1 Ạbudaam 19 - Ạḍinya Iigbia

Ilaija odi ẹpe Eegum aSainai

¹ Ehab ọdaam mọ ạghaaph oomo ịpe Ilaija aḍighi bọ ạḅeni Jẹzebel ạnir phọ ọdi rꞌịpe ọdi ạsighe bọ elhool ạziom oomo ariil phọ aBaal.

² Kụ ạJezebel arom ọokpaany ạghiom Ilaija kụ ạḅeni mọ, “Aruru phọ ịliom ịmi eghiigh, eru mạar dị tụtu rẹteeny ọdo phọ amem mọ ạmuen iḍue kụ mị úḍighi ịdi aghuḍum mọ ạna kạkigh ịdipho ọnyo ạbidi.”

³ Kụ aruugu rasiph Ilaija, kụ ọdi aḅetenu asuma ạḍua, loor ẹmhu aghuḍum mọ ọdi, ạpham otelhedom mọ ọdi ạghimom ẹpe Beersheba ẹmha phọ aJuda. Kụ aseere otelhedom mọ ọdi ẹpe phọ,

⁴ Ilaija arelhe ẹmhu aḍio ẹpe ẹdala phọ, ạghi ạrol ude uḅa azin eeberia, mọ kpạripe ọno amugh kụ ạḅem mọ, “Oye dị ụmoogh ịmi, mẹnighe ni. Nyịidipho sịghe ghuḍum mọ ạmi. Mị kụ ụ́nighe úpu bụrude phọ ạmi.”

⁵ Kụ ọdi ạmina rạnaani loor azin eeberia phọ, bịn ọokpaany kꞌỌmoogh-we phọ aru ạḅogh nyọdi kụ ạḅeni nyọdi mọ, “Ḅetenu alhe ạbred.”

⁶ Kụ ọdi aphogh bịn ạmiin ạbred dị ọgbaghaḍi loor esi ịghologhol iiḅu rꞌizoki ạmuum dị edi ẹpe ẹmhu phọ ọdi. Kụ ọdi aḅetenu alhe ạphughol mụum, ạḅile ạmina.

⁷ Kụ ọokpaany phọ ạḅile aru amuneni ịyal amem, kụ ạḅogh nyọdi kụ ạḅeni nyọdi mọ, “Ḅetenu alhe eḍien ạphughol mụum, ịdi eḍighi bọ erelhe phọ ạna ẹpughan.”

⁸ Kụ Ilaija aḅetenu alhe eḍien ạphughol mụum, kụ eḍien phọ ẹngo nyọdi ịnyaam. Kụ ọdi arelhe inyadi ootaany rꞌinyadi aḍughul ạghi asi Sainai ẹeḅaraph iigbia phọ Ẹnaan.

⁹ Kụ ọdi ạghi asi esi dị epogh asighiigh kụ ọdi ạrol sịphe ḍughul phọ. Kụ ikpo ọnhu Ọmoogh-we phọ eru ẹteeny nyọdi kụ epuru mọ, “Ilaija, nạ raḍighi ghan sịen phọ eeghe?”

¹⁰ Kụ ọdi ạphagharanaan mọ, “Mị mạsighe ologhi phọ ạmi ạḅam loor ạna Ọmoogh-we Ẹnaan Oomo Ịikpo phọ kụ reemor ologhi phọ ạmi ịdipho ạnian. Awe phọ Ịzirel moghel ịyo phọ ạna, olereghi renmeny ạrikia phọ ạna, ọsighe elhool ẹgham ọziom oomo ariil phọ ạna ọmadan. Mị bịn, ogina phọ ạmi, kụ usugha, kụ bịdi rụwa ghan ịmi oghiigh aani.”

¹¹ Ọmoogh-we phọ ạḅeni nyọdi mọ, “Telhe ạghi risigh ạmeera egbodo ạmi sịphe ạnyu ẹeḅaraph phọ sịphe egbodo ạmi, ịdi eḍighi bọ Ọmoogh-we phọ rạwa oten ịpa phọ.” Kụ rꞌịikpo oboom oghim aḅomoghi oomo phọ aruugum mọ, aḅomoghi oomo phọ asighiigh phọ risigh Ọmoogh-we phọ, kụ ọlo Ọmoogh-we phọ ọ́rol sịphe oghim mọ. Oghim mọ roten kụ ade ephiigha, kụ ọlo Ọmoogh-we phọ ọ́rol sịphe ade phọ repiigha bọ.

¹² Ade phọ rephiigha bọ reten, bịn ạnian esoor. Kụ Ọmoogh-we phọ ọ́rol sịphe ologhi ạnian phọ. Ạnian phọ reten, bịn ọony ẹyoghoyogh ẹḍogh eephola.

¹³ Mem dị Ilaija ạnaghan bọ ẹḍogh phọ, kụ ọdi ạsighe ukpe phọ ọdi aakpereghiom risigh ọdi, kụ amite ạghi ạmeera sịphe ọnhu epogh ẹeḅaraph phọ. Kụ ọdi ạnaghan ẹḍogh dị repuru ghan mọ, “Ilaija, nạ raḍighi ghan sịen phọ eeghe?”

¹⁴ Kụ ọdi ạphagharanaan mọ, “Mị mạsighe ologhi phọ ạmi ạḅam loor ạna Ọmoogh-we Ẹnaan Oomo Ịikpo phọ kụ reemor ologhi phọ ạmi ịdipho ạnian. Awe phọ Ịzirel moghel ịyo phọ ạna, olereghi enmeny ạrikia phọ ạna olereghi, ọsighe elhool ẹgham ọziom oomo ariil phọ ạna ọmadan. Mị bịn ogina phọ ạmi bịn kụ usugha, kụ bịdi rụwa ghan ịmi oghiigh aani.”

¹⁵ Kụ Ọmoogh-we phọ ạḅeni nyọdi mọ, “Ḅula eten phọ nạ ạḍua bọ kụ aru ạghi ẹpe ẹdala phọ ạDamaskos. Nạ rọghi rosi ẹpe phọ, sịghe elho ịko agbul Hạzael ọdi ạda Sịria.

¹⁶ Ạsighe elho agbul Jehu mọ ọony phọ aNimsi ọdi ạda Ịzirel, ạsighe elho ịko agbul Ilaisa ọony phọ aSafat ọlo Ebel Mahola ọdi aḍighi oyil ạsighe dọl phọ ạna.

¹⁷ Tọrobo ọlo akpetenaan elhool ẹgham mọ ạHazael, pọ aJehu aghiigh ghan, kụ tọrobo ọlo akpetenaan elhool ẹgham mọ aJehu, pọ Ilaisa aghiigh ghan.

¹⁸ Kụ mị asugheeny ni oḍual ọonir awe sịphe Ịzirel, ḍita ạbuphe úkpuḍian aani bọ ọoḅereghi aBaal, ḅịle kẹn kọ́kpun ghan bọ igbudu phọ ọdi.”

Ẹmagham mọ Ilaisa

¹⁹ Kụ Ilaija aten rạki kụ ọdi ạmiin Ilaisa ọony phọ aSafat. Ọdi makpooghi ịyaldi rꞌinya ạsinam ịyal yạl ịne egina esi raḅephom ghan iḅeph; ḍioph rꞌaḍiniin edi risigh, ọdi rꞌạḍieri phọ edi ọman rekumuan. Ilaija ạsighe onyoraam mọ ọdi anyorom nyọdi.

²⁰ Kụ Ilaisa ạwile ịyal phọ ạsinam mọ ọdi, aghiil ạdaph Ilaija kụ ạḅeni mọ, “Seseeny mị rạaḅereghi ni nyịna mọ meera mị ụkpunogh ọde ạmi rꞌonhiin ạmi kụ mị agbi ọdaph ạna.” Kụ Ilaija ạḅeni nyọdi mọ, “Ḅula, mịna ụpiom nyịna eeghe?”

²¹ Kụ Ilaisa aḅula ạsighe ịyal ạsinam mọ ọdi ạze, ạsighe oreeny phọ ọkpoom ghan bọ sịnam mọ ạkpooniom nịan, ạsa ịnam mọ ạsighe ạngo we phọ kụ ạa. Kụ ọdi aḅetenu ạtuonom Ilaija arelhenaan ghan nyọdi dom.