1 Ạbudaam 20 - Ạḍinya Iigbia

Aweye ạSiria otuphiom ẹgham Ịzirel

¹ ẠBen Hadad ọdaam mọ ạSiria aakpomoghi oomo awe ẹgham mọ ọdi ạghi azuom ẹgham Sameria kụ eeghi, ọdi rꞌịraardi rꞌịyal ạbudaam mọ oḍighan bọ nyọdi ḅịle rꞌạrusu rꞌarughuugh-ude.

² Kụ ọdi arom rụukpaany mọ ọghi ẹpe ẹmha phọ ọteeny Ehab ọdaam mọ Ịzirel ọḅeni nyọdi mọ, “Mị ạBen Hadad ạḅem ịduon mọ,

³ ‘Asilva phọ ạna rꞌagol phọ ạna ịlo ạmi. Igey ạnmariir phọ ạna rꞌạnmuny phọ ạna rꞌoomo igey ạraraar phọ ạna ịlo ạmi.’”

⁴ Kụ ọdaam mọ Ịzirel ạphagharanaan kụ ạḅem mọ, “Oye dị ụmoogh ịmi, mị ọlo ạna ọdaam mọ, rꞌoomo ạraraar phọ ạmi ịlo ạna, ọdaph ịpe nạ ạghaaph bọ.”

⁵ Kụ ạruukpaany phọ ọḅile kẹn ọghi ọteeny nyọdi kụ ọḅeni mọ, “ẠBen Hadad ạḅem ịduon mọ, ‘Mị marom ghan ni mọ oru ọteeny nyịna mọ ọsighe silva phọ ạna rꞌagol phọ ạna, rꞌạnmariir phọ ạna rꞌạnmuny phọ ạna urom.

⁶ Mị katom butelhedom mọ ạmi ọdo amem mọ ạmuen iḍue bịdi oḅiligha oomo ogiga phọ ạna rꞌaruutu abutelhedom mọ ạna. Kụ ịdi bịdi koḍighi bọ tọrobo egey ịyaar lọ bịdi ọmiin sịphe kꞌạna, bịdi ọsighe ghan ọpham ọḍuanam.’”

⁷ Kụ Ehab ọdaam mọ Ịzirel ạmagh oomo ikumoor awe ịsiphe ade phọ mọ itu kụ ạḅeni bịdi mọ, “Ịlogh elegh, mị rịiḅereghi ni inyina. Ịmiin nyịidipho. Oye phọ ọphon rạwa ịiḅaghami. Ọdi arom mọ oru ụḅeni ịmi mọ mị ụsighe nmạriir phọ ạmi rꞌạnmuny phọ ạmi, asilva phọ ạmi rꞌagol phọ ạmi, ụngo nyịno. Kụ mị ụ́ngo nyọdi ọkaraph ọnhu.”

⁸ Kụ oomo ikumoor awe phọ rꞌoomo awe phọ ọḅeni nyọdi mọ, “Kạ́naghan ịlo ọdi, kámeera.”

⁹ Kụ Ehab ạḅeni rụukpaany phọ ạBen Hadad mọ, “Ịḅeni nyọpo ụmoogh bọ ịmi ọdaam mọ mọ, ‘Oomo ịḅel phọ ịpe nạ arom bọ butelhedom mọ ạna, mị kaḍighi ni. Kụ ọlo ịphen egi phọ mị káḍighi.’” Kụ ạruukpaany phọ ọdi ogheel ọghaaph ịphen phọ ọḅeni nyọdi.

¹⁰ Kụ ạBen Hadad arom ạghiom Ehab kụ ạḅeni mọ, “Ạrumugh phọ ịgurogh ịmi eghiigh eḍighi ịlo epu sịen mụghumo ọoru phọ aSameria kamuza ni ẹezua ạḍighaagh oomo awe phọ ạbuphe ụdaph bọ ịmi.”

¹¹ Kụ ọdaam mọ Ịzirel ạphagharanaan mọ, “Oye ẹgham mọ ọpo rạnyaaghian bọ ịlo ẹgham kúutuma ghan ịdipho ọlo mạghi ạkpar apu arigheel.”

¹² ẠBen Hadad rọnaghan dom mọ ạḍien, kụ ọdi rꞌạbueri phọ ạbudaam mọ rꞌọdi ọḅoph bọ odi ẹpe ophoghoghoony phọ rọpughol ghan miim, kụ ọdi ạto ạḅeni we phọ ọdi mọ, “Ịnyaaghian ịlo ozuom ẹgham ẹmha phọ,” kụ bịdi ụtuugh ni oḍighi.

¹³ Mem mọ ạmuphe, oyil ạghi ni ạteeny Ehab ọdaam mọ Ịzirel kụ ạḅeni mọ, “Ọmoogh-we phọ ạḅem ịduon mọ, ‘Nạ ạmiin ni ẹgham mọ ạbuen? Mịin, mị kạḅogh bịdi ạlogh ḍịghaagh ạna rodon, kụ nạ alegheri mọ mị kụ Ọmoogh-we phọ ni.’”

¹⁴ Kụ Ehab apuru mọ, “Ạbuanhian kụ koḍiemiom bọ ịphen phọ?” Kụ oyil phọ mọ, “Ọmoogh-we kụ ạḅem bọ ịduon phọ, kẹḍua esi ugheel ạnmuny ẹgham mọ ạbuo ạrumhu phọ ropogh bọ rịikpigh areelhe phọ kụ emite.” Kụ ọdi apuru mọ, “Ạnhian kụ kạpur bọ atuphe ẹgham mọ?” Kụ ọdi ạphagharanaan mọ, “Nạ.”

¹⁵ Kụ Ehab agbi ugheel ạnmuny phọ, bụphe ropogh bọ reelhe phọ, kụ bịdi ọman bọ ịyal okuron rꞌịyaldi rꞌịyal awe; kụ ọdi agbi oomo awe phọ Ịzirel, kụ bịdi ọman bọ oḍual ọonir awe.

¹⁶ Kụ bịdi oḅetenu ootaany mem dị ạBen Hadad mạphughol miim sịphe ophoghoghoony phọ, ọdi rꞌịraardi rꞌịyal ạbudaam mọ oḍighan bọ nyọdi.

¹⁷ Ugheel ạnmuny phọ ạbuphe ropogh bọ rịikpigh areelhe phọ kụ ụphur oḍiemi ghan. ẠBen Hadad arom rụukpaany mọ ọghi ophogh ịpe remite bọ, kụ bịdi ọḅeni nyọdi mọ, “Awe ọḍua ni ẹpe Sameria rotu.”

¹⁸ Kụ ọdi ạḅeni bịdi mọ, “Isiphi bịdi imoom kẹ́ze mụghumo ụtu ẹepho kụ rotu bọ, mụghumo bịdi ụtu ẹgham kụ rotu bọ.”

¹⁹ Ugheel ạnmuny phọ ạbuphe phọ ropogh bọ rịikpigh areelhe phọ ọḍua sịphe ẹmha phọ rọki, rꞌawe ẹgham mọ ọdaph bọ bịdi.

²⁰ Oye ye ạbidi aghiigh mụlogh-ḍien phọ ọdi, kụ awe ạbuo ạSiria phọ osumughu kụ Ịzirel aphorogh bịdi. Kụ ạBen Hadad odaam mọ ạSiria aḍigh ạsu ọdi akpetenaan asuma rꞌawe phọ ọdi.

²¹ Kụ Ehab ọdaam mọ Ịzirel aphiemi rụsu phọ rꞌarughuugh-ude phọ, kụ ạze bụminighan ạbuo ạSiria.

²² Kụ oyil phọ ạghi atuman Ehab ọdaam mọ Ịzirel kụ ạḅeni nyọdi mọ, “Tue ạkparamian loor rꞌaweye ẹgham ạna kụ ạlogh elegh ạmiin ịphen nạ aḍighi bọ, ịdi eḍighi bọ osoor ạlha phọ ạḍien phọ ạbuo ạSiria ọḅile ni rotu ozuom ạna.”

Aweye ạSiria otuphiom ẹgham dị emuneniom ịyal Ịzirel

²³ Kụ abutelhedom mọ ạBen Hadad ọdaam mọ ạSiria ọḅeni nyọdi mọ, “Ạrumugh phọ ạbidi ạrumugh ẹpe aroogbolom mọ kụ iḍighi bọ ịdi bịdi ọkpar bọ upu iyira, kụ yira rꞌạbidi kobe ẹpe ẹyaghagha bọ bịn yira kọkpar ri opu bịdi.

²⁴ Ḍighi ịduon: sịghiogh ịraardi rꞌịyal ạbudaam sịphe ạdol phọ ạbidi, tọrobo oye ạḍua esi phọ ọdi, kụ ạsighe bụo ạrumhu ẹgham mọ asereghi esi phọ ạbidi.

²⁵ Kụ agbi we ẹgham mọ ạna, ịdipho awe ẹgham mọ ạna bụphe ophe bọ ẹpe ẹgham mọ, ạsu atum ạsu, oghuugh-adool atum oghuugh-adool, yira rꞌạbidi kobe ẹgham mọ ẹpe ẹyaghagha bọ, kụ yira ọkpar opu bịdi.” Kụ ạBen Hadad ạnaghanan bịdi kụ ọdi ạtuugh ịdipho bịdi oroma bọ nyọdi aḍighi.

²⁶ Kụ rẹteeny osoor phọ kụ ạBen Hadad agbi we phọ ạSiria kụ ạghi ẹpe Afek ee ẹgham rꞌỊzirel.

²⁷ Kụ ookpomoghi weye phọ Ịzirel, kụ ọngo bịdi rạraar olhe kụ bịdi oten ọghi ẹgham mọ kụ odoghoḍi ịyal asita arugbogo osoman weye phọ ạSiria. Kụ aweye phọ Ịzirel ọghigh ịyal ịbam asita ịga ọtomaam weye phọ ạSiria omuza bọ oomo phọ ạraama phọ.

²⁸ Kụ oye kꞌẸnaan ạḍua aru, kụ ạghaaph ạḅeni Ehab ọdaam mọ Ịzirel kụ ạḅeni mọ, “Ọmoogh-we phọ ạḅem ịduon mọ, ‘Loor esi dị ạbuo ạSiria phọ rọḅem ghan bọ mọ Ọmoogh-we phọ Ẹnaan ọlo ẹpe aroogbolom mọ bịn, mọ kẸ́naan ẹphen ẹyaghagha bọ kụ iḍighi mị katorori ni oomo ọoloogh awe phọ ạbuen ạlogh ḍịghaagh ạna, kụ nạ alegheri mọ mị kụ Ọmoogh-we phọ.’”

²⁹ Kụ bịdi odoghoḍi rugbogo, ogbogo atum ogbogo, oḍual aḍughul-otu. Kụ ḍịphe emuneniom bọ oḍual phọ kụ ẹgham mọ emiigh. Kụ ạnmuny Ịzirel ọze bụo ạSiria phọ, we dị ọman oniin okuron ọonir awe ẹgham dị rotelhe ude.

³⁰ Kụ buniin oghiil osuma ogheel ẹpe Afek, kụ iikpe ẹmha phọ emeleghuom ịyaldi rꞌoḍual ọonir awe bụphe osugha bọ oghiil ọḍuaghu. Kụ ạBen Hadad ạgba ni ẹmhu asuma aḍigh ẹmha phọ Afek, kụ aḍigh osoph ebughotu ạaghian.

³¹ Kụ abutelhedom mọ ọdi ọḅeni nyọdi mọ, “Nyịidipho yoor ọnaghan mọ ạbudaam ịsiphe aruutu phọ Ịzirel rꞌọnma ghan ni ighirigiir. Seseeny omunughian rukpe-ọto ọsighe iḍigh ọkagha yogh rụmhu ayira ọghi ọteeny ọdaam mọ Ịzirel; oḍighom ịyaar ọdi kạpel li ghuḍum ạna.”

³² Kụ bịdi omunughian rukpe-ọto kụ ọsighe iḍigh ọkagha yogh irum ạbidi kụ ọghi ọteeny ọdaam mọ Ịzirel kụ ọḅeni mọ, “ẠBen Hadad otelhedom mọ ạna ạḅem mọ, ‘Seseeny mị rạaḅereghi ni nyịna mọ ịmi kúghiigh’.” Kụ Ehab apuru mọ, “Ọdi odi ni? Ẹnighe ni. Ọdi phọ ịdipho umor ạmi.”

³³ Awe phọ osooromi loor ạbidi rokori ghan ọmiin ịpe Ehab kaḍighi bọ; kụ bịdi okem olegheri ịpe edi bọ sịphe ologhi phọ ọdi emite ịlo ọdi kạḅem. Kụ bịdi ọḅeni mọ, “Ịduon phọ ni, ạBen Hadad umor ạna phọ ni.” Kụ Ehab ạḅeni bịdi mọ, “Ịki ẹpham nyọdi erumom.” Kụ ạBen Hadad ạghi ạteeny nyọdi. Kụ moru rosi, kụ Ehab ạḅeni nyọdi mọ, “Tue aḍigh sịen oghuugh-adool phọ ạmi.”

³⁴ Kụ ạBen Hadad ạḅeni nyọdi mọ, “Oomo ạramha phọ ịpe ọde phọ ạmi ạanyi bọ ọde phọ ạna, mị kaḅulemi ni ạngo nyịna, kụ amiteghom siḍighi ịlo ạna ẹpe Dạmaskos ịdipho ọde phọ ạmi aḍighi bọ ẹpe Sameria.” Kụ Ehab ạḅeni nyọdi mọ, “Mị kạwilenaan ni nyịna, kụ yira okunyon ni ịyo ịduon nạ ạghaaph bọ kụ nạ akeel.” Kụ bịdi oghiran ịyo, kụ ọdi ạwile nyọdi kụ ọdi agheel.

Oyil atonyon Ehab

³⁵ Kụ esi ikpo ọnhu Ọmoogh-we phọ oniin oye sịphe aḍita ariil phọ ạḅeni ọnyo ogbo ọdi mọ, “Seseeny ụgurogh ịmi.” Kụ oye phọ ómeera ọgurogh nyọdi.

³⁶ Kụ ọdi ạḅeni nyọdi mọ, “Ịdipho nạ ụ́naghanan bọ ẹḍogh Ọmoogh-we phọ, nạ ạḍua ụgbatanaan ịmi sịen phọ rạki, ạnam-dịka kụ keghiigh nyịna.” Kụ ọdi ạgbatanaan nyọdi rạki bịn íbia bịn ạnam-dịka ẹmiin nyọdi bịn eghiigh.

³⁷ Kụ oyil phọ ạmiin ọnon oye kụ ạḅeni mọ, “Seseeny, ụgur ịmi ugiph.” Kụ oye phọ ạgurogh nyọdi abenogh adoghoḍi rạagha.

³⁸ Kụ oyil phọ ạḍua ạghi ẹpe eten phọ rakori ghan ọdaam mọ, ạsighe ukpe azua aakpereghiom ẹmhu ọdi rꞌaghisigh phọ ọdi.

³⁹ Ọdaam mọ raten kụ oyil phọ amoghiom ọdaam mọ kụ ạḅeni mọ, “Otelhedom mọ ạna ạghi ẹpe ogbo ẹgham mọ kụ ọnyo ẹgham ạsighe oniin oye dị ọdi asiph uruom ịmi kụ ạḅem mọ, ‘Pạm oye phọ ọphon, kụ eru mạar dị oye phọ aphe, pọ kọsighe ghuḍum mọ ọdi onmiom ghuḍum mọ ạna. Kụ ịdipho ílho, pọ nạ kạkpe ịraar ọonir ipoḍi asilva.’

⁴⁰ Kụ otelhedom mọ ạna odi rukumuan ẹphen rꞌẹnon ekpisi bịn oye phọ asuma.” Kụ ọdaam mọ Ịzirel ạḅeni nyọdi mọ, “Ọoruen phọ ạna ịduon; nạ masopha ni ọoruen phọ ạngo loor ạna.”

⁴¹ Kụ oyil phọ azughuronaan ukpe phọ ạsighe sịphe aghisigh phọ ọdi, kụ ọdaam mọ Ịzirel ạlogh nyọdi elegh mọ ọdi oniin oyil.

⁴² Kụ oyil phọ ạḅeni ọdaam mọ ịduon mọ, “Ọmoogh-we phọ ạḅem ịduon mọ, ‘Nạ mạwile oye phọ ọpo ọḅogh bọ ọlogh ḍịghaagh ạna kụ ọḅem bọ mọ kokiigh phọ, kụ iḍighi aghuḍum mọ ạna katelhian ghuḍum mọ ọdi; awe ẹgham mọ bụphe ạna kotelhian we ẹgham mọ bụphe ọdi.’”

⁴³ Kụ ọdaam mọ Ịzirel ạghi aḍigh ologhi otu. Kụ ẹeḅaghami ologhi ọdi kụ ọdi akururu agheel Sameria.