Лукас 12 - ФӀыцӀагъэ ЛъапӀэ

ФэрыщӀагъэм зыщыфхъумэ

¹ ЦӀыхубэр мин бжыгъэкӀэ къызэхуэсауэ зэжьэхэуэ-зэрыпӀытӀ щыхъум, Хьисэ и гъэсэнхэм мыпхуэдэу яжриӀащ япэщӀыкӀэ: – Тхьэвым пщагъэ зэрыхэлъым хуэдэу, фарисейхэм фэрыщӀагъэр яхэлъщи, абы зыщыфхъумэ.

² Нахуэ къэмыхъужын щэхурэ къыщӀэмыщыжын бзыщӀыгъэрэ щыӀэкъым.

³ КӀыфӀу жыфӀа псалъэр цӀыхухэм нэхуу зэхахыжынущ, пэшым щэхуу щыжыфӀар унащхьэм тету къаӀуэтэжынущ.

ЦӀыхухэм фащымышынэу, Тхьэм фыщышыни, нэхъыфӀщ

⁴ – Си ныбжьэгъухэм нывжызоӀэ, фаукӀын нэхъыбэ нэгъуэщӀ зыри къывэзымыщӀэфынухэм фащымышынэ.

⁵ Сэ вжесӀэнщ фызыщышынэн хуейр: фиукӀа нэужь, жыхьэнмэм фыхидзэну къару зиӀэр арщ фызыщышынэн хуейр. Мис Абы фыщышынэ.

⁶ Бзу цӀыкӀуитхур ахъшэ жьгъеитӀ къудейщ зэращэр. Апхуэдэу щыт пэтми, абыхэм языхэзи зыщигъэгъупщэркъым Тхьэм.

⁷ Фэ фи щхьэц налъэ нэгъунэ Тхьэм ибжауэ щытщ. Фымышынэ! Бзу Ӏэджэ нэхърэ фынэхъ лъапӀэщ фэ.

Хьисэ зылъытэр Тхьэм илъытэнущ

⁸ – НывжызоӀэ, си Ӏумэтым зэритыр цӀыхухэм щимыбзыщӀу къыжызыӀэ дэтхэнэри Тхьэм и мелыӀычхэм я пащхьэм щилъытэжынущ ЦӀыхум и Къуэм.

⁹ Ауэ цӀыхухэм я пащхьэ иувэрэ къысхуэмейуэ, симыдэу къыжызыӀэм Сэри сызэрыхуэмейр, зэрызмыдар Тхьэм и мелыӀычхэм я пащхьэ къыщыжысӀэнущ.

¹⁰ ЦӀыхум и Къуэм щхьэкӀэ псалъэ мыхъумыщӀэ жызыӀэм Тхьэм къыхуигъэгъунущ. Ауэ Тхьэм и Псэм мыхъумыщӀэ хужызыӀэм Тхьэм къыхуигъэгъунукъым.

¹¹ ТхьэлъэӀупӀэ унэм щызэхуэсахэм я пащхьэ фагъэкъуэншэну фыщрашэкӀи, унафэщӀхэм е лӀыщхьэхэм я пащхьэм фыщрагъэувэкӀи зызэрывгъэхеину щӀыкӀэм фемыгугъу,

¹² а дакъикъэм жыфӀэнур Тхьэм и Псэм фи гум кърилъхьэнущ.

Къулей акъылыншэм теухуауэ

¹³ ЦӀыхубэм здыхэтым, Хьисэ лӀы гуэр къелъэӀуащ: – УщиякӀуэ, си къуэшыр ди адэм къыщӀэнамкӀэ къыздэгуэшэну схужеӀэ, – жиӀэри.

¹⁴ – Апхуэдэ Ӏуэхухэр зэхэзгъэкӀыну хьэмэрэ щӀэингуэшу сыщытыну сэ зыми сигъэувакъым, – иритыжащ Хьисэ абы жэуап.

¹⁵ Хьисэ цӀыхухэм яжриӀащ итӀанэ: – Фысакъ! Щхьэхуещагъэм зыщыфхъумэ, сыту жыпӀэмэ цӀыхум сыт хуэдэ мылъку бгъэдэлъами, цӀыху гъащӀэр мылъку къудейкӀэ къапщытэркъым.

¹⁶ Ар жиӀэри, щӀагъыбзэ зыщӀэлъ хъыбар къригъэжьащ: – ЦӀыху къулей гуэрым и щӀым гъавэ бэв къытекӀат.

¹⁷ «СщӀэнур сыт? – жиӀащ абы игукӀэ. – Гъавэр здыщӀэслъхьэн сиӀэкъым».

¹⁸ ИтӀанэ жиӀащ: «Мыращ сщӀэнур: си гуэнхэр къезгъэгъэуэжынщи, нэхъ Ӏэхуитлъэхуиту щӀэрыщӀэу езгъэщӀынщ. Гъавэу къытесхар абы ирезгъэлъхьэнщ, си хъугъуэфӀыгъуэхэри абы щызгъэтӀылъынщ.

¹⁹ ИтӀанэ сигукӀэ жысӀэнщ: Илъэс ӀэджэкӀэ узрикъун хъугъуэфӀыгъуэ уиӀэщ. Зыгъэпсэху, ефэ, ешхэ, уи нэгу зегъэужь».

²⁰ Ауэ Тхьэм абы къыжриӀащ: «Акъылыншэ! Ныжэбэ уи псэр хезгъэхынущ. Хэт зылъысынур уэ зэхуэпхьэса мылъкур?»

²¹ Тхьэм и гур хэзыгъахъуэ ӀуэхухэмкӀэ къулей зимыщӀу, зи щхьэр къулей зыщӀыж дэтхэнэми аращ къыщыщӀынур, – къыщӀигъуащ Хьисэ.

Ерыскъым нэхърэ гъащӀэр нэхъапэщ

²² – Абы къыхэкӀкӀэ нывжызоӀэ, – яжриӀащ Хьисэ и гъэсэнхэм, – «Сыт тшхынур?» жыфӀэу фызэрыпсэуным фытемыгузэвыхь, е «Сыт щыттӀэгъэнур?» жыфӀэу фи Ӏэпкълъэпкъым щхьэкӀэ фымыгузавэ.

²³ Ерыскъым нэхърэ гъащӀэр нэхъапэкъэ, щыгъыным нэхърэ Ӏэпкълъэпкъыр нэхъапэкъэ?

²⁴ Феплъыт къуаргъхэм. Абыхэм жылэ трасэркъым, гъави Ӏуахыжыркъым, гуэни гъавэ гъэтӀылъыпӀи яӀэкъым, итӀани ахэр Тхьэм егъашхэ. АтӀэ фэ фынэхъ лъапӀэкъэ а къуалэбзухэм нэхърэ?

²⁵ А Ӏуэхухэм тегузэвыхь пэтми, хэт фэ фщыщу зы сыхьэткӀэ нэхъ мыхъуми зи гъащӀэм хэзыгъэхъуэн зылъэкӀынур?

²⁶ АтӀэ а мащӀэ тӀэкӀур щыфхузэфӀэмыкӀкӀэ, нэгъуэщӀым сыт фыщӀытегузэвыхьыр?

²⁷ Удз гъагъэхэм феплъыт: ахэр гугъу ехьыркъым, цыи яджыркъым. Ауэ нывжызоӀэ, апхуэдизу зызыгъэщӀэращӀэу щыта пащтыхь Сэлмэн а цӀыкӀухэм щыщ дэтхэнэри зэрыхуэпам хуэдэу зихуапэу щытакъым.

²⁸ АтӀэ нобэ гъагъэ пэтми, пщэдей хьэкум ирадзэну удзыр Тхьэм апхуэдизу щихуапэкӀэ, фэ абыхэм нэхърэ ӀэджэкӀэ нэхъыфӀу фихуэпэнукъэ, фӀэщхъуныгъэ зи мащӀэхэ?

²⁹ Фшхынымрэ фызэфэнымрэ щхьэкӀэ фымыгузавэ икӀи фемылӀалӀэ.

³⁰ Мажусийхэм аращ къызыкӀэлъажыхьыр. Фи Адэр фызыхуэныкъуэ псоми зэрыщыгъуазэр фигу ивгъэлъ.

³¹ Тхьэм и Тепщэныгъэр къэфлъыхъуи, адрей фызыхуэныкъуэ псори Тхьэм къывитынущ.

³² Фымышынэ, гуартэ мащӀэ. Фи Адэм и Тепщэныгъэр къывитыну хуейщ.

³³ Фи мылъкур фщэжи, къыщӀэкӀар къулейсызхэм яхуэвгуэш. Жьы мыхъун бохъшэ зыӀэрывгъэхьэ, зыхэмыщӀын мылъку уафэм щызэвгъэгъуэт, абы дыгъу дэкӀуеифынукъым, хъуным зыри щыхуэшхынукъым.

³⁴ Сыту жыпӀэмэ фи мылъкур здэщыӀэм фигури щыӀэнущ.

Мэсихь къыщигъэзэжкӀэ фызэрыхуэзэнымхуэхьэзыру фыщыт

³⁵ – Зи бгыр щӀэкъузарэ зи уэздыгъэр къаблэ цӀыхум хуэдэу фыпсэу.

³⁶ Зи тхьэмадэр хьэгъуэлӀыгъуэм къикӀыжыным пэплъэрэ, къэсыжа нэужь, бжэм къызэрытеуӀуэу къыщӀэзыгъэхьэжыну хьэзыр ӀуэхутхьэбзащӀэм хуэдэу фыщыт.

³⁷ Тхьэмадэм къигъэзэжа нэужь, мыжеяуэ зрихьэлӀэж ӀуэхутхьэбзащӀэр гъуэгу махуэ теуващ. Пэжыр нывжызоӀэ, тхьэмадэм и бгыр щӀипхэнурэ, ӀуэхутхьэбзащӀэхэр иригъэфэу-иригъашхэу езыр ящхьэщытынущ.

³⁸ Ар жэщ ныкъуэуи нэхущуи щрет, тхьэмадэр сыт хуэдэ зэманым къэкӀуэжми, мыжеяуэ зрихьэлӀэж ӀуэхутхьэбзащӀэхэр гъуэгу махуэ теуващ.

³⁹ Мыр зэвгъащӀэ: дыгъуакӀуэр къыщыкӀуэну сыхьэтыр унэр зейм ищӀатэмэ, ар абы унэм къыщӀигъэхьэнутэкъым.

⁴⁰ Фэри хуэхьэзыру фыщыт, сыту жыпӀэмэ фыщыпэмыплъэ сыхьэтым къигъэзэжынущ ЦӀыхум и Къуэм.

⁴¹ – Зи щӀыхьыр ин, – жиӀащ Питрэс, – къыжыпӀа щӀагъыбзэр зыхуэгъэзар уи гъэсэнхэм ди закъуэ, хьэмэрэ цӀыху псоми яхуэгъэзауэ щыт?

⁴² – Тхьэмадэм адрей ӀуэхутхьэбзащӀэхэр зи ӀэмыщӀэ ирилъхьэу игъуэу псори игъэшхэн хуейуэ дзыхь зыхуищӀа цӀыху пэжым, губзыгъэм хуэдэу фыщыт, – итыжащ жэуап Хьисэ.

⁴³ – Тхьэмадэм къыщигъэзэжкӀэ, унафэ ищӀам темыкӀауэ зрихьэлӀэж ӀуэхутхьэбзащӀэр гъуэгу махуэ теуващ.

⁴⁴ Пэжыр нывжызоӀэ, тхьэмадэм и мылъку псори а ӀуэхутхьэбзащӀэм дзыхь хуищӀынущ.

⁴⁵ Ауэ а ӀуэхутхьэбзащӀэм игукӀэ «Си тхьэмадэм щӀэх къигъэзэжынукъым» жиӀэрэ, цӀыхухъуи цӀыхубзи къимыгъанэу ӀуэхутхьэбзащӀэ псори иубэрэжьу, ефэ-ешхэу, фадэкӀэ иригъэлейуэ щытмэ,

⁴⁶ щыпэмыплъэ махуэм, щимыгугъэ сыхьэтым тхьэмадэм къигъэзэжынурэ, а ӀуэхутхьэбзащӀэр тӀууэ зэгуиупщӀыкӀынущ икӀи Тхьэр зымылъытэ цӀыху псоми къалъысыну Ӏыхьэр абыи лъигъэсынущ.

⁴⁷ И тхьэмадэм и унафэм щыгъуазэу щыта пэтрэ зызымыгъэхьэзыра, е и тхьэмадэр зыхуейр зымыгъэзэщӀа ӀуэхутхьэбзащӀэм удын куэд къытехуэнущ.

⁴⁸ Ауэ и тхьэмадэм и унафэм щымыгъуазэу удын къызыпэкӀуэ Ӏуэху зылэжьа ӀуэхутхьэбзащӀэм удыну къытехуэнур мащӀэщ. Тхьэм куэд зритам куэдкӀэ еупщӀыжынущ, куэд дзыхь зыхуищӀам нэхъыбэж къритыжыну хуигъэувынущ.

Зы унэ ис цӀыхухэм я акъыл зэтемыхуэж хъунущ

⁴⁹ – ЩӀылъэм мафӀэ ездзыну аращ Сэ сыкъыщӀэкӀуар. ИкӀи сытым хуэдэу сыхуейт Сэ ар иджы къызэщӀэнэну.

⁵⁰ Ауэ хьэзаб куэд сшэчын хуейуэ Сэ иджыри къыспэщылъщ, икӀи ар щызэфӀэкӀынум пэплъэ си псэр хуабжьу гугъу йохь.

⁵¹ ЩӀылъэм тет цӀыхухэм зэгурыӀуэныгъэ къахуэсхьыну сыкъэкӀуа фи гугъэу къыщӀэкӀынщ фэ. НывжызоӀэ, аракъым сыкъыщӀэкӀуар. АтӀэ цӀыхухэр зэхэзгъэкӀыну аращ сыкъыщӀэкӀуар.

⁵² ДяпэкӀэ, зы унэ ис цӀыхуитхум я акъыл зэтемыхуэж хъунущ: цӀыхуищым адрей тӀум жаӀэр ямыдэу, цӀыхуитӀми мыдрей щым жаӀэр ямыдэу хъунущ.

⁵³ Адэм жиӀэр къуэм имыдэу, къуэм жиӀэр адэм имыдэу; анэм жиӀэр пхъум имыдэу, пхъум жиӀэр анэм имыдэу; гуащэм жиӀэр нысэм имыдэу, нысэм жиӀэр гуащэм имыдэу хъунущ.

Дызэрыт зэманыр щӀэн зэрыхуейр

⁵⁴ – КъухьэпӀэмкӀэ къыщежьауэ къакӀуэу пшэ щыфлъагъукӀэ, «Уэшх къешхынущ» жывоӀэ асыхьэтым икӀи апхуэдэуи мэхъу, – яжриӀащ Хьисэ цӀыхубэм.

⁵⁵ – ИпщэкӀэ къикӀыу жьы къыщепщэм деж «Хуабей хъунущ» жывоӀэ икӀи апхуэдэуи мэхъу.

⁵⁶ ФэрыщӀхэ! УэфӀ хъунуми уэлбанэ хъунуми уафэм и теплъэмкӀэ къывощӀэф, атӀэ иджы дызэрыт зэманыр щхьэ къыфхуэмыщӀэрэ?

Уи дэуэгъум узэрекӀужыным и ужь ит

⁵⁷ – Тэмэмыр фэ езым щхьэ зэхэвмыгъэкӀрэ?

⁵⁸ Псалъэм папщӀэ, уи дэуэгъур уи гъусэу хеящӀэм деж ущыкӀуэкӀэ, гъуэгу удытетыху, узэрекӀужыным и ужь ит. Армыхъумэ, уи дэуэгъум хеящӀэм уритынущ, хеящӀэм лъэхъуэщтетым уӀэщӀилъхьэнущ, лъэхъуэщтетым лъэхъуэщым ущӀидзэнущ.

⁵⁹ НыбжызоӀэ, къанэ щымыӀэу уи щӀыхуэр умыпшынауэ, укъаутӀыпщынукъым.