Лукас 20 - ФӀыцӀагъэ ЛъапӀэ

Лъэпкъ тхьэмадэхэр Хьисэ къызэреупщӀар

¹ Махуэ гуэрым, Хьисэ Тхьэм и Унэм цӀыхухэр щиущийрэ, Тхьэм и хъыбарыфӀыр иӀуатэу здэщытым, дин гъуазэ нэхъыщхьэхэр, теурэт егъэджакӀуэхэр, лъэпкъ тхьэмадэхэр къыбгъэдыхьэри, къеупщӀащ:

² – ПщӀэ псори пщӀэну тепщэныгъэ къозытар къыджеӀэт. Хэт хуит узыщӀар?

³ – Сэри зы упщӀэ фэстынущи, жэуап къызэфт, – жиӀащ Хьисэ. –

⁴ ЦӀыхухэр иумэхъыну Яхья къэзыгъэкӀуар хэт? Тхьэра хьэмэрэ цӀыхухэра?

⁵ – «Тхьэращ къэзыгъэкӀуар» жытӀэмэ, «атӀэ Яхья жиӀар щхьэ фи фӀэщ фымыщӀарэ?» къыджиӀэнущ, – жаӀащ абыхэм, зэчэнджэщри. –

⁶ «ЦӀыхухэращ къэзыгъэкӀуар» жытӀэмэ, цӀыхубэр мывэкӀэ къыдэуэурэ даукӀынущ, Яхья бегъымбару ялъытэри. –

⁷ Арати, Яхья къэзыгъэкӀуар ямыщӀэу жаӀащ абыхэм.

⁸ – Абы щыгъуэ Сэри вжесӀэнукъым сщӀэр сщӀэну хуит сызыщӀар хэтми, – жиӀащ Хьисэ.

ЖызумгъэкӀ бзаджэхэм теухуа щӀагъыбзэ

⁹ Хьисэ цӀыхухэм щӀагъыбзэ яжриӀащ итӀанэ: – ЛӀы гуэрым жызум хадэ игъэтӀысри, жызумгъэкӀхэм пӀалъэкӀэ яритащ. Яритри, езыр зыкъомрэ къэтыну ежьащ.

¹⁰ Жызумыр къыщыпачыж зэманыр къыщысым, и жызум Ӏыхьэр къригъэхьыну и унэӀутхэм ящыщ зы жызумгъэкӀхэм деж игъэкӀуащ. Абыхэм унэӀутыр яубэрэжьри, ӀэнэщӀу къаутӀыпщыжащ.

¹¹ Апхуэдэу къыщращӀэм, зы унэӀут игъэкӀуащ аргуэру. АрщхьэкӀэ ари къаубэрэжьщ, лей кърахри, ӀэнэщӀу къаутӀыпщыжащ.

¹² Ещанэуи зы унэӀут игъэкӀуащ, ауэ ари къауӀэри, хадэм кърадзыжащ.

¹³ Апхуэдэу щыхъум, жызум хадэр зейм мыпхуэдэу жиӀащ: «Сыт сщӀэн? ФӀыуэ слъагъу си къуэр згъэкӀуэнщ, хэт ищӀэрэ, абы пщӀэ къыхуащӀынкӀэ мэхъу».

¹⁴ АрщхьэкӀэ жызумгъэкӀхэм хадэр зейм и къуэр щалъагъум, зэчэнджэщри жаӀащ: «Жызум хадэр зейм и мылъку псори къызыхуэнэнур мыращи, ар дывгъэукӀи, мылъкур дыдей хъунущ».

¹⁵ Арати, щӀалэр хадэм кърадзыжри яукӀащ. – Жызум хадэр зейм сыт абыхэм ярищӀэнур? – щӀэупщӀащ Хьисэ. –

¹⁶ ЯрищӀэнуращ: къигъэзэжынурэ, жызумгъэкӀхэр зэтриукӀэнущ, жызум хадэр нэгъуэщӀхэм яритынущ. – Тхьэм къимыгъэхъукӀэ апхуэдэ! – жаӀащ цӀыхухэм, ар щызэхахым.

¹⁷ Хьисэ абыхэм яхэплъэри, къыпищащ: – Тхыгъэ ЛъапӀэм ит мы псалъэхэм къикӀыр сыт: «УхуакӀуэхэм зрамыпэсу хыфӀадзэжа мывэр унэ лъабжьэм и къуапэр зэрагъэбыдэ мывэ нэхъыщхьэ хъуащ»?

¹⁸ А мывэм теджалэ дэтхэнэри зэгуиудынущ, езы мывэр зытехуэ дэтхэнэри щӀипӀытӀэнущ.

¹⁹ А щӀагъыбзэр теурэт егъэджакӀуэхэмрэ дин гъуазэ нэхъыщхьэхэмрэ яхуэгъэзауэ зэрыщытыр къащыгурыӀуэм, Хьисэ абдеж дыдэм щаубыдыну хэтащ ахэр, ауэ цӀыхубэм ящышынэрти, и гугъу ящӀын тегушхуакъым.

Тезыр ахъшэм теухуауэ

²⁰ Арати, теурэт егъэджакӀуэхэмрэ дин гъуазэ нэхъыщхьэхэмрэ Хьисэ кӀэлъыплъу щӀадзащ. Абы къищынэмыщӀауэ, щыпкъафэ зэтрагъэуауэ цӀыху зыбжанэ кӀэщӀаутӀыпщхьащ, Хьисэ зэрагъэкъуэншэн псалъэ гуэркӀэ къаубыду, Римым къигъэкӀуа унафэщӀым ирырагъэубыдын я гугъэу.

²¹ Ахэр Хьисэ къеупщӀащ: – УщиякӀуэ, уи псалъэхэр зэрыпэжри, цӀыхухэр пэжыгъэм тету зэрыбущийри, зэхэгъэж зэрумыщӀри, Тхьэм и гъуэгур цӀыхухэм пэжу зэребгъащӀэри дощӀэ.

²² АтӀэ, дэ къайсэрым тезыр ахъшэ етт хъунрэ мыхъунрэ къыджеӀэт.

²³ Хьисэ абыхэм я бзаджагъэм гу щылъитэм, мыпхуэдэу яжриӀащ:

²⁴ – Зы динар сывгъэлъагъут. Хэт и сурэт абы тедзар? Хэт и цӀэ абы тетыр? – Къайсэрым и сурэтырщ, – жаӀащ абыхэм.

²⁵ – АтӀэ апхуэдэу щыщыткӀэ, къайсэрым ефтын хуейр къайсэрым ефт, Тхьэм ефтын хуейр Тхьэм ефт, – жиӀащ Хьисэ.

²⁶ Арати, цӀыхухэм ялъагъуу къахуэубыдакъым Хьисэ абыхэм, уеблэмэ и жэуапыр яфӀэтелъыджэ хъуауэ сабырыжащ.

ЛӀахэр къызэрытэджыжынур Хьисэ къызэрыжиӀар

²⁷ ЛӀахэр къызэрытэджыжынур зи фӀэщ мыхъу садукейхэм ящыщ зыбжанэ Хьисэ къыбгъэдыхьэри къеупщӀащ:

²⁸ – УщиякӀуэ, Мусэ и Теурэтым итщ зыгуэрым и къуэшыр дунейм ехыжрэ и фызыр быныншэ фызабэу къанэмэ, лӀар щӀэблэншэ мыхъун щхьэкӀэ, лӀам и къуэшым фызабэр къишэжын хуейуэ.

²⁹ Зэшибл псэурт. Нэхъыжьым фыз къишэри, сабий имыгъуэтауэ, дунейм ехыжащ.

³⁰ Абы и ужькӀэ етӀуанэм и фызащ а цӀыхубзыр,

³¹ итӀанэ ещанэми и фызащ. Апхуэдэу зэшиблми я фызу щытащ ар, ауэ зэшиблри лӀэжащ, сабий къащӀэмынэу.

³² Заул дэкӀри, езы фызри дунейм ехыжащ.

³³ АтӀэ зэшиблми я фызу щыта цӀыхубзыр хэт зылъысынур лӀахэр къыщытэджыжкӀэ?

³⁴ – Мы дунейм тет цӀыхухэм зэрышэ я хабзэщ, – жиӀащ Хьисэ. –

³⁵ Ауэ лӀахэм къахэтэджыкӀыжу, къэкӀуэну дунейм щыпсэуну зыхуагъэфэщэнухэр дэкӀуэу, фыз къашэу щытынукъым.

³⁶ ИкӀи зэи лӀэжынукъым, атӀэ мелыӀычхэм хуэдэу щытынущ. Ахэр Тхьэм и бынщ, Тхьэм лӀахэм къахигъэтэджыкӀыжащи.

³⁷ Ауэ лӀахэр къызэрытэджыжынур фщӀэну фыхуеймэ, а Ӏуэхум и пэжыпӀэр пыжьей чыцэм теухуа хъыбарым, Теурэтым итым, Мусэ нахуэу къыщегъэлъагъуэ. Мусэ Зиусхьэным абдежым зэреджэр Ибрэхьим, Исхьэкъ, Екъуб сымэ я Тхьэущ.

³⁸ Тхьэр лӀахэр аркъым зи Тхьэр, атӀэ псэухэрщ, Тхьэм дежкӀэ псори псэущ.

³⁹ Хьисэ ар щыжиӀэм, теурэт егъэджакӀуэ языныкъуэхэм мыпхуэдэу жаӀащ: – Дэгъуэу жыпӀащ, ущиякӀуэ.

⁴⁰ Арати, тегушхуэу, Хьисэ нэгъуэщӀ гуэркӀэ еупщӀын къахэкӀакъым абыхэм афӀэкӀ.

Мэсихьыр зи къуэр хэт?

⁴¹ Хьисэ аргуэру абыхэм еупщӀащ: – Мэсихьыр Даут и къуэу цӀыхухэм щхьэ жаӀэрэ?

^42-43 Езы Даут Забурым и напэкӀуэцӀхэм мыпхуэдэу къыщыжеӀэ а Ӏуэхум теухуауэ: «Зиусхьэным си Зиусхьэным къыжриӀащ: Уи бийхэр лъэгущӀэтын пхуэсщӀыху, си ижьырабгъумкӀэ къыщыс».

⁴⁴ Аращи, езы Даут Мэсихьым ЗиусхьэнкӀэ йоджэ. Апхуэдэу щыщыткӀэ, Мэсихьыр Даут и къуэу дауэ зэрубжынур?

ФэрыщӀагъэм зыщыфхъумэ

⁴⁵ ЦӀыхубэр къедаӀуэу здэщытым, Хьисэ и гъэсэнхэм мыпхуэдэу яжриӀащ:

⁴⁶ – Щыгъын кӀыхь зыщыгъыу къэзыкӀухьын зыфӀэфӀхэу, цӀыху зэхуэсыпӀэхэм деж сэлам къыщрахкӀэ зи гур зыгъэфӀ теурэт егъэджакӀуэхэм фахуэсакъ. Абыхэм тхьэлъэӀупӀэ унэхэми Ӏэнэ къыщаӀэт щӀыпӀэхэми тхьэмадэ тӀысыпӀэр щаубыдыну яфӀэфӀщ.

⁴⁷ Фызабэхэм я мылъкур фӀашх абыхэм, ауэ тхьэ щелъэӀукӀэ, цӀыхухэм зыкърагъэлъагъун щхьэкӀэ, я лъэӀур кӀыхьу яукъуэдий я хабзэщ. Апхуэдэхэм тезыр ткӀий къапоплъэ.