1 Ạbudaam 2 - Ạḍinya Iigbia

Ekureriom oroma dị aDevid aroma Sọlomon

¹ Asuḍughul-otu phọ aDevid remunughan dị kamugh, kụ ọdi aroma oroma phọ ọphon ạngo Sọlomon ọony phọ ọdi kụ ạḅeni mọ,

² “Mị rakeel eten oomo aḅirini phọ. Mạar ạpham loor ạna ạkparami aḍeenaan mọ nạ oye ni,

³ aako ghan ịtooghi Ọmoogh-we Ẹnaan phọ ạna, ạdaph ghan reten phọ ọdi kụ arelhe ghan; aako ghan ịtooghi phọ ọdi, ẹḍogh phọ ọdi rꞌịiruen phọ ọdi rꞌạraraar ọghiom ologhi phọ ọdi, ịdipho ọge bọ sịphe Ologh phọ aMozis, ọbo edughom ẹrolonaan nyịna esi oomo ịpe nạ kaḍighi bọ rꞌạtorobo ekpisi lọ nạ rạki.

⁴ Ọmoogh-we phọ ạkparami ni ọghaaph phọ ọdi ạrol kꞌagee-pọ, ịpe ọdi ạghaaph bọ ịlo ạmi kụ ạḅem mọ, eru mạar dị ạnmuny phọ ạna ọmaar ri dọl, reten erelhe phọ ạbidi, kụ rotelhe ghan ghisigh ạmi rꞌọgba igey rꞌoomo ologhi phọ ạbidi rꞌoomo uwaloor phọ ạbidi, pọ kẹ́bile dị oye kạḍua ghan sịphe kꞌạna amite ạtolom ạgada phọ ạda Ịzirel.

⁵ “Kụ nạ alegheri ni ịpe aJoab ọony phọ aZeruya uḍighi bọ ịmi; ịpe ọdi aḍighi bọ Ạbner ọony phọ ạNer rꞌAmasa ọony phọ ạJeter ịyal phọ ạbuo ạrumhu ẹgham mọ Ịzirel, bụphe ọdi ạze bọ azu ịḅaal mem ẹepho, ạsighe ịḅaal ẹgham mọ agbul elhool phọ ọdi ạgbanaam bọ, ạḅile ạsighe agbul rokoro phọ ọdi ạlogha sịphe ịyal ạrada aruwol phọ ọdi.

⁶ Tụugh ịpe olhegheri ịyaar phọ ạna ạman bọ kụ aḍighinom. Kụ ọlo kámeera ẹmhu ạsuol phọ ọdi egheel ọmar iḍim rꞌẹepho.

⁷ “Nmạ ghan ighirigiir nmụny phọ aBazilai ọlo ạGiliad phọ, bịdi oḍighom aani bụphe kole ghan bọ eḍien sịphe ạnyu ịdaabili phọ ạna. Bịdi ụmeera ni uuḅeghogh ịmi mem mọ mị ạtu bọ Ạbsalom umor phọ ạna kụ asuma.

⁸ “Ịdi etum sịphe. ASimei ọony phọ aGera ọlo ẹmha aBahurim ẹpe ạBenjamin odi ḍịghaagh ạna. Ọdi uutuuny ịmi, ụḅeni yogh ịmi ọdorodo ḍio phọ ạḍiphe mị ạghi bọ Mahanaim, kụ ọdi ạḍua aru uzuom ịmi sịphe Jọdan, kụ mị aghol ḍien Ọmoogh-we phọ aghunyaam ạngo nyọdi, ạḅeni mọ, ‘Mị kạ́sighe elhool aghiighom nyịna.’

⁹ Kụ iḍighi nyịidipho ụ́sighe ghan nyọdi ugbiom oye dị erugh ípum. Loor esi dị nạ ạsu ni ologhi, nạ kụ kalegheri ịpe nạ kaḍighi bọ nyọdi; kụ aḍighi ịdi kamugh ḍuugh egbo.”

Aḍuugh phọ aDevid

¹⁰ ADevid amugh ạtuonom bụrude phọ ọdi; kụ ọsighe nyọdi oḍi sịphe ẹmha phọ aDevid.

¹¹ ADevid ạda bọ Ịzirel inyadi ạsia; ạda Hẹbron oḍual ạsia, ạda Jeruselem ịraardi rꞌịraar ạsia.

¹² Kụ ạSolomon ạrolom ạgada ọdaam mọ aDevid ọde phọ ọdi, kụ ogananami eelhe phọ ọdi eeleghaan.

Aḍuugh phọ Adonaija

¹³ Kụ Adonaija ọony phọ aHagit ạghi kꞌaBatsiba onhiin phọ ạSolomon. Kụ ạnir phọ apuru nyọdi mọ, “Nạ ụtu ni igey kụ aru bọ?” Kụ ọdi ạphagharanaan mọ, “Mị ụtu ni igey kụ aru bọ.”

¹⁴ Kụ ọdi ạḅem kẹn mọ, “Mị ạmoogh ni ịyaar ọḅeni ạna.” Kụ ạnir phọ ạḅeni nyọdi mọ, “Kạaph.”

¹⁵ Kụ ọdi ạḅem mọ, “Tọ nạ alegheri ni mọ ọda eelhe phọ usi ịmi, kụ oomo awe phọ Ịzirel ruphogh ghan ịmi mọ mị kụ kạda eelhe phọ, mọ anmia akiton aḍigh ḍịghaagh umor phọ ạmi, ịdi eḍighi bọ ịḍua esi Ọmoogh-we phọ kụ eḍigh ḍịghaagh ọdi.

¹⁶ Mị rạlhom nyịna nyịidipho eniin ịyaar, kụ ịmi kúghine.” Kụ ạnir phọ ạḅeni nyọdi mọ, “Kạaph.”

¹⁷ Kụ ọdi ạḅeni mọ, “Seseeny, mị rạaḅereghi ni nyịna, ḅẹni Sọlomon ọdaam mọ, ịdi eḍighi bọ dị kạ́ḅeni nyịna mọ eeye, dị ụngo ịmi Ạbisag ọlo aSunem mọ mị upin.”

¹⁸ Kụ aBatsiba ạḅem mọ, “Ẹnighe ni. Mị kạḅeni ni nyọdi ọdaam mọ.”

¹⁹ Kụ aBatsiba ạghi, ạteeny Sọlomon ọdaam mọ ọghaaph ịpe Adonaija arom bọ ạḅeni nyọdi mọ ạḅeni ọdaam mọ. Kụ ọdaam mọ aḅetenu ạghi ạteeny ạnir phọ, kụ azumeri ẹmhu ọdi ude risigh ạnir phọ kụ ọdi ạrol sịphe ạgada ọdaam mọ, kụ ạḅeni mọ, “Ịsighe ịyaar ọrolom eruom onhiin ọdaam mọ.” Kụ ạnir phọ ạrol ḍịghaagh elhiom ọdi.

²⁰ Kụ ạnir phọ ạghaaph mọ, “Mị uru ni ọlhom ạna ẹnum ịyaar bịn. Seseeny ni, ịmi kụ́ḅeni mọ nạ ómeera.” Kụ ọdaam mọ ạḅeni ạnir phọ mọ, “Onhiin ạmi, kạaph, loor esi dị mị kạ́ḅeni nyịna mọ mị úmeera.”

²¹ Kụ ạnir phọ ạḅeni nyọdi mọ, “Sịghe Ạbisag ọlo aSunem mọ ạngo umor phọ ạna Adonaija aphin.”

²² Kụ Sọlomon ọdaam mọ ạphagharanaan kụ apuru onhiin phọ ọdi mọ, “Nạ rạḅem ghan mọ ọsighe Ạbisag ọlo aSunem mọ ọngo Adonaija aphin, pọ ḅịle ạlomonaan nyọdi rꞌẠbayata oyil ạrikia phọ rꞌaJoab ọony phọ aZeruya ọda eelhe phọ-a, loor esi dị ọdi kụ okumoor umor ạmi.”

²³ Kụ ạSolomon aghol ḍien Ọmoogh-we phọ aghunyaam mọ, “Ẹnaan ịgur ịmi eghiigh dị mị ụtuan ọghaaph phọ ọphon úkiigh Adonaija.

²⁴ Kụ iḍighi nyịidipho, ịdipho Ọmoogh-we phọ odi bọ ni, ọpo ugananami bọ ịmi kụ aḍighi ịdi mị kụ ạrolom ạgada ọdaam mọ aDevid ọde phọ ạmi, ọpo mụlhoghonaan bọ ịmi ọophi ịdipho ọdi aguanaan, Adonaija ọlo oghiigh arodon bịn.”

²⁵ Kụ Sọlomon ọdaam mọ arom Benaya ọony phọ ạJehoyada kụ ọdi ạghi ạgur nyọdi aghiigh.

Otoph ogbeph Ạbayata, ḅịle rꞌaḍuugh phọ aJoab

²⁶ Kụ Sọlomon ọdaam mọ ạḅeni Ạbayata oyil ạrikia phọ mọ, “Ḍụa agheel ẹpe Anatot ẹpe ozo phọ ạna, ọbo nạ ạkpe oghiigh bịn; kụ nyịidipho mị nyịna kághiigh loor esi dị nạ kụ urool ghan Igbe Ịyo phọ Ẹnaan Ọmoogh-we phọ mem mọ aDevid ọde phọ ạmi kụ nạ ụmiinom oomo ịminimiin phọ ịpe ọde phọ ạmi ạmiinom bọ.”

²⁷ Kụ ạSolomon aphorogh Ạbayata amitiom mọ ọdi kúḍighi mun oyil ạrikia Ọmoogh-we phọ, omuzeḍiom ịpe Ọmoogh-we phọ ạghaaph bọ ịlo ọto Ilai ẹpe Sailo.

²⁸ Kụ ịphen phọ rẹdu reḍigh rụru aJoab, ọdi asuma ạghi aḍigh ḍibuo Ogbogo Ạdol Ọmoogh-we phọ kụ ạpham rạphaal enmeny ạrikia phọ. (Ịyaar phọ eḍighi bọ aJoab ạdaph Adonaija óḍighan rꞌẠbsalom.)

²⁹ Kụ ọghi ọghaaph ọḅeni Sọlomon ọdaam mọ mọ aJoab masuma ạki aḍigh sịphe Ogbogo Ạdol Ọmoogh-we phọ kụ ạtol atuman enmeny ạrikia phọ, kụ ạSolomon arom aBenaya ọony phọ ạJehoyada kụ ạḅeni mọ ọdi ạghi aghiigh nyọdi.

³⁰ Kụ aBenaya ạghi asi sịphe Ogbogo Ạdol Ọmoogh-we phọ kụ ạḅeni nyọdi mọ, “Ọdaam mọ ạḅem mọ tue.” Kụ ọdi ómeera mọ, “Mị kamugh sịen.” Kụ aBenaya aḅula ạghaaph ạḅeni ọdaam eelhe phọ mọ, “Ịphen kụ ịdi ọdi ạphagharanaan.”

³¹ Kụ ọdaam mọ ạḅeni nyọdi mọ, “Ḍighi nyọdi ịpe ọdi rạwa bọ. Kiigh nyọdi aḍi sịphe phọ, ẹrol dị nạ ạmophoronaan elegheri ịḅaal phọ ịpe aJoab azu bọ, esi ạmi rꞌọto ọde phọ ạmi.

³² Ọmoogh-we phọ kạsighe ni ịḅaal phọ ọdi aḅulemi ạḅam ẹmhu ọdi, ịpe ọdi azuom bọ Ạbner uwo ẹmhu ẹgham ạbuo Ịzirel rꞌAmasa uwo ẹmhu ẹgham ạbuo aJuda, ịyal awe aruukuan dị oseleman opu nyọdi bịn ạze, aDevid ọde phọ ạmi ólhegheri aani.

³³ Kụ iḍighi ịḅaal phọ ạbidi kọsighe ọḅam ẹmhu aJoab rꞌạrumhu ạnmuny ọdi kꞌagee-pọ, kụ ẹboroph kẹḍua esi Ọmoogh-we phọ ẹtolonaan Devid rꞌoghiil ọdi dị kọtolom ạgada ọdaam mọ ọdi kꞌagee-pọ.”

³⁴ Kụ aBenaya ọony phọ ạJehoyada ạghi ạgurogh nyọdi alher aghiigh, kụ oḍi nyọdi sịphe otu ọdi ẹpe ẹdala phọ.

³⁵ Kụ ọdaam mọ ạsighe Benaya ọony phọ ạJehoyada aḍighi uwo ẹmhu awe ẹgham aseere dọl phọ aJoab; kụ ọdaam mọ ạsighe Zẹdok oyil ạrikia phọ aseere dọl phọ Ạbayata.

Aḍuugh phọ aSimei

³⁶ Kụ ọdaam mọ arom ọghi ọmagh Simei kụ ạḅeni nyọdi mọ, “Lọgh otu ọlo ạna ẹpe Jeruselem, arugh ẹpe. Tọrobo ịlo ẹrol, ụ́ḍua ghan úkeel ẹnon ekpisi.

³⁷ Legheri mọ tọrobo aḍio lọ nạ ạḍua ẹpe phọ kụ ạḅeeny okol ạmuum mọ ạKidron aphun, pọ aḍuugh ạna mẹteeny, kụ ịḅaal ạna kẹtol ẹmhu ạna.”

³⁸ Kụ aSimei ạḅeni ọdaam mọ mọ, “Ịphen nạ ạghaaph bọ ẹnighe ni. Ịphen ọde-otu phọ ạmi ọdaam mọ ạḅeni bọ otelhedom mọ ọdi, ọdi kạtuugh ni aḍighi.” Kụ aSimei arugh ẹmha aJeruselem abia.

³⁹ Kụ ịraar ạsia reten bịn ịyal ạrebene aSimei osuma ọḍua ogheel kꞌAkis ọdaam ẹmha ạGat ọony aMaaka phọ. Kụ ọghi ọghaaph ọḅeni Simei mọ, “Pogh. Ạrebene phọ ạna odi ẹpe Gạt.”

⁴⁰ Kụ aSimei aḅetenu aselemi ẹnam adool ọdi, ạghi Gạt ạteeny Akis. ASimei ạghi ạsighe rẹbene phọ ọdi ẹpe Gạt ạpham agheel.

⁴¹ Kụ ọghi ọghaaph ọḅeni Sọlomon mọ aSimei mạḍua Jeruselem ạki Gạt aḅula.

⁴² Kụ ọdaam mọ arom ọghi ọmagh Simei, kụ apuru nyọdi mọ, “Mịna ḍịen uḍighi ịdi nạ aghol ḍien Ọmoogh-we phọ akunyaam, kụ mị ạḅeni nyịna mọ legheri mọ tọro aḍio lọ nạ ạḍua ẹpe Jeruselem ạghi ẹnon ekpisi, pọ tọro ịlo eḍighi pọ aḍuugh ạna, kụ nạ ụḅeni ịmi mọ ịphen nạ ạnaghan bọ mọ ẹnighe ni.

⁴³ Eeghe kụ iḍighi kụ nạ óoko bọ iighunya phọ ạna nạ aghol bọ ḍien Ọmoogh-we phọ kụ aghunyaam, iilogh phọ ịpe mị ạlogh bọ ạngo nyịna nạ óoko bọ?”

⁴⁴ Kụ ọdaam mọ ạḅeni kẹn Simei mọ, “Tọ nạ alegheri ni oomo ịkaraph phọ ịpe nạ aḍighi bọ Devid ọde phọ ạmi, pọ Ọmoogh-we phọ kạsighe ni ịkaraph phọ ịpe nạ aḍighi bọ aḅulemi ạḅam ẹmhu ạna,

⁴⁵ kụ ạSolomon ọdaam mọ kọseph ni, kụ ạgada ọdaam mọ aDevid kogananami ni risigh Ọmoogh-we phọ kꞌagee-pọ.”

⁴⁶ Kụ ọdaam mọ ạḅeni Benaya ọony phọ ạJehoyada mọ kịa aghiigh nyọdi; kụ ạghi ạgurogh nyọdi alher aghiigh. Kụ ogananami eelhe phọ ạSolomon eeleghaan.