Руфэ 4 - ФӀыцӀагъэ ЛъапӀэ

БоӀэз Руфэ къызэришар

¹ Абы хэту, цӀыхур щызэхыхьэ хабзэ жылэ дыхьэпӀэм деж кӀуэри щытӀысащ БоӀэз. Арати, зи гугъу ищӀа и унэкъуэщ щэхужакӀуэр щыблэкӀым: «Къэгъази моуэ къэтӀыс, си къуэш», – жиӀэри еджащ. Абы къигъазэри тӀысащ.

² БоӀэз жылэ хасэм щыщу тхьэмадипщӀ къишэри, ахэри игъэтӀысащ.

³ Абы и ужькӀэ и унэкъуэщ щэхужакӀуэм зыхуигъазэри жриӀащ: «НэӀумий, МоӀэбей къикӀыжам, ди къуэш Елимэлэх къыщӀэна и щӀапӀэр ещэж.

⁴ Сэ къэслъытащ уэ абы щыгъуазэ усщӀыну си къалэну, икӀи мыбдеж щыт псори, лъэпкъым ди нэхъыжьыфӀхэри ди щыхьэту, ар къэпщэхуну ухуеймэ, бжесӀэну. Уэ къэпщэхужмэ, хъарзынэщ, ауэ плъэмыкӀынумэ, сщӀэн щхьэкӀэ, къызжеӀэ. Уэр фӀэкӀа ар къищэхужыну зыри хуиткъым, уэ къыпкӀэлъыкӀуэр сэращ». «Сэ къэсщэхужынущ ар», – жиӀащ абы.

⁵ Апхуэдэу щыхъум, БоӀэз жиӀащ: «НэӀумий деж ар къыщыпщэхуж махуэм щхьэгъусэу къэпшэн хуейщ фызабэ Руфэ, моӀэб лъэпкъым щыщыр, Мэхълэн мыгъуэм къыщӀэнар. Фэ къуэ вгъуэта нэужь, Мэхълэн мыгъуэм и къуэпсыр абы зэфӀигъэувэжын икӀи и мылъкури къыхуэнэн щхьэкӀэ».

⁶ Ар унэкъуэщ щэхужакӀуэм идакъым: «Абы щыгъуэм сэ а щӀапӀэр къысхуэщэхужынукъым, сыхилъэфэнкӀэ сошынэри. Уэ езым къэщэхуж, сэ апхуэдэу схуэщӀэнукъым», – жиӀащ.

⁷ (Япэм щыгъуэ ИсрэӀилым хабзэ яӀащ щӀапӀэр щащэжкъыщащэхужым деж лъэныкъуитӀым языхэзым и вакъэ лъэныкъуэр зылъихрэ адрейм ириту. Апхуэдэ щӀыкӀэкӀэ я зэгурыӀуэныгъэм къару игъуэтырт.)

⁸ Арати, унэкъуэщ щэхужакӀуэм, БоӀэз «Уэ езым къэщэхуж» жриӀэри, и вакъэ лъэныкъуэр лъихащ.

⁹ Апхуэдэу щыхъум, БоӀэз лъэпкъым и нэхъыжьхэми цӀыхубэми захуигъэзащ: «Нобэ фэ фыщыхьэтщ Елимэлэхи, Къилиуэни, Мэхълэни яйуэ щыта псори НэӀумий деж къызэрыщысщэхужым.

¹⁰ КъищынэмыщӀауэ, Мэхълэн къыщӀэна фызабэ Руфэ, МоӀэбей щыщыр, щхьэгъусэу къызошэ: дунейм ехыжам и щӀэиныр езым и щӀэблэм къылъысыжу, и къуэпсыр лъэпкъым хэмыкӀуэдыкӀыжын, и цӀэри и Ӏыхьлыхэм ящымыгъупщэжу, жылэм и тхыдэм къыхэнэн щхьэкӀэ. А псом фэ нобэ фрищыхьэтщ!»

¹¹ Лъэпкъым и нэхъыжьхэми абдежым щызэхуэса псоми «дрищыхьэтщ» жаӀащ, икӀи БоӀэз къехъуэхъуащ мы псалъэхэмкӀэ: «Уи унэ къихьэ цӀыхубз цӀыкӀур ИсрэӀил и унагъуэр зыгъэбэгъуа Рэхъелэрэ ЛеӀэрэ хуэдэу, Зиусхьэным быныфӀэ ищӀ! Ефрафэ и деж къулей ущыхъуи, Бэтлъэхъем уи цӀэр щрагъэлъапӀэ!

¹² А цӀыхубз цӀыкӀумкӀэ уэ къыпщӀэхъуэну щӀэблэр Тэмар Ехьудэ къыхуилъхуа Пэрэз и лъэпкъым хуэдэ Зиусхьэным ищӀ!»

Даут бегъымбарым и лӀакъуэр

¹³ Апхуэдэ щӀыкӀэкӀэ БоӀэз Руфэ къишэри, щхьэгъусэ хуэхъуащ. БоӀэз абы бгъэдыхьэри, Руфэ, Зиусхьэным и фӀыгъэкӀэ, уэндэгъу хъури, къуэ игъуэтащ.

¹⁴ ЦӀыхубзхэм НэӀумий къыжраӀэрт: «Зиусхьэным и шыкурщ! Нобэ быныншэу укъигъэнакъым, узыпӀыжыну къуэ уигъэгъуэтащ! Уи щӀалэ цӀыкӀум и цӀэр ИсрэӀилым лъапӀэ щрехъу!

¹⁵ Абы уэ гъащӀэр ӀэфӀ пщищӀыжынущ, уи жьыщхьэ узыхуей ухуигъэзэнущ! Ар къэзылъхуар уи нысэ цӀыкӀуу фӀыщэу укъэзылъагъурщ, уэркӀэ къуибл нэхърэ нэхъыфӀырщ!»

¹⁶ НэӀумий сабий цӀыкӀур къищтэри, ӀэплӀэкӀэ кърихьэкӀыу, и куэщӀым ису ипӀащ.

¹⁷ Гъунэгъу фызхэм «НэӀумий къуэ къыхуалъхуащ» жаӀэрт. Абы цӀэуэ Ӏубэд фӀащащ. Ар Даут и адэ Исий и адэжырщ.

¹⁸ Пэрэз и къуэпсыр мыращ: Пэрэз и къуэщ Хъэцрэн,

¹⁹ Хъэцрэн и къуэщ Рам, Рам и къуэщ Ӏэминэдэб,

²⁰ Ӏэминэдэб и къуэщ Нэхъшун, Нэхъшун и къуэщ Сэлмэний,

²¹ Сэлмэний и къуэщ БоӀэз, БоӀэз и къуэщ Ӏубэд,

²² Ӏубэд и къуэщ Исий, Исий и къуэщ Даут.