1 Ạbudaam 1 - Ạḍinya Iigbia

ADevid ọdaam eelhe phọ mạkpo

¹ Mem dị aDevid ọdaam mọ mạkpo, ariiḍio aghuḍum mọ ọdi remunughan, aloor phọ ọdi ítue mun ịinyuum ghạlamo uzu ni ukpe ẹghologhol.

² Abutelhedom mọ ọdi opuru nyọdi mọ, “Yoor kọki ọwa esina ọnyani oruom nyịna ọde-otu phọ ayoor ọdaam mọ, ạmeera ghan atuman ọdaam mọ ạghologholomi ghan nyọdi, ạmina ghan sịphe ekpologhi phọ ọdi, ẹrol dị aloor ọde-otu phọ ayoor ọdaam mọ ẹenyuum ghan.”

³ Kụ bịdi ọghi oomo eelhe phọ Ịzirel ọwa esina ọnyani kụ bịdi ọmiin Ạbisag ọlo aSunem kụ ọsighe oruomonaan ọdaam mọ.

⁴ Ọdi ạnighe ni igey, ạloghonaan ghan ọdaam mọ ḍịghaagh, arelhenaan ghan sidom. Kụ ọdaam mọ rꞌọnyani phọ esi ụ́tolan.

Adonaija akophora ọda eelhe phọ

⁵ Kụ Adonaija, onhiin phọ ọdi aHagit, aphoophe loor ọdi kụ ạḅem ghan mọ, “Mị kaḍighi ọdaam.” Kụ ọdi aakolobian loor ọdi rughuugh-ude rꞌawe dị kokiilom ghan rụsu, amitiom ooghdi awe dị kọtol risigh ọdi.

⁶ (Ọde phọ nyọdi ọ́baam, ópuru mọony phọ ọdi mọ, “Ịphen nạ raḍighi bọ ịghen?” Ọdi phọ aḍighi ni ooḅi; Ạbsalom kụ aruom nyọdi.)

⁷ Adonaija amitenom ezue Joab ọony aZeruya, rꞌẠbayata oyil ạrikia phọ, kụ bịdi oḍighan nyọdi.

⁸ ẠZedok oyil ạrikia phọ rꞌaBenaya ọony phọ ạJehoyada rꞌaNetan oyil phọ Ẹnaan rꞌaSimei rꞌaRei rꞌikpolom awe phọ aDevid úḍighan rꞌAdonaija.

⁹ Adonaija ạsighe iyool-ịga rꞌilephiri ạsinam rꞌạsinam dị ọmaar ẹbughe, ạsighe ạphighironom ẹkia ịigaany ẹpe Ẹna Ẹkaraph-ịyaar etuman bọ ẹpe En Rogel. Ọdi ạamaghagh oomo abumor phọ ọdi nmụny ọdaam mọ, rꞌoomo awe aJuda butelhedom ọdaam mọ.

¹⁰ Kụ ọdi ọ́magh aani Netan oyil phọ Ẹnaan rꞌaBenaya rꞌikpolom awe phọ rꞌạSolomon umor phọ ọdi.

Oḍighi Sọlomon ọdaam eelhe phọ

¹¹ Kụ aNetan apuru Batsiba onhiin phọ ạSolomon mọ, “Nạ mạnaghan aani ni mọ Adonaija ọony phọ aHagit maḍighi loor ọdi ọdaam, kụ aDevid ọde-otu phọ ayira ólhegheri?

¹² Kụ iḍighi, nyịidipho tue. Mị karoma nyịna ịdi nạ kaḍighi kụ ạpelaam ghuḍum ạna rꞌaghuḍum ạSolomon ọony phọ ạna.

¹³ Kịa nyịidipho kꞌaDevid ọdaam eelhe phọ apuru nyọdi mọ, ‘Ọde-otu ạmi, nạ ḍịen kụ óghunya bọ ọngo ọnyani-otu phọ ạna, kụ nạ ụ́ḅeni bọ ịmi mọ ạSolomon ọony phọ ạna kụ kạsighe bọ dọl phọ ạna aḍighi ọdaam eelhe phọ? Kụ ịbile iḍighi ika kụ Adonaija kụ mạda bọ?’

¹⁴ Kụ mem dị nạ odi rạkaaph kạḅeni ọdaam mọ kụ mị atu ạkparami ọghaaph phọ.”

¹⁵ ABatsiba ạghi kꞌọdaam mọ aḍigh ologhi otu phọ ọdi, kụ mem mọ ạmuen phọ ọdaam mọ mạkpo kụ Ạbisag ọnyani ọlo aSunem mọ kụ ratelheminaan ghan ọdaam mọ sidom.

¹⁶ ABatsiba azumeri ẹmhu ọdi ude risigh ọdaam mọ kụ ạngo rughuenian, kụ ọdaam mọ apuru mọ, “Nạ rạwa mọ mị aḍighinaan nyịna eeghe?”

¹⁷ Ạnir phọ ạḅeni nyọdi mọ, “Ọde-otu ạmi, tọ nạ ughunya ni ạngo ọnyani-otu phọ ạna; nạ ụsighe ḍien Ọmoogh-we Ẹnaan phọ ạna kụ aghunyaam bọ kụ ạḅem mọ ạSolomon ọony phọ ạmi kụ kạsighe dọl phọ ạna ạda, mọ ọdi kụ kạtolom ạgada ọdaam eelhe phọ.

¹⁸ Kụ nyịidipho Adonaija kụ mạda kụ ọde-otu phọ ạmi ọdaam mọ ólhegheri.

¹⁹ Ọdi mạsighe ịbadi ilephiri ạsinam, iyool-ịga, rꞌạsinam dị ẹmaar ẹbughogh ạpinyonom rịkia, ạamaghagh oomo ạnmuny ọdaam mọ, Ạbayata oyil ạrikia phọ rꞌaJoab uwo ẹmhu awe ẹgham mọ, kụ ọlo Sọlomon ọony phọ ạna ọdi ọ́magh aani.

²⁰ Kụ nyịidipho oomo ariḍien awe phọ Ịzirel rephogh nyịna, ọde-otu phọ ạmi ọdaam mọ, ọḅeni ạbidi nyọpo kạtolom bọ ạgada ọdaam eelhe phọ

²¹ Lọ ịduon phọ úḍighi, pọ, mem dị ọde-otu phọ ạmi ọdaam mọ kamugh ạtuonom bụrude phọ ọdi, kugbiom ịmi rꞌạSolomon ọony phọ ạmi ọloghom bụdi osoroghu iilogh.”

²² Kụ ạnir phọ rꞌọdaam mọ odi ni rọkaaph kụ aNetan oyil phọ Ẹnaan ạghi aḍigh.

²³ Kụ bịdi ọḅeni ọdaam mọ mọ, “Mịin Netan oyil ịmiin phọ Ẹnaan.” Kụ ọdi aḍigh ạghi ạteeny ọdaam mọ, azumeri ẹmhu ọdi.

²⁴ Kụ aNetan apuru mọ, “Ọde-otu ạmi ọdaam mọ, nạ kụ ụḅem bọ ni mọ Adonaija kụ ạsighe dọl phọ ạna ạda; ọdi kụ ạrolom ạgada ọdaam eelhe phọ?

²⁵ Rodon ọdi mạsighe ịbadi ilephiri ạsinam, iyool-ịga, rꞌạsinam dị ẹmaar ẹbughogh ạpinyonom rịkia, ạamaghagh nmụny ọdaam mọ rꞌaJoab uwo ẹmhu awe ẹgham mọ rꞌẠbayata oyil ạrikia phọ. Kụ pogh, bịdi odi egbodo ọdi role rọpughol, kụ rọḅem ghan mọ, ‘Ẹnaan ẹkpoomi Adonaija ọdaam mọ.’

²⁶ Kụ ịmi ọony phọ ạna, rꞌạZedok oyil ạrikia phọ, rꞌaBenaya ọony phọ ạJehoyada, rꞌạSolomon ọony phọ ạna, ọdi ọ́magh aani.

²⁷ Kụ ịphen phọ nạ ọde-otu phọ ạmi ọdaam mọ, nạ kụ uḍighi ni kụ nạ otelhedom mọ ạna ọ́ḅeni aani bọ nyọpo kạsighe bọ esi ọde-otu phọ ạmi ọdaam mọ ạda ạtolom ạgada ọdaam ẹmha phọ?”

²⁸ Kụ aDevid ọdaam mọ ạphagharanaan kụ ạḅeni mọ, “Ịmagh Batsiba.” Kụ ạnir phọ aru ạmeera egbodo ọdaam mọ.

²⁹ Kụ ọdaam mọ aghunya kụ ạḅem mọ, “Ọmoogh-we phọ odi bọ ni ọpo ạtagharan bọ uwaloor phọ ạmi ạsighe esi oomo ịminimiin phọ ạmi;

³⁰ ịdipho mị ạsighe bọ ḍien Ọmoogh-we phọ Ẹnaan phọ Ịzirel kụ aghunyaam bọ ạngo nyịna mọ ạSolomon ọony phọ ạna kụ kạsighe dọl phọ ạmi ạda, ạtolom ạgada phọ, agey ni ịduon phọ ni kụ ẹdi mị kaḍighi rodon phọ ạḍien.”

³¹ ABatsiba azumeri risigh ọdi ude, kụ ạngo rughuenian ọdaam mọ, kụ ạḅem mọ, “Ọde-otu ạmi Devid, tọl kꞌagee-pọ.”

³² Kụ aDevid ọdaam mọ ạḅem mọ, “Ịmagh Zẹdok oyil ạrikia phọ rꞌaNetan oyil phọ Ẹnaan rꞌaBenaya ọony phọ ạJehoyada.” Kụ bịdi ọghi ọteeny ọdaam mọ.

³³ Kụ ọdaam mọ ạḅeni bịdi mọ, “Ịsighe butelhedom ọde-otu phọ anyina rꞌanyina ẹghi ẹsaany Sọlomon ẹpham erumom; ọony phọ aḍigh ạnyu ẹnam adool phọ ạmi ẹpham nyọdi ẹghimom ẹpe ọonu adir phọ aGihon.

³⁴ ẠZedok oyil ạrikia phọ rꞌaNetan oyil phọ Ẹnaan ọsighe mụnum-ịko ọsagharan ẹmhu ọdi aḍighi ọdaam ạbidi eelhe phọ Ịzirel. Ịsighe ọkuodu phọ ephula kụ ẹḅem ghan mọ, ‘Ẹnaan ẹkpoomi Sọlomon ọdaam mọ!’

³⁵ Kụ ẹdaph nyọdi erigheel ẹrol dị ọdi ạtolom ạgada ọdaam eelhe phọ ạmi, kụ mị mạma nyọdi ọda areelhe phọ Ịzirel rꞌaJuda.”

³⁶ Kụ aBenaya ọony phọ ạJehoyada ạphagharanaan ạḅeni ọdaam mọ mọ, “Ẹrol li ịdipho. Ọmoogh-we Ẹnaan phọ ạna ọdaam mọ ẹtuugh ni ịduon phọ ẹḅem.

³⁷ Ịdipho Ọmoogh-we phọ ạrolonaan bọ ọde-otu phọ ạmi ọdaam mọ, ọdi ạtuugh ni ịdipho ạrolonaan Sọlomon ạbughe ẹereegh phọ ọdi, apuemi ọde-otu phọ ạmi aDevid ọdaam mọ.”

³⁸ Kụ ạZedok oyil ạrikia phọ rꞌaNetan oyil phọ Ẹnaan rꞌaBenaya ọony phọ ạJehoyada rꞌạbuo aKeret rꞌạbuo aPelet ọghi oḍighi ịdi ạSolomon aḍigh ạnyu ẹnam adool aDevid ọdaam mọ; ọdaph nyọdi ọghi osi ọonu adir aGihon.

³⁹ Kụ ạZedok oyil ạrikia phọ ạghi sịphe Ogbogo Ạdol Ọmoogh-we phọ ạsighe mụnum-ịko ạsagharan ẹmhu ạSolomon. Kụ bịdi ophula ghan ọkuodu phọ kụ oomo awe phọ ọḅem ghan mọ, “Sọlomon ọdaam mọ, tọl kꞌagee-pọ.”

⁴⁰ Kụ oomo awe phọ ọsaram nyọdi kụ ophula yogh ghan ruuḍue robo rꞌọḅaal ologhi; kụ oghur igiri phọ ạbidi aḍighi ịdi ade phọ ephiigha.

⁴¹ Mem dị Adonaija rꞌoomo awe phọ ọdi ạamaghagh bọ mọ olhe ilhe phọ rọmadan kụ ọnaghan bọ oghur igiri phọ ọdi pụruku bịdi olhe eḍien ọwile. Kụ mem dị aJoab ạnaghan bọ ẹḍogh ọkuodu phọ kụ ọdi ạḅem mọ, “Eeghe kụ imite kụ ọyugh phọ aleeny bọ ịduon ẹpe ẹmha phọ?”

⁴² Kụ ọdi odi rạkaaph ghan bịn ạJonatan ọony phọ Ạbayata oyil ạrikia phọ aru, kụ Adonaija ạḅeni nyọdi mọ, “Ḍigh otu. Ogey oye ịduon ạna kạpam ni ogey ọghaaph kụ atumom.”

⁴³ Kụ ạJonatan ạphagharanaan kụ ạḅeni Adonaija mọ, “Agey ni, aDevid ọdaam mọ ọde-otu phọ ayira mạsighe Sọlomon ạdaami.

⁴⁴ Kụ ọdaam mọ arom Zẹdok oyil ạrikia phọ rꞌaNetan oyil phọ Ẹnaan rꞌaBenaya ọony phọ ạJehoyada rꞌạbuo aKeret rꞌạbuo aPelet phọ bịdi ọsighe nyọdi ọsaany ọman ẹnam adool ọdaam mọ.

⁴⁵ ẠZedok oyil ạrikia phọ rꞌaNetan oyil phọ Ẹnaan mọsagharan ẹmhu ọdi elho ịko ẹpe ọnhu-adir phọ aGihon oḍighi ọdaam, kụ bịdi mọsaram nyọdi rotigheel kụ ẹmha phọ rẹwalawala. Pọ kụ ọyugh phọ nyina rẹnaghan ghan bọ.

⁴⁶ ẠSolomon mạrolom ạgada ọdaam eelhe phọ.

⁴⁷ Ẹdi etum sịphe, abutelhedom ọdaam mọ moru ọseph Devid ọdaam mọ ọde-otu phọ ayira, ọḅeni mọ, ‘Ẹnaan eselemi ḍien phọ ạSolomon ẹnighe epu ḍịphe ạna, ạbughe ạgada ọdaam ẹmha phọ; nyọon ọdi apuemi nyọon ạna.’ Kụ ọdaam mọ azumeri ẹmhu ọdi sịphe ẹmina phọ.

⁴⁸ Kẹn, kụ ọdaam mọ ạḅile ạḅem ịduon mọ, ‘Ạḍiseph ẹrolonaan Ọmoogh-we Ẹnaan phọ Ịzirel, dị ụngo bọ ịmi mọony dị mạrolom ạgada ọdaam eelhe phọ ạmi rodon, dị mị kụ ạsighe riḍien ạmi kụ rạmiin aani.’”

⁴⁹ Kụ ariḅio oomo awe phọ Adonaija ạamaghagh bọ rekaph kụ oḅerenu uwo ạḍio ọdi ạghi ḍịo ọdi.

⁵⁰ Kụ oḅio Adonaija rakaph loor ẹmhu ạSolomon, kụ ọdi aḅetenu ạghi ạpham rạphaal enmeny ạrikia phọ.

⁵¹ Kụ ọghi ọghaaph ọḅeni Sọlomon mọ, “Adonaija raghiilaan ni nyịna Sọlomon ọdaam mọ, kụ ạki ạpam rạphaal ịsiphe enmeny ạrikia phọ, kụ rạḅem ghan mọ, ‘Sọlomon ọdaam mọ ạghi aghunya mọ ọno ịmi kúghiigh.’”

⁵² Kụ ạSolomon ạḅem mọ, “Eru mạar dị ọdi kaḍeenaan ni loor phọ ọdi mọ ọno oye oḍuom ologhi ni, pọ rꞌaḍiniin ạḍilaal ẹmhu ọdi kẹ́ḍua emeel ude. Kụ ọlo ọmiin ịkaraph ạroozo loor ọdi, pọ ọdi kamugh ni.”

⁵³ Kụ ạSolomon arom kụ ọghi ọsighe nyọdi sịphe ạraphaal enmeny ạrikia phọ ọpham orumom, kụ ọdi ạghi kụ akpuḍian risigh Sọlomon ọdaam mọ. Kụ ạSolomon ạḅeni nyọdi mọ, “Keel kꞌạna.”