Лукас 8 - ФӀыцӀагъэ ЛъапӀэ

Хьисэ и Ӏумэтым ит бзылъхугъэхэр

¹ Тэлай дэкӀри, Тхьэм и Тепщэныгъэм теухуа хъыбарыфӀыр цӀыхухэм яхуиӀуатэурэ, Хьисэ къалэхэмрэ къуажэхэмрэ къызэхикӀухьын щӀидзащ, и гъэсэн пщыкӀутӀри и гъусэу.

² Абыхэм нэмыщӀ, жин бзаджэ къызыхихужа икӀи игъэхъужа бзылъхугъэ зыбжани щӀыгъут Хьисэ. Абыхэм я цӀэр мыращ: Хьисэ жин бзаджибл къызыхихужа Мэрям, Магдалэ къуажэм щыщыр,

³ лӀыщхьэ Хьирэд и мылъкузехьэ Хузэ и фыз Иухьанэ, Сусанэ, нэгъуэщӀхэри. Ахэр я мылъкумкӀэ Хьисэрэ и гъэсэнхэмрэ ядэӀэпыкъурт.

Жыласэм теухуа щӀагъыбзэ

⁴ Жылэхэм къикӀауэ цӀыху куэд къыщызэхуэсым, Хьисэ щӀагъыбзэ зыщӀэлъ хъыбар къригъэжьащ:

⁵ – Жыласэм жылэ трисэну дэкӀащ. Здытрисэм, жылэм щыщ гъуэгум телъэлъащ. ЦӀыхухэм ар щӀым хаутэри, къуалэбзухэм зэщӀащыпащ.

⁶ Жылэм щыщ щӀы мывалъэми хэхуащ икӀи къуэпс идзащ, ауэ псы зэримыгъуэтым къыхэкӀкӀэ гъужащ.

⁷ Жылэм щыщ банэми хэхуащ икӀи къэкӀащ, ауэ банэм абы и къуэпсым зригъэужьакъым.

⁸ Жылэм щыщ щӀыфӀми хэхуащ, къэкӀащ икӀи трисар щэкӀэ бэгъуауэ къытрихыжащ. Ар жиӀа нэужь, Хьисэ макъ лъагэкӀэ къыпищащ: – ТхьэкӀумэ зиӀэм жысӀэр зэхрырех.

ЩӀагъыбзэм и мыхьэнэр

⁹ А щӀагъыбзэм къикӀыр къагуригъэӀуэну къелъэӀуащ и гъэсэнхэр Хьисэ.

¹⁰ – Тхьэм и Тепщэныгъэм и щэхухэр фщӀэну хуит фищӀащ фэ Тхьэм, – жиӀащ Хьисэ. – Ауэ адрей цӀыхухэм щӀагъыбзэущ ар зэрызэхахынур икӀи «еплъ пэтми ялъагъунукъым, зэхах пэтми къагурыӀуэнукъым».

¹¹ ЩӀагъыбзэ зэхэфхам къикӀыр мыращ: Жылэр Тхьэм и псалъэращ.

¹² Гъуэгум техуа жылэр Тхьэм и псалъэр зэхэзых цӀыхухэрщ, ауэ иужькӀэ Ӏиблисыр абыхэм къахуокӀуэри, зэхаха псалъэр яфӀедыгъу, фӀэщхъуныгъэ ямыгъуэтын, къемылын щхьэкӀэ.

¹³ ЩӀы мывалъэм хэхуа жылэр Тхьэм и псалъэр зэхэзыхыу ар гуфӀэгъуэкӀэ зыщтэ цӀыхухэрщ. Ауэ я фӀэщхъуныгъэм лъабжьэ зэримыӀэм къыхэкӀкӀэ, апхуэдэ цӀыхухэм Тхьэр тэлайкӀэщ я фӀэщ зэрыхъур, я фӀэщхъуныгъэр зыгъэунэху гугъуехьхэр къалъыкъуэкӀа нэужь, Тхьэм и гъуэгум тощхьэрыукӀыж ахэр.

¹⁴ Банэм хэхуа жылэр Тхьэм и псалъэр зэхэзыххэрщ. Ауэ зэманыр и пӀэм иткъыми, апхуэдэ цӀыхухэр гъащӀэм пыщӀа гугъуехьхэм, мылъку къэлэжьыным, зыгъэтхъэжыным хущӀагъэхьэркъым. Ахэр зи къуэпсыр зымыдз къэкӀыгъэм хуэдэу къонэ.

¹⁵ ЩӀыфӀым хэхуа жылэр Тхьэм и псалъэр гу хьэлэлым, гу пцӀанэм щызыхъумэу икӀи къэмыдзыхэу гъавэ бэв къезыхьэлӀэж цӀыхухэрщ.

Нахуэ къэмыхъужын щэхуи бзыщӀыгъи щыӀэкъым

¹⁶ – Уэздыгъэ пигъанэу кумбыгъэкӀэ щӀиӀубэркъым зыми, е гъуэлъыпӀэ щӀагъым щӀигъэувэркъым, атӀэ уэздыгъэ тегъэувапӀэм трегъэувэ, къыщӀыхьэхэм яхуэнэхун папщӀэ.

¹⁷ Нахуэ къэмыхъужын щэхурэ къыщӀэмыщыжын, къамыщӀэжын бзыщӀыгъэрэ щыӀэкъым.

¹⁸ Аращи, фызэрыдаӀуэ щӀыкӀэм фыкӀэлъыплъ. Сыту жыпӀэмэ зиӀэ дэтхэнэми Тхьэм къыхущӀигъунущ, зимыӀэ дэтхэнэми иӀэу къыфӀэщӀри Тхьэм Ӏихыжынущ.

Хьисэ и анэмрэ и къуэшхэмрэ

¹⁹ И анэмрэ и къуэшхэмрэ Хьисэ деж къэкӀуащ. Ауэ бгъэдыхьэфыртэкъым, цӀыхур Ӏувти.

²⁰ Хьисэ хъыбар ирагъэщӀащ: – Уи анэмрэ уи къуэшхэмрэ укъалъагъуну къэкӀуауэ щӀыбым дэтщ, – жаӀэри.

²¹ – Тхьэм и псалъэр зэхэзыххэу ар зыгъэзащӀэхэращ Сэ си анэ, си къуэш хъужхэр, – итыжащ Абы жэуап.

Хьисэ борэныр зэригъэсабырыжар

²² Махуэ гуэрым Хьисэ, и гъэсэнхэр и гъусэу, кхъуафэжьейм итӀысхьэри, яжриӀащ: – Девгъажьи, дызэпрывгъэкӀ гуэлым. Арати, ежьахэщ.

²³ Кхъуафэжьейм ису здэкӀуэм, Ар щхьэукъуащ. Гуэлым борэн къыщыхъейри, кхъуафэжьейм псы къиуэу щӀидзащ. Я Ӏуэхур шынагъуэ хъуат.

²⁴ Апхуэдэу щыхъум, Абы и гъэсэнхэр къыбгъэдыхьэщ, къагъэушри, къыжраӀащ: – УщиякӀуэ, ущиякӀуэ, детхьэлэ! Хьисэ къэтэджри, борэнри толъкъунхэри игъэсабырыжащ, дунейри щым хъужащ.

²⁵ – Фи фӀэщхъуныгъэр дэнэ щыӀэ? – еупщӀащ Хьисэ абыхэм. – Жьыми псыми унафэ яхуэзыщӀу зыгъэӀурыщӀэ мыр хэт хъуну? – жаӀэурэ зэупщӀыжырт гъэсэнхэр, шынарэ ялъэгъуар яфӀэтелъыджэ хъуауэ.

Жин бзаджэхэм яӀыгъ цӀыху гуэр Хьисэ зэригъэхъужар

²⁶ Джэрэсин лъэпкъым я хэкум, Гэлилейм къыпэщылъым, нэсащ ахэр.

²⁷ Хьисэ кхъуафэжьейм къыщикӀым, жылэм щыщ лӀы гуэр, жин бзаджэхэм яӀыгъыу, къыхуэзащ. Куэд щӀауэ щыгъын щымыгъыу къикӀухьырт абы, и унэ исыжтэкъым, щыпсэур кхъэрат.

²⁸ Хьисэ къызэрилъагъуу, и лъакъуэм кӀийуэ зыщӀидзэри, макъышхуэкӀэ жиӀащ абы: – Я Нэхъ Лъагэм и Къуэ Хьисэ, сыт уи Ӏуэхуу къысхэлъыр? СынолъэӀу, гугъу сумыгъэхь!

²⁹ Абы апхуэдэу щӀыжиӀар Хьисэ абы хэс жин бзаджэр къыхэкӀыжыну унафэ хуищӀати, аращ. Жин бзаджэр а цӀыхум куэдрэ къыхыхьэурэ, гугъу иригъэхьырт. ГъущӀ кӀапсэкӀэ епхауэ яхъумэрт ар, арщхьэкӀэ кӀапсэр къызэпиудырти, жин бзаджэм ар къумым ихурт.

³⁰ – Уи цӀэр сыт? – еупщӀащ абы Хьисэ. – Дзэщ сэ си цӀэр, – къритыжащ абы жэуап. А лӀым жин бзаджэ куэд и пкъым хыхьауэ хэсти, арат абы апхуэдэу щӀыжиӀэр.

³¹ Жин бзаджэхэр Хьисэ хуабжьу къелъэӀуащ, кууупӀэ лъащӀэншэм имыгъэкӀуэну.

³² А щӀыпӀэм кхъуэ хъушэ щыхъуакӀуэрт, Ӏуащхьэм тету. Кхъуэхэм яхыхьэну хуит ищӀыну къелъэӀуащ ахэр Хьисэ. КъыщелъэӀум, Абы ахэр хуит ищӀащ.

³³ Жинхэр цӀыхум къыхэкӀыжри, кхъуэхэм яхыхьащ. Арати, хъушэр зэрехьэжьэщ, нэпкъым елъэри, псым итхьэлащ.

³⁴ Къэхъуар зылъэгъуа кхъуахъуэхэр щӀэпхъуэжри, къалэми жылэхэми щаӀуэтэжащ ялъэгъуар.

³⁵ Къэхъуам еплъыну цӀыхухэр къыдэкӀщ, Хьисэ деж къакӀуэри, жин бзаджэр къызыхэкӀыжа цӀыхур хуэпарэ и акъылыр зэтеувэжауэ, Хьисэ и лъакъуэм пэгъунэгъуу щысу кърихьэлӀащ икӀи хуабжьу шынахэщ.

³⁶ Къэхъуар зи нэгу щӀэкӀахэм Хьисэ а лӀым жин бзаджэхэр къызэрыхихужар яӀуэтэжащ.

³⁷ Джэрэсинхэр псори Хьисэ къелъэӀуащ я хэкур къибгынэну, сыту жыпӀэмэ псори хуабжьу шынат. Хьисэ кхъуафэжьейм итӀысхьэри ежьэжащ.

³⁸ Жин бзаджэ къызыхихужа лӀыр Хьисэ къелъэӀуащ: «Гъусэ сыщӀ», – жиӀэри. Ауэ лӀым мыпхуэдэу жриӀэри, Абы ар иутӀыпщыжащ:

³⁹ – Уи унэ кӀуэжи, Тхьэм къыпхуищӀа фӀыгъуэшхуэр уи лъэпкъэгъухэм яхуэӀуэтэж. ЛӀым къуажэм игъэзэжри, Хьисэ къыхуищӀар цӀыхухэм яхуиӀуэтэжащ.

Хьисэ ажалымрэ узымрэ зэрытекӀуар

⁴⁰ Хьисэ игъэзэжа нэужь, цӀыху куэд къыпежьащ, ахэр псори абы къыпэплъэрти.

⁴¹ ТхьэлъэӀупӀэ унэм щылажьэхэм я нэхъыщхьэ гуэр, Яхьир и цӀэу, Хьисэ деж къакӀуэщ, и лъакъуэм зыщӀидзэри, къелъэӀуащ и унэм хуеблэгъэну.

⁴² Абы ипхъу закъуэр, илъэс пщыкӀутӀым нэблэгъар, лӀэн гъунэгъу хъуауэ сымаджэ хьэлъэу хэлът. Арати, Хьисэ къелъэӀуам и гъусэу ежьащ, цӀыхубэр къытегуплӀэу.

⁴³ Илъэс пщыкӀутӀ хъуауэ лъы зыщӀэкӀ цӀыхубз гуэр абдеж щытт цӀыхухэм яхэту. И мылъкур дохутырхэм ятригъэкӀуэда пэтрэ, зыми яхуэгъэхъужатэкъым ар.

⁴⁴ А цӀыхубзыр Хьисэ и щӀыбагъымкӀэ къыщыбгъэдыхьэри, и щыгъын кӀапэм къеӀусащ, лъыр асыхьэтуи увыӀащ.

⁴⁵ – Хэт къызэӀусар? – щӀэупщӀащ Хьисэ. Зыми зыщимыумысыжым, Питрэс жиӀащ: – УщиякӀуэ, цӀыху цӀыкӀур къопщӀауэ, лъэныкъуиплӀымкӀи къыщыптогуплӀэ.

⁴⁶ – Хьэуэ, сэ зыгуэр къызэӀусащ, – жиӀащ Хьисэ. – Сыту жыпӀэмэ къару зэрысщӀэкӀар зыхэсщӀащ.

⁴⁷ ЦӀыхубзым зибзыщӀыну Ӏэмал зэримыӀэжыр щилъагъум, кӀэзызу къыкъуэкӀщ, Хьисэ и лъабжьэм зыщӀидзэри, еӀусэн хуей щӀэхъуари асыхьэтым зэрыхъужари цӀыху псоми я пащхьэм щиӀуэтэжащ.

⁴⁸ – Ди шыпхъу, уи фӀэщхъуныгъэм уигъэхъужащ. Тхьэм гупсэхугъуэ къуит, кӀуэ иджы.

⁴⁹ Хьисэ и псалъэр нигъэсатэкъым, Яхьир и унэм щыхьэкӀуэ къикӀыу мыпхуэдэу къыщыжриӀам: – Яхьир, уи пхъур щыӀэжкъым. Дин ущиякӀуэр лейуэ гугъу йоумыгъэхь.

⁵⁰ Ар щызэхихым, Хьисэ Яхьир жриӀащ: – Умышынэ. Уи фӀэщ щӀы закъуи, къелынущ уи пхъур.

⁵¹ Хьисэ Яхьир и унэм щынэсым, Питрэс, Яхья, Екъуб икӀи хъыджэбз цӀыкӀу лӀам и адэмрэ и анэмрэ нэмыщӀ, унэм нэгъуэщӀ щӀыхьэну хуит ищӀакъым.

⁵² ЦӀыху псоми пыхьэрэ гъуэгыу хьэдагъэ ящӀырт. Хьисэ абыхэм яжриӀащ: – Фымыгъей. Мыр лӀакъым, жейуэ аращ!

⁵³ ЦӀыхухэр Хьисэ къыщыдыхьэшхащ, хъыджэбз цӀыкӀур зэрылӀар ящӀэрти.

⁵⁴ Хьисэ абы и Ӏэр иубыдри мыпхуэдэу жиӀащ: – Пщащэ цӀыкӀу, къэтэдж!

⁵⁵ Хъыджэбз цӀыкӀум и псэр къыхыхьэжри, асыхьэтым къызэфӀэуващ. Ар ягъэшхэну унафэ ищӀащ Хьисэ.

⁵⁶ Пщащэ цӀыкӀум и адэмрэ и анэмрэ телъыджащэ ящыхъуат ялъэгъуар, ауэ Хьисэ абыхэм унафэ яхуищӀащ къэхъуар зыми хуамыӀуэтэжыну.