Лукас 3 - ФӀыцӀагъэ ЛъапӀэ

Яхья и ущиехэр

¹ Къайсэр Тиберий и тетыгъуэм и епщыкӀутхуанэ илъэсым Понтий Пилат Ехьудейм и унафэщӀу щытащ. Хьирэд Гэлилей хэкум и лӀыщхьэт; Хьирэд и къуэш ФылыпӀ Итурей, Трэхъуэнит хэкухэм я тетт; Лисанэ Абилиней хэкум щытепщэт;

² Хьэнэнрэ Къаифэсрэ дин гъуазэ нэхъыщхьэ дыдэт. Зэчрей и къуэ Яхья, къумым щыпсэум, Тхьэм и псалъэ къыхуехащ абы щыгъуэ.

³ Яхья Иордан псым и Ӏэшэлъашэхэр къызэхикӀухьурэ, цӀыхухэм я гуэныхьыр Тхьэм къахуигъэгъун папщӀэ, тобэ къахьыжу зрагъэумэхъын зэрыхуейр яжриӀэрт.

⁴ А Ӏуэхум теухуауэ Ишаяхь бегъымбарым и тхылъым мыпхуэдэу итщ: «Къумым джэ макъ къыщоӀу: Зиусхьэным и гъуэгур хуэвгъэхьэзыр, и лъагъуэхэр захуэ хуэфщӀ.

⁵ Дэтхэнэ къуэладжэри тафэ хъунущ, дэтхэнэ бгыри Ӏуащхьэри лъахъшэ хъунущ. Гъуэгу нэшэкъашэхэр занщӀэ хъунущ, гъуэгу кумблӀэмбхэр джафэ хъунущ.

⁶ Тхьэм и цӀыхухэр къызэрыригъэлыр псоми ялъагъунущ абы щыгъуэ».

⁷ Зрагъэумэхъыну къакӀуэ цӀыхубэм мыпхуэдэу яжриӀэрт Яхья: – Уий, блэщылъхухэ! Тхьэм и губжь къэкӀуэнум фыӀэщӀэкӀыфыну фи фӀэщ зыщӀар хэт?

⁸ Тобэ къэфхьыжар пэжмэ, фи тобэм хуэфащэ Ӏуэху влэжь. Ауэ фигукӀэ жывмыӀэ «Ибрэхьимщ ди адэр». НывжызоӀэ, мы мывэхэм Ибрэхьим бын къыхухигъэхъукӀын лъэкӀынущ Тхьэм.

⁹ Джыдэр жыгым тешэщӀа хьэзырщ. ПхъэщхьэмыщхьэфӀ къызыпымыкӀэ дэтхэнэ жыгри къраупщӀыкӀынурэ мафӀэм хадзэнущ.

¹⁰ – АтӀэ сыт дэ тщӀэн хуейр? – къеупщӀащ цӀыхухэр Яхья.

¹¹ – ДжанитӀ зиӀэм зыри зимыӀэм ирырет, ерыскъы зиӀэр зимыӀэм дрегуашэ! – жиӀащ Яхья.

¹² Тезыр ахъшэ къыхэзыххэри зрагъэумэхъыну къакӀуэри, Яхья къеупщӀащ: – УщиякӀуэ, дэ сыт тщӀэн хуейр?

¹³ – Къыхэфхын хуей ахъшэм нэхъыбэ къыхэвмых, – жиӀащ Яхья.

¹⁴ – Дэ сыт тщӀэн хуейр? – къеупщӀащ зауэлӀхэр. – Ахъшэ зыми залымыгъэкӀэ къытевмых, пцӀы зыми тевмылъхьэ, фи улахуэмкӀэ арэзыуэ фыщыт.

¹⁵ – Яхья мы-Мэсихьу пӀэрэ? – жаӀэурэ ягукӀэ зэупщӀыжырт Мэсихьыр къыщыкӀуэнум пэплъэ цӀыхухэр.

¹⁶ – Сэ псыкӀэ фызоумэхъ, – яжриӀащ къедаӀуэхэм Яхья. – Ауэ сэ нэхърэ ӀэджэкӀэ нэхъ лъэщ си ужьым итщ. Абы и вакъэ лъэпсыр хуэстӀэтэну сэ схуэфащэкъым. Абы мафӀэкӀэ икӀи Тхьэм и ПсэмкӀэ фиумэхъынущ.

¹⁷ И хьэмыр иригъэкъэбзэн папщӀэ, Абы хьэнцэ ӀэщӀэлъщ, и гуэдзыр гуэным щигъэтӀылъынущ, хьэуазэр мыужьых мафӀэкӀэ игъэсынущ.

¹⁸ НэгъуэщӀ куэдкӀи иущийурэ, Тхьэм и хъыбарыфӀыр цӀыхухэм яхуиӀуатэрт Яхья.

¹⁹ ЛӀыщхьэ Хьирэд и къуэшыр псэууэ абы и фыз Хьирэдидэ къызэришэжам икӀи лейуэ зэрихьам щхьэкӀэ Яхья ар игъэкъуаншэрт.

²⁰ Лейуэ зэрихьа псом и щӀыӀужкӀэ Хьирэд Яхья лъэхъуэщым щӀригъэдзащ.

Яхья Хьисэ зэриумэхъар

²¹ Яхья цӀыхухэр щиумэхъым, Хьиси абы зригъэумэхъащ. Хьисэ тхьэ зделъэӀум, уафэр зэкӀэщӀэкӀри,

²² тхьэрыкъуэм и пкъым и теплъэ иӀэу Тхьэм и Псэр къыхуехащ. Уафэм макъ къиӀукӀащ: «Уэращ фӀыуэ слъагъу си Къуэр, си гур хэзыгъахъуэр».

Хьисэ и адэжьхэр

²³ Илъэс щэщӀым итми арат Хьисэ Тхьэм къыщӀигъэкӀуа Ӏуэхугъуэр илэжьын щиублам. ЦӀыхухэм ялъытэрт Хьисэ Исуф, Елий,

²⁴ Мэтфат, Лэуий, Мэлхъий, Ений, Исуф,

²⁵ Мэтаф, Ӏэмэс, Нэум, Хьесли, Нэгей,

²⁶ МэӀэт, Мэтаф, Шэмей, Есихь, Ехьудэ,

²⁷ Иухьэнан, Ресэ, Зурабэбыл, ШэлъфэӀил, Нер,

²⁸ Мелхий, Ӏэдий, Куэсэм, Елмэдим, Ӏэир,

²⁹ Ехъущ, ЕлиӀэзэр, Ӏэюрым, Мэтфат, Лэуий,

³⁰ Шемэн, Ехьудэ, Исуф, Ӏэюнэм, Елэкъим,

³¹ Мэлий, Менэ, Мэтафэ, Нэтэн, Даут,

³² Исий, Ӏубэд, БоӀэз, Сэлмэний, Нэхъшун,

³³ Ӏэминэдэб, Рам, Хъэцрэн, Пэрэз, Ехьудэ,

³⁴ Екъуб, Исхьэкъ, Ибрэхьим, Терахъ, Нэхъур,

³⁵ Сэрыху, РэӀуу, Пэлэдж, Ебыр, Щэлихь,

³⁶ Къенан, Арпэхшад, Шем, Нухь, Ламэхь,

³⁷ Мэфущэлихь, Хъэнох, Ерэд, Мэхьэлэлил, Къенан,

³⁸ Енус, Сеф, Ӏэдэм сымэ къатехъукӀауэ. Езы Ӏэдэм Тхьэм ейт.