1 Ạbudaam 12 - Ạḍinya Iigbia

Arughunughun ephunom mọ otuphe ọgbatanaan

¹ ARehoboam ạghi Sẹkem ịdi eḍighi bọ oomo Ịzirel uukpomoghan ẹpe phọ oḍighi ọdi ọdaam eelhe phọ.

² Mem dị aJeroboam ọony phọ aNebat ạnaghan bọ ịphen phọ mem mọ ọdi odi bọ ẹpe Ijipt (loor esi dị ọdi aghiilaan bọ Sọlomon ọdaam mọ kụ asuma bọ agheel Ijipt).

³ Kụ bịdi orom ọghi ọmagh nyọdi, kụ aJeroboam rꞌoomo ookpomoghan awe phọ Ịzirel oru kụ ọḅeni Rehoboam mọ,

⁴ “Ọde phọ ạna ạamoromi ni dool phọ ayoor kụ iḍighi nyịidipho dughe ịikpara arukumuan phọ ọde phọ ạna, adughe dool phọ ọdi uwiririom ghan bọ iyoor, kụ yoor ogbi okumu ghan ạna.”

⁵ Kụ ọdi ạḅeni bịdi mọ, “Ikeel. Ẹman ịraar aḍughul-otu kụ ẹḅile eru.” Kụ awe phọ ogheel.

⁶ Kụ aRehoboam ọdaam mọ rꞌikumoor awe ọpham ruupuruan, bụphe rꞌạSolomon ọde phọ ọdi ọrolan ghan bọ mem mọ ạmuphe dị odi bọ, kụ ọdi ạḅeni bịdi mọ, “Iroma ịmi ịpe mị kạpagharanaan bọ we phọ ạbuen.”

⁷ Kụ bịdi ọḅeni nyọdi mọ, “Eru mạar dị nạ kaḍighi otelhedom awe phọ ạbuen rodon kụ akumu bịdi, kụ nạ ạkaaph ghan igeny ikpo ọnhu mem lọ nạ rạpagharanaan bịdi, pọ bịdi koḍighi ni butelhedom ạna kꞌagee-pọ.”

⁸ Kụ ọdi ọ́sighe ịpe ikumoor awe phọ oroma bọ nyọdi. Ọdi ạsighe oroma ugheel ạnmuny iigbo phọ ọdi otuman bọ nyọdi.

⁹ Kụ ọdi ạḅeni bịdi mọ, “Iroma ịmi ịpe yira kọpagharanaan bọ we phọ ạbuen, bụphe ụḅeni bọ ịmi mọ dughe ẹemor phọ ẹpe ọde phọ ạna uwiririom bọ iyoor.”

¹⁰ Kụ ugheel ạnmuny iigbo phọ ọdi ọḅeni nyọdi mọ, “Ịduon kụ ịdi nạ kạpagharanaan we phọ ạbuen ọḅeni bọ nyịna mọ, ‘Ọde phọ ạna awiririom ni dool phọ ayoor kụ nạ kadughe ni ḍụghum?’ Ḅẹni bịdi ịduon mọ, ‘Ạkubam ạghunugh ạmi ạamor apu esin ọde phọ ạmi.’

¹¹ Kụ nyịidipho ịdipho ọde phọ ạmi ịleti bọ inyina dool dị ẹemor, ḍịo ạmi kẹemor epu sịphe. Ọde phọ ạmi ịguroghom ghan inyina ịkpara kụ mị kịguroghom ghan inyina siepere.”

¹² Mẹman ịraar phọ aḍughul-otu phọ, ịdipho ọdaam mọ ạḅeni bọ bịdi, kụ aJeroboam rꞌoomo awe phọ Ịzirel ọghi ọteeny Rehoboam.

¹³ Ọdaam mọ ạphagharanaan we phọ rꞌegbagara ẹḍogh, ọ́sighe ịpe ookpomoghan ikumoor awe phọ ọḅeni bọ nyọdi.

¹⁴ Ọdi ạdaph ịpe ookpomoghan ugheel ạnmuny phọ oroma bọ nyọdi mọ, “Ọde phọ ạmi ịleti inyina dool dị ẹemor, kụ adool ḍịo ạmi kẹemor epu pạ. Ọde phọ ạmi ạsighe ghan ịkpara kụ ịguroghom inyina, kụ mị kạsighe ghan siepere kụ ịguroghom inyina.”

¹⁵ Ọdaam mọ ọ́naghanan we phọ, ịdi eḍighi bọ onmia phọ ọphon phọ ạḍua esi Ọmoogh-we phọ kụ aru; ẹrol dị ịpe ọdi ạghaaph bọ eḍighi ekol, ịpe Ọmoogh-we phọ ạghaaph bọ ạḅeni Ahaija oyil ịmiin phọ aSailo ạḅeni Jeroboam ọony phọ aNebat.

¹⁶ Kụ mem dị oomo awe phọ Ịzirel ọmiin bọ mọ ọdaam mọ ọ́naghanan bịdi, kụ awe phọ ọlo oruphe mọ, “ADevid rꞌayoor ụ́ḅaran mụghen abin? Yoor ụ́moogh bin erua esi ọony phọ ạJesi. Weye Ịzirel, uwo kꞌọdi agheel kꞌọdi. Kụ nyịidipho pọrono; bụo ẹemara aDevid, imiigha loor.”

¹⁷ Kụ awe phọ Ịzirel ogheleghu, kụ aRehoboam ạda we phọ Ịzirel, bụphe orugh bọ ẹpe ạramha phọ aJuda.

¹⁸ Kụ aRehoboam ọdaam mọ arom Adoniram uwo ẹmhu ạbuo eepua iiḍighi phọ mọ ạghi ạteeny we phọ Ịzirel kụ oomo phọ ạbidi ọḅile ghụn ọsighe ikpo oroḅol nyọdi oghiigh, kụ aRehoboam aagborion ạghi aḍigh oghuugh ẹgham ọdi asuma agheel Jeruselem.

¹⁹ Ịphen phọ eḍighi ni ịdi ạramha Ịzirel ephunom mọ rꞌọto phọ aDevid ụ́pomoghian mun kꞌarodon.

²⁰ Mem dị oomo awe phọ Ịzirel ọnaghan bọ mọ aJeroboam mạḍua Ijipt atigheel, bịdi orom ọghi ọmagh nyọdi sịphe ookpomoghan phọ ọsighe nyọdi oḍighi ọdaam oomo Ịzirel. Ạbunon awe dị oḍighan rꞌẹemara phọ aDevid ụ́tol omuton eghun aJuda bịn.

Ịmiin phọ aSemaya

²¹ Kụ aRehoboam ạghi asi Jeruselem, kụ ọdi aakpomoghi oomo eghun aJuda rꞌeghun phọ ạBenjamin, kụ bịdi ọson oniin okuron rꞌọphaanyadi ọonir awe bụo amugh eeghe mọ ọghi oruphiom ẹgham ẹemara epẹ ephunom mọ Ịzirel ạar ọda eelhe phọ oḅulemi ọngo Rehoboam ọony phọ ạSolomon.

²² Kụ Ẹnaan ẹghaaph ẹḅeni Semaya oyil ịmiin phọ

²³ mọ ạḅeni Rehoboam ọony phọ ạSolomon ọdaam mọ aJuda rꞌoomo eghun aJuda rꞌeghun ạBenjamin rꞌạbueri phọ awe phọ mọ,

²⁴ “Ịphen phọ ịtooghi dị ẹḍua esi Ọmoogh-we phọ mọ kẹ́ki etuphiom ẹgham bumor phọ anyina awe phọ Ịzirel; igheleghu iloghi aruutu anyina.” Kụ bịdi ọnaghanan ikpo ọnhu Ọmoogh-we phọ, kụ oḅula ogheel, ọdaph ikpo ọnhu Ọmoogh-we phọ.

AJeroboam mạḅitonaan Ọmoogh-we phọ

²⁵ Kụ aJeroboam ọdaam mọ ạlogh ẹmha phọ ạSekem sịphe aruugum mọ ạga phọ Ifraim kụ arugh pạ, kụ ọdi ạḍua sịphe phọ ạghi ẹmha phọ ạPenuel awinighom ịinya ẹgham.

²⁶ Kụ aJeroboam ạḅem sịphe ologhi phọ ọdi mọ, “Iini sịen, nyịidipho ọda eelhe phọ kaḅula ni akeel ẹemara phọ aDevid.

²⁷ Eru mạar dị awe phọ ạbuen ọghi Jeruselem oḍighi ịyaar aghuḍum sịphe Otu Ịiḅereghi phọ, pọ iloghi awe phọ ạbuen kenmia ni ekiton eḅula esi oye phọ ọpo ạmoogh bọ bịdi. Bịdi kughiigh ịmi kụ ọḅile oḅula esi aRehoboam ọdaam mọ aJuda.”

²⁸ Kụ ọdaam mọ ạsighe ologhi ọdi amitenom ezue, kụ ạsighe gol ạlhemom ịyal ịbam ilephiri ạsinam, kụ ạḅeni we phọ mọ, “Mẹphughanam ẹghi phọ anyina ẹpe Jeruselem. We Ịzirel, ipogh ịkaaghineen ạrumugh phọ anyina, ịpe ịsighe bọ inyina ẹḍuanam ẹpe ade phọ Ijipt.”

²⁹ Ọdi ạsighe nyeniin aseere Bẹtel, kụ ạsighe nyẹeri phọ aseere Dạn.

³⁰ Kụ ịphen phọ eḍighi ịkaraph ịdi eḍighi bọ awe phọ rọki ghan kọoḅereghi ẹpe Bẹtel rꞌạDan.

³¹ Kụ ọdi adoghoḍi rugbogo ịiḅereghi ẹpe aroogbolom mọ, kụ ạmaaghi riil ạrikia sịphe ogbo aḍita awe phọ dị útu bụo ẹemara kꞌaLivai.

Moronyon iiseeny phọ ẹpe Bẹtel

³² Kụ aJeroboam agu ẹyaal dị kole ḍioph rꞌoogh aḍughul-otu ọphaanya ụnwanyu phọ ịdipho ẹyaal ẹlo aJuda. Kụ ọdi aḍighi yogh rạraar aghuḍum sịphe enmeny phọ, aḍighi yogh ghan ịduon phọ ẹpe Bẹtel ạngo sịnam agol phọ ọdi ạlhemogh bọ, kụ ọdi asereghi bụpinyon rịkia phọ ẹpe Bẹtel, ẹpe arugbogo ịiḅereghi phọ ọdi ạloghoḍi yogh bọ.

³³ Kụ ọdi ạghi ẹpe enmeny ạrikia phọ ọdi ạkan bọ ẹpe Bẹtel ḍioph rꞌoogh aḍughul-otu ọphaanya ụnwanyu phọ, ụnwanyu phọ ọdi ạsaḅar bọ sịphe ologhi phọ ọdi; kụ alianaan weye phọ Ịzirel ẹyaal, kụ ạsuughi ịnsens sịphe enmeny phọ.