1 Ạbudaam 17 - Ạḍinya Iigbia

Ilaija rꞌịgbakuro ạmuum mọ

¹ Oniin oyil ịmiin ọlo aTisbe ạrol li dị aghol mọ Ilaija. Ọdi arugh ẹpe eelhe ạGiliad. Ọdi ạḅeni Ehab mọ, “Ịdipho Ọmoogh-we Ẹnaan phọ Ịzirel odi bọ ni, ọpo mị rakumu bọ, ooto kásoor, ọlophia kạ́loph sịa phọ ịphen, emuton dị mị ạḅem.”

² Ikpo ọnhu Ọmoogh-we phọ eru ẹteeny Ilaija kụ ẹḅeni mọ,

³ “Ḅetenu nyịidipho asuma agheel ẹpe erumuḍio phọ remite ghan bọ, ạaghian ẹpe okol ạmuum mọ aKerit ḍịghaagh ạga phọ ẹpe erumuḍio phọ remite ghan bọ matuman ạJodan.

⁴ Nạ pụghol ghan mụum ịsiphe okol phọ, kụ mị mạḅeni rẹghiligho mọ ẹngo ghan nyịna eḍien ẹpe phọ.”

⁵ Kụ ọdi ạghi ạtuugh ịpe Ọmoogh-we phọ ạḅeni nyọdi, kụ ọdi ạghi arugh ẹpe okol ạmuum mọ aKerit. Ịsiphe phọ kụ ẹpe erumuḍio phọ remite ghan bọ ẹpe Jọdan.

⁶ Kụ ạreghiligho phọ ẹsighe ghan eḍien eruom ghan nyọdi ḍịroor rꞌadulhe, kụ ọdi ạphughol ghan mụum okol phọ.

⁷ Ị́man mem bịn okol phọ amoopha ạgharaghar, ịdi eḍighi bọ ọlophia ọ́lhoph ghan mun ẹpe ade phọ.

Ilaija rꞌekpukele ạnir ẹpe Zạrefat

⁸ Kụ Ọmoogh-we phọ ạḅeni Ilaija mọ,

⁹ “Ḅetenu agheel ẹpe Zạrefat matuman aSaidon, kụ ạrol. Mị mạḅeni ni ẹpe phọ ekpukele ạnir dị kạpham nyịna.”

¹⁰ Kụ ọdi aḅetenu agheel Zạrefat phọ. Kụ mem dị ọdi ạghi bọ asi sịphe eḍighom ẹmha phọ, iḍighi ni dị ekpukele ạnir phọ odi sịphe phọ rạso ghan ịpe. Kụ ọdi ạmagh ạnir phọ kụ ạḅeni mọ, “Seseeny, korom mọony ẹnum ạmuum sịphe oko phọ ạna ụngo aani ịmi mị ụpughol.”

¹¹ Kụ ạnir phọ aten rạki oḍu ạmuum mọ, kụ ọdi ạmagh ạnir phọ kụ ạḅeni mọ, “Pạmam eeḅoghoḍi ạbred uruom.”

¹² Kụ ạnir phọ ạḅeni mọ, “Ịdipho Ọmoogh-we Ẹnaan phọ ạna odi bọ, mị ụ́moogh ẹsaaneen eḍien omuton ẹezua ạḍighaagh ịbiakpa sịphe okporoma rꞌẹphurukpu ạmunum sịphe eeku. Mịin, mị ụso ịpe phọ ịphen ọpham ogheel, ọsighe ọgbaghaḍiom ẹphurukpu ịlo ạmi rꞌẹphurukpu ịlo ọony phọ ạmi yoor olhe bịn yoor omuughu.”

¹³ Kụ Ilaija ạḅeni ạnir phọ mọ, “Kákiilaan. Kịa aḍighi ịdipho nạ ạḅem bọ kụ ọlo pụr uḍighinaan ịmi ẹnum eḍien ạsighe aru uruom, kụ aḍighi ẹlo ạna, kụ agbi oḍighi ẹlo ọony phọ ạna.

¹⁴ Ọmoogh-we Ẹnaan phọ Ịzirel ạḅem ịduon mọ, ‘Eḍien phọ ạna kémuneen sịphe okporoma phọ, ạmunum mọ ạna kẹn kámuneen sịphe eeku phọ tụtu ẹteeny ḍio phọ ạḍiphe mị Ọmoogh-we phọ kaḍighi bọ ịdi ọlophia kạloph sịen aḅirini phọ.’”

¹⁵ Kụ ạnir phọ ạghi ạtuugh ịdipho Ilaija ạḅeni bọ nyọdi aḍighi. Kụ ạnir phọ rꞌọdi rꞌọto kꞌạnir phọ olhe ịminighan asuḍughul-otu.

¹⁶ Kụ ịgbieneen ịbiakpa phọ ímuneen sịphe akanama phọ; ḅịle kẹn, ạmunum mọ ómuneen sịphe eeku phọ; ọdaph ikpo ọnhu phọ ịpe Ọmoogh-we phọ ạghaaph bọ ạḅeni Ilaija.

¹⁷ Ịphen phọ reru reten bịn ọony ekpukele ạnir phọ ạmoogh bọ otu phọ ameel ẹzegh dị ologhi úḍuom, aḍiphooghu emuneen.

¹⁸ Kụ ạnir phọ ạḅeni Ilaija mọ, “Mịna kaḍighinom nyịna eeghe, nạ oye kꞌẸnaan. Nạ uru kꞌạmi oḍighi ịdi kọotughian ịkaraph phọ ạmi, oghiigh ọony phọ ạmi ḍụghum?”

¹⁹ Kụ Ilaija ạḅeni ạnir phọ mọ, “Ụngo ịmi mọony phọ ạna.” Kụ ọdi aḅeton mọony phọ sịphe ạrugbo ạnir phọ ạsighe, kụ ọdi ạpham mọony phọ ạsiinyom ẹpe ạnyu otu phọ ọdi arugh bọ kụ ạsighe mọony phọ ạmuneen ẹmina ọdi.

²⁰ Kụ ọdi ạlho ạmagh Ọmoogh-we phọ kụ ạḅeni mọ, “Ọmoogh-we Ẹnaan phọ ạmi, nạ mạsighe ịkaraph ạḅam ẹmhu ạnir phọ ọpo mị odi bọ kꞌọdi oghiigh ọony phọ ọdi?”

²¹ Kụ ọdi aḅololoom mọony phọ ịraar amem kụ ọdi ạlho ạmagh mọ, “Ọmoogh-we Ẹnaan phọ ạmi, seseeny, mị rạaḅereghi ni nyịna, ḍighi ịdi uwaloor ọony phọ ọphon kaḅula aḍigh loor ọdi.”

²² Kụ Ọmoogh-we phọ ạnaghan ẹḍogh phọ Ilaija, kụ uwaloor ọony phọ aḅula loor ọony phọ kụ ọony phọ aḍum.

²³ Kụ Ilaija ạsighe mọony phọ ạpham ạḍua ẹpe ẹedanieen otu phọ asoor aḍigh sịphe osoph phọ. Kụ ạsighe mọony phọ ạngo onhiin phọ. Kụ Ilaija ạḅeni mọ, “Mịin, ọony phọ ạna maḍum.”

²⁴ Kụ ạnir phọ ạḅeni Ilaija mọ, “Nyịidipho esi ịphen phọ kụ ẹdi mị malhegheri mọ nạ oye kꞌẸnaan phọ ni. Ekpo ọnhu Ọmoogh-we phọ lọ ẹḍua ọnhu ạna kụ emite pọ egey ni.”