Лукас 9 - ФӀыцӀагъэ ЛъапӀэ

Хьисэ и лӀыкӀуэ пщыкӀутӀым къару яриту зэрыригъэжьар

¹ Хьисэ и гъэсэн пщыкӀутӀыр ириджэри, къарурэ тепщэныгъэрэ яритащ, жин бзаджэхэм ятекӀуэн, узыфэхэр ягъэхъужын папщӀэ.

² Арати, Тхьэм и Тепщэныгъэм и хъыбар ягъэӀуну, сымаджэхэр ягъэхъужыну иригъэжьащ Хьисэ ахэр.

³ – Гъуэгуанэ фыщытехьэкӀэ, зыри здевмыхьэжьэ: баши, хъуржыни, щӀакхъуи, ахъши, щыгъын леи здэвмыщтэ, – яжриӀащ абыхэм Хьисэ. –

⁴ Сыт хуэдэ жылэ фыдыхьэми, бысым хъуэж фымыщӀу зы унэм фыщыхьэщӀэ, жылэм фыкъыдэкӀыжыху.

⁵ Фезымыгъэблагъэхэм я жылэм фыкъыщыдэкӀыжкӀэ фи лъакъуэм трихьа сабэр кӀэрывгъэщэщыж, къызэрывэкъуэншэкӀамкӀэ ар щыхьэт яхуэхъун папщӀэ.

⁶ Арати, Хьисэ и гъэсэнхэм жылэхэр къызэхакӀухьын щӀадзащ, сымаджэхэр ягъэхъужрэ Тхьэм и хъыбарыфӀыр яӀуатэу.

⁷ Хьисэ теухуауэ къекӀуэкӀ псалъэмакъыр лӀыщхьэ Хьирэд щызэхихым, зыхуихьынур имыщӀэу хэгупсысыхьащ, Яхья бегъымбарыр къэтэджыжауэ жаӀэрти.

⁸ Языныкъуэхэм Иляс бегъымбарым дунейм къигъэзэжауэ жаӀэрт. Пасэрей бегъымбархэм ящыщ гуэр къэтэджыжа хуэдэу зыгъэхъыбари щыӀэт.

⁹ Езы Хьирэд мыпхуэдэу жиӀащ: «Яхья и щхьэр сэ пезгъэупщӀащ. АтӀэ мы зи хъыбар зэхэтхыр хэт хъуну?» Хьирэд езыр щӀэкъурт Хьисэ хуэзэну.

Хьисэ цӀыху минитху зэригъэшхар

¹⁰ Хьисэ и лӀыкӀуэхэм къагъэзэжри, ящӀауэ хъуар яӀуэтэжащ. Ахэр гъусэ ищӀри, БэтсэидкӀэ зэджэ къуажэм кӀуащ Хьисэ, абы я закъуэу щыӀэну.

¹¹ АрщхьэкӀэ цӀыхухэм ар къащӀэри, кӀэлъыкӀуащ. Щынэсым, Хьисэ ахэр иригъэблагъэри, Тхьэм и Тепщэныгъэм яхутепсэлъыхьащ, гъэхъужын хуейхэри игъэхъужащ.

¹² Махуэр щыхэкӀуатэм, и гъэсэн пщыкӀутӀыр къыбгъэдыхьэри, Хьисэ къыжраӀащ: – ЦӀыхухэр жылэ гъунэгъухэм гъакӀуэ, жэщыр щрахын унэрэ яшхынрэ къагъуэтын папщӀэ, сыту жыпӀэмэ мыр щӀыпӀэ пхыдзащ.

¹³ – Фэ езым вгъашхэ ахэр, – яжриӀащ Хьисэ абыхэм. – Дэ щӀакхъуитхурэ бдзэжьеитӀрэ фӀэкӀ диӀэкъым, дыкӀуэу цӀыху псоми папщӀэ шхын къэдмыщэхумэ, – къатыжащ абыхэм жэуап.

¹⁴ (ЦӀыхухъу къудейуэ минитхум нэблагъэрт ахэр.) – ЦӀыхухэр щэ ныкъуэ хъу гуп-гупурэ евгъэтӀысэх, – яжриӀащ Хьисэ и гъэсэнхэм.

¹⁵ Хьисэ зэрыжиӀам хуэдэу ящӀащ, цӀыхухэр ирагъэтӀысэхащ.

¹⁶ Хьисэ щӀакхъуитхумрэ бдзэжьеитӀымрэ къищтэщ, уафэм дэплъейри, Тхьэм фӀыщӀэ хуищӀащ ерыскъым щхьэкӀэ. ЩӀакхъуэмрэ бдзэжьеймрэ зэпищӀыкӀри, и гъэсэнхэм яритащ, цӀыхухэм хуагуэшын папщӀэ.

¹⁷ ЦӀыхухэр шхащ, псоми загъэнщӀащ икӀи къадэхуауэ матэ пщыкӀутӀ зэщӀакъуэжащ щӀакхъуэрэ бдзэжьейуэ.

Хьисэ зэры-Мэсихьыр Питрэс и фӀэщ зэрыхъуар

¹⁸ Хьисэрэ и гъэсэнхэмрэ я закъуэу махуэ гуэрым тхьэ елъэӀуа нэужь, Хьисэ абыхэм еупщӀащ: – ЦӀыхубэм Сэ сыхэту жаӀэрэ?

¹⁹ – Языныкъуэхэм умэхъакӀуэ Яхья къэтэджыжауэ жаӀэ уэр щхьэкӀэ, нэгъуэщӀхэм у-Илясу жаӀэ, пасэрей бегъымбархэм ящыщ гуэр къэтэджыжауэ жызыӀи щыӀэщ.

²⁰ – АтӀэ фэ сыхэту жыфӀэрэ? – еупщӀащ Хьисэ абыхэм. – Уэ Тхьэм ури-Мэсихьщ, – жиӀащ Питрэс.

²¹ Хьисэ абыхэм ткӀийуэ унафэ яхуищӀащ ар зэры-Мэсихьыр ямыгъэхъыбарыну, икӀи мыпхуэдэуи яжриӀащ:

²² – ЦӀыхум и Къуэм хьэзабышхуэ ишэчын хуейщ. Лъэпкъ тхьэмадэхэми, дин гъуазэ нэхъыщхьэхэми, теурэт егъэджакӀуэхэми ЦӀыхум и Къуэр ямыдэу къызыхахунущ, яукӀынущ, ауэ ещанэ махуэм лӀахэм къахэтэджыкӀыжынущ Ар.

²³ Си ужь къиувэну хуейм езым и щхьэ Ӏуэхухэр зыщрегъэгъупщи, Сэр щхьэкӀэ гугъу зригъэхьыфу, уеблэмэ и гъащӀэр зэрытрахыну Ӏэщэр махуэ къэс ихьыфу щрет, итӀанэ си ужь къреувэ, – яжриӀащ псоми Хьисэ. –

²⁴ Сыту жыпӀэмэ зи псэр зыхъумэжыну хуейм и псэр фӀэкӀуэдынущ, ауэ Сэр папщӀэ зи псэр зытым и псэр хъума хъунущ.

²⁵ ЦӀыхум дунейм тет фӀыгъуэр зыӀэригъэхьэрэ езыр жыхьэнмэлы хъумэ, е и псэм зэран хуэхъужмэ, сыт и сэбэп?

²⁶ Си ущиемрэ Сэрэ къыттеукӀытыхь дэтхэнэми ЦӀыхум и Къуэри теукӀытыхьыжынущ, езым и щӀыхьри, и Адэм и щӀыхьри, мелыӀыч лъапӀэхэм я щӀыхьри бгъэдэлъу къыщигъэзэжкӀэ.

²⁷ Пэжыр нывжызоӀэ, Тхьэм и Тепщэныгъэр ямылъэгъуауэ дунейм емыхыжын мыбдежым щытхэм къыфхэтщ.

Хьисэ и щӀыхьыр и гъэсэнищым къазэрыригъэлъэгъуар

²⁸ А псалъэхэр жиӀа нэужь, махуий хуэдиз дэкӀауэ, Питрэс, Яхья, Екъуб сымэ зыщӀигъури, Хьисэ тхьэ елъэӀуну Ӏуащхьэм дэкӀуеящ.

²⁹ Тхьэ зделъэӀум, Абы и нэгум зихъуэжащ, и щыгъынри лыдыжу хужьыбзэ хъуащ.

^30-31 Хьисэ цӀыхуитӀ напӀэзыпӀэм къыхуэхутэри, къепсэлъэн щӀадзащ. Ахэр бегъымбарышхуэу Мусэрэ Илясрэт, тӀуми нурыр къащхьэщихырт. Тхьэм и мурадыр игъэзэщӀэн щхьэкӀэ, Ар куэд мыщӀэу Ерусэлим щылӀэн зэрыхуейм тепсэлъыхьырт ахэр.

³² Питрэс и гъуситӀымрэ езымрэ жей къатеуэри, Ӏурихащ, ауэ къыщызэщыужым, зи щӀыхьыр нэхушхуэм хуэдэу нэрылъагъу хъуа Хьисэрэ адрей тӀумрэ – Мусэрэ Илясрэ къалъэгъуащ.

³³ Мусэрэ Илясрэ Ар къыщабгынэм, Питрэс Хьисэ мыпхуэдэу жриӀащ: – УщиякӀуэ, сыту гурыхь мыбдежым дыщытыну. ПщыӀищ дгъэувынщ, зыр Уэ, зыр Мусэ, зыр Иляс папщӀэ. Питрэс жиӀэр езым ищӀэжыртэкъым.

³⁴ Ар щыжиӀэм, пшэ Ӏэрамэ къащхьэщыхьэри, щӀихъумащ, щыщӀихъумэм, ахэр къэщтащ.

³⁵ Пшэм макъ къыхэӀукӀащ: «Мыр си Къуэрщ, Къыхэсхаращ. Абы жиӀэм федаӀуэ».

³⁶ Макъыр увыӀэжа нэужь, Хьисэ зыри и гъусэжтэкъым, езым и закъуэт. Абы и гъэсэнхэм ялъэгъуар зыми жрамыӀэу а махуэхэм ябзыщӀащ.

Хьисэ щӀалэщӀэ гуэрым жин бзаджэ къызэрыхихужар

³⁷ ЕтӀуанэ махуэм ахэр Ӏуащхьэм къехыжа нэужь, Хьисэ цӀыху гупышхуэ къыпежьащ.

³⁸ А гупым лӀы гуэр къыхэгуоукӀри, мыпхуэдэу жиӀащ: – УщиякӀуэ, кхъыӀэ, си къуэм схуеплъ, а зыращ сиӀэр.

³⁹ Жин бзаджэр къытоуэри, егъэкӀий, хуэш къыхегъэхьэри, и жьэм тхъурымбэ къыжьэдэкӀыу егъэкӀэзыз икӀи хуабжьу имыгъэхыщӀауэ кӀэрыкӀыркъым.

⁴⁰ Уи гъэсэнхэм селъэӀуат жиныр къыхахужыну, ауэ зыри яхуещӀакъым.

⁴¹ – ФӀэщхъуныгъэншэу зэкӀуэкӀа щӀэблэ, – жиӀащ Хьисэ. – Сыт хуэдизрэ иджыри сыфхэтыну? Сыт хуэдизрэ иджыри фысшэчыну? Къашэ мыдэ уи щӀалэр.

⁴² ЩӀалэр къыщыбгъэдыхьэм, жин бзаджэм ар ириудри игъэкӀэзызащ. Хьисэ жиныр игъэувыӀэщ, щӀалэр игъэхъужри, и адэм иритыжащ.

⁴³ ЦӀыхухэм яфӀэтелъыджэ хъуащ Тхьэм и лъэкӀыныгъэм и инагъыр. Хьисэ илэжьа Ӏуэхугъуэ псори ягъэщӀагъуэу цӀыхухэр здэщытым, езы Хьисэ и гъэсэнхэм мыр яжриӀащ:

⁴⁴ – Мы вжесӀэр фи гум ивубыдэ: ЦӀыхум и Къуэр цӀыхухэм ӀэщӀалъхьэнущ.

⁴⁵ Ауэ абыхэм къагурыӀуакъым Хьисэ жиӀам къикӀыр, а псалъэм и мыхьэнэр абыхэм щабзыщӀати. Езыхэри Хьисэ еупщӀыну тегушхуакъым.

Нэхъ иныр хэт?

⁴⁶ Хьисэ и гъэсэнхэм нэхъыщхьэ хъун хуейр яхузэхэмыгъэкӀыу зэдауэрт.

⁴⁷ Хьисэ ахэр зэгупсысыр ищӀэрти, сабий гуэр къищтэщ, зыбгъэдигъэувэри, мыпхуэдэу яжриӀащ:

⁴⁸ – Си хьэтыр зылъагъуу мы сабийр езыгъэблагъэм Сэри сригъэблэгъауэ мэхъу. Сэ сезыгъэблагъэм сыкъэзыгъэкӀуар иригъэблэгъауэ мэхъу. Нэхъ цӀыкӀу дыдэу къыфхэтырщ нэхъыщхьэр.

Пэрыуэгъу къыфхуэмыхъур фи телъхьэщ

⁴⁹ – УщиякӀуэ, дэ зыгуэр тлъэгъуащ жин бзаджэхэр цӀыхухэм уи цӀэкӀэ къахихужу, – жиӀащ Яхья. – ИкӀи пэдубыдащ апхуэдэу имыщӀэну, ди гъусэу зэрыщымытым щхьэкӀэ.

⁵⁰ – Пэвмыубыд. Фэ пэрыуэгъу къыфхуэмыхъур фи телъхьэщ, – жиӀащ Хьисэ.

Самарейхэм Хьисэ зэрамыдар

⁵¹ Тхьэм Хьисэ уафэм щиӀэтыжыну махуэр къыщыблагъэм, Абы Ерусэлим кӀуэну мурад ищӀащ.

⁵² Арати, Хьисэ лӀыкӀуэу цӀыху зыбжанэ япэ иригъэщащ. Ахэр кӀуэри, Самарие хэкум хиубыдэ жылэ гуэрым дыхьащ, Абы хэщӀапӀэ къыхуагъэхьэзырыну.

⁵³ Ауэ самарейхэм Ар жылэм дагъэхьэн ядакъым, Ерусэлим кӀуэрти.

⁵⁴ Абы и гъэсэнхэу Екъубрэ Яхьярэ ар щызэхахым, мыр жаӀащ: – Зи щӀыхьыр ин, ахэр зысын мафӀэ уафэм къедгъэхынщ, ухуеймэ?

⁵⁵ Хьисэ абыхэм захуигъазэри щаригъэгъэтащ.

⁵⁶ Ахэр нэгъуэщӀ жылэ кӀуащ итӀанэ.

Хьисэ и гъуэгум утетыныр зыхуэдэр

⁵⁷ Ахэр гъуэгу тету здэкӀуэм, Хьисэ зыгуэрым мыр къыжриӀащ: – Зи щӀыхьыр ин, Уэ дэнэ укӀуэми, уи ужь ситу сынэкӀуэнщ.

⁵⁸ – Бажэм гъуэ иӀэщ, къуалэбзуми абгъуэ иӀэщ, ауэ ЦӀыхум и Къуэм и щхьэр щигъэтӀылъын пӀэщхьагъ иӀэкъым, – жиӀащ Хьисэ.

⁵⁹ – Си ужь къиувэ, – жриӀащ Абы нэгъуэщӀ зым. – Зи щӀыхьыр ин, япэщӀыкӀэ си адэр щӀэзгъэлъхьэж, – къитащ абы жэуап.

⁶⁰ – ЛӀахэм я лӀахэр езым щӀрыралъхьэж, ауэ уэ кӀуэи, Тхьэм и Тепщэныгъэм и хъыбарыр цӀыхухэм яжеӀэ, – жриӀащ абы Хьисэ.

⁶¹ НэгъуэщӀ гуэрми Хьисэ мыр къыжриӀащ: – Зи щӀыхьыр ин, сэ уи ужь сиувэнщ, ауэ япэщӀыкӀэ си унэм исхэм сэлам езгъэхыж.

⁶² – Зи Ӏэр пхъэӀэщэм тезылъхьэу къызэплъэкӀыжыр Тхьэм и Тепщэныгъэм и жьауэ щӀэтыну хуэфащэкъым, – итащ жэуап Хьисэ.