ịdi eḍighi bọ bịdi ọmiin mọ olegheri-ịyaar Ẹnaan phọ kụ odi loor ọdi, ọsighe ghan oogboom ịiruen.