1 Ạbudaam 16 - Ạḍinya Iigbia

¹ Kụ Ọmoogh-we phọ ạghaaph ạḅeni Jehu ọony phọ aHanani ịlo aBaasa mọ,

² “Mị uru sịphe atopha phọ kụ ạpham nyịna aphoophe ạghiom ạnyu, ạsighe nyịna aḍighi oḍiemiom mọ pogh we phọ ạmi Ịzirel, kụ nạ ạdaph reten phọ ịpe aJeroboam bịn eḍighi ịdi awe phọ ạmi Ịzirel mọphu, kụ ịkaraph phọ ạbidi ẹghagh ologhi ạmi.

³ Kụ iḍighi kụ mị kaḅeer ri kꞌaBaasa rꞌọto ọdi apiemi, kụ mị aḍighi kꞌạna ịdipho mị aḍighi bọ kꞌaJeroboam ọony phọ aNebat.

⁴ Asuogh kụ kẹba tọrobo ọlo kꞌaBaasa lọ amugh sịphe ẹmha phọ, kụ ịnun phọ ịpe rẹpeeph bọ ẹpe ạnyu phọ kụ kẹba tọrobo ọlo kꞌọdi lọ amugh ologhi eḍum.”

⁵ Kụ ịnon ịlo aBaasa rꞌiiḍighi phọ ọdi ịpe esugha bọ rꞌịikpo phọ ọdi ọsighe ni ọge sịphe ạḍinya ịpe emiteghu bọ mem mọ ạbudaam mọ Ịzirel.

⁶ Kụ aBaasa amugh ạtuonom bụrude phọ ọdi kụ oḍi nyọdi ẹpe Tirza; kụ Ela ọony phọ ọdi ạsighe dọl phọ ọdi ạda.

⁷ Adom Ọmoogh-we phọ ịḍua ḍịghaagh aJehu oyil ọony phọ aHanani dị egbolomaam Baasa rꞌọto ọdi loor oomo ịkaraph phọ ọdi aḍighi bọ risigh Ọmoogh-we phọ, kụ eḍighi bọ ịyaar phọ ẹghagh bọ ologhi Ọmoogh-we phọ, rꞌịpe ọdi ạsighe bọ rạghaagh ọdi aḍighinom, ẹkigh ịdipho ịpe ọto kꞌaJeroboam; ḅịle kẹn rꞌịpe ọdi ạze bọ kꞌaJeroboam.

Ela ọdaam mọ Ịzirel

⁸ Rẹman ịyaldi rꞌodiiny ạsia dị Ạsa mạda Juda, kụ Ela ọony aBaasa amiigh aani ọda Ịzirel, kụ ạda ịyal ạsia ẹpe Tirza.

⁹ Kụ aZimri otelhedom mọ ọdi, uwo ẹmhu dị rapogh ghan muniin abin ịyal arughuugh-ude phọ ọdi, amitenom nyọdi ẹkaraph ezue. Mem mọ ạmuphe phọ Ela odi kꞌArza ọpo rạsaanaan ghan bọ nyọdi rꞌọto ọdi eḍien ẹpe Tirza ạpughol miim dị rakiigh nyọdi.

¹⁰ Kụ aZimri ạghi aḍigh ạgurogh nyọdi aghiigh. Rẹman ịyaldi rꞌoḍual ạsia dị Ạsa mạda Juda kụ aZimri ạsighe dọl phọ ọdi ạda.

¹¹ Ọdi romiigh bọ ọda rꞌọrolom ạgada ọdaam eelhe phọ bịn, aZimri ạze oomo ọto kꞌaBaasa ạmadan. Ọdi rꞌoniin oye ósugheeny mꞌọnyo asiya mꞌọyaghiri.

¹² AZimri aphiemi ni oomo ọto kꞌaBaasa ạdaph ịpe Ọmoogh-we phọ ạghaaph bọ ịpe egbolomaam bọ Baasa ạḅeni Jehu oyil phọ.

¹³ Loor esi oomo ịkaraph phọ aBaasa rꞌịlo oomo ịkaraph phọ Ela ọony phọ ọdi, ịpe bịdi oḍighi yogh bọ tụtu eḍighi bọ ịdi Ịzirel ọphu, eḍighi ịdi ẹghagh ologhi Ọmoogh-we Ẹnaan phọ Ịzirel, loor ẹmhu ịkaaghineen ạrumugh phọ ạbidi.

¹⁴ Kụ ịnon ịlo Ela rꞌiiḍighi phọ ọdi ịpe esugha bọ, ọsighe ni ọge sịphe ạḍinya ịpe emiteghu bọ mem ạbudaam mọ Ịzirel.

AZimri ọdaam mọ Ịzirel

¹⁵ Ạsa ạda bọ Juda rẹman ịyaldi rꞌoḍual ạsia, kụ aZimri ạda oḍual aḍughul-otu ẹpe Tirza, bịn Ịzirel odoghoḍi rugbogo ozuom ẹgham aGibeton eniin ẹmha ạbuo aFilistia.

¹⁶ Kụ mem dị awe phọ Ịzirel ạbuphe orugh bọ ẹpe arugbogo phọ ọnaghan bọ mọ aZimri maakpomoghi we kụ maghiigh ọdaam mọ; kụ oomo awe phọ Ịzirel ọsighe Ọmri uwo ẹmhu awe ẹgham mọ ọdaami eelhe phọ Ịzirel ḍio phọ ạḍiphe ẹpe arugbogo phọ.

¹⁷ Kụ Ọmri ạḍua ẹpe Gibeton, kụ oomo Ịzirel ọdaph nyọdi, kụ bịdi ọghi ozuom ẹgham Tirza.

¹⁸ Kụ mem dị aZimri ạmiin bọ mọ mọsighe ẹmha phọ, kụ ọdi ạghi ạsiiny ạnyu otu ọdaam mọ kụ ọdi ạḅar loor phọ ọdi rꞌotu phọ ạsu nịan kụ ọdi amugh.

¹⁹ Loor esi ịkaraph phọ rꞌạsipioghom mọ ọdi ịpe ọdi aḍighi yogh bọ risigh Ọmoogh-we phọ, ạdaph bọ reten eḍighinom mọ ịpe aJeroboam rꞌịkaraph phọ ịpe ọdi aḍighi bọ tụtu eḍighi ịdi Ịzirel oḍighi yogh ịkaraph.

²⁰ Iiḍighi phọ aZimri ịpe esugha bọ rꞌịkaraph aruuzue phọ ịpe ọdi amitenom ghan bọ ọdaam mọ, ọsighe ni ịphen phọ ọge sịphe ạḍinya ịpe emiteghu bọ mem ạbudaam mọ Ịzirel.

Ọmri ọdaam mọ Ịzirel

²¹ Kụ awe phọ Ịzirel odia ịyal abin: eniin ẹku oḍighan Tibni ọony phọ aGinat ọsighe nyọdi ọdaami, eniin ẹku oḍighan Ọmri.

²² Kụ awe phọ bụphe oḍighan bọ Ọmri kụ ụmoogh ịikpo opu bụphe oḍighan bọ Tibni ọony phọ aGinat. Kụ aTibni amugh kụ Ọmri ạda aani.

²³ Rẹman ịraardi rꞌoniin ạsia dị Ạsa mạda Juda, kụ Ọmri amiigh ọda Ịzirel kụ ọdi ạda ni ḍioph rꞌịyal ạsia. Ọdi ạda bọ ẹpe Tirza odiiny ạsia.

²⁴ Kụ ọdi agho eegbolom mọ ẹpe Sameria ḍịghaagh aSemer odiiny ọonir ipoḍi asilva kụ ạlogh ẹmha phọ sịphe ạnyu eegbolom mọ. Ọmri ạkparamiom iikolobian ẹgham ạmoogh ghan bọ eegbolom mọ kụ ọdi aghol ḍien ẹmha phọ ọdi amitiom bọ mọ aSameria ẹdaphan ḍien phọ Semer ọpo ạmoogh ghan bọ eegbolom mọ.

²⁵ Ọmri aḍighi yogh ịkaraph risigh Ọmoogh-we phọ, aḍighi yogh ịdi elegheri bịn ẹloghori epu ịpe ạbuḅel phọ.

²⁶ Kụ ọdi ạdaph oomo areten eḍighinom mọ ịpe aJeroboam ọony phọ aNebat aḍighi yogh bọ, ịkaraph dị eḍighi ịdi Ịzirel oḍighi ịkaraph dị ẹghagh ologhi Ọmoogh-we Ẹnaan phọ Ịzirel, loor ẹmhu ịkaaghineen ạrumugh phọ ạbidi.

²⁷ Oomo ịnon ịlo Ọmri ịpe esugha bọ, ịpe ọdi aḍighi yogh bọ, rꞌịikpo phọ dị aḍeenaan bọ, ọsighe ni ọge sịphe ạḍinya phọ ịpe emiteghu bọ mem ạbudaam mọ Ịzirel.

²⁸ Ọmri amugh ạtuonom bụrude phọ ọdi, kụ oḍi nyọdi ẹpe Sameria; kụ Ehab ọony phọ ọdi ạsighe dọl phọ ọdi ạda.

Ehab ọdaam mọ Ịzirel

²⁹ Rẹman ịraardi rꞌọphaanya ạsia dị Ạsa mạda Juda, kụ Ehab ọony phọ Ọmri ạda ni Ịzirel ẹpe Sameria ịyaldi rꞌịyal ạsia.

³⁰ Kụ Ehab ọony phọ Ọmri aḍighi yogh ịkaraph risigh Ọmoogh-we phọ, aḍighi yogh ịdi elegheri bịn ẹloghori epu ịpe ạbuḅel phọ.

³¹ Esi ọdi ịrol dịadi oopho ịyaar ri bịn ọdaph ịkaraph areten eḍighinom mọ ịpe aJeroboam ọony phọ aNebat, kụ ọdi ạsighe Jẹzebel ọnyani phọ Etbaal ọdaam mọ aSaidon aphin, kụ ạghi aaseeny ghan ạaḅereghi ghan eru dị oghol mọ aBaal.

³² Kụ ọdi aḅolonaan Baal enmeny ạrikia sịphe obughotu phọ aBaal nyọpo ọdi ạlogh bọ ẹpe Sameria.

³³ Kụ Ehab ạkananaan igbudu um-ạke Asera kụ ạḅile aḍighi yogh ipeel dị ẹghagh ologhi Ọmoogh-we Ẹnaan phọ Ịzirel ịdi epu ịpe ạbuḅel ạbudaam mọ Ịzirel.

³⁴ Amem mọ Ehab kụ ẹdi aHiel ọlo ạBetel phọ ạlogh bọ ẹmha phọ Jeriko. Ọdi ạsighe Abiram ọkpana phọ ọdi kụ aphighiom ẹmha phọ, ạsighe esoony phọ ọdi Segub kụ adoghoḍiom rụnhu-aḍibuo ẹmha phọ aJeriko, ọdaph ikpo ọnhu Ọmoogh-we phọ ịpe ọdi ạghaaph bọ ạḅeni Josua ọony phọ ạNon.