Лукас 21 - ФӀыцӀагъэ ЛъапӀэ

Фызабэм и жумартыгъэр

¹ Хьисэ плъэри, Тхьэм и Унэр зыдэт пщӀантӀэм щаӀыгъ ахъшалъэм къулеижь гуэрхэм ахъшэ ирадзэу къилъэгъуащ.

² ЩакӀэлъыплъым, гу лъитащ фызабэ тхьэмыщкӀэ гуэрми гъуаплъэ ахъшэ жьгъеитӀ ахъшалъэм зэрыридзэм.

³ – Пэжыр нывжызоӀэ, – жиӀащ Хьисэ, – мы фызабэ тхьэмыщкӀэм псоми нэхърэ нэхъыбэ иридзащ;

⁴ сыту жыпӀэмэ мы къулеижьхэм къадэхуэм щыщщ Тхьэм тыгъэ хуащӀыр, ауэ мы фызабэм иӀэу хъуар иридзащ ахъшалъэм, къулейсыз пэтрэ.

Тхьэм и Унэм къыщыщӀынур Хьисэ къызэрыжиӀар

⁵ Тхьэм и Унэр мывэ дахэкӀэ, цӀыхухэм къахьа тыгъэхэмкӀэ гъэщӀэрэщӀауэ зэрыщытым цӀыхухэр зэрытепсэлъыхьыр щызэхихым, Хьисэ мыпхуэдэу жиӀащ:

⁶ – Мы флъагъум щыщу мывитӀ къызэтрамынэу щызэтракъутэну махуэхэр къэсынущ.

⁷ – УщиякӀуэ, а зи гугъу пщӀы зэманыр къыщысынур дапщэщ? Дауэ ар къызэрысар къызэрытщӀэнур? Сыт хуэдэ нэщэнэ къыдэкӀуэнур? – упщӀэ къратащ Хьисэ.

⁸ – Фысакъ, зыми зыкъевмыгъэгъапцӀэ, – жиӀащ Хьисэ. – Сыту жыпӀэмэ си цӀэр зыфӀащурэ куэд къыфхуэкӀуэнущ, «Мэсихьыр сэращ!», «Зэманыр къэсащ» жаӀэурэ. Абыхэм я ужь фимыувэ.

⁹ Зауэхэм, зэрыхьзэрийхэм я хъыбар зэхэфхмэ, фымышынэ. А тхьэмыщкӀагъэхэр къэхъун хуейщ япэщӀыкӀэ, ауэ абы щыгъуэкъым дунейм и къэкъутэжыгъуэр.

¹⁰ Зы лъэпкъыр нэгъуэщӀ лъэпкъым езэуэну къызэщӀэтэджэнущ, зы къэралыр нэгъуэщӀ къэралым езэуэну зыкъаӀэтынущ.

¹¹ ЩӀыпӀэ-щӀыпӀэкӀэрэ щӀыр ину щыхъеинущ, уз зэрыцӀалэхэм зыщаубгъунущ, гъаблэ къыщыхъунущ. Уафэм нэщэнэ инхэр къыщылъэгъуэнущ, къэхъукъащӀэ шынагъуэхэр къэхъунущ.

¹² Ауэ а Ӏуэхугъуэхэр къэхъуным и пэ къихуэу, цӀыхухэм фаубыдурэ гугъу фрагъэхьынущ си Ӏумэтым фызэритым щхьэкӀэ. ТхьэлъэӀупӀэ унэхэм хьэкум къыщыфтращӀыхьынущ, лъэхъуэщхэм фыщӀадзэнущ, пащтыхьхэм, унафэщӀхэм я пащхьэм фрашэнущ.

¹³ Мис абы щыгъуэ щыхьэт фыкъыстехъуэну Ӏэмал вгъуэтынущ.

¹⁴ Ауэ апхуэдэу къытщыщӀынущ жыфӀэу, зэрызывгъэхеину Ӏэмал къэвмыгупсыс. Ар фи гум быдэу ивубыдэ.

¹⁵ Фи жагъуэгъухэр къывэмыныкъуэкъуфын, къыфпэрымыуэфын папщӀэ, Сэ губзыгъагъэ фхэслъхьэнущ, псалъэ Ӏущ фӀурыслъхьэнущ.

¹⁶ Фыкъэзылъхуа фи адэ-анэхэр, фи къуэшхэр, фи Ӏыхьлыхэр, фи ныбжьэгъухэр къывэпцӀыжынурэ, тепщэхэм фыӀэщӀагъэхьэнущ икӀи языныкъуэхэр а тепщэхэм фаукӀынущ.

¹⁷ Си цӀэр зэрывгъэлъапӀэм щхьэкӀэ псори къыфтеплъэ мыхъуу щытынущ.

¹⁸ Ауэ зы налъэ фи щхьэцым хэкӀуэдыкӀынукъым.

¹⁹ ШыӀэныгъэ зизыгъэӀэм и псэр къригъэлынущ.

Хьисэ Ерусэлим къыщыщӀынур къызэрыжиӀар

²⁰ – Ерусэлим дзэхэм къаухъуреихьауэ флъагъумэ, абы лъапсэрыхыр къыщыхуэкӀуэну зэманыр къызэрыблэгъар зэвгъащӀэ.

²¹ Ехьудей хэкум ис цӀыхухэм бгы щӀыпӀэхэм зыщрагъэпщкӀу абы щыгъуэ, Ерусэлим дэсхэр къалэм дрекӀ, губгъуэм итхэр къалэм дремыхьэ.

²² Сыт щхьэкӀэ жыпӀэмэ Тхьэм мы лъэпкъым хуэфащэр ирищӀэнущ а махуэхэм, Тхыгъэ ЛъапӀэм ит псори къэхъун щхьэкӀэ.

²³ Фыз лъэщыджэхэми сабий быдзафэ зиӀэхэми я дунейр мыгъуэ хъунущ а махуэхэм. Мы щӀыпӀэм ис цӀыхухэм тхьэмыщкӀагъэшхуэ къатепсыхэнущ икӀи Тхьэм и ней къащыхуэнущ.

²⁴ Языныкъуэхэр джатэкӀэ яукӀынущ, адрейхэр мажусий къэралхэм гъэру яхунущ. Ерусэлим и уэрамхэр мажусийхэм яутэу щытынущ, я пӀалъэр икӀыху.

Хьисэ къызэригъэзэжыным зэрытепсэлъыхьар

²⁵ – Дунейм тет лъэпкъхэр тенджызым и толъкъун ябгэ къэукъубияхэм я макъ шынагъуэхэм икӀи дыгъэм, мазэм, вагъуэхэм къыщылъэгъуэну нэщэнэхэм ягъэгужьеярэ ящӀэнур ямыщӀэу къагъэнэнущ.

²⁶ Дунейм къыщхьэщыхьэну тхьэмыщкӀагъэм пэплъэ цӀыхухэм шынэ къащтарэ пӀейтеигъэм игъэмэхыу щытынущ, уафэм щыӀэ къарухэр зэщӀэсысэнущи.

²⁷ ЦӀыхум и Къуэм и къарур бгъэдэлърэ и щӀыхьыр Ӏэтауэ пшэм хэту къакӀуэу ялъагъунущ абы щыгъуэ.

²⁸ Аращи, а Ӏуэхугъуэхэр къэхъуу флъагъумэ, фи гур къызэрывгъэгъуэтыжи, фи щхьэр фӀэт, Тхьэм щхьэхуит фыщищӀыжыну зэманыр къэблэгъащи.

²⁹ ЩӀагъыбзэ къригъэжьащ Хьисэ итӀанэ: – Хъурмейм феплъ, адрей жыгхэми феплъ.

³⁰ Жыгыр къэтӀэпӀу щыфлъагъум деж гъэмахуэр къызэрыблэгъар зыми къывжимыӀэуи фощӀэ.

³¹ Абы ещхьу, зи гугъу фхуэсщӀа Ӏуэхугъуэхэр къэхъуу флъагъумэ, Тхьэм и Тепщэныгъэр къызэрыблэгъар зэвгъащӀэ.

³² Пэжыр нывжызоӀэ, мы щӀэблэр кӀуэдыжынукъым, а псори къэмыхъуауэ.

³³ Уафэмрэ щӀылъэмрэ кӀуэдыжынущ, ауэ си псалъэр кӀуэдыжынукъым.

Мы дунейм епха Ӏуэхугъуэхэм фи псэр евмыгъэтхьэкъу

³⁴ – Ефэ-ешхэным, фадэм, мы дунейм епха Ӏуэхугъуэхэм фи псэр евмыгъэтхьэкъу, а махуэр уащхъуэдэмыщхъуэу къыфтемыпсыхэн щхьэкӀэ.

³⁵ Сыту жыпӀэмэ а махуэр дунейм тету хъуам къапхъэн яхуэхъунущ.

³⁶ Фи гумрэ фи псэмрэ жеипӀэ евмыт, сыт щыгъуи тхьэ фелъэӀу, а къэхъуну псоми фыкъызэрелын икӀи ЦӀыхум и Къуэм и пащхьэм фызэрихьэфын къару фиӀэн щхьэкӀэ.

³⁷ Хьисэ Тхьэм и Унэм цӀыхухэр щиущийрт махуэкӀэ, ауэ пщыхьэщхьэ зэрыхъуу къалэм дэкӀырти, Зейтун Ӏуащхьэм жэщыр щигъакӀуэрт.

³⁸ ЦӀыхубэр жьыуэ къызэщӀэтаджэрти, Тхьэм и Унэм къекӀуалӀэрт, Хьисэ жиӀэм едэӀуэн папщӀэ.